منتديات بنات مصر

منتديات بنات مصر (https://forums.banatmasr.net/)
-   منتدى يوميات الاعضاء (https://forums.banatmasr.net/f61/)
-   -   بصراحة مع Bright Brain (https://forums.banatmasr.net/msryat445257/)

مِسكُ الشَهادة 11-30-2013 10:49 PM

بصراحة مع Bright Brain
 


ما زلنا نمضي لعرض وجهات النظر المختلفة
ونمضي بشغف لإستضافة المزيد من الإخوة
الأأفاضل وفقهم الله وأسعدهم جميعا ً ...
ضيفنا لهذا اليوم الحقيقة أنه ضيف نادر
وهذا اللقاء الأأول ما بيننا في حوار أو لربما
لأول مرة أراه في حوار كخالد ... يراه البعض
غامض هنا لأنه يتواجد بشكل كبير في قسم معين
إلى حد ٍ ما فأحببنا أن نقتحم عليه ذاك القسم
رغبة ً منا لإستضافته بعض الوقت في حوارنا هذا
إنسان متميز راقي التفكير رصين التصرف
إنه الأخ الفاضل :_

( Bright Brain )

أهلا ً وسهلا ً بك أخي
ننتقل لمضمون الحوار ...





السلام وعليكم ورحمة الله وبركاته


وعليكم السلام ورحمة الله وبركاته


إزيك يا د.أحمد طمنا عنك

الحمد لله دائما

عاوزين نخرجك من الصفحات شويا هههه

تحت أمرك

العفو الأمر لله أولا ً وأخيرا ً تشرفنا والله
ــــــــــــ



1_ د. أحمد حدّثنا عن نفسك قليلا ً لمن لا يعرفك ؟

شاب مصري بسيط من عائلة أرستقراطية
,, طالب في كليه الصيدلة جامعة الأزهر ,, كفاية كده ....!!
ــــــــــــ


2 _ كيف كانت لحظة معرفتك بهذا المنتدى وكيف تصفه من حيث
النشاط والعلاقات ما بين الأعضاء ؟


معرفتي بالمنتدى كانت وانا في اولى
ثانوي أو تانيه مش فاكر قوي ,, بنت عمي
عرفتني على المنتدى وقالت لي اشترك فيه
,, ففضلت متابع المنتدى فتره كبيره لحد ما اشتركت فيه
أصف المنتدى من حيث النشاط : فهو المنتدى
نشط عموما ويزيد نشاطه في وقت الأجازة الصيفيه
, بيعمل بيات شتوي جزئي
من حيث العلاقات بين الأعضاء :
فهو فيه أعضاء محدش يعرف عنهم حاجة ،،
وفيه إللى معروف معرفه شخصيه ،، وفيه إللى اتعرفوا
هنا على المنتدى واتطورت علاقتهم وبقوا بيتكلموا
على الشات أو على الموبايل ،، بس البداية كانت هنا
ــــــــــــ

3_ نلاحظ كثيرا ً حصر تواجدك في قسم الصفحات ما السبب
الرئيسي لذلك ؟


السبب الرئيسي اني لما بلف في المنتدى
بلاقي حاجات متكرره كتير جدا من الفيس بوك أو من تويتر
وانا هناك على طول فمفيش داعي للتكرار
وكمان المواضيع أغلبها بيكون متكرر في بقيت الأقسام
أما إني بدخل قسم الصفحات فدا لإنه كل واحد
بيعبر عن إللى جواه فيه طبعا مش بيعبر بكل حاجة
بس يكفى انه بيجيب كلام من عنده هو إللى كاتبه

ــــــــــــ

4_ ماذا تمثل لك مدونتك وهل هي سياسية بالدرجة الأولى
أم متنوعة وفق الحدث برأيك ؟


تمثل لي بمثابة شبه فضفضه بنسبه قليله
وبالنسبه لموضوع إنها سياسيه ،، فهي مش
سياسية بالدرجه الكبيره ،، ولكن يغلب عليها الطابع
السياسي الأيام دي نظرا لما يحدث حولنا فالموضوع
كبير جدا ،، والسياسه هي إللى مجمعه الكل في
الكلام ،، يعني مثلا مش معقوله هكون راكب ميكروباص
وأتكلم مع الناس فيه عن آخر بحد دوائي دكتور فلاني عمله ...!!
ــــــــــــ

5_ كيف تقيم علاقتك بالأعضاء وما مدى تقبّلك للرأي الآخر ومتى
تحبذ عدم الرد والكلام ؟


علاقة محدوده جدا جدا جدا
لأني بعتبر دا عالم وهمي بس فيه بعض
الأعضاء هنا أتمنى لو تجمعني الظروف بيهم
تقبل الرأي الآخر دا شئ أساسي في أي
حد بيتعامل مع الناس وإلا ميتكلمش او ميخرجش
من بيته احسن
عدم الرد والكلام دا بعمل بيه
لما يكون النقاش غير بناء فدا بيكون هباءا منثورا فببعد عنه
ــــــــــــ

6_ هل أنت َ شخص غامض أم إنطوائي أ م أنك شخص إجتماعي ولكن
بحدود معينة ؟


هنا في المنتدى "العالم الافتراضي" غامض إلى حد ما
في الحياة الطبيعيه إجتماعي من الدرجة الأولى
ــــــــــــ

7_ هل هناك فرق ما بين د. أحمد هنا وفي
الواقع أم أن كلاهما يكمل الآخر ؟


فرق كبير جدا
بس هي نفس المبادئ
ــــــــــــ

8_ هل تعتقد أن الخلافات السياسية في الخارج ساهمت بشكل كبير
للتأثير على العلاقات ما بين الأعضاء هنا وهل أنت مع منع المواضيع السياسية
لفترة لتهدئة الإمور كما تم ذلك فعليا ً سابقا ً ا م لا ؟

طبعا الخلافات أثرت بشكل كبير هنا ودا لاحظناه كلنا
لا طبعا أنا ضد منع أي مواضيع سواء كانت سياسة أو غيرها
لأن كل واحد بيعبر عن أخلاقة
فسيب الناس تعرف مين إللى بيتكلم
دا من باب " تكلم حتى أراك "
ــــــــــــ

9_أنت من المعارضين بشدة لما حدث في 30 يونيو .هل تعتقد
أن 30 يونيو هي جزء من 25 يناير أ م أنها موجة قوية للقضاء عليها ؟

30 يونيو هو الثورة المضاده بعينها
محت من الوجود حاجة اسمها 25 يناير
فدا طريق ودا الطريق المعاكس له
ــــــــــــ

10_ كيف تقبّلت فكرة الأإفراج عن مبارك وهل تعتقد أن يعود النظام
السابق للحكم كما يقال أم أن ذلك إشاعات فقط ؟

كان متوقع جدا الافراج عن مبارك ,, بعد مهرجان البراءة للجميع
وهو النظام كان مشي عشان يرجع
النظام زي ما هو متغيرش غير الرأس ورجعت تاني بعد 30 يونيو
ــــــــــــ


11_ هناك من يرى أن الخلاف الآن ما بين
الإخوان المسلمين والنظام الحاكم فقط كيف ترد على ذلك ؟

الخلاف الآن بين الحق والباطل
ودائما يكون الخلاف كذلك
النظام الآن ما هو إلا عصا في يد أمريكا وإسرائيل
ودا كله لإن الغرب أيقن قوة المسلمين إذا اتحدوا
فبدل ما ييجي يحارب ويقتل في الناس هنا بنفسه
فجند له رجال مخلصين ل هنا يقوموا بمهمته على
أكمل وجه
ــــــــــــ

12_ هل كنت تشارك في الإعتصامات والمظاهرات التي كانت وما زالت
تقام ضد النظام الحاكم أم أن هناك أسباب قسرية كانت تمنعك من ذلك ؟

شاركت في الاعتصامات والمظاهرات في ميدان
النهضه وفي ميدان رابعه وقبلهم في ميدان التحرير
أيام 25 يناير وأيام المجلس العسكري
وإلى الآن مستمر لحد سقوط الانقلاب العسكري
أو إني أعتقل أو إني استشهد

ــــــــــــ
13_ ما هو رأيك بالدستور الجديد ؟