منتديات بنات مصر - لانا والبنت الصغنتوته

صلوا على النبى

كان ياما كان ومش بعيد قوى فى الزمان ..راجل وكان غلبان وعنده دكانة .. ودكانه مش مليان ..يعنى قول شيكولاتة وساعات بيبقى لبان .. والاطفال اللى فى الشارع دايما بتتصارع ويروحوا ع الدكان ... بيحبوا جدو عدنان .. صاحب الدكان.
بنت مسخوطة .. حلوة صغنتوته .. تستنى لما يمشوا عيال الحارة .. وتعدل لبسها وتسرح شعرها .. وتروح على الدكان ..بتحب جدو عدنان.. وهو كان بيموت فيها ويحبها .. تطبطب عليه وتتمسح مابين اديه .. تنزل دمع العجوز انهار ...تضحك الصغنونة ..بتعيط ياجدو كل ماتشوفنى؟ .. ليه؟ .. مش عايز تشوفنى؟ .. وهو يادوب شايف كلامها خارج من شفايفها .. وحاسس كأنه هو اللى خلفها .. مش عايزة شيكولاته ياجدو ولاعايزة حتى لبان .. عايزاك بس كده منور الدكان .. انا باحبك ياجدو .. قوللى : وانت كمان؟
وفى يوم وهيا رايحاله .. تشوفه وتتطمن على حاله .. فراشة كانت معدية .. ضربت جناحها فى شعر الصغنونة .. وشعرتين طاروا .. زعلت عليهم الصغنونة .. ودموعها كانت بحور عايمة ومجنونة .. الشارع من دموعها بقى تقولشى النيل .. وطلع شجر على الجنبين وورد لونه جميل .. وجدو فى الدكانة مش واخد باله .. نظرة تعبان على حاله .. بيرتب الدكان .. رغم انه مش مليان .. بس جدو صحيح انسان.
مش ناسى جدو لما الكلب كان عطشان .. سقاه بكف ايده وجابله اكل كمان .. وشافه شيخ الجامع وقاله بشرى ياأنسان .. عملك باقيلك .. وزى ماأنقذت الكلب .. ربنا هايبعتلك النجدة انت كمان ..واستغرب عدنان .. نجدة ليه ؟ هو فيه ايه .. ومن ساعتها والحكاية دى شغلاه .. بس ماكانش خايف من أى شئ فى السكة يستناه.
الصغنونة عدت النهر ورايحة على الدكان ..لكن كلها ميه .. مستحمية .. خافت على جدو ليبرد لما يسلم عليها .. قعدت جنب شجراية .. وراحت كده فى النوم .. وفى المنام شافت أميرة جميلة بتقولها :شايفاكى لونى وشكلى .. كأنى ببص فى مرايتى .. مش عارفانى؟ .. دانتى بتاعتى ..وبحرك وشجرك ووردك ..حتى كمان الشجراية .. صغنونة .. أصحى .. أنا لانااااااا
قلق عليها عدنان .. خرج من الدكان .. يدوب شايف .. بس هايجازف .. لاشاف بحر ولامية .. مليان بس حنية .. وخطوة والتانية والتالتة يادوبها كمان .. كان لشوشته فى الطوفان غرقان ..افتكر شيخ الجامع ..وماخافش من الموت .. كان خايف بس ع الصغنونة.
لانا قالت لها فى المنام .. الحقى حبك فى الغميق هايضيع .. فتحت عينيها .. الدنيا ايه فيها ..فين جدو عدنان؟ .. ازاى ساب الدكان؟ .. وقلبها شاورلها بسرعة عليه .. طب تعمل ايه؟ وف لحظة فردت شعورها شعور شعور .. وقالت هاجيبه بالشعور .. طول مالشعور مخلص وصافى .. يبقى الحبيب يفضل معايا .. قالتلى كده الحلوة لاناااا .. وجدو عدنان .. هو كمان كان حاسس بيها ..ضرب كده بأديه ..مش عارف هايعمل ايه .. لقى شعرها حبال حبال .. شديدة تشد جبال .. مسك بأديه وبرجليه .. وربنا ادى الصغنونة العافية .. تشد .. صحيح بالعافية .. بس خرج مبسوط .. وف قلبها مربوط .. وتحت الشجراية قعد جنبها .. وجت لانا وفرحت بها .. والفرح زاد وزاد .. وضحكتها لعلعت وزغزغت جميع شوارع كول

توته توته .. خلصت الحدوته

ايه يابنات .. أيه ياولاد .. حلوة .. ولا ملتوتة ؟