|
حلقه جديده من برنامج _ تخبيط _ ومعانا ( احمد برهان ) تخبيط والان على موعد دائما في برنامجنا تخبيط وبين راي واخر في مشاكل مجتماعتنا بين الرجل والمراه بين التحضر والجهل بين التغيير الرغوب واللا مرغوب يقولون انها اختلاف الازواق واخرون بقولون تدني الاخلاق ودي كانت بدايه الاسئله http://3.bp.blogspot.com/-1doukz-uXx...AD%D8%B1+3.jpg / البنت اللي بتقصر شعرها وهل هذا يقلل من جمال المرأه بسم الله الرحمن الرحيم.... اولا طبعا اشكر لك هذا الاهتمام و موضوعك الشيق الجميل الرائع اللي بجد كل الاعضاء بيستفيدوا منه ربنا يوفقك و يكرمك يارب... بالنسبة للسؤال يعني انا اري ان الشعر تاج المراة و من اسرار جمالها... يعني هيا كده بتتخلي عن انوثتها و رقتها .. و عشان ايه ؟ عشان الموضة و الكلام اللي بنسمعه ده... ناهيك عن ان تقصير الشعر بدرجة كبيرة ممكن يكون فيه تشبه للنساء بالرجال و الرسول الكريم لعن من يفعل ذلك / البنت اللي بتلبس ضيق او قصير انا طبعا ضد هذا الكلام جدا.... يعني هيا بتعمل كده ليه ؟ عشان تلفت الانظار ؟ طيب هيا لو جميلة بجد مش محتاجة تلفت النظر اليها... غير انها معصية و مجاهرة بالمعصية لله سبحانه و تعالي... اللي تعمل كده ما تساويش أي حاجه في نظري.. / من تضع مكياج بطريقه ملفته المكياج ممكن يكون للزوج و ده شئ طبيعي و جميل و يعني بيحبب الزوج لزوجته و يخليه ينظر ليها في حب و اعجاب.. لكن غير كده يعني تروح الشغل و هي متمكيجه و لا تمشي في الشارع عشان العيال يعاكسوها و الرجاله يمشوا وراها.. اكيد ده غلط و اكبر غلط... و لا اوافق عليه... اقولك علي حاجه بيني و بينك ؟؟ انا بالنسبة لي مهما كان مظهر و جمال زوجتي المستقبلية اللي ما قابلتهاش حتي الان.. ما احبش المكياج لان الجمال الطبيعي افضل الف مرة من الجمال الصناعي... يعني احب اشوف زوجتي كما هي ... دون تجميل او تلوين .. وجهة نظري الشخصية . / الكعب العالي وهل نبرر المراه القصيره للبسها للكب العالي اولا الكعب العالي له اضرار صحية كتييييرة. و اهمها انه بيتعب ضهرها و الاقدام كمان.. غير كده انا ارفضه عشان انته لو لاحظت مشية البنت اللي لابسه كعب عالي... تلاقيها ماشيه كانها تتدلع و تتمايل .. عشان توازن نفسها و ده فيه فتنه كبيرة و اكرهه ...غير كده الكعب العالي له صوت رنان و هذا يلفت الانتباه لها و كانها تقول للرجاله" انا ماشيه قدامكوا اهو بصوا عليا " / عمليات السليكون بالتاكيد لا اوافق عليها.... يعني انا مش شايف فيها أي ضرورة .. و ايه السبب ؟ يا ستي طالما ان جوزك موافق تعمليها ليه ؟ و اكيد انا مقتنع بان الزوجة اللي انا هاختارها.. عايزها طبيعية مش عايز نفخ و لا شد و لا تزييت و لا التقاليع الغريبة السخيفة اللي بنسمع عنها دلوقت .. ربنا يتسر علينا و علي بناتنا !! / كان قديما زمن الرجل ( سي السيد) والان اصبح زمن المراه ما تعليقك طبعا دي نكتة ظريفة ... عشان لو راجل اقتنع بان ده صح بيكون يعني مش تمام خالص... ازاي يكون زمن المراة... و كمان ايه التقاليع دي زمن الرجل و زمن المراة.. يا ناس انا اكره الفرقة و العداوة دي.. كما لو ان