منتديات بنات مصر - قعدة بنات ثقافية....

*اول ما تسمع كلمة<صالون ثقافي> تتخنق لأنك بتتخيل المنظر ، مكان واسع اضاءته مستفزة كراسي خشب عتيقة ستات كراكيب...كلام خلاص راح عليه الزمن مش بعيد تلاقي واحد قاعد بيغني علي العود <امان يا لالاي>...هو لسة في صالونات ثقافية....أه بس بقي صالونات البنات الثقافية علي طريقتهم الخاصة هي الصيحة الجديدة في عالم البنات و أفكارهم الخاصة جدا.

*مجموعة بنات قرروا يعملوا صالون ثقافي لكن اكيد متطور شوية ، هاتلاقي فيه كل حاجة تضمن ثقافة البنات و هاتلاقي كمان قوانين و مسابقات و جوائز...اول حاجة تجذبك في الصالون البناتي ان كل بنت بتعلم البنات التانية حاجة تثقفهم بيها ، مثلا مرة بنت علمت البنات الاسعافات الاولية وبالشرح والحركات ، و دي مثلا تعتبر ثقافة طبية؟

*و في الفقرة الادبية بنوتة اتكلمت عن قصة شكسبير و شرحت مضمون القصة و بعد كدة كله يقول رأيه في القصة و يناقشها...و جاءت الفقرة الدينية بيتكلموا في الدين و في بنات شرحت حديث نبوي كان عن التوبة....و بعد شوية اتكلموا عن الاعلام الهادف وطبعا البنات مش هاتنسي الدنيا و حياتهم اللي جاية فتكلموا في <فقه النكاح> و <زواج الاقارب>.

*و ما ينفعش بنات من غير جمال و دلع استضافوا في الصالون بتاعهم "خبيرة تجميل"و علمتهم ازاي يحطوا ميك اب و يخفوا العيوب اللي في الوش و الماسكات و الشعر ، و كمان بيبقي فيه وقت في النص بيعملوا فيه < dish-party> صغيرة مع بعض وفي نهاية اليوم بيعملوا مسابقة و بيقسموا نفسهم لمجموعتين و المسابقة تبقي عبارة عن اسئلة عامة و ثقافية و في النهاية اللي بيكسب بيأخذ جوائز..

*يا بنات دة نموذج رائع للبنات اللي بيتجمعوا علي حاجة خير وبتفيدهم في ثقافتهم و كمان بتكسبي منها اصحاب جديدة و كثير ، بجد دلوقتي بعد الصالون الثقافي البناتي دة الجامد اوي دة ياريت الصالونات الثقافية ترجع تاني و يارب دماغ البنات وافكارهم تفضل كدة علي طول شغالة و يرجعوا كل قديم علي طريقتهم و يخلقوا كل جديد علي طريقتهم الطريقة البناتية...
\
/
\
/
\
ايه رأيكم يا صبايا في اليوم دة وفي الصالون دة لو كل واحدة فينا جمعت اصحابها وعملوا صالون ثقافي زي دة يوم واحد في الاسبوع اظن ان في حاجات كتير هاتتغير جوانا لأننا هانفيد وهانستفيد وهانحس ان الوقت مش بيضيع بالعكس هانحس ان كل دقيقة ليها قيمتها....يلا مستنية اسمع ارائكم في الصالون دة