حكومتنا الحنونة

[ahmed 22]

تحذير : الموضوع طويل وفيه استظراف كتير ومالوش اي لازمة ..
..لو حابب توفر وقتك وما تقراش ..

شوف يا اخي سبحان الله الحكومة بتاعتنا حنينة وعطوفة برضه
زعلوا عالناس اللي بتشتكي من ان بيوتها ممكن تتهد بسبب مخالفات البنا
او يدفعوا فلوس كتيرة بسبب قانون التصالح الجديد
بسبب انهم اشتروا شقة من صاحب عمارة ودفعوا شقي عمرهم
وماكنوش يعرفوا انها مخالفة وكدا
انا مش مختلف البلد فعلا بتحاول تراعي منطقة الشقق
المسكونة بالناس وكدا وبتخفض فلوس او تشوف المالك
يعني المحافظين بيشوفوا حلول
وفيه تقسيط تلت سنين وليلة سعادتك
واحتمال يخفضوا شوية فلوس .. بيسهلوا عالناس وبيضحوا ..

انما لو انت باني شقة وقاعد في الخليج وفاضية
فأحنا هنهدها ليك لحد ما ترجع.. انت ايه اللي غربك
انتي كلبة ايه غربك وسيبتي البلد ..
احنا هنا بنحاوطك بين عنينا احنا نور عنيك ..
انما بره مع نفسك بقا ..لازم تكون معانا بجسدك
مش بروحك اللي بتهفهف في المكان دي ..

..بس ترجع وتقول حقهم.. فلوس الخليج كتير برضه ومغرية ..
واهو بدل ما يبني البيت مرة يبني مرتين .. عشان مصر
وينفع بتوع الطوب والاسمنت والزلط عشان عجلة الاقتصاد تدور ولناس تشتغل
وبرضه ينفع الدولة لما يستأنف وييجي يتصالح .. برضه عشان مصر
ويدفع فلوس تاني بزيادة .. وينفع المحكمة بشوية رسوم..
هيحصل ايه مثلا ... يا اخي اهم حاجة الاقتصاد
اهم حاجة العجلة ... عشان مصر امنا.

بس برضه فيه فلوس هنا ممكن تضيع يا اسطا
احنا كنا متواعدين مثلا علي عشرين مليار جنيه
ممكن عشان الرأي العام وتهدئته وكد يبقوا 19 ونص بس
نسكت كحكومة لا .. في نص رايح كدا..
حق الشعب هيضيع.. احنا جايين عشان حق الشعب ..

هنا الحكومة عندنا دخلت دخلة كريم كوجاك
في برنامج الصدمة .. لما كان الوضع بيحمي
وكان دايما ليه مقولته الشهيرة
هنا كان لازم اتدخل ..
كان عليه دخلة عنب .. ولا دخلة شنكار بسام
وتدخلت الحكومة .. ويا له من تدخل ..

قالت كدا كتير عالناس ... وعلينا برضه كحكومة
احنا نطلع قرار مجلس وزراء عشان نحمي الناس
من هذا الخداع من اصحاب العمارات
احنا هنعمل التقيلة حتي لا يتكرر هذا الوضع المأساوي مرة اخري ..
عصارة افكار السنين ... بلحة المحبين .. زتونة كراسة الاول
احنا نعمل بطاقة رقم قومي للشقة بحيث نحمي الناس من اي استغلال

بعيدا عن المسمي اللي ممكن بعد كدا يطلعوله بشهادة ميلاد ..
انا الصراحة انبهرت بهذا القرار لحد هذه النقطة
قلت ايه الكلام الجامد ده .. اخيرا هنخرج بره الصندوق بقا وهنفكر

بس انا ماكنتش فاهم .. غبي
طبعا الرجل قاعد علي نار.. مصر شاغلاه بكباريها وحواريها
يعني هو دماغه متبرمجة ان يقلب الشعب في بريزتين
فبينه وبين نفسه هيموت
يعني هنخدم كدا ونفكر ببلاش .. ده حتي حرام

بص كدا لنفسه وصعبت عليه مصر وقال
ماعتقدش الناس ترضاها اننا ننفكر ببلاش
هوب دبل كيك .. نزل يابني ملحق للقرار
بالفلوس اللي هتندفع بقا مقابل البطاقة دي
خلينا نشوف هنعملها رسوم ولا ضرايب ولا ايه ..

انا اتاخدت شوية لما كنت قاعد معاهم بس بعد ما فكرت
انا قلت حقهم ... الرجل اللي هيقعد ده يطلع شهادات
هياخد مصروفه منين ... لازم بابا وماما يشهيصووه ..
واحنا صدرنا مفتوح لأولادنا اللي قاعدين عالكمبيوتر بيطلعوا
الرقم القومي بتاع بنتنا التانية المتمثلة في الشقة .. دي الغاليةة
يعني الرسوم هتطلع كام يعني 50 ولا 60 جنيه ... عشان مصر مش مشكلة
طبعا احنا كأولاد عاقين فكرنا كدا .. مش فاهمين .. والله احنا غلابة
احنا مابنفهمش مصلحة الدولة العليا

طبعا وهو قاعد بيفكر .. قالك ندفعهم ضرايب مثلا ؟
بس دي انعملت في خمسين مشهد قبل كدا .. ومدفعينهم ضرايب
عالشقة لما بتتباع وبتاع .. مش هينفع شغل حزلقوم ده في الخطة دي

الحل ده مستهلك .. لازم نخرج عن المألوف .. عاوزين نفكر بالجديد
هنا احتاروا وكان الحل الأخير لما حمارهم بيغلب
انهم يستدعوا دكتور المسالك البولية في الوزارة

الرجل ده بيجيبوه لما بيغلبوا او يتزنقوا في ازاي يطلعوا فلوس من الشعب
انا ماعرفش اسمه .. بس غالبا احنا هنطلق عليه لقب ( الخازوق )
وتقريبا الرجل ده عارف الشعب مخبي فلوسه فينن
و كان بتاع مبيعات وكان مكروه وسط صحابه
فحاقد عالدنيا وعالناس وعالمجتمع ..

قالك احنا طبعا كان التارجيت بتاعنا صغير وهو اننا نخزوق
المخالفين بس اللي بيعتدوا علي الارض الزراعية ..
احنا دلوقتي التارجت بتاعنا كبر ما شاء الله ..
الهدف كبر والمرمي بقا واسع
وهريدي واقف ...و لازم نشوط علي هريدي..

شوف بقا مصر فيها كام شقة هنطلع ليهم شهادات وهتبقي ميغة
والله احنا بندلع الشعب ده وبندلع نفسنا
احنا كدا ممكن بدل مانعوض النص مليار اللي راح ده بس
نعمل موازنة جديدة للبلد مثلا
ونبني بقا في كباري كتير وكدا ..
وزعق وقال فجأة وعنيه بتشاور نفسها تعيط ومناخيره تقرفنا ..
كدا هنبني مصر يا فندم من جديد
الدموع نزلت منهم فجاة ثم اجهشوا بالبكاء
وهما بيسمعوا كلمة هنبني مصر من جديد
الله يمسيك بالخير يا كابتن عدلي .. فرض ثقافته علي مصر
تحس انهم اتأثرو فعلا في مشهد تمثيلي ابن كلب
خلي المشاهدين يرجعوا من كتر حلاوته
الحكومة عندنا العاطفة بتاعتها ضعيفة شوية تجاه الطوب والاسمنت

واستطرد كلامه وقال بس ده يا فندم بيضيف علينا مسؤلية جديدة
و يخلينا ناس حقانيين يا فندم برضه ..
هو قال يا فندم مرتين في جملة واحدة
ودي اشارة بمدي كبر الخازوق اللي جاي ..

وقال حقي وحقك .. وبرضه احنا تقلنا عالناس .. والناس ممكن تزعل ..
ودول جزء من مسر .. مصر يا فندم
وهنا الشريحة كبيرة والعدد في اللمون .. فلما نقول فلوس اقل في وقت محدد
هنلاقي اقبال اكتر .. بعد ما رمينا الفزعة الاولانية
والبيوت مهدودة في كل مكان .. والله يا فندم التوقيت مثالي
احنا هنضرب عصفورين بحجر .. دي بمثابة الضربة الجوية التانية
في حرب تحرير الشقق ..

بص يا فندم ..احنا نعملها رسوم .. بلاش يا جماعة ضرايب .
كلمة ضرايب بقت بتزعل ..
وعشان برضوا انتوا ماتزعلوش احنا هنعمل الرسوم بالمتر
مش معقول طبعا ابو شقة زي ابو فيلا ...
انا كبتاع مسالك لازم اكون سالك
طلع يابني ورق وقلم واكتب ورايا وخلي احمد موسي يغني

رسوم استخراج بطاقة الرقم القومي للشقة

الشقة ال 100 متر مثلا رسوم 500 جنيه
الشقة ال 200 متر مثلا اديها يابني 1000 حلو الف صح اه جميل ..
والشقة اللي فوق 300 متر مثلا اديها 1500 يا بلاش ..

والله دلع يا اخوانا .. الشعب ده مش عارف مين يدلعوا غيرنا
عامة انا ماوصلتش للفيلا مثلا هتبقي كام
بس انا لن اقبل بأقل من 2000 جنيه مثلا

وفي نهاية الجلسة كله سقف والخازوق قال
انا حكيكي فخور بحكومتنا الرشيدة
بارك الله فيكم وجعلكم ذخرا لتلك التيكية ..

[فداااااااااااء]

والله اللى زعلان ياخد موقف
لكن مستسلمين وراضين فخلاص يشبعوا بقا
يفرض عليهم ضرايب ولا اتاوة ولا يهدم بيوتهم ولا يسرقهم

طالما ساكتين يستاهلوا

[شروق محمود]

مش حسيت ان الموضوع طويل ولا حاجه
وانا بقرا لقيته خلص لانى فعلا عاوزه افهم
يعنى هما دلوقتى عاوزين رسوم ع كل شقه
طيب والفلوس اللى طالبينها دى اللى اخر ميعاد لها اخر الشهر ده والباقى ع 3 سنين
وافرض احنا ساكنين فى برج وصاحبه مش عارفين فين او مسافر او مات السكان يعملوا ايه
صراحة حسبى الله ونعم الوكيل

[ahmed 22]

اقتباس المشاركة الأصلية كتبت بواسطة فداااااااااااء والله اللى زعلان ياخد موقف لكن مستسلمين وراضين فخلاص يشبعوا بقا يفرض عليهم ضرايب ولا اتاوة ولا يهدم بيوتهم ولا يسرقهم طالما ساكتين يستاهلوا

مين بقا اللي يستاهلوا
ما هما اهلي واهلك

مع احترامي الكامل
يعني ليه محسساني
انك مش معنية بالامر
ما هو كله طايله الضرر
وكله محتار في رد الفعل المناسب

انا الصراحة مابحبش ادعاء بطولة بالكلام
بحس ان فيه اهانة لأهالينا ولينا عامة
كلنا في الهم سوا
والسكات حاليا علي قدر ما فيه ضعف
بنجلد بيه ذاتنا كل يوم وكل ليلة بسبب ومن غير سبب
بقدر ما وراه مسؤليات في كل بيت وعلي كتف كل رجل
بتخلي الكلام ليه الف حساب ..

التغيير لقطة محتاج الكل ياخدها
مش واحد بس لوحده يغنيه ..

[ahmed 22]

اقتباس المشاركة الأصلية كتبت بواسطة شروق محمود مش حسيت ان الموضوع طويل ولا حاجه وانا بقرا لقيته خلص لانى فعلا عاوزه افهم يعنى هما دلوقتى عاوزين رسوم ع كل شقه طيب والفلوس اللى طالبينها دى اللى اخر ميعاد لها اخر الشهر ده والباقى ع 3 سنين وافرض احنا ساكنين فى برج وصاحبه مش عارفين فين او مسافر او مات السكان يعملوا ايه صراحة حسبى الله ونعم الوكيل

هيطلعوا قرار من مجلس الوزراء
انهم يعملوا رقم قومي للشقق حاجة زي البطاقة كدا
بتطلعها عشان تثبت ان المكان ده غير مخالف للبناء وكدا

الرسوم علي حسب المتر
يعني الشقة ال 100 متر بتبدأ من 500
وتصاعدي بقا وانتي طالعةة ...
وغالبا المعاد بتاع استخراجها هيتمد لشهر مارس 2021

اما حوار مثلا انك ساكنة في عمارة مخالفة وانتم فعليا
ساكنين فيها ... لسا فيها كلام .. مش واضحة اوي..
لانه لسا ماتمش لحد دلوقتي انه تم هدم عمارة مسكونة بالناس علي حد علمي ..

بس غالبا صاحب العمارة المفروض اللي هيدفع لو فيه التصالح

[حـيـــــآة ❤]

انا اتاثرت بكل كلمه والله العظيم
حسبي الله ونعم الوكيل
بس هتقول لمين والله كله شايل ف قلبه وساكت
عمر ماحد هيعترض عالجيش ازاي لأ
خلينا ناكل زلط وادينا عايشين وساكتين
ولا بيوت الناس الغلابه ال بتتهد قدام عيونهم
وفرض الرسوم ع كل حاجه
ناقص يفرضوا رسوم على الهوا والاكسجين ال بنتنفسه
تقريبا انت بتتكلم عن المدبولي رئيس الوزراء ال منه لله
كفته ف فته والشعب ساكت.
غلابه ي استاذنا هيعملوا ايه
كلنا بنعترض بيننا وبين بعض وبعدين؟
هيقولك دينيا لا يصح الخروج على ولي الأمر 😂
الحمد لله احسن من غيرنا كتير
وكل واحد وكل ظالم هيتحاسب يوم الحساب
اسفه عالاطاله.. لكن موضوعك مش طويل للي متأثر
تسلم ربنا يجبر بحاطرك

[بحر القمر]

انهم بقبيح افعالهم يتعجلون نهاياتهم

[ahmed 22]

اقتباس المشاركة الأصلية كتبت بواسطة حـيـــــآة ❤ انا اتاثرت بكل كلمه والله العظيم حسبي الله ونعم الوكيل بس هتقول لمين والله كله شايل ف قلبه وساكت عمر ماحد هيعترض عالجيش ازاي لأ خلينا ناكل زلط وادينا عايشين وساكتين ولا بيوت الناس الغلابه ال بتتهد قدام عيونهم وفرض الرسوم ع كل حاجه ناقص يفرضوا رسوم على الهوا والاكسجين ال بنتنفسه تقريبا انت بتتكلم عن المدبولي رئيس الوزراء ال منه لله كفته ف فته والشعب ساكت. غلابه ي استاذنا هيعملوا ايه كلنا بنعترض بيننا وبين بعض وبعدين؟ هيقولك دينيا لا يصح الخروج على ولي الأمر 😂 الحمد لله احسن من غيرنا كتير وكل واحد وكل ظالم هيتحاسب يوم الحساب اسفه عالاطاله.. لكن موضوعك مش طويل للي متأثر تسلم ربنا يجبر بحاطرك

لاء مش دول اللي بيقولوا لا يصح الخروج عالحاكم هههه
والله ا انا احيانا بتمني ان احنا نكون غلط ..
والناس دي تكون بتفكر صح
والزمن يثبت انهم صح .. ورؤيتنا احنا اللي ضيقة
ويكون الوقت اللي احنا فيه ده مجرد ذكري سيئة وخلاص
ونقول عالخوف ده تحمل مش ضعف في المستقبل ..
اتمني القادم يكون افضل ان شاء الله

شكرا لحضورك الراقي ..

[ahmed 22]

اقتباس المشاركة الأصلية كتبت بواسطة ياسر عبد الباقي انهم بقبيح افعالهم يتعجلون نهاياتهم

ربنا يقدم الخير ان شاء الله

[حازم34]

اخي الكريم حينما قالت الأخت فداء الناس تستاهل علشان راضين بالظلم انت اعترضت طيب هقولك وازيدك حينما وقف الناس ضد الهدم وتجمهروا خافت الحكومه وجهات سياديه أبلغت المسؤل عن خطوره الوضع وفعلا تراجعت الحكومه بعدما كان المسؤل يهدد بنزول الجيش ومعه المعدات ايبيد البيوت ورفض الجيش طبعا السكوت علامه الخوف او الرضى ولكن إذا اجتمع الناس وكانوا على قلب رجل واحد يقدروا يعملوا الكثير.... اسأل الله ان يفرج عن مصر هذا الهم والغم القابع على قلوب الغلابه منهم يارب تحياتي