الجنسين اعداء.. دول متكاملين.. يعني الرجل يحتاج الي حنان و رقة و مشاعر المراة و المراة تحتاج الي قوة و قيادة و احتواء الرجل و انه يشتغل عشان يوكلها... اكيد ما فيش حاجه اسمها زمن الرجل و لا زمن المراة / هل فعلا المراه اخدت من حقها من اهتمام في يومنا المعاصر انا شايف انها واخدة حقها منذ نزول الاسلام .. و قد اوصي بها الرسول الكريم في خطبة الوداع.... و لو كانت فيه بعض الزوجات حقها مهضوم... اكيد ده راجع الي سطوة و جبروت بعض الرجال... و لازم يكون فيه توعية اكتر من رجال الدين... بالنسبة للموضوع ده.. عشان الزواج مودة و رحمة و مش قهر و ضرب و عذاب / اختار وظائف لا تصلح للمراه انا غير مقتنع بعمل المراة اساسا.. و انا عن نفسي لو هاقطع من جسمي و هاشتغل في الفاعل و لا أي حاجه زي كده .. اشتغل و لا اني اخلي زوجتي و لا اختي يروحوا يشتغلوا.. لان الفكرة مرفوضة شكلا و موضوعا... الشغل للست بس يكون في حالات الضرورة القصوي و الاحتياج و بيكون بمعايير صارمة جدا / لو في مراه وظيفتها جزاره ايه تعليقك وده موجود فعلا اكيد تكون معلمة مش مراة... يا خرابي !! جزارة مرة واحدة... دي مهنة صعبة و غير كده فيها اختلاط و احتكاك و موتان قلب... لا اكيد ده يكون شذوذ عن القاعدة.. و هي ان المراة شئ رقيق ..!! / هل هناك من الوظائف التي تقلل من انوثه المراه أي وظيفة غير ان تكون ربة المنزل و رعاية الاسرة ... تقلل من انوثتها و بصراحة من غير مواربة... تسقطها من نظري... المراة كيان عفيف طاهر شريف غالي.... يجب ان يصان و يظل في البيت... لكن ان تكون هكذا امام الرجال زي التفاحة اللي الدبان بيعف عليها... اكيد لا اقبل ده ابدا / الرجيم وعمليات التجميل انا اكيد مش ضد الرجيم.. ليه لا ؟ له فوائد و بيكون مفيد جدا في بعض الاحيان... عندي بعض التحفظ علي عمليات التجميل... يعني ممكن اوافق عليها لو انها ضرورية جدا... و حدث مثلا تشوه شديد... و لو اني كنت اطلب ان عمليات التجميل بتكون تحت اشراف دكتورة و ليس دكتور... / المراه التي تمارس العاب القوى اكيد ممكن تطور مواهبها و تدخل مجال مصارعة المحترفين !! بالزمة دي تكون بنت او انثي ازاي يعني ؟؟ / هل الرقص فن ام اغراء الرقص الشرقي اقصد الرقص فحش و بذاء و قلة ادب و احترام و مجاهرة بالذنب... زي الافلام اللي كلها مناظر اقل حاجه تتقال عليها انها قذرة و يقول لك ابداع و حرية ابداع.... يا اخي ده الاسلام خلي الكلام ... مجرد الكلام.... مع أي بنت او امراة اجنبيه...يعني أي واحدة مش من المحارم... خلي الكلام يكون في اقل الحدود و بابسط الكلمات ده امتي ؟ لما يكون الكلام ده هايتوقف عليه مصلحه... ده مجرد الكلام بس... ما بالك باللي تتعري و تعرض جسمها زي السلعة الرخيصة الفاسدة القذرة و يقولوا علي الهجس و القبح ده فن... لا اكيد لا فن و لا شئ ده قلة ادب و انعدام دين و ضمير / لماذا عندما تحزن المرأه تصوت ولما تفرح تزغرت ليه مش الراجل مثلا الحقيقة مش عارف... عشان عمري ما فكرت في كده... يمكن الراجل مش بيعرف يزرغط مثلا ؟... عامة الصويت ده محاولة للفت الانتباه و ممكن يكون كمان محاولة