حبيبك فين،، مسابقه أجمل دويتو

[دمعه حائره]

مركز الخليج

في وسط التوهه والعتمه
بشوفك في السما نجمه
تنور روحي وانت بعيد
وشوقي كل يوم بيزيد
ويسألني عليك قلبي
أقوله ده جاي وبخبي
أنادي عليك متسمعنيش
كفايه خلاص متوحشنيش
هعلم قلبي يقسي عليك
ولا هاسهر أفكر فيك
أنسى وبس هم يومين
ويسألنى حبيبك فين ؟
أنا هنا ياحبيبتي وسامعك
ولآخر عمري هكون جنبك
إزاي تفتكري إني نسيتك
وانتي الوحيده اللي هويتك
ده أنا شايفك حلم بيتحقق
هيحلي حياتي أنا مصدق
يارزق من السما جالي
وبدعي يارب يبقالي
ده وعد عليا وبقولك
تبقي شمسي وأبقي ضلك
بس أوعى تقسي قلبك
قلبي عايش عشان يحبك

دويتو مع نفسي انا
#mena_hassan

[بحر القمر]

جميل جدا جدا
يارب يسعدك ويوفقك

[big bốss]

حلوه دويتو مع نفسي متالقه دوما يا منه

بس هى دى مسابقه انا مش سمعت عنها

[حازم34]

ياسلام على الإبداع والجمال في ديتو جميل بعنوان الحب الجميل واحلامه وكلماته. دايما الكلمات والابداع حليفك ما شاء الله... قلم راقي وابداع دايما ما أجمل الكلمات وجواب القلب تحياتي لقلمك وفكرك الراقي.... ربي يسعدك وبالتوفيق يارب

[شروق محمود]

جميله الكلمات
تناغم وتوافق راقى مع النفس
بالتوفيق منون

[واد حبيب]

اي الجمال ده بجد رائع
كلماتك دايما تعمل الابداع والمشاعر الجميله
تسلم يدك وقلمك علي جمال كلماتك
تحياتي لكي

[فداااااااااااء]

جميلة كلماتك منة
دوما مبدعة عزيزتى
تسلم ايدك ويدوم نبضك الحلو

[شاعر الإحساس]

مش قلنا ممنوع مشاركه فرديه 😂
بس يلا نستثني منها شمس المكان

عاميه جميله بجد ...
رقيقه وسلسه....وخفيفه
وتداخل طرف الديو التاني كان محكم..
في وقت التساؤل الصحيح ....
للرد على السؤال :
انسى وبس هم يومين
ويسألني حبيبك فين !
ليبدأ دوره الاخر في النص برقه..

جميله عامره بالاحساس شيقه
وكأنها من قلمين لا قلم واحد..


دام نبض قلمك يا منه
ودايما منورانا بجميل خطك وتواجدك
دمت بكل خير

بالتوفيق

[ايمان طلعت]

جميل الديو بين منه و دمعه حائرة هههههه
قلمك رقيق راقي
دام نبض قلمك
تحياتي

[*فجر الاسلام*]

ماشاء الله عليكي حبيبتي مبدعه في كل الأحوال
ومافيش احلي من الإنسان يبقي مع نفسو 😉
تسلمي بالتوفيق