تيـــــــــــــــــــــــــت
 

مساء الخييييييييير
لاحظتوا حاجه غريبه انتشرت فى الكلام لما حد بيشتم حد او بيستخدم كلمه عيب او ميصحش ينطقها ألاقيه كاتب
تييييييييييييييت تيييييييييت
وممكن يحط قبلها كلمة ابن الـ....تييييييييت
وهكذا بقا، قال يعنى الواد مؤدب ومش عاوز يقول كلمه عيب،مع ان هو كدا يبقا قالها بالفعل
قايم بدور "الرقابه" بسلامته ومش عاوز يخدش الحياء العام بكلمات مش ولابُد، كنت بشوف الحركه دى فى الافلام زمان لما ممثل او ممثله يقول كلمه لا يوافق عليها الرقيب ويرفضها الذوق العام يكتموا الصوت أو يغلوشوا عليه بصوت الصفاره إللى جالنا منها المصطلح الشبابى الثورى الحديث
تييييييييييييييت

ألا هى فين "الرقابه" صحيح ومقصهم الشهير إللى كان بيخسف بأى فيلم الأرض لو معجبهمش كلامه ومشاهده؟؟
انقرضت مع الحياء؟
يظهر ان بجد ....إللى اختشوا ماتوا،،، الفاتحه عالرجاله والستات كمان

طيب وليه تشتم أصلاً ما دمت عارف ان الكلمه عيب؟؟؟
يعنى إللى بيشتم ده مش بيتكسف؟؟ وشه مش بيحمر ولا بيحس انه عمل حاجه عيب ومتصحش؟؟
محدش قاله....اختشى او استحى؟؟
زمان كان فيه برنامج اسمه ذاكرة السينما بيقدمه واحد قديم أوى شهرته"ميكى ماوس" حكى قصه مره ان فيه واحده ممثله وجه جديد ظهرت فى الخمسينيات وانتجت فيل لنفسها، اتخبطت فى عقلها وفكرتها شطاره وشتكت فى احد المشاهد وقال (يا ابن....الحيوان اللى بيهوهو) كدا خبط لزق
طبعاً الرقابه بهدلتها الاول قبل ما يمسحوا الكلمه والجمهور"المحترم" امــــــــــتـــــــــنـــــــــــع عن دخول الفيلم وقاطعوه
الست اتكبست واتكسفت من نفسها سحبت الفيلم وحرقت الشريط واعتزلت من قبل ما تبتدى....احترمت نفسها
بس بعد ايه؟؟ كان لازم تتقرص من ودانها الأول
أومال افلام واغانى اليومين دول مفروض يتعمل فيها ايه؟؟
العيب علينا مش على اللى بيعملوهاـلولا لقيوا عليها إقبال وبتكسب مكانوش تمادوا فى قلة وانعدام الأدب

صفاقه وقلة حيا....حلوه الكلمه دى صح؟
جيباها من فيلم عربى قدييييم

احنا بقا.....هيييييييييييييييصه
وبقا العيب عادى
مع انى والله لسه بتخض وبعيط لما بسمع حد بيشتم فى الشارع
والشباب والبنات بيهزروا مع بعض بالشتيمه وبالتييييييييييت
ويكتبوها عينى عينك كده

المشكله دلوأت انى بقيت اتكسف" اهتف" للنادى بتاعى ولا اشجعه حتى
كنا بنقول
تيييييت تييييت أهلى، تراباتاتييييييييت زمالك

يعنى كدا أنا أبقا بشتم الأهلى والزمالك؟؟؟

ربنا يخليكو حد يشوفلى كلمه تانيه اهتف بيها بقا لحسن كدا عيب خالص وبسرعه بقا قبل الدورى ميبتدى ولا مش باينله السنه دى؟؟