للاعتراض علي الواقع.. يعني العيل لما بيتولد بيصرخ عشان كان عايش جوا بطن امه كل شئ سهل.. الاكل سهل و العمليات الحيوية سهلة .. لكن لما بيتولد و ينزل للدنيا تبدا المعاناة ... عشان كده بيصرخ.... ممكن يكون صويت الستات معناه لفت انتباه و رفض للواقع... لكن الزغرطة مش عارف تفسيرها صراحة. / قالوا المرأه سريعه الزعل وقالوا ايضا بان باقل الكلمات تصالحها وكان شئ لم يكن هل هو تسامح ام حب ام ماذا المراة كتلة من المشاعر... صدقني.... يعني هي أي كلمة حلوة تجذبها... حتي لو هي انكرت ده و نفيته بشده.... بس الكلام الحلو بيأثر جواها جدا و بيخلي مشاعرها فياضة و متدفقة كده... عشان كده اكيد بيكون من السهل انها تتصالح و تسامح ... و خصوصا لو انها بتحب انسان زي زوجها مثلا... اكيد بيكون ليه معزة خاصة جوا قلبها و نفسها و روحها و كيانها... فاقل كلمة منه تخليها ترجع زي الاول و احلي كمان... يعني مجرد وجهة نظري الشخصية. / لماذا دائما قلب المرأه يتحكم بعقلها لانها كيان عاطفي بحت يا صديقي... يعني يمكن المراة احب اشبهها و اقول عليها قلب كبير او قلب بيمشي علي رجلين... يعني العاطفة جواها شئ فظيع و جميل جدا... يمكن عشان كده بتكون انفعالية جدا في الغضب و اتخاذ القرارات و كده... بس اكيد اجمل شئ في المراة هو عاطفتها... اللي ممكن لو الراجل استغلها صلح... يعيش في جنة حقيقية و هي تعيش زي الملكة المتوجة علي عرش قلبه / المرأه والمرايا واصبحت كخيالها ولو كانت زوجتك من عشاق المرايا هتعمل ايه يعني المراة مفتونة بنفسها وابراز جمالها مهما كان هذا الجمال بسيط او متواضع .. يعني دي فطرة وضعها الخالق عز و جل جواها.... زي ما الراجل فطرته انه ينظر الي مفاتن النساء... ربنا جعل المراة فطرتها انها تبرز هذا الجمال و هذه المفاتن... زي ما يكون الدين عشان يختبر قوة الانسان المؤمن خلاه يخالف فطرته... فامر الراجل انه يغض بصره و المراة انها تستر عوراتها و مش تتجمل لحد غير جوزها... يعني عشان كده تلاقي البنات و الستات مفتونة بالمرايا.... عشان عايزين يكونزا في اجلم صورة دايما .. و اكيد لو زوجتي كده... انا ممكن امسكها من ايدها اللي بتوجعها!! بس اكيد تكون مسكة حنونة عطوفة شاعرية... يعني امطرها بكلام الحب و الغزل و العشق و الهيام... و الحاجات الي بتدوب قلبها و مشاعرها دي... و اخليها تهتم بكلامي انا و تبص ليا انا اكثر ما تبص للمرايا... يعني شوية اساليب رومانسية ممكن تهدي الحكاية و تخليها متعلقة بيا انا اكثر من اكبر مراية . / ايه رائيك في الستات المسنات من يضعون احمر الشفايف ومكياج وملابس غير ملائمه لسنهم ويعتقدون انفسهم ما زالوا صغار يعني ده زي ما بيقولوا النزاع الاخير... و كما ان الذبيحة دايما تتراقص بعد الذبح و تتلوي زي ما يكون كلها نشاط و حيوية... و بيقولوا عليها حلاوة روح... برضه الستات عارفة ان القطار عدا و فات و ان انوثتها انتهت و دبلت خلاص.... و تعمل كده عشان تقنع الناس انها لسه جميل و مرغوبة ... بس اكيد ما فيش حد بيقتنع ... حتي هيا من جواها عارفه انها بتعمل شئ خلاص ما فيش منه فياده و ان الشباب و الانوثة مش ممكن يرجعوا بشوية مساحيق و كام فستان ضيقين و لا متعريين. / ايه رئيك في البنت اللي بتقلد الولد في لبسه وفي حركاته وسلوك حياته اكيد مش بنت و لا اثي و مش من الصنف اساسا!! و طبعا ده حرام خالص... الرسول الكريم لعن المتشبهين من الرجال بالنساء و النساء بالرجال... عارف يعني ايه لما الرسول " يلعن " انسان ؟ دي كبيرة جدا عند ربنا والله... بس الناس بتكبر و تقول خلي البت تعيش.. و مش عارفين المصيبة اللي بنتهم فيها و ان هما هايتحاسبوا علي اللي بتعمله بنتهم عشانهما كده قصروا في تربيتها... اكيد غلط فاحش جدا انها تكون كده.. / من الممكن ان تجيب المرأه عن اي سوال الا اذا سالتها عن عمرها المراة تحب ان تكون رقيقة و جميلة و صغيرها طول عمرها... مش قلت لك ان ربنا فطرها علي حب اظهار جمالها و زينتها للاخرين ؟ طيب ازاي تقول علي سنها و هي نفسها تكون صغنونة و كتكوتة طول عمرها ؟ صعب يعني... ممكن مثلا لغاية 24 تقول علي سنها لكن بعد كده بيكون صعب جدا انها تصارح حد في كده الا جوزها طبعا عشان هوا شاف بطاقتها لما اتجوزها !! بس اكيد فيه حالات شاذة قليلة المراة تصارح فيها بسنها عادي من غير ما تتكسف او تتعصب / االمرأه المتسلطه ولو ربنا رزقك بواحده زي كده هتعمل ايه اكيد مش ممكن تظل بيننا حياة لو كانت زوجتي متسلطة ... انا مش ممكن تتحكم فيا امراة مهما كنت احبها... انا كرامتي عندي عالية جدا و نفسي عزيزة اوي... و اكيد لو كده نتجادل و نتناقش بالحسني و الدين و الشرع و افهمها بهدوء... لكن غير كده مش هاتنفع العلاقة من الاساس / قيل وقال عن الحموات وما يسببونه من مشاكل وهل ستخاف من حماتك اكيد الحموات فيهم نوعية بتحب المشاكل... و اكيد فيهم نوعية بتخرب البيوت.. عشان البنت زي الجوهرة عند امها تكره ان حد ياخدها منها او يشاركها فيها... لكن اكيد كلمة خوف دي صعبة شوية... يعني اخاف من ايه ؟ انا مشكلتي اني صريح شوية و مش باعرف اخبي اللي جوايا.. يعني صعب اخاف منها لكن اكيد هحاول اني ابني علاقة ود بيننا ... فطالما ان اللي ممكن اكسبه بالحرب.. اناله بالسلم... يبقا احارب و اضيع وقتي و جهدي و اعصابي ليه ؟ / ايه رايك في البنات الرغايه ( الرطاطه) علي فكرة يمكن باتكلم كتير في الحوار ده.... لكن في واقع الحياة انا كلامي قليل جدا و ممكن تقول عليا صموت جدا... انا صراحة احب اسمع اكتر من اني اتكلم... احب اني اسمع مثلا من زوجتي... حتي لو الكلام كتير... اراقبها و اشوفها بتتكلم ازاي... اراقب حركة شفايفها و حركات اصابعها و انفعالها... يعني ممكن اتغزل فيها و هيا بتتكلم!! لكن اكيد فيه ظروف مش هاقدر اسمعها فيها .. و لازم هيا تقدر ده... يعني زي ما انا ادتيها وقتي و سمعتها... لازم تديني عذري و تسكت في اوقات معينة ........ اسئله الرجل / الرجل الذي لا يتحمل المسئوليه اكيد ليس رجلا ... عشان الرجولة مسؤولية... فلو هوا مش قادر علي المسؤولية... ازاي هايقدر يدير بيت و اسرة مع بعض ؟ / الرجل الذي يخجل عادي ... الخجل شعور بشري طبيعي... و الرسول الكريم قال " الحياء كله خير" لكن طبعا بشرط ان الخجل مش يضيع حقه / رجل دموعه سريعه وهل دموعك سريعه برضه الدموع عمرها ما كانت عيب... يعني الدموع رد فعل بشري و يمكن يكون محاولة لا شعورية... عشان تخفف حدة الصدمة و قوة الانفعال.. مش شايف انه غلط و لا انه حكر علي الستات... و صراحة انا دمعتي قريبة.. يمكن عشان باحس ان مشاعري مرهفة و رقيقة شوية / الشاب الذي يعاكس الفتيات وهل حدث وعاكست قبل كده شايف ان ده سفاهة و هبل.. يعني هايستافد ايه من المعاكسة ؟ غير كده حرام عليه ... يعني هايترد له في اخته او في نساءه.. و كمان كده هوا مش راعي اداب الطريق... و ان الفتاة دي و اللي لازم يدافع عنها مش هوا اللي بيعاكسها و يتحرش بيها... يمكن عملت كده مرة او مرتين في حياتي... كنت صغير في ثانوية... بس صراحة قلت كلمتين و سكت... لا مشيت و لا طولت.. بس حسيت بسفاهة نفسي و عمري ما كررتها بعد كده / لماذا في بعض المجتمعات العربيه هناك تفرقه بين الولد والبنت مش عارف... كتير نري ثقافة الذكورة هي المسيطرة... و ان الولد هوا اللي ياخد كل شئ.. حتي في الاكل تلاقي نصيب الولد في اللحمة كتير و حتت كويسة و البنت تاخد العظم... سبحان الله !! رغم ان الاسلام كلامه غير كده خالص... ما فيش تفرقه و لا عنصرية عشان... ده دين ربنا الحقيقي.. و تلاقي برضه في بعض مناطق الصعيد الراجل يورث و البنت لا... مش عارف بأي قاعدة يحصل الكلام ده.... بس اكيد لازم يكون فيه دور للدعاة عشان يوضحوا للناس ان كون البنت بنت... لا ده عيب و لا عار و لا نقيصه... و انها لازم تاكل لحمة كويسة و هي كمان لازم تورث !! / ما هو عيب الرجل و الله مش عارف يعني ممكن يكون أي عيب... لكن العيب الواضح اللي بنشوفه كتير يمكن السطوة و النفوذ و انه عايز يعش الدور و يكون هوا مش راجل البيت... لا ... يكون جبار البيت... و ده سببه البعد عن الدين / حنان الرجل هل هو مكتسب من المرأه ممكن ... بس فيه رجاله بيكون الحنان اضح جدا فيهم...ممكن يكون فعلا مكتسب منهم يعني تكون امة حنينه عليه.. و ربته علي الحب و التفاهم... عشان كده طلع بالاسلوب ده... ممكن برضه يا غالي. /وهل هناك من السيدات من يرفضون حنان الرجل حقيقة صعب الا لو كانت مريضة نفسيا و لا حاجه !!.. لان المراة كلها مشاعر و احاسيس... و تحب ان تروي مشاعرها و قلبها و روحها بالحنان و الحب... يعني صعب ترفض انثي الحنان / الشاب السيس الشاب السيس .... تيييت... !! ربنا يهدي الجميع / الرجل اللي بيقلد المراه في لبسها وحركاتها ربنا يهديهم و كفاية كده بقا ..هههههههه /ماذا تعني لك كلمه رجل ايمان بالله و رسوله.. صدق ... امان... توكل... ارادة... تصميم.. مسئولية.. يعني كلمات كتيرة / الرجل اللي زوجته بتلبس ضيق وقصير وعادي صعب يكون راجل صراحه.... بيكون شئ تاني عشان ده مش بيغيير علي زوجته وهل عندما تتزوج ان شاء الله مراتك هتمشي على الموضه ولا ايه النظام اكيد هاتمشي علي الشريعة بحذافيرها.... ما فيش شئ اسمه موضة.. فيه شرع و دين و كتاب ربنا بس / ما هي نقطه ضعف الرجل المراة اشكرك على قبول الدعوه كل الشكر لك اخي الغالي... صراحة اسئلة مميزة و رائعة.. نشطت الذهن و القلب و الروح و الذاكرة دمت مبدعا... و ربنا يوفقك لكل خير... لك مني اطيب و اجمل تحية... و كل التقدير و الاحترام دمت بخير دائما اكيد نورتني اخي وكنت سعيد بتواجداك القيم وبحسن ردودك وعقليتك الواعيه والمميزه واكيد انتا عضو نشهد له بالتميز في فتره قصيره دمت بخير وحضور راقي ونورت البرنامج تحياتي لك انتظرونا وحلقه جديده من برنامج تخبيط .. |
ولو اني اختلف معاك فـ نقطة الوظيفه للمرأه دي بس حلقه جميله طبعا وأبيه سامي كـ العاده ببرامجك الجميله دايما منورين الحلقه اكيد |
حلقه جميله وضيف مميز ثبت وجوده فى وقت قصيــر بـ أسلوبه المحترم الراقي مع الجميع .. اسئله رائعه وجريئه كعادتك ياسامى واجابات احمد متزنه وعقلآنيـه أختلف معاه فى نقطه بسيطه لكنى أحترم وجهه نــظرك.. ربنا يوفقكم دايمــا و تقييمي للحلقه المميزه |
مش عارفه ليه الاسئله بالاجابات مش متقبلها يمكن عشان فيها انتقادات كتيراووي للمراه وده راي بصراحه << بس احيك ع البرنامج وع الاسئله والاجابات والضيف دوام التوفيق للبرنامج^^ |
حوار مميز نورت الحلقه يا أبو حميد بالتوفيق ليكـ دايما ان شاء الله تسلم سامى للمجهود يدوم النشاط |
حلقة جميلة سامى مع ضيف مميز ذو اجابات مميزة تحياتى لكم |
أي وظيفة غير ان تكون ربة المنزل و رعاية الاسرة ... تقلل من انوثتها و بصراحة من غير مواربة... تسقطها من نظري... المراة كيان عفيف طاهر شريف غالي.... يجب ان يصان و يظل في البيت... لكن ان تكون هكذا امام الرجال زي التفاحة اللي الدبان بيعف عليها... اكيد لا اقبل ده ابدا بصراحة رأيك اسعدنى وارى تطابق كبير فى الرؤية بيننا . شكرا اخى وصديقى احمد برهان شخصية رائعة واجابات فوق الممتازة اتفق عليها معك جدا اسعدنى التواجد هنا بحوار اكثر من ممتع شكرا لاخى سامى على البرنامج الجميل وبأنتظار ضيفك القادم ودى واحترامى |
هل هناك من الوظائف التي تقلل من انوثه المراه أي وظيفة غير ان تكون ربة المنزل و رعاية الاسرة ... تقلل من انوثتها و بصراحة من غير مواربة... تسقطها من نظري... المراة كيان عفيف طاهر شريف غالي.... يجب ان يصان و يظل في البيت... لكن ان تكون هكذا امام الرجال زي التفاحة اللي الدبان بيعف عليها... اكيد لا اقبل ده ابدا انا بختلف معاك جدا في النقطه دي طب ما انا بشتغل واعتقد دا شئ عادي جدا بس حواليك كدا في اي مكان هتلاقي المراه موجوده فيه ودا عمره ما يقلل منها نهائي يعني لما تشتغل المراه مش هتبقي عفيفه وطاهره تبقي انسانه مش كويسه يعني وجهة نظرك وتحترم بردو حلقه جميله يا كبرياء وبالتوفيق دايما في انتظار الحلقه القادمه ان شاء الله تحياتي |
حلقة حلوة اوي بجد حسيت احمد مجاوب من قلبه كدة :d كلامك حلو بس ليا تعليق خلي بالك لحسن يقلب عند مراتك المستقبلية ان شاء الله بشعور بالكبت من غير قصد عشان موضوع اللبس و الشغل و كدة تسلم ع الحلقة يا سامي :) |
مجهود مميز كبرياء دائما متألق منور يأحمد بجد اجابات رائعة تأكد أنك رجل حر لا يقبل بالحال المايل وأتفق معك تماما تحياتي لكما ونجومي أخوكم القيصـــر قلب وكلمات |
| الساعة الآن 08:54 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب