يا عم.. بجنيه كتاكيت

[Little princess]

مش عارفه حظى وحش ليه؟؟!! عمرى ما ربيت حاجه وفلحت، دايماً بتصدم من أيام ما كنت صغيره وأنا مليش حظ مع الحيوانات أو الطيور الأليفه إللى ممكن تتربى فى البيت.

الكلاب حرام ،وكل ما أجيب قطه ماما تسربها، تستنى أى عربيه معديه وتحطها فيها علشان تتوه وما تعرف ترجع تانى، والله كان قلبى بيتقطع على فراقهم، كل الحلول المقترحه فشلت فى إقناع مامتى بالإحتفاظ بالحاجات "الحيه" دى، مش فاهمه يعنى أجيبهالها محنطه ولا إيه؟؟!!.


حتى المره إللى جبت فيها قطه من وراها وحطتها فى المنور قفشتها ، مع إنى كنت بنزلها الأكل من الشباك ؛ أرمى الطبق الأول وبعدين أصب فيه اللبن أو الزبادى أو السمك، كنت ببآ عامله زى إللى بيشتغلوا فى السيرك وأنا متعلقه ومدلدله من الشباك علشان أصيب الهدف والحاجه تيجى فى الطبق بالظبط.ولما توافقت ميولنا فى تربية الأرانب تعارضت أهدافنا وغاياتنا، هى بتربيهم للأكل وأنا بربيهم من باب "الشعور بالمسؤليه" وإنى ألاقى حاجه أهتم بيها. وفشلت حكاية الأرانب كمان بعد المجازر إللى كنت بشوفها.


نفسى فعلاً أربى حاجه وأكون مسؤله عنها من الألف للياء وأشوفها وهى بتكبر معايا ومشاركانى يوم بيوم، وكمان يبؤوا اصدقائى واتكلم معاهم من غير ما أخاف منهم يفتنوا علىَّ، بس أعمل إيه فى حظى إللى بيطاردنى جوا البيت وبراه، حتى لما اشتريت سمك وحطيته فى الفصل ربنا كرمنى بواحد ذكى ومش عاجبه الحجم الصغنن للسمك فقال يساعده إنه يكبر بسرعه وحط علبة الأكل كلها، تانى يوم لقينا السمك طافى على وش الميه وميت من كتر الأكل، جربت العصافير وطلعوا اتنين "ذكور" وبردو تانى يوم لقيناهم مقطعين بعض وريشهم فى الفصل كله ودفناهم فى حوش المدرسه،جبنا قفص كبييير ومليناه عصافير وبغبغانات، جت الداده خافت من انفلوانزا الطيور وطيرتهم كلهم. وأنا أطلع من نكد أدخل فى إللى بعده.
العيال أقنعونى نربى "دود قز" ورغم قرفى الفظيييييييع من أى دوده إللى إنى هاودتهم على أمل إنه يفلح معايا، وجبنا برطمانات وحطينا فيها ورق توت واشترينا الدود وكله تمام، معداش يوم والتانى إلا واتكررت نفس المأساه والدود كله مات وفشل مشروع مصنع الحرير إللى كنت بخطط ليه. بذمتكوا شفتوا نحس أكتر من كدا؟؟ دا بيتهيألى حتى لو جبت سلحفاه من إللى بتعيش 150 سنه بردو هتموت تانى يوم. جايز أنا مهمله ومش عارفه أربى؟! جايز بشترى حاجات مضروبه وصلاحيتها منتهيه؟؟ هتجنن أنا.

_________________________

مره جاتلى فرصه على طبق من دهب، واحد شايل قفص وبيبع "كتاكيت ملونه" والله مش هتصدقوا الواحد بكام؟! كان الواحد بعشره صاغ تخيلوا؟ بس دا طبعاً من ييجى خمس ست سنين قبل إختراع أنفلوانزا الطيور والبيضه تبآ بجنيه.الأهم بآ إن ماما مكنتش فى البيت؛ يعنى ممكن اشتريهم واخبيهم فى أودتى من غير ما حد ياخد باله.
وفعلاً...نديت للبياع بطريقة القطط:"بس بس ..يا عم"، الراجل ما صدق وجه جرى وبمنتهى الحماس قال:" أأمرى،،بخمسه ولا بعشره؟؟".
-"إيه يا عم!! هو أنا هفتح مزرعه؟!" –" طيب عاوزه كام واحد؟"
-" إنت أؤوللى رأيك آخد بجنيه ولا بنص جنيه؟" شوفوا السذاجه!!.- أكيد بجنيه أحسن. –" ما أنا عارفه إنه طبعاً احسن ليك، بس أحسن لى فى إيه؟".-"لأن العشره أحسن من الخمسه؛ داخل علينا شتا وبرد وممكن يموتوا، لكن لو كتير هيدفوا بعض، وكمان لما العشره يموت منهم خمسه سته مش مهم، لكن الخمسه لو ماتوا انتى هتزعلى."

يا سلام ع الصراحه والوضوح،هو عارف انهم كدا كدا ميتين بس إحتمال مش كلهم يعنى، أنا كدا اتفائلت ان المره دى الحكايه هتفلح معايا. توكلت على الله واخترت عشر كتاكيت فى منتهى الحلاوه وباين عليهم الصحه، بس فى واحد غلبان كدا رقبته طويله ومفيهاش ريش صعب علىَّ فأخدته من باب الشفقه وربنا يكرمنا بسببه ويبارك فى اخواته.

أخدت الكتاكيت ودفعت الفلوس والراجل إطمن فلقيته بيقول:" تبئى حطى لهم كبسولة مضاد حيوى فى الميه وشربيهم ميه بسكر لحد يومين" . – "نعم؟!! مش عاوزنى كمان اعملهم تأمين صحى؟؟" –" يا ستى انا بنصحك علشان ما يموتوش بسرعه وكمان ضرورى تدفيهم". –" احطهم فى الفرن يعنى؟!" –" ممكن ما يستنوش لحد ما يتحطوا فى الفرن" الراجل قال الجمله وخدها جرى قبل ما افوق من الصدمه، دا متأكده انهم ميتين ميتين ومش هيعيشوا لحد الدبح والفرن. إيه إللى أنا عملته فى نفسى ده؟؟!!.
راحت السكره وجت الفكره...فوقت لقيتنى حاضنه الكتاكيت إللى عاملين مظاهره، طب احطهم فين؟؟ ربنا اكرمنى وافتكرت مكان كرتونه، جريت جبتها وفرشتها تمام وطاردت الضيوف الجداد فى كل البيت لحد ما لميتهم فى الكرتونه وطلعت خبيتهم فى أودتى قبل مامتى ما تيجى.

___________________________________

مكنتش اعرف ان المسؤليه متعبه كدا!! اكل وشرب ودوا وتدفئه كمان؟؟!الله يكون فى عون الحكومه وعون أهالينا، أنا إللى جبت دا كله لنفسى، سرقت طبقين صغننين من المطبخ ، بس لقيتنى محتاره؛ الصغننين دول ياكلوا ايه؟ جبتلهم "ميه بسكر" وفتافيت عيش ووقفت اتحايل عليهم ياكلو وبردوا مفيش فايده، نزلت غليت لبن وجبتهملهم ويظهر انهم فرحوا بيه بس الفرحه ما كملتش، الكتكوت يشرب اللبن وألاقيه ينط ويجرى على الميه يشرب ويرفع راسه لفوق، باين كدا اللبن كان مغلى جامد ولما شربوا منه لسانهم فأفأ فراحو يبردوه بالميه.


بس عارفين؟؟ اللسعه دى جت فى صالحى، لسانهم وجعهم وبطلوا صوصوه، احسن بردوا علشان ماما ماتكتشفهمش.مسؤليه فظيعه والأفظع إنى مخبيه الموضوع، والمستخبى مصيره يبان. إللى هون على الأمر انى توقعات البياع فى محلها ومن تانى يوم لقيت كتكوت مشتح على منقاره ومفيهوش نفس، وكل يوم أتاوى جثه تحت شجرة الجوافه، ولحد دلوقت لما حد يقول "جوافتنا" طعمها حلو أقول لهم "البركه فى جثث كتاكيتى..سماد عضوى يعنى"،المهم....قلت خلاص هانت، كلهم هيموتوا قبل ماما ما تعرف، بس انكشفت على آخر اربع كتاكيت.

_____________________________

فى يوم كان الجو برد ومطره أوى ودول كمشانين موت، مفيش حاجه نفعت تدفيهم ولا حتى الشمع وانا بدفيهم واحد واحد فوقه وهو والع؛ صعبوا علىَّ وقلت اعمل لهم "كاكاو" ساخن يدفيهم.لسه واخده "طبق" الكاكاو وطالعه أودتى وألاقى مين أؤودامى؟؟ ماما طبعاً. اتصدمت وكنت عارفه انى خلاص اتقفشت، " ايه ده؟؟ كاكاو فى طبق؟ لمين ده؟" – " لى يا ماما" – " وهو انت بتشربى فى طباق اليومين دول!! قلبتى قطه؟؟!!" –" لأ...كنت عاوزاه يبرد" –" منين عاملاه يدفيكى ومنين عاوزاه يبرد؟؟!"
مش قلت لكم انى اتقفشت خلاص، ولا اجدع وكيل نيابه، قرييت بكل حاجه واعترفت بجريمتى. الصراحه إنى كنت عاوزه اخلص من المسؤليه وارتاح من العيال إللى جولى على غير أوان دول.وكمان تعبوا اعصابى من المناورات إللى بعملها علشان ما حد يقرب من اودتى إللى ريحتها بقت بشعه. رميت المسؤليه على كتف ماما وهربت، اتبريت منهم وقلت توبه.


ورغم انكشاف السر وإهتمام ماما الشديد بيهم، إلا إنهم كلهم ماتوا ما عدا أخينا أبو رقبه مسلوخه، فضل معمر معانا كذا شهر ،ياكل وما يبان عليه وقالب راسنا وطالعين نازلين علشانه، تخيلوا انه من كتر ما صعب على فى وحدته بقيت ادعى انه يموت ويخلص، أكيد شعوره صعب أوى وانه من غير حد يونسه، بس الحمد لله، أخيراً ربنا كرمنا بواحده جريتنا تعطفت وقبلته عندها علشان هى كمان اتعمل فيها نفس المقلب وكانت شاريه كتاكيت كتيييييير وفضل منهم تلاته بس.

غريب الإنسان،يفضل يدور على المسؤليه ويجيب الشقا والمعاناه لنفسه، مع انه كان فى حاله وخالى البال، بس تقول إيه!!! لا فراغ نافع ولا شغل نافع، ولا حتى تربية الكتاكيت نافعه

منقول

[منى خالد]

ههههههههههههههه
الله يكون بعونك
بس عارفة العيب مش فى السمك
ولا الكتاكت ولا الددود العيب فى العتبة
ههههههههههههههه
غيرو العتبة عنى عزلو من البيت احسن اصلة مش
كويس
ههههههههههههههههه
مشكوووورة حبيبتى قصة جميلة
دمتى بحفظ الله

[Little princess]

هههههههههههههههههههههههه
اختي منى خالد
اشكرك على المرور
يا رب تكون عجبتك

[Karamela]

هههههههههههههههههههههههههههههههههههههههههههههههه

على فكرة فعلا الكتاكيت بيموتوا بسررعة اوي:icon1366:

افتكر مرة شبطت في كتكوت اخضر واصفر :vb36:

وحت اشترتهم ولما رجعت البيت طرت بيهم بس:vb36:

كان بعلم ماما طبعا وفتحت المكيف وحطيت الميه والاكل ومشيت :vb36:

بعد 10 دقايق بالزبط لما دخلت لقيت منظر فظييع :Sport-114:


دلقوا الميه كلها والاكل داب فيها وهما جثث هامدة على سطح الميه:icon1366:


الله أكبر ياجماعة عندنا ميت الحقوا:vb19::vb19::vb19:

وهات ياضحك هههههههههههههههههههههههههههههههههههه

ميرسي ياليتل جميلة اوي رجعت لي ذكريات وذكريات مانتحرمش منك ياقمر

ومااقدرش امشي كدا من غير مااحط حاجة اسبشلي عشان تفتكري مروري

[Little princess]

هههههههههههههههههههه
لا حول ولا قوة إلا بالله
ههههههههههههههههههههه
مشكورة يا عسل على المرور

[اميره القمر]

ههههههههههههههههههههههه
بجد جااااااااااااااااااااامده
عجبتنى جدا
وفعلا تربيه الحاجات دى مش سهله
انا مثلا كان عندى حوض سمك
وكان كل ما اجيب سمك
يجى حد يقولى الله جميل
تانى يوم الاقيه ميت
غيرت للعصافير وبرضه كانت
مبتعمرش
تسلمين
Little princess
دمتى بود

[Little princess]

هههههههههههههه انتى كمان
مشكورة لمرورك الطيب
تحياتي

[نور الشمس]

موضوع جميل جداااااااااااا.
انا كمان مامتى بتربى كتاكيت بس انا مليش دعوه بيهم خالص.
شكراااااااااا على الموضوع.

[عاشق الأحزان]

اختى الغالية/¨°o.O ( نورهان ) O.o°¨




هههههههههههههههههههههههههههههههههههههههههههههههه
هههههههههههههههههههههههههههههه
الله يرج ابليسك
انا صدقت انه كل حاجه عندك نحس
وقطعتى قلبي
بس كلمه منقول فقستنى
هههههههههههههههههههههههه



يسلموووو يسلموووو يسلمووو

موضوع راااائع ومتالق وراقي
قلمك مميز ودمتى مبدعة

دمتى بود



"¨°°o°°¨]§[° عا الأحزان شق°]§[¨°°o°°¨"

[Little princess]

هههههههههههههههههه

اه طبعا منقول وبلا فخر هههههههههههههه
وهو انا فيا دماغ اكتب ده كله

دى قصه قريتها وعجبتنى وشكلها عجبتكم برضه ^^

يسلمووو على المرور
تحياتي