منتديات بنات مصر

منتديات بنات مصر (https://forums.banatmasr.net/)
-   منتدى يوميات الاعضاء (https://forums.banatmasr.net/f61/)
-   -   ( حكايات وبنعشها ) مع ( morshooo ) ( زواج بلا حب ) (https://forums.banatmasr.net/msryat436665/)

morshooo 09-22-2013 11:36 PM

( حكايات وبنعشها ) مع ( morshooo ) ( زواج بلا حب )
 
بسم الله الرحمن الرحيم

اهلا بيكم جميعا

وعودة لبرنامجكم

( حكايات وبنعشها )

لمشاهدة الحلقات السابقه

هنــــــا

http://files.w-enter.com/uploadcente...yatlogomk5.png

حكاياتنا فى الحياة كتير جدا بتكون متشابهة

ممكن يحصل معايا موقف ونفس الموقف يحصل معاك

ممكن الموقف الى انا فيه اطلع انا غلطان ولكن .

الموقف الى حصلك تطلع انتا صح مش غلطان

فى الاول والاخر كلها ( حكايات وبنعشها )

تعالو نشوف الحكايه بتاعت النهاردة

وبعد كدا اشوف رئيكم فيها ايه .


http://files.w-enter.com/uploadcente...yatlogomk5.png

الابطـــال

هو ( شاب ) من القاهرة

هى ( فتاة ) من الصعيد

الام ( شخصيه لها دور كبير فى الحكايه )

المكان : بين محافظتى ( القاهرة ) و ( الصعيد )

التاريخ : على مر الزمان


http://files.w-enter.com/uploadcente...yatlogomk5.png

البدايـــه :

( هو ) شاب يبلغ من العمر 22 عام يحب فتاة من القاهرة ويتمنى الزواج

منها ولكن يلاقى صعوبه كبيرة جدا خاصه من ( والدته ) التى تسيطر

على كل شيىء يخص حياة اولادها


( هى ) فتاة تسكن فى صعيد مصر لا يوجد لها احلام لشخص

ترتبط به كل ما يهمها ان تخرج من الصعيد ومن منزل الاب والام

الذين يسيطرون عليها وعلى اخواتها جميعا واكنهم مهمشين بالبيت .


تعالو نشوف اول حوار حصل فيه ايه :


http://files.w-enter.com/uploadcente...yatlogomk5.png

هو : صباح الخير يا ماما

والدته : صباح الخير ياحبيبى

ماما كنت عايز اكلم معاكى شويه

خير لو نفس الموضوع يبقى بلاش احسن

ياماما انا بحبها ومش عايز غيرها


اسمع انا هى كلمه وقولتها لو هتتجوزها تشوفلك مكان تعيش فيه

ياماما مانا ليه شقه فى البيت هنا يعنى مش عايزانى اعيش جنبك

طالما هتعصانى يبقى مش عايزاك ولو حصل والا انتا ابنى والا اعرفك

دا نفس الحوار الى بيحصل بينهم هم الاتنين كل لما

الموضوع بيتفتح و( البطل ) مش عارف يعمل ايه

ياترى يجوز الى بيحبها ويعصا والدته والا يسمع كلامها

ويتخلى عن حبه الوحيد وعن مشاعرة .

ماتيجو نشوف الحوار دا حصل فيه ايه :


http://files.w-enter.com/uploadcente...yatlogomk5.png

والدته : حبيبى انا عايزاك فى موضوع مهم

هو : خير يا ماما ياريت تكونى رضيتى عنى

انا راضيه عنك طول ما انتا مطاوعنى


طيب خير يا ماما

انا لقيتلك عروسه بنت حلال وتعرفها وبنت زى العسل

نعم يعنى انا بقولك بحب بنت تقوليلى انا لقيتلك عروسه

ايوة لقيتها ويوم الخميس انا وابوك هنسافر ونطلبها


يعنى ايه انتو كمان اتفقتو وانا ايه ماليش اى اعتبار

انتا مهما عملت انا مش هسمحلك تاخد البنت الى بتقول عليها

ياماما وانا مش عيل صغير تتحكمو فيه


اسمع انا اخر مرة هقولهالك لو مسمعتش الكلام انتا والا ابنى والا اعرفك .

وبعد معاناة مع والدته وتهديدها انها هتسيب البيت

وهيكون هو السبب وبعد ضغوط اخواته عليه خاصه اخته

الاصغر منه بـ (سنتين ) مبقاش فى حل قدامه الا انه يوافق

وقال لنفسه مفيش مشكله ياما شباب اجوزو بنات مش بيحبوهم

ويمكن الحب يجى بعد الجواز .

تعالو نشوف كمان الحوار دا عشان حوار مهم .


http://files.w-enter.com/uploadcente...yatlogomk5.png

( البطله ) :

اخيرا هيجى الى هياخدنى من البيت دا لا وكمان هياخدنى

لمصر ايه دا اخيرا حلمى هيتحقق مايهمنيش هو مين والا شكله ايه

الى يهمنى انه هياخدنى من هنا هو دا الى كنت بتمناة من زمان انا اصلا

مكنش مكانى هنا فى ( الصعيد ) انا مكانى ( القاهرة ) واعيش ملكه هناك كمان

مع ان كان حلمى انى اجوز واحد غنى يعيشنى عيشه كويسه ويعوضنى

عن القرف الى عيشته بس مش مشكله اهو على الاقل هياخدنى من هنا .


زى ما كلنا عرفنا البطله مايهمهاش هو مين المهم

انه هياخدها من الصعيد لـ القاهرة .

وبعد مرور سنه تم الزواج فعلا واتنقلت ( البطله ) عشان تعيش

فى احضان ( القاهرة ) وقاعدة فى شقه فى نفس البيت مع اهل زوجها .

بس تعالو نشوف كدا الحوار دا حصل فيه ايه :


http://files.w-enter.com/uploadcente...yatlogomk5.png

( هو ) : انتى مش بتنزلى ليه تشوفى ابويا وامى محتاجين حاجا والا لا

( هى ) انا بقوم من النوم متاخرة وبكون تعبانه مش قادرة اعمل حاجا

يعنى ايه انتى المفروض كل يوم تنزلى تشوفيهم لو عايزين حاجا


ليه يعنى وبعدين هيعوزو ايه ماهم قاعدين واختك معاهم لو فى حاجا هتعملها

بس برضو واجب عليكى تشوفيهم حتى لو تبصى عليهم وتطلعى تانى

يوووة انا مش قولتلك مش فاضيه لكدا كفايه عليه البيت وقرفة .

واضح ان العلاقه بينها وبين اهل زوجها مش كويسه

ودا طبيعى جدا خاصه ان ام البطل بتاعت مشاكل .

بس الحوار دا كان مهم جدا تعالو نشوفه .


http://files.w-enter.com/uploadcente...yatlogomk5.png

والدت البطل : اية يابنتى عاش من شافك اومال لو مش قاعدة فى نفس البيت

هى : دا على اساس ان انتو الى قاعدين فى بلد تانى مانا قاعدة اهو معاكو

اقصد يعنى مش بتنزلى ليه اهو حتى نشوفك ونطمن عليكى

لا اطمنى انا كويسه وعايشه اهو لما تعوزة تطمنى عليه اسئلى ابنك عليه

اسمعى يابنتى انا نظامك دا مايعجبنيش وطريقتك دى ماتنفعش

ليه بقى كنت عملتلك ايه والا فاكرين انى جايه شغاله هنا

لا مش شغاله والا حاجا بس المفروض على الاقل تشوفينا

والله انا كدا وعيشتى كدا بحب اكون فى حالى لو كان عاجبكم

( هو ) كفايه بقى انتو الاتنين كفايه انتو ايه مابتبطلوش خناق


خلاص يابنى لا خناق والا حاجا خد مراتك واطلع شقتك

والله يكون احسن انا اصلا مش عايزة اقعد غير فى شقتى انا طالعه .

طبعا المعامله واضحه ان فيها مشاكل كتيرة والبطل

مش عارف يعمل ايه ياترى يقف مع والدته والا مع مراته

بس الى هو متاكد منه ان الى هو فيه دا مالوش اى زنب فيه

وقرر انه يقول الكلام دا لوالدته .


http://files.w-enter.com/uploadcente...yatlogomk5.png

( هو ) : عاجبك الى ابنك فيه دا والى انتى كمان فيه

( والدته ) : اكيد لا يا حبيبى وانا السبب انا عارفه بس

مفيش بس يا امى انا خلاص مبقاش ليه اى لزمه فى الحياة

ماتقولش كدا يا حبيبى

انا بقيت اروح شغلى وارجع لمكان مش عايز اقعد فيه وانتى السبب

انا كنت عايزاك لبينت انا اخترهالك


وياريتك ما اخترتيلى ههههه ادى اختيارك زى ما انتى شوفتى

ربنا يهديها بكرة ربنا هيكرمها وتكون كويسه

بكرة هو فين بكرة دا انا بقالى سنتين مجوزها ومفيش اى احساس من ناحيتها

نعمل ايه يابنى فى نصيبنا


ما انتى السبب انتى السبب بس اعمل ايه .

الموضوع خلاص بالنسبه للبطل الحياة بقى

مالهاش اى لزمه بالنسباله مع ان دا مكنش حلمه الى كان نفسه فيه

بس تعالو نشوف اخر حوار للبطل كان ايه :


http://files.w-enter.com/uploadcente...yatlogomk5.png

( البطل )

يااااا الله بقى هو دا الى كنت بحلم بيه ههههههه

زوجه وولاد وحياة

كل دا راح فين ياترى غلطتى انى وافقت امى وسمعت كلامها

والا غلطتى انى سبت البنت الى بحبها وحلمت معاها اننا نكون

احسن زوجين فى العالم كل دا مين السبب فيه ياترى انا والا الحياة

دلوقتى خلاص بقيت والا حاجا ( حبيبتى ) اجوزت خلاص وربنا كرمها

وانا ( طلقت ) الى خربت عليه حياتى و ( امى ) ربنا يرحمها بقى

انا مسامحها فى الى عملته فيه بس خلاص انا كدا شكرا

لا عايز بيت والا زوجه والا حياة بس سؤالى .

ياترى انا السبب واستاهل الى حصل معايا دا فى حياتى والا مين السبب ؟


http://files.w-enter.com/uploadcente...yatlogomk5.png

الخـــــلاصه :

الحكايه الى تم عرضها دلوقتى حصلت مع ناس كتير فى مجتمعنا

بس الغريب ان رغم انها بتحصل ونهايتها بتكون بالشكل دا

الا ان فى ناس مازالت مصرة انها تعمله وفى فعلا

امهات او ابهات بيصرو انهم يجوزو اولادهم بالطريقه دى


http://files.w-enter.com/uploadcente...yatlogomk5.png

نصيـــحه :

ياريت اى حد يحصل معاة كدا ان يتم غصبه انه يتزوج من حد

مايوفقش لانها حياة واسرة وبيت ولازم يعرض وجه نظرة

ويصر عليها لسبب بسيط ( ازاى حد هيقدر يعيش مع حد وهو مش بيحبه )


http://files.w-enter.com/uploadcente...yatlogomk5.png

النهــــايه

اتمنى ان الحلقه تنال اعجابكم وتكونو استفدو منها

واتمنى عرض وجهات نظركم وتقولو رئيكم فى الحكايه

والى حصل فيها .

فى النهايه اتمنى الحلقه تنال اعجابكم

انتظرونى وحلقه جديدة من

( حكايات وبنعشها )

تحياتى

MORSHOOO



الحان الورد 09-22-2013 11:46 PM



،

حلو الموضوع
والقصة موجودة للأسف عندنا ،،
رغم اني بشوف ان المفروض الشخص يصر على اللي هو عايزه مهما كان ،
بس ساعات بتبقى في عقبات أكبر منه ،،
زي ان والدته تكون شديدة مثلاُ زي القصة دي وتحصل مشاكل أكبر
بيصعبوا عليا بصراحة ^^
بحسهم بين نارين ، والمفروض يختاروا أقل الضررين
وعموماً مش كل القصص بتكون زي دي ، يعني في نسبة ان البنت تكون كويسة وتقدر تسعد زوجها مع الوقت ،، أو على أقل تقدير تمشي الحياة
وأعتقد ان الشخص ممكن يفهم أهله من الأول انه لو اتجوز حد غصب عنه
حياته مش هتكون سعيدة ويحاول يقنعهم ،،
وكل قصة ليها ظروفها بقى ..

شكراً ع الموضوع يا مورشو
بالتوفيق

امواج الحزن 09-23-2013 12:07 AM

سامت يمناك

ودام ابداعك وتميزك

دمعه حائره 09-23-2013 12:38 AM

حكايات فعلا موجوده يمكن فى اغلب البيوت
للاسف عدم التفاهم والتسلط من الاهل بيجيب التعاسه للاولادهم
بس المعروف ان البنت ممكن تتغصب على الجواز لكن الولد صعبه اوى

زهرة الياسمين 09-23-2013 01:31 AM

حلوة اوي القصة
من وجهة نظري شايفة كل الاطراف غلطانة
الام لما غصبت ابنها على جوازة
والبنت لما كانت عايزة اي جوازة وخلاص غير انها كان المفروض تتعامل بطريقة احسن من كدة لكن واضح ان الطمع كان مسيطر عليها
والشاب برضو غلط لما ماحاولش هوا يحسن علاقة البنت باهله باي طريقة كل اللي كان بيفكر فيه بس ان امه غلطانة وانو غلط لما سمع كلامها
ماهي حبيبته عايشة زي الفل واتجوزت واكيد مبسوطة وحتى لو ما كانتش كدة بتحاول
اما موضوع ياخدوا بعض عن حب فاكييييد مع العشرة مليون في المية هايحبوا بعض وعن تجارب ليا مع صاحبات كتير اتجوزوا جوازات عادية مش حب وكدة وعايشين مبسوطين
تقبل مروري ومشاركتي
زهرة الياسمين

العاشق الذى لم يتب 09-23-2013 07:38 AM

اهلا بيك احمدوحشنى
ومبروك رجوعك باللون المفضل
حكاية وبنعشها
فعلا الحكاية دى موجودة وبكثرة
وأكاد أجزم أنها موجودة فى كل بيت إلا القليل ونادرجدا
وهى تسبب جل المشاكل
ويترتب عليها تفكك الأسروضياع الأطفال
دائماماينتج عنها الطلاق والذى تكون ضحيته الاطفا والذين يعيشون محرومون من ود وحنان الوالدين ويتربوا على الشجاروالخلاف ولايعرفوا للأستقارا النفسى عنوانا
وكذا االذى يتعذرعليه الطلاق
يعيشوا فى هم وغم ونكد
ماهم إلا بهائم رتع
لايتنعمون بطعم حياة ولايهنئون بلذة الحب والعواطف والمودة والتى كانت هى أساس الحياة الزوجية والتى ذكرها ربك وهو يتحدث عن العلاقة بين الأثنين
وكم ياأخى من مشاكل فى البيوت تشبه ذلك وإن كطانت ذوأختلافات متنوعة
المهم الأباءوالأمهات
ربمايكن لهم أحدالأسباب ولكن ليست كلها

حيث تغيرت الاوضاع والأساليب وتنوعت وتحدثت
أخويا أحمد
الله أسأل أن يسعدك مع زوجك
ونحن أبضا وكل الأسرالمصرية
شكرا لك يارشرش
وحشنى والله
تقبل تحياتى وودى

خارج عن القانون 09-23-2013 09:37 AM

الموضوع ده فعلا متواجد كتير ومن الجنسين

وده اكبر دليل على ضعف شخصية الابناء وهو شىء مرفوض تماما

تسلم ايدك مورشو ع الموضوع

انجي_1 09-23-2013 11:12 AM

هو اكيد ملهوش زنب ف اللي حصل

الام هي السبب في المشاكل اللي حصلت فوق دي

المهم ان الواحد يعتبر من اخطاء الاخرين

تسلم موضوع جميل

morshooo 09-23-2013 12:21 PM

اقتباس:

المشاركة الأصلية كتبت بواسطة الحان الورد (Post 4182967)


،

حلو الموضوع
والقصة موجودة للأسف عندنا ،،
رغم اني بشوف ان المفروض الشخص يصر على اللي هو عايزه مهما كان ،
بس ساعات بتبقى في عقبات أكبر منه ،،
زي ان والدته تكون شديدة مثلاُ زي القصة دي وتحصل مشاكل أكبر
بيصعبوا عليا بصراحة ^^
بحسهم بين نارين ، والمفروض يختاروا أقل الضررين
وعموماً مش كل القصص بتكون زي دي ، يعني في نسبة ان البنت تكون كويسة وتقدر تسعد زوجها مع الوقت ،، أو على أقل تقدير تمشي الحياة
وأعتقد ان الشخص ممكن يفهم أهله من الأول انه لو اتجوز حد غصب عنه
حياته مش هتكون سعيدة ويحاول يقنعهم ،،
وكل قصة ليها ظروفها بقى ..

شكراً ع الموضوع يا مورشو
بالتوفيق

اهلا الحان
منورة التوبيك
اكيد كتير جدا حصل العكس
ان لو حصل جواز بالشكل دا
مش شرط البنت تطلع كدا
ولكن ليه من الاساس الاهل
يغصبو سواء على الولد او البنت
من الزواج بالطريقه دى .

morshooo 09-23-2013 12:23 PM

اقتباس:

المشاركة الأصلية كتبت بواسطة امواج الحزن (Post 4183002)
سامت يمناك

ودام ابداعك وتميزك

اهلا بيك يا غالى
سعيد بمرورك


الساعة الآن 08:02 PM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w