|
الحلقة السادسة من ( لمن يجرؤ فقط ) مع ( حَرفُُ هجآءّ ) اهلا بيكم وحلقة جديدة من برنامجكم ( لمن يجرؤ فقط ) الفترة الاخيرة شوفنا خلافات سياسية فى المنتدى فى مؤيد وفى معارض واستمرارا للاستضافه الاعضاء عشان يوضحو رئيهم استضفت النهاردة عضوة بتاعت مسيرات :D رايحه فين رايحه مسيرة جاية منين جاية من مسيرة هتنامى فين هنام فى مسيرة هتنامى فين هنام فى اى مسيرة :D لا بجد معانا النهاردة ضيفة صاحبة رئى خاص بيها وصاحبه قناعه صعب حد يغيرها بس مع الوقت هتتغير انا عارف :24: المتالقه / حَرفُُ هجآءّ فى البداية تعالو نشوف الـ ( 8 ) نقاط الـ اختار منهم ضيفى حياتى / اعترافات اعضاء المنتدى / سياسة المنتدى وجع دماغ / سؤال من مجهول كلام فى السياسة / صورة وتعليق تعالو نشوف الحوار : الاختيار الاول ( اعترافات ) اولا : تنكرى انك شخصية متقلبة او مزاجية ؟ وشايفا ان شخصيتك دى مقتنعه بيها تماما وشخصيتك بتأثر على حياتك والا لا ؟ من اولها كده ليه الفضايح دى ايوه فعلا انا شخصية متقلبة مزاجية وصعب ان حد يأثر عليا وبنعزل تماما لو نفسيتى تعبانه بس مسالمه والله ههههه عارفه انه عيب بس اكيد له اسبابه لانى كنت غير كده من فتره مش كبيره وفى شهود عليا انى كنت هادية اوووى بس مش معنى انى متقلبه انى اكون متقلبه فى كل شىء هى بس الانفعال والانعزال بتأثر اكيد على حياتى بس خلاص اتعودوا عليا كده وان شاء الله ادينى بحاول اظبط من الموضوع ده ثانيا : ياترى جوزك بما انه فى الداخلية لية دخل بوجهة نظرك برجال الشرطة الفترة الاخيرة ؟ وياترى كرهك دا لرجال الشرطة أثر على علاقتك بجوزك الفترة الاخيرة ؟ لا أحمد ملوش دخل فى وجهه نظرى نهائى مبادئيا رجال الشرطه فيهم الكويس وفيهم الوحش بس احنا عارفين كويس من ايام مبارك انهم طغاه ومش هننكر ده وفى تجاوزات كتيره اوووى منهم مع الناس سواء باهانه لفظيه او ضرب وسحل فى الاقسام ومهازل فى الشوارع حتى استخدامهم لقانون الطوارىء اللى اداهم الحق فى انهم يقبضوا على اى حد بحق او من غير حق كان غلط وتلفيق تهم وما ادراك بئا بالباقى وعشان كنت تعيش مع الداخلية كان لازم يكون لك حد فى الداخليه ايام مرسى ومع وجود محمد ابراهيم اللى فاق فجائه كده من الغيبوبه وعرف دلوقتى ان فى دوله لازملها امن كان فى تأمر كبير او تقدر تقول تخاذل من الشرطه فى تحقيق الامن للبلد حتى المرور كان متخاذل ده الشوارع الرئيسيه والميادين مكنتش تلاقى فيها عسكرى مرور واحد يوحد ربنا الا القليل انا بتكلم عن اسكندرية كمثال الايام دى بئا هو عايز هيبته ترجعله تانى اللى ضاعت فى 25 يناير وبالاتفاق مع الجيش على مواجهه المظاهرات اللى كانت بتطلع لرفض الانقلاب نزلت الشرطه وفجائه كده الشرطه رجعت لحضن الشعب تانى ايه ده هى كانت اصلا فى حضن الشعب من قبل ثورة يناير؟ وده يديك الدليل ان فى شىء كبير كان مدبر من قبل 30 /6 عشان كل مؤسسات الدولة ترجع تشتغل تانى بنفس نظامها مش معنى كلامى ان حكومه مرسى كانت قادرة على حكم البلد واصلاحها وعملوا ضدها الانقلاب حكاية يأثر على علاقتى به ده هيرجع لتصرفه هو مع الناس هل هيظلم وهيضرب ويستعمل العنف معاهم او لا وبوجه حق أو لا لانى بصراحه رافضه تماما ان يكون اسلوبه وحشى ( كلام فى السياسة ) اولا : منين انتى مش مقتنعه ( بمرسى ) وبتقولى انك مش ( اخوانية ) وبتنزلى فى مسيرات مؤيدة للاخوان ومطلبها الاول ( عودة مرسى ) مش شايفة ان فى تناقض فى كلامك . فعلا انا ضد مرسى ومش اخوانية نزولى للمسيرات ده اعتراض على الحكم العسكرى وعلى فض الاعتصامات بالطرق الوحشية اللى حصلت شوف فى ناس كتير شبهى مش عايزين مرسى يرجع بس رافضين للمجلس العسكرى وحكمه وده واضح جدا لا وجود للرئيس الانتقالى الا باشارة من المجلس العسكرى وعايزين حق اللى ماتوا من غير وجه حق احتراماً للدم وادامية الانسان بوجه عام ثانيا : انتى قولتى ان كان فى حلول لفض الاعتصام منها ( منع الاكل ) وبتعترضى على طريقة فض الاعتصام واكلمتى كتير فى صفحاتك عن امور سياسية من وجهة نظرك وفجاة اعلنتى انك ( مش سياسية ) ودا تناقض اخر فى كلامك ؟ لا مش تناقض انا بتكلم فى السياسة باللى اعرفه مش هفتى يعنى اما عن طريقة فض الاعتصام بالطريقة البشعه دى رفضاها جدا لانها مفيهاش احترام لابسط حقوق الانسان وهى حقه فى الحياة وطرق الفض اكيد الجيش عنده طرق كتير غير اللى اتفض بها الاعتصام و عشان الجيش فضه بالطريقه دى احنا كشعب موافقين و معندناش خبره فى طرح حلول عشان كده بنبرر طريقه الجيش واكنه يعنى غُلب حماره وحط فى اعتبارك ان السيسى طلع وقال انه حاول مع الاخوان التفاهم على فض الاعتصام ورفضوا طيب ياعم الحج مش دول ارهابيين طيب ازاى بتتفوض مع ارهابيين يعنى انا حرامى يدخل يسرق شقتى واتفاوض معاه عشان ميجيش سرقها تانى طب ازاى ؟ الاختيار الثالث ( اعضاء المنتدى ) اولا : تفتكرى الاعضاء موافقة على اعلانك انك مايشرفكيش تكونى ( مصرية ) والغريب ان الى عملك ( اعجاب ) فى صفحتك للمشاركة دى كلهم ( مؤيدين لمرسى ) شايفا ان كلامك دا بيدل على وطنيتك وان فعلا يهمك حال البلد . عايزة اقولك حاجه يوم الحساب ربنا مش هيحسبنى بمصريتى لا يفرق الله بين عربى واعجمى الا بالتقوى اما عن الاعضاء مفيش عضو فى المنتدى يجبر عضو تانى على التعامل معاه لو مش عجبه دى حاجه الحاجه التانية الوحشية وعدم الرحمة والقتل والحرق وقتل مصابين احياء والدليل قريبى اللى مات محروق ومفيش فى جسمه رصاصه وعدم العدل بين المصريين ده حتى وصل عدم العدل للقتلى م رابعة والنهضة ان يجبر اهاليهم على كتابة سبب الوفاة انتحار او سكته قلبية وهو متفرتك من الرصاص والاهالى منهم اللى وافق لإكرام موتاهم على الناحية التانية من شهداء رفح الجنود والظباط فى كرداسة تصاريح الوفاة مفصله قتلوا ازاى وباية مش هقول الدوله بتفرق فى التعامل بين الاحياء هقول بأى عدل الدوله تتعامل مع جميع الموتى؟ طيب مات ماشى واعتبرته الدوله كلب وراح بس اكتبوا بئا مات ازاى؟ ولا عشان التقارير هتودى الفاعل فى ستين داهيه وهيعتبر مجرم حرب اهدر حق العايش والميت كمان وباى منطق بئا اقول انا مصرية والدوله اللى احنا فيها معتبرتش اللى ماتوا مصريين ولهم حق فى الدوله حتى فى الموت تفرقة وعدم العدل بين المصريين = عدم وجود دولة لكل المصريين وعن نفسى عايزة تحقيق العدل قبل الدولة ياخى ده انا تمنيت ان ربنا ينزل علينا يوم القيامه عشان يتحقق العدل اما عن الوطنية الوطنية دى مش كلمتين هقولهم فى حب مصر هى الدولة كانت حققت للناس الوطنيه ؟ لما يكون القانون تحت امر الحكام اللى بيطلعوا به الحرامية من السجون و فوق دماغ الشعب لو يقول فين حقى او يقف ضد الظلم زى ما بيحصل دلوقتى اى حد بيعترض على الحكومه الحالية الرد ياما الرصاص ياما الاعتقال ومش بتكلم على الاخوان المسلمين عندك البرادعى مرفوعه ضده دعوه بالتخابر خالد داود كذلك محمد سليم العوا كذلك ده كان مع مرسى اسماء محفوظ واسراء عبد الفتاح اللى ثوره يناير عملت منهم ابطال دلوقتى بئوا عملا قتل تامر عبد الرؤؤف واصابه حاتم البربرى وغيرهم كتير من اللى كانوا ضد مرسى ضدهم دعاوى وحملات اعتقالات على نطاق واسع عشان ابئا وطنية واحب بلدى يبئا الدوله تدينى حقى الوطنيه مش واجب عليا طول ما حقى مهدور فيها ثانيا : لية موفقتيش انك تشاركى فى حملات ( منع التعصب ) الى تم اعلانها من بعض الاعضاء وبعتلك اننا نعمل مع بعض حمله ( الصمت السياسى ) بما انك معارضه ورفضى المشاركه شايفا ان لو كنتى وافقتى على المشاركه فى الحمله كنتى هتبقى خاينه من وجهة نظر المؤيدين والا كان اية سبب رفضك . اولا رأيى يعبر عنى فقط اما عن المؤيدين لمرسى مش من المنطق انى لما اعمل حمله الصمت السياسى واللى فى اساسها تهدئه الوضع بين الاعضاء هيعتبرونى خاينه ثانيا الحمله كان ممكن أوافق اعملها وانا فى ظروف نفسية غير اللى كنت فيها وانت عارف انا حالتى كانت عامله ازاى الاختيار الرابع ( صورة وتعليق ) شهداء رفح http://files2.fatakat.com/2013/8/13769902819610.jpg مقتنعه ان فعلا الجيش الى عمل كدا زى ما مؤيدين المعزول بيقولو بص دى حاجه محتاجه انى اتحقق منها لانى مش بحب اقول كلام الا اذا كان موثوق لان ممكن يكون فعلا ماتوا عن طريق جماعات جهادية بس ده ميمنعش انها ممكن تكون عملية من الجيش عشان قبلها كانت حادثة المعتقلين فى ابو زعبل اللى اتقتلوا واتحرقوا و للعلم فى المخابرات وعلى مستوى جميع الدول فى قانون اسمه مهمة فى الداخل Duty in inside وهى عمليات تتم من وفى الجيش لكسب جوله ادام الخصم 2 / متظاهرين الاتحادية ومؤيدى الجيش http://www.el-balad.com/upload/photo...2o/478.jpg?q=0 ياترى ملايين الاتحادية والتحرير كنتى عايزة السيسى يتجاهلهم كما تجاهلهم ( مرسى ) وكنتى عايزة الجيش يعمل اية فى وجود ملايين بالشوارع لرحيل ( مرسى ) . كنت رافضها لاسباب اولا الجيش وظيفته حماية الوطن من اى خطر ومش محتاج تفويض من الشعب للقضاء على الارهاب واذا كان عايز حل حقيقى كان عمل استفتاء على مرسى حتى لو كان هيجبر مرسى عليه اللى جى بصندوق يمشى بصندوق لكن هو استدرج الشعب بالتفويض عشان لما يقتل يبئا الشعب هو اللى فوضه وبعدين هو لما طلب التفويض من الشعب مكنش فاهم ان كان هيبئا فى رد فعل من المعتصمين على انه عملهم ارهابيين وتزيد الحشود وتسمع منهم كلام تهديد ده غير التصريحات من هنا وهناك على وجود اسلحه ثقيله فى رابعه طيب هى فين وفين الرشاش المتعدد هو انا المفروض عليا لما اشوف شويه عساكر ماسكين صندوق فيه زخيرة واسلحه خلاص كده اصدق انهم من رابعه طيب ليه ميكنش الاسلحه مدسوسه عليهم عشان الاعلام يصور وقول ذيع وخلى ان كان فى اسلحه فى رابعة اكيد غلط كان يبئا التعامل مع المسلحين فقط طيب تفسر بايه القناصه اللى كانوا بيقنصوا المعتصمين اللى مش معاهم سلاح ووقفين عادى وشوف فى فيديوهات كتير لقناصين؟ محتاجه رد على السؤال ده حاجه كمان طول فتره حكم مبارك الجيش تحت طوع مبارك ومغطى على فساد 30 سنه وفى ثورة يناير ومع كمية العنف اللى حصل والاعتقالات والقتل الجيش لا يحركه ساكناً الا بعد أمر مبارك للجيش بتفويضة لادارة البلاد يعنى ادارة الجيش كانت تحت ادارة الدولة بالتالى نقول تحت اى دستور او بند فى قانون من حق الجيش يخرج للفصل بين تيارات متنازعه ؟ وهنا فى الانقلاب العسكرى الجيش انقلب على الحكومة لتنفيذ ارادة الشعب (معاك ان ارداة الشعب تحترم) يعنى الجيش هنا ادى لنفسه صلاحيه السلطه الحاكمة للدوله اللى مكنتش معاه ايام مبارك وبكده حكم المجلس العسكرى فوق حكم الدولة اللى كان تحت الدولة ايام مبارك واتحداك لو فى قانون فى الدستور يدى الجيش السلطة الحاكمة فوق سلطة الدوله وعشان نفوق شويه من بعد ثورة يناير لحد الان الشعب اضحك علية بتعيين رئيس مدنى لان اللى حصل من الجيش يأكد ان مصر دولة تحت حكم عسكرى مش مدنى لان لو كان حكم الدولة للرئيس المدنى فقط مكنش انقلب الجيش http://new.elfagr.org/Portal_News/bi...2013817169.jpg شايفا انها جماعه كانت تستحق الوصول للحكم وفعلا اختارو افضل من يمثلهم كرئيس جمهورية وهل يستحقون قتلهم بهذا الشكل من اجلة . الاخوان اخطائهم كتير اولها اختيار محمد مرسى للحكم لان محمد مرسى لا يملك مقوامات اساسيه لرجل دوله لكن هو كان اختيار اضطرارى بسبب خروج الشاطر تانى حاجه بنوا عداءات مع اشخاص كتير ورموز فى الدوله وبالتالى بئا فى مناصر للاخوان ومعادى ليها تالت حاجه قطعه لعلاقتنا بسوريا كان شىء خطير جدا ومعملش حساب علاقتنا بباقى الدول وخصوصا ان مصر فى مرحلة تخبط سياسى رهيب هو مرسى له حجه فى بعض التصرفات انه معندوش وسطيه فى التعامل ياما ابيض ياما اسود وده بيرجع للدين لان الدين مفهوش وسطيه وده مش غلط بس مينفعش فى السياسة على عكس اى تيار ليبرالى ديما ماسك العصاية من النص وغير سد النهضة والسذاجه السياسية والتردد فى حل الازمات سواء على المستوى الداخلى او الخارجى السؤال الخامس ( سؤال من مجهول ) فى البداية ارحب بالضيفه وعايزة اسئلها سؤال بسيط جدا انتى مقتنعه بوقوفك مع الاخوان والتواجد فى مسيراتهم ودا قولتيه اكثر من مرة فى مدونتك ؟ والا بتنزلى وتعملى كدا عشان قريبك ( رحمه الله ) ؟ والله انا مش مع الاخوان ولا مع رجوع مرسى لكنى ضد الحكم العسكرى ضد المجازر ضد اهدار حقوق الانسان واعتباره حيوان ابن خالتى لما مات اقسم بالله لو شوفت شكله مش هتصدق ان اللى عمل فيه كده مسلم ده اليهود مش بيعملوا فى بعض كده ازاى بئا مش هيبئا فى رد فعل من اهالى الموتى على اولادهم اللى ماتوا شبه الحيوانات بدون رحمه ولا انسانيه وبقتل واحد من رابعه او النهضه اهاليهم بئوا بن لادن جديد عايز حق ابنه حتى لو هيموت عشان يجيبه وده فعلا بيحصل وشوفته بكدا بتخلص سادس حلقات البرنامج . انتظرونا الحلقات القادمة تحياتى . |
اسيل دى كانت طيبه اوى و ربنا من 3 سنين كنت تشخط فيها تعيط :18: دلوقتى اى حد يحاول ينرفزها ممكن تضربه و تدخل فيه السجن :d و مش هعلقت على الاراء السياسيه كفايا خناق لانك مش هتقتنعى و انا بعلن اهو السيسي لازم يتحاكم فى محكمه عسكريه علشان اسيل تستريح بس :18: حلقه جامده يا مورشو استمر |
حلقه جامده يا مرسي قصدي يا مرشو منوره يا اسيل اقتباس:
طيب هوه عدلي منصور من العسكر وبعدين قالو الف مره ان الجيش مش طمعان في الحكم تصدقي برده اللي بيعمل تظاهر دولت مش علشان مرسي علشان حكم العسكر منورين |
ربنا يرحم ابن خالتك يا رب هو و عمي و باقي الناس اللي ماتو دول من غير ذنب و انتي موقفك و رأيك صح بجد عجبوني جدا حلقة تحفة ،، تسلمو يا مورشو و اسيل |
اقتباس:
ده مجرد صورة يعني باينة اووووي مش حتي دي مش واخد بالك منها هههههههه |
حلقة جميلة مورشو اسيل منورة اكييد مش هتكلم عن الاراء السياسية لاني مختلفة مع معظمها ^^ ولكن عمتا اجاباتك رائعة جدااا عجبتني ثقتك من نفسك واقتناعك برايك ربنا يرحم قريبك ويرحم اموات المسلمين جميعا ويحفظ مصر يااارب تسلم مورشو علي الحلقة |
اقتباس:
بس لو عوز الحق مع اعتراضي لحكم العسكر بس شعب مصر مفيش حد هيمشيه صح غير العسكر هههههههههههههههههههههه |
حلقة بصراحة رائعة وعجبتني الردود فعلاً وانا مع كلامها وفي نقطة انت بتثيرها يا مورشو كل شوية حتة الوطنية... في أعضاء هنا كانت بتقول معرفش عن الوطنية غير انها محطة بنزين والعدل شركة انتاج سينمائي... ده بسبب صدمات المواقف والتخوين فبنفعال ممكن نقول كده حلقة رائعة منكما واسعدنا حواركم الراقي كل التحية والتقدير |
حلقه جميله يا مورشو والاجمل الاسئله والاجمد من كدا الاجابه والردود عليها منتظرين البقاى تحياتى |
حلقة ممتازة بكل معنى الكلمة عجبنى بصراحة اراء اختنا اسيل جدا الحمد لله عضوة من اللى ضد مرسى افصحت بكل صدق اللى كثيرين رافضين يعترفوا بية وقالت كلمة حق وانا معاها فى كل كلمة وفعلا مصر ضاعت بلا رجعة كل شىء حلو فى بلدنا مات مع اطهر شباب استشهد برصاص الغدر والخيانة حلقة مميزة جدا شكرا لك مورشو وشكرا اسيل احترامى لكما . |
| الساعة الآن 11:16 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب