منتديات بنات مصر - فوائد تاخر الزواج للبنوتات بس وممنوع منعا بات للشباب

السلام عليكم ورحمة الله وبركاته

النهارده هكلمكم عن موضوع جميل اوي واحنا مش واخدين بالنا منه
اللي خلتني اخد بالي منه واحده اخت صحبتي عندها 33 سنه تصدقو كلامها اقنعني وهو عن
فوائد تاخر الزواج

اه والله تصدقوا تأخر الزواج بقا ليه فوائد واحنا مش واخدين بالنا منه
وعشان محدش ينط في وشي ويقولي ايه اللي بتقوليه ده والبنات هتزعل و و و

انا هتكلم عن نفسي حد له حاجه عندي :198:او عن اخت صحبتيبس هعتبر نفسي انا 33 سنه او حتي 40 مع اني لسهه ف الجامعه بس يلا علشان محدش يزعل:198:

يلا
انالو 33 مثلا انسه طبعا >>>>>>>

هقولكم على اكتشفات تاخر الزواج

من اناحيه الصحيه مثللا

طبعا احنا عارفين ان معظم الرجاله بيعايروا بعد الجواز لو الست مرضت او تخنت

لكن احنا الحمد لله مش هنلاقي المشكله دي لو اتجوزنا

ليه بقى هقولكم

واحده زيي لما تتجوز لو فعلا كان عندي 33 او 40 حتي محدش يعرف الايام مخبينا ايه يا اوختشي منك ليها:200: هتتجوز واحد مثلا 40 -50- او 60 >>>>>

احتمال كبير اوي يكون عنده سكر او ضغط لسنه الكبير وما خفى كان اعظم

يبقى هنمشي على مبدأ لا تعايرني ولا اعايرك الهم طايلني وطايلك :198:

مفيش مجال للمعايره اصلا انا وهو هندخل مهكعين يبقى هنعاير ايه بقى

هنيجي للادويه بقا
هيكون عارف الادويه اللي ممكن تحتاجيها يعني مش هتحتاجي تشرحيله ده دوا الضغط وده دوا السكر

ماهو معاه اصلا الادويه يبقى متخافيش هتريحي دماغك من الشرح
بالنسبه للجهاز بقا

طبعا احنا هيبقا جهازنا اكتر من اي واحده اتجوزت

تخيلي مثلا اننا بنجهز واحنا عندنا 20 مثلا يعني

لو واحده اتجوزت وهى عندها 22 سنه يعني جهزت سنتين بس

لكن احنا ما شاء الله بقالنا 13 سنه بنجهز

يعني ممكن بجهازنا نفتح سوق بحاله :129:
بالنسبه للمشاكل الزوجيه

متخافيش يا حبيبتي مش هيكون في مشاكل لاننا اصلا اللي هيشغلنا اكبر من المشاكل الزوجيه

يعني طلوع المعاش والامراض واننا ندور على تربه ندفن فيها

مفيش وقت اصلا:1eye:

حتى لو في مشاكل متخافوش بردوا اصلها مش هتقعد كتير:yuck:

يعني تخيلوا واحده اتجوزت وهى 20 سنه ومثلا مكتوبلها انها تموت وهى 60 وعندها مشاكل يبقى عاشت 40 سنه مشاكل

احنا بقى ما شاء الله علينا كل ما بنكبر كل ما بنقلل المده وربنا يططول ف اعمركو
بالنسبه للاكل

احنا خلاص هنبقا بقينا معلمين

ما هو مش معقول كل السنين دي ومبنعرفش نطبخ اكيد رزعتنا طول اليوم في المطبخ جابت نتيجه وبقينا اساتذه طبيخ مش زي البنات الوحشيين خالص اللي اتجوزوا بدري قبل ما يتعلموا الطبيخ
ياااااااااااااااااااااي

بالنسبه للتعليم والوظيفه

طبعا عشان نخلص من القرف اللي بنشوفه كل واحده بتطلع همها في حاجه

الموظفه تلاقيها بتطلع همها في الشغل وبتحاول تثبت للكل ان مش همها تأخر الزواج وبردوا اللي بتكمل دراسات عليا نفس الحكايه

وبنوصل ما شاء الله لمراكز عاليه واهي فرصه نلاقي حاجه نكتم بيها بق الناس اللي بينقط عسل لما يشوفنا ويقولونا ليه ما اتجوزتوش لحد دلوقتي

اصلي بحضر الدكتوراه يا طنط ومش فاضيه :198:

واطلعي من دماغي وامشي من وشي بدل ما احضر فيكي جريمه قتل>>>>>>>>>>>>>طبعا ده في سرنا
بالنسبه للمكافئات والمكاسب

بصي يا ستي بما اني كبيره يبقى احتمال اتجوز واحد كبير بردوا >>>>>>ايه النباهه دي جبتي التايهه

يبقى هيكون قرب على حالتين

يا يطلع على المعاش واستمتعي بقى يا قمر بفلوس مكافاه المعاش http://files.fatakat.com/newsmilies/...ieviousbig.gif

يا يطلع على السريع وياخد استماره 6 وهنيئاً لكي بالميراث:003:>>>>>>>>>بعد الشر طبعا يعني اخرتها نترمل بعد الصبر ده كله

الحسد وما ادراك ما الحسد

طبعا عارفين ان في ناس عينهم تتدب فيها رصاص مبترحمش

احنا الحمد لله هنرتاح من الموضوع ده

طبعا لو واحده سنها صغير واتجوزت اسمعوا بقى العجب العجاب من الكلام اللي بيتقال في فرحها

شوفي يختي البت لسه مطلعتش من البيضه واتجوزت

يا نهار ابيض دي اتجوزت دي لسه عيله

صحيح عيال بيتجوزوا عيال

والله ناصحه عرفت توقع واحد في السن ده

وهكذا من قاموس الحسد

اما احنا بقى ما شاء الله علينا شوفوا الكلام بس من غير حسد

يااااااااااااه اخيرا الحمد لله اتجوزت

والله اصلها بنت طيبه وصبرت عشان كده ربنا كرمها واتجوزت

الحمد لله ان ربنا فك عقدتها واتجوزت

ربنا عوض صبرها خير واتجوزت

شفتوا الفرق مفيش حسد :biggrin:

تقديس الحياه الزوجيه
طبعا اي بنت اتجوزت وهى صغيره ممكن الشيطان يلعب في مخها وتفضل تعيش في مشاكل مع جوزها وتطلق في الاخر وهى حاطه في دماغها انها صغيره ولسه الفرص كتييييييييييييير قدامها

احنا بقى الغلابه لاااااااااااااااا
تلاقينا بنقدس اوي الحياه الزوجيه ونستحمل ونستحمل ونستحمل لغاية لما نطق وبردوا نستحمل ونتوغل قصدي نستحمل

ما احنا جبناه بعد شوق يبقى مش بسهوله نستغنى عنه
تنظيم النسل

يعني احنا ربنا يقدرنا يارب ونلحق نجيب حتة عيل مش زي البنات الوحشيييييييييييييين خالص اللي بيجيبوا عيل واتنين وتلاته يااااااااااااااااااااي سوفااااااااج

الخبره

من كتر طبعاً قعدتنا على النت وفي البيت ومع زمايلنا المتجوزين بقينا خبره في كل حاجه تخص الجواز

يعني مش محتاجين حد يفهمنا اي مواضيع عنه احنا بقينا معاجم ماشيين على الارض

يعني خلاص انا بقيت عارفه كل حاجه

امتى اطلب من جوزي حاجه

اراضيه ازاي

ازاي استحمل عكننته وطلباته

ازاي اغلس عليه لما احب انتقم منه

ازاي اخليه يطفش من البيت

ازاي اقتله واخفي الجريمه

مش قلتلكم خبره

لكن البنات الوحشيييييييييييييييين خالص اللي بيتجوزوا بدري طبعا بيبقوا لسه معندهمش خبره خالص عشان كده بتكتر عندهم المشاكل ياااااااااااااااااااااااي سوفاااااااااااااااااااج

التواصل الاجتماعي

بمعنى ان سيرتك هتبقى على كل لسان يا حاجه >>>>>>>>>>>>احم احم انا اقصد بكل خير طبعا صفوا نيتكم:1eye:

يعني تلاقي كل بيت يعرفك يذكرك بالخير

مثلا في واحده بنتها هتتجوز تلاقيها اول ما حد يروح يباركلها تسأله هى فلانه بنت فلانه يختي لسه ربنا مرزقهاش بعيل قصدي بعريس

تقولها والدمعه هتفر من عينيها لا يختي لسه

تقوم هى ترد عليها وبردوا الدمعه هتفر من عينيها يارب يرزقها يارب
ف العزا واحده تقابل واحده وتعزيها وفي وسط الكلام بردوا نفس السيناريو

حتي ف السوق تلاقي واحده تقابل واحده وتقولها شفتي كيلوا الطماطم بقى بكام تقولها اه يختي غلي اوي

تقوم التانيه ترد عليها اه ربنا ينتقم منهم غلوا كل حاجه وبالمناسبه هى فلانه بنت فلانه لسه متجوزتش

مش عارفه ايه العلاقه بصراحه :198:

بس المهم اننا بنتذكر بكل خير
تجنب الاخطاء والوقوع ف الذنوب

طبعا من القرف بردوا اللي بنشوفه من كلام الناس ومن مص الشفايف والمزمزه والتلقيح بالكلام في الافراح ومن الهروب من كلمة عقبالك اللي بنبقى عارفين انها بتساوي بالظبط عقبالك بقى لما ربنا يفك عقدتك يا بايره يا معنسه يا اللي مش لاقيه حد وهكذا

بطلنا نروح افراح وبطلنا نروح اي مناسبات عشان يرتاحوا

وبكده مش هنرتكب اي ذنوب لان في الافراح في اغاني وممكن تاخدنا الحماسه ونرقص يبقى الحمد لله جت من عندهم

و كمان هربنا من موضوع التجاوزات اللي بتحصل بين المخطوبين

واحنا عارفين كل ما فترة الخطوبه بتطول كل ما التجاوزات دي بتكتر

احنا بقى لا ما شاء الله علينا

اصلا مفيش فترة خطوبه

خطوبة مين هو انا لسه هقرا فاتحه وخطوبه وشبكه وكتب كتاب ودخله

امتى ده؟؟؟؟ هو يوم خطوبه واللي بعده كتب كتاب ودخله واقلب يا عم هو احنا فاضيين للمراحل دي :198:
الزهد ف الحياه

خلاص من كتر اللي شفناه بقينا زاهدين في كل حاجه

هتجيلك شبكه بعشره جنيه>>>>>> حاضر :445:

هتسكني في شقه من غير حمام >>>>>>>>حاضر
:445:
مفيش فرح >>>>>>>حاضر :445:

مبقاش يهمنا حاجه في الدنيا

وخصوصا لو العريس انسان كويس يبقى هو كل دنيتنا<<<<<<<<<<<<شفتوا الرومانسيه مش قلتلكم خبره:biggrin:

من الناحيه الدينيه ( النقطه دي مش بهزر فيها فعلا بتكلم بجد ولله الحمد )

هقولكم ازاي

تلاقينا كلنا الحمد لله بنستغفر ربنا كتير عملا بالايه

(( ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا
وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) ))

بنقرأ قرآن كتير بردوا ويمكن انا لو قلت مثلا ان ختم القرآن يوميا هيجيب عريس هتلاقينا كلنا بنختمه مفيش مشكله المهم يجي العريس

الدعاء والتقرب الى الله بالاعمال سواء ببر الوالدين او بالصدقات او او ............

يمكن الناحيه دي بالذات انا بدعي ربنا ان لو كان ليا نصيب واتجوزت افضل عليها ومقلش منها

شفتوا بقى الفوائد تأخر الجواز بطلوا بقى تحسدوناااااااااااااااااااااااااااا يا وحشين

الموضوع للهزار يا بنات وكل كلامي كان اعتبارع عن نفسي لو وصلت للسن ده من غير جواز نفسي عشان مفيش اي بنوته تزعل من كلامي :126: