|
حلقة جديدة من برنامج ask me anything ومعاناmorshooo http://forums.banatmisr.com/imgcache/2/33388alsh3er.png عضونا عضو مبدع وفنان عضونا فى المنتدى من زمااااااان عضونا ماسك اليوميات كمان عضونا عملنا أجمد عضو ورانا فيه كل الالوان عضونا هيتجوز زغرطوا ياجدعان ههههههه (احم احم احسن من مشرف اليوميات) معانا morshooo نشوف الحوار مع الكينج منور يا أحمد البرنامج ومبروووك على الجواز ربنا يكملك على خير الله يبارك فيكى وعقبال جميع اعضاء المنتدى ماعدا المجوزين طبعا :D نبدء بسم الله الشخصية من هو مورشوو فى كلمات بسيطة ؟ شاب مصرى ليه طموحات بتمنى تحقيقها صحيح حققت معظمها والحمد لله ولكن دائما الواحد بيحب يكون افضل . حاسه أن مورشوو انسان واقعى جدا بعيد اووى عن الرومانسية صح لا لاء ؟ انا مقتنع ان الرومنسيه مش من حق اى حد يحسها غير الى بحبها فقط يعنى مش ملزم انى ابين انا رومنسى والا لا هنا فى المنتدى او حتى للناس الى اعرفها فى حياتى الخاصه . الى يهمنى البنت الى بحبها تحس بدا معايا ما هى الخطوط الحمراء فى حياة مورشو التى لا يمكن أن يتعدها ؟ حياتى الشخصيه والتجريح دا مسمحش لحد انه يتعداهم او يكلم فيهم انا شخص ليه حياتى الشخصيه وانا الوحيد الى اقرر اقول ايه عنها ومقولش ايه عنها . والتجريح مسمحش لحد انه يكلم عنى بطريقه مش كويسه او يقلل من مجهود عملته لا احد يقدر أن يحدد شخصيتنا الا نحن فما الصفه التى تميزك ؟ ساعات الواحد لما يكلم عن نفسه فى اعضاء بتقول عليه مغرور ^_^ ولكن الحمد لله شايف انى من النوع الى بيسامح جدا وحته الطيبه الحمد لله موجودة فيا ودائما بهتم انى اكون مع اى شخص محتاجنى معاة . وهل بك عيوب تريد التخلص منها ؟ الكسل اكتر حاجا انا بضايق منها فى نفسى هل تمنيت أن تكون مشهور ؟ وما الشىء الذى تود الاشتهار به ؟ اتمنيت فى صغرى اكيد كنت دائما بقول انا هكون مشهور فـ ( كورة القدم او الاعلام ) ^_^ يقال أن الحب الحب كالحرب من السهل أن تُشعلها . .و من الصعب أن تُخمدها ما رأيك ؟ اكيد صح المرأة لو حست انها فى أمان وبالحب من شخص هتديله كل الى عايزة لو الامان قل او الحب قل المرأة معاملتها بتتغير مهما حصل من الشخص او الزوج معاها البيت ما هو ترتيبك فى الاسرة ؟ رقم ( 5 ) وفاة والدتك ما تأثيرة عليك ؟ وما تأثيرة على البيت بشكل عام ؟ اكيد مفتقدها جدا وكنت اتمنى تكون موجودة دلوقتى ويمكن أثرت عليه بشكل كبير جدا فى حياتى خاصه بعد وفاتها مباشرة ولكن من نعم الله على الانسان ( النسيان ) التأثير اكيد كان علينا كلنا انا واخواتى واهلنا كمان الحمد لله كانت بتنعم بحب واحترام الجميع خاصه اهل زوجها ( والدى ) ودى من الحاجات الى بتحصل قليل جدا ان اهل الزوج يعتبرو زوجه اخوهم او ابنهم واحدة منهم . ( ربنا يرحمها ) الله امين يرحم موتى المسلمين اجمعين ما الشىء الذى تمنيت تحقيقه لكن الظروف حالت بينك وبينه ؟ مفيش حاجا معينه بصراحه فاكرها بس الحمد لله نوعا ما لما بحتاج حاجا بحاول اوصلها . اكله ومشروب بتحبه ؟ مكرونه بشاميل وفراخ عصير مانجو وفراوله ــــــــــــــــــــــــــــــــــــــــــــــــــ ـــــــ عش الزوجية يقال الرجال لايهتمون باخلاق الفتاة الا حين بحث عن الزواج وقبل ذلك فهم يهتمون اكثر بالخصر النحيل ما رأيك؟ دا مين الى بيقول :D ممكن دا بيحصل بس معايا بصراحه لا الحمد لله الى عرفتهم سواء فى الجامعه او فى اثناء الدراسه الحمد لله ناس محترمين وليهم كل الاحترام . اختيارك لزوجتك على اساس الحب ولا اهو جواز واستقرار وخلاص؟ بصى صعب حد يدخل يقول دا جواز وخلاص دى بدايه ههههههههههههه لكن الطبيعى ان الواحد طالما اختار شريكه حياته يبقى اكيد فى حب سواء بنسبه قليله او كبيرة بس المهم انه موجود ودا بيكبر مع الوقت ومع وجود اطفال ووجود مواقف من خلالها بتعرف الشخصيه الى اخترتها دى فعلا تستحق تكون زوجتك والا لا لو زوجتك مش بتعرف تطبخ هتعمل ايه ؟ لا الحمد لله بتطبخ كويس دا الى اعرفه بس الله واعلم بقى ^_^ لو مش بتعرف اكيد هخليها تتعلم لحد لما كله يتظبط معاها ودا طبيعى فى الاول هنعانى بس يله الحياة كدا ^_^ لو فى مشكله وجهتكم او خلاف لا قدرالله تصرفك هيكون ايه ؟ الاهم ان محدش يدخل من اهلنا دى اهم حاجا يعنى ماتجريش على مامتها او والدها وتحكيله الى حصل اى خلاف ان شاء الله يتحل عن طريقنا احنا اخد يوم يومين تلاته اسبوع المهم ان محدش يدخل بينا . لو زوجتك عصبية هتتعامل معاها ازاى ؟ عصبيه ازاى لو بتتعصب على حاجا من حقى يبقى اكيد هعرفها غلطها يعنى ماتبقاش مثلا مش شايفا واجبتها معايا واكلمها فى الموضوع دا فتتعصب علية مثلا اكيد مش هسمح بدا منها . واكيد مع الوقت هيبقى فى تفاهم بينا والامور هتبقى تمام . فموضوع العصبيه دا ياريت اى زوجه تحاول تغير من نفسها او اى زوج كمان العصبيه مالهاش لزمه فى الحياة الزوجيه . وحده صحبتى متجوزة بتحكيلى بتقولى جوزى اول ما اتجوزنا اول ما يفتح بابا الشقه ينادى يا ايمان يا ايمان وبعد اول بيبى بقى ينادى يا احمد يا ايمان وبعد تانى بيبى يا احمد يا مصطفى ومفيش ايمان فى رأيك ليه الرجل بعد الانجاب بيتغيروا ؟ هاتى رقم جوز صحبتك اشكرة :D بصى الطبيعى ان الواحد لما ربنا بيكرمه بطفل بيكون كل حياته الاطفال بيكون ليهم معامله خاصه كفايه ان مثلا الواحد بيقعد طول اليوم فى شغله مش شايف ابنه والا بنته عكس الزوجه الى بيكون فى تليفونات بينهم طول اليوم انتى مثلا ممكن تلاقى والدك لو زورتيه كل اهتمامه ببنتك واول لما يشوفكم ياخدها منك ويلعبها ويبوس فيها وبعد ساعه والا حاجا يقولك ازيك عامله ايه :D فدا طبيعى . ان شاء الله ربنا يزرقك بالذرية الصالحة نفسك اول بيبى يكون بنت ولا ولد لو بنت هتسميها ايه ولو ولد هتسمية ايه ؟ يابنتى لو قولت بنت وهسميها ( اسيل ) الاعضاء هتطلع علينا سمعه مش كويسه :18: بصى اسماء الولاد هتبقى مشكله بالنسبالى جدا لسبب بسيط ان ماشاء الله العائله عندنا مخلصين على الاسامى يعنى عندنا ( يوسف / ادم / عمر ) ودول اكتر اسامى بحبها البنات بقى عادى قدامى المجال مفتوح واسامى البنات بحس انها كتيرة وسهل تختار منها اقتباس:
كان عندى اسئله كتير هنا بس رنين كاتبه عريظه قولت كفايه هنا كده اوكيك متى متى يكون مورشو ضعيف امام المرأة ؟ لو ادتنى الاحساس الكامل بالحب والاهتمام وبلاش ردودك بهزار ماشى ياكينج ماهو رديت يا ناصحه :04: متى تكون عصبى ؟ قليل لما بتعصب بس ممكن اتعصب لو فى اتفاق سابق بينى وبين حد ومعملش بيه متى تجلس بمفردك ؟ وانا داخل انام ^_^ يمكن كل يوم وانا داخل انام بقعد كدا يجى 30 دقيقه اراجع فيه احداث اليوم والتصرفات الى حصلت منى متى تكون غيور ؟ بصى انا عندى ثقه جامدة جدا فى المراة يعنى مش من النوع الى هفضل افتش ورا مراتى انتى بتعملى ايه وبتكلمى مين ومين بيرن عليكى طالما انا اخترتها تكون شريكه حياتى يبقى خلاص فة ثقه موجودة بينا الا لو حصل العكس ساعتها مستحيل اكمل معاها . من لمن تقول لك/ى وحشه والدتى ( رحمها الله ) نفسى اطمن عليك/ى محمد اخويا نفسى فعلا اطمن عليه وربنا يكرمه سامحتك ..... اى شخص قال فى حقى كلمه مش كويسه وهو مش متاكد منها من هو/هى [ ذهبت بلا همسة وداع .. وهجرتني ] اسلام صحبى ( ربنا يرحمه ) اتوفى فى يوم وقبلها بساعتين كان اتصل بيه ومكنتش شايف الموبيل ولما شوفت الموبيل كان الوقت اتاخر فقولت اتصل بيه الصبح صحيت على اتصال زميل ليه وقالى انه اتوفى فكان نفسى اعرف كان هيقولى ايه قبل وفاته بساعتين . من هو/ هى اقرب صديق لك ؟ فى كذا صديق ليه مش شخص واحد يمكن احنا 3 تقريبا كل اخبارنا مع بعض وتفاصيل حياتنا . ــــــــــــــــــــــــــــــــــــــــــــــــــ ــــــ رأيك ما رأيك فى يوم 21/ 6 نزول الاسلامين لتأييد الرئيس ؟ عرض قوة ضعيفه نزولهم اكد انهم خايفين وفاكرين انه استعراض عضلات اكتر حاجا استغربتلها ان معظمهم فى اللقاءات التليفزيونيه كلامهم ان هم دول الى قامو بالثورة ومقتنعين بدا مع انهم كانو جوا جحور ومطلعوش منها الا بعد ما اتاكدو ان مبارك رحل . فى رأيك متى تخون المرأة ؟ مبحبش كلمه خيانه عموما ولكن لو هى مقدرتش تحافظ عليه يبقى العيب فيها مهما كان انا واحد اجوزت عشان الاقى اهتمام وحب من الزوجه فمينفعش الاقى فى اهمال فى حاجا منهم يعنى مثلا مرجعش البيت الاقيها سايبا البيت مقلوب وهى قاعدة فاضيه طول اليوم ماينفعش ارجع البيت مالقهاش مهتمه بنفسها مارجعش البيت مالاقيش مثلا اكل والا حاجا معموله مبصش الاقى الشعور بينا بقى لا مبالاة الى مش فارق معايا هى موجودة والا لا صاحيه والا نايمه ..... الخ كل دا بيخلى الواحد يبص لحد تانى ووقتها هيلاقى الاهتمام والحب معاها . فحكايه ان الواحد يبص لحد تانى بيكون السبب فيه الزوجه او المراة او بقى لو كان فى علاقه بين اتنين ومحصلش نصيب لظروفهم ودا راح فى طريق ودا فى طريق ورجعو لبعض تانى وبرضو رجوعهم يكون بسبب عدم راحتهم مع ازواجهم . فى رأيك متى يهمل الزوج زوجته ؟ لو مفيش اهتمام بيه ومفيش اهتمام بواجبات الزوجيه والبيت انا زوج ليه واجبات اعملها وحقوق اخدها لو محصلش دا اكيد هيكون فى مشاكل زوجيه ــــــــــــــــــــــــــــــــــــــــــــــــ المنتدى عضو/ة تكونت بينكم علاقه معه عن طريق المنتدى ؟ مقابلات وكدا محصلتش خالص بينى وبين اى عضو لكن علاقات صداقه اكيد فى اعضاء فى تواصل بينا عضو/ة مميز فى اليوميات ؟ حاليا فى اعضاء ماشاء الله ماشين كويس منهم ( شيماء / اسيل / سما / حلم عمرى ) وفى اعضاء على فترات بتظهر زى ( الرجل المتواضع / واحلا بنوته/ اميرة الحب الضائع ) عضو/ة هيبقى له مستقبل فى اليوميات ؟ الاسماء الى قولتها بس المهم الاستمراريه مش حكايه يومين او شهرين وفجأة يختفو حتى لو محدش منهم بقى مشرف لو يستحقو فعلا المفروض يكملو نشاط واكيد هيكونو مشرفين عضو/ة يعتبر الاميز الى نفسك؟ فى اعضاء بحب جدا مواضيعهم وبحس انهم بيقدمو حاجا مفيدة نستفيد منها منهم ( طارق ) بحب انا المواضيع الى فيها معلومه مش موضوع كتابى وخلاص عن احساس او شعور جوايا يمكن ( طارق ) من النوع دا مواضيعه بيكون فيها حاجا او معلومه عضو/ة تلفتك مواضيعه ؟ مواضيع فى كذا حد وفى اعضاء كتير جدا بهتم بانى اشوف منزلين ايه سلبيات بتشوفيها فى المنتدى ؟ وايه اللى ينقصه ؟ السلبيات معروفه لسه فى مجاملات بين الاعضاء وبعض الى ينقص المنتدى شويه شفافيه يعنى لما يتم حظر عضو انا شايف ان مش عيب نقول دا اتحظر ليه سواء لاختلاف الاراء او لانه بعت رساله فيها خروج عن النص طالما هو عمل دا فعلا فليه مقولش السبب للجميع ونسيب الاعضاء تخمن وتقول الى تقوله ممكن عضو يتحظر لسبب هايف بس الاعضاء تقول لبعضها دا عمل وعمل ونلاقى الاشاعات زى الفل بينهم . اسئله الاعضاء رنين احم احم ^^ كنت لسه بفكر اننا لو استضفناك فى اجمد عضو ايه المصيبه ال ممكن تدور عنها الحلقه بس معرفتش اوى فقررت ارتجل انا بقى ^^ اهلا اهلا ههههههههه لازم نصيبه يعنى ارتجلى ارتجلى بما انك خلااص ارتبطت وباذن الله فرحك خلااص اهو ربنا يبارك يارب قولى بقى -مكنش نفسك ترتبط بشخصيه معينه فى المنتدى ؟ قبل ما اعرف خطيبتى كان ممكن يكون فى بس مشكله المنتدى ان مش سهل ترتبط من خلاله يعنى ممكن تعجب ببنت من بلد تانيه فصعب تفضل رايح جاى وتقابلها وتتفقو على تفاصيل حياتكم يعنى اهم خطوة وهى ازاى هجيب اهلى واجى اطلبك صعب تتفقو عليها بينكم وبين بعض -هل ابتديت اعجابك لحد فى المنتدى ورفض ؟ لا محصلش قبل كدا وبعدين لو حصل لازم يوافقو :105: والا هم حرين كنت هشغل عليهم اجمد عضو بما انه توبيك النصايب :D -هل بقى حد فى المنتدى ابدى اعجابه بيك وكان ايه رد فعلك ؟ اصل المشكله ان الاعضاء هتفهم اعجاب بانه حب مفيش حاجا اسمها انا معجب بقلمك ومواضيعك وفكرك لازم هنربط الاعجاب بالحب والارتباط -لو مسكنا مروشو اداره المنتدى مين من الادرايين والمراقبين ال موجودين ممكن تعزله من منصبه ومين هترقيه فى منصب جديد وتستعين بيه ؟ ههههههههههههه بلاش اشيل مين دى بس كلهم ناس محترمين ويستهلو المكان الى هم فيه . الترقيه فى كذا حد يستاهل الترقيه منهم . حوراء والرحال -ممكن تخلى زوجتك تشارك معانا فى المنتدى ^^ ؟ اكيد مفيش مشكله لو هى حبت دا مع انها تعرف المنتدى وتعرف اسماء بعض الاعضاء -احكيلنا ازاى اتعرفت على زوجتك ؟ صدفه شوفتها مرة فطلب انى اتقدملها والحمد لله تم ( سريع انا :D ) - ايه اكتر حاجه بتؤثر بالسلب على حياتك ؟ عدم الراحه مبحبش اكون فى مكان مش مرتاح فيه يعنى لو مش مرتاح فى البيت دا بيأثر عليه لو مش مرتاح فى شغلى بيأثر عليه - انسان غير صفات فيك او موقف غير مجرى حياتك ؟ وفأة اسلام صخبى يمكن اتاكد ان فعلا الواحد فى اى لحظه ممكن يفارق الحياة فلازم الواحد يخلى باله من تصرفاته فى اى وقت . - امتى اخر مره حسيت بالذنب واتجاه مين وليه ؟ انا مقصر الفترة الحاليه مع نفسى بس فعلا مشاغل الحياة مخليانى بتجاهل حاجات كتير جدا لازم متجهلهاش بس ان شاء الله الفترة الجايه هحاول اغير الحكايه دى كفايه كدا بقى ^^ دا كل دا ارتجال اومال لو اعداد كنتى عملتى ايه :D وبستغل بقى يا اسيل البرنامج معاكى علشان اشكر احمد فى مجهوده معايا فى موضوع الميرى ووحده العنايه فعلاً بيساعد بجد وقرفته انا الحقيقه علشان افهم الامور ماشيه ازاى ربنا يباركلك يارب ويجعله فى ميزان حسناتك ~ منور يا طونى خليفه ^^ انا الى سعيد بوجودك ومفيش لا تعب والا حاجا المهم ان شاء الله نقدر نعمل حاجا حتى لو بسيطه وبشكرك على اهتمامك انتى كمان بالموضوع دا وربنا يجعله فى ميزان حسناتك . ــــــــــــــــــــــــــــــــــــــــــــــــــ ــــ الاميرة رودى هتقضى اجازه الجواز او شهر العسل فين ؟ انا قولتلك انى هقضيها فى مكان من الاتنين بس خلاص اتاكد انى هقضيهم فى المكانين وهم الانتريه و قوضه النوم والبلكونه كمان ^_^ انا فرحى قبل 30 / 6 بيومين بزمتك فى حد لو مكانى هيفكر يروح فى اى مكان هههههههههه دا عندنا شاليه فى العريش بقالنا سنتين محدش راح بص عليه حتى هههههههههه اكيد هقضيه فى البيت وهنا فى المنتدى ^_^ كلمه تقولها لاعضاء بنات مصر اتمنى التوفيق لجميع الاعضاء وكل سنه وانتو طيبين ورمضان كريم وان شاء الله كل عضو فى حاجا بيحلم بيها يقدر يحققها . اظن انت اتشاهدت بعد ما خلصت يلا مش خسارة فيك بعد الجواز مش هنشوفك كتير نورت الحلقة يا أحمد وفعلا انا استمتعت بها كتير واستنونى مع ضيف جديد |
بجد حوآآآر جميل جدا بينك يا اسيل وبين احمد والف الف مبروووووووك الجوآآز يا احمد ربنا يسعدك يا { رب وتشوف احلى ايام حياتك |
حلقة جميلة أوي ., ومورشو اكيد منور ., وألف ألف مبروووك على الجواز والله لسا عارفة ., ربنا يهنيك يا رب ., وآرائك رغم اختلافي معاك في بعضها إلا إني منكرشي إنها كلها كانت صريحة جداً ., وشخصيتك برضو جميلة ., استمتعت جداً بالحوار ., جميل منك يا اسيل والله ., |
اقتباس:
منتدى ايه تبقى ناوى تجيبها فى اجمد عضو اكيد مبروك يامرشدى وربنا يتمم بخير ويسعدك يارب حلقه جميله اسيل تسلمى |
صراحه من اجمـل الاستضافات التي مررت عليها في حياتي اسف اولا مبروك يا احمد وربنا يتمملك علي خير بجد اسئله ولا اروع استضافه امتعتنا من المستضيفه اسيل والضيف اللذيذ المثقف مورشو تعلمنا من هذا الحوار الكثير جدا تقبلو مروري |
... الفرح قبل 30 /6 .. مكنت تعمله بعد تلاتين على الاقل تبقى الفرحه فرحتين . رحيل الريس وفرحك .. :) ألف مليووون مبروووك مورشو .. يارب يسعدك ديماً . ويرزقك الذريه الصالحه والخير كلهـ حوار جميل وإجابات روعه لاول مره بقرأ اجابات حد للآخر ... ... موفقين |
حلقه جميله جدا جدا مجهود رااااائع اسيل واسئلتك جميله واجابات احمد كمان جميله بفرح فيك جدا يااحمد لما تكون ضيف بحس انه تخليص من اللى بتعمله فينا الف مبروك يا احمد وربنا يسعدك |
حـــــوووار جميل جدا مع شخصية اجمل الف مليووووووووون مبروووك الزواج ي أأحمد وربنا يتمم علي خير * تسلمي ف انتظار الجديد ,، |
ألف مبرووك يا مورشووو استضافه رائعه بجد وأسئله جامده والاجوبه رووعه |
غيرت لون خطى وحطيت أحمر شفاه علشان أهنى وأبارك مقدما لأخوياالعريس المشاغب والعسل وكمان الفللى الباشمهندس أحمد ومش عارف جاب مرشودى منين وقبل ماانسى لحسن الزهيمر بيشتغل اليومين دول أشكرك أختى أسيل برنامج جميل ومتنوع وأسئلته أجمل أولا يارشرش لابنا يقويك ويعينك وهتخلص الفلوسات طبعا وربنا يتتم على خير ومايسلطش عليك العروسة بس زعلان منك إنك دعيت للأعضاء بالزواج ومارتضش تدعيلى معاك وقلت متزوجين لأ حرام عليك يارشرش ليه تمنع الفرحة وتحرمنا من العروسة والأنتريه الجديد وكمان أشكرك حيث ذكرتنى ضمن المقصريين فى حق قسم اليوميات فعلا أنا مقصر بس أوعدك ان شاء الله بعد ماأبطل مغازلات وأقتل الرومنسية وأطلق العواطف وربك يكرمنا بعدرمضان ان شاءالله وأخلص من مناقشة الماجستير هحاول أكون متواجد فى القسم وعجبتنى إجابتك كاملة ماعدا حاجة وحدة بلاش اجيب سيررتها مرة تانية مقدما الف مبروك ربنا يجعل زفافك كله خيروبركة ويرزقك الذؤية الصالحة شكرا لك اختى اسيل وننتظر الحلقة الجاية مودتى |
| الساعة الآن 10:01 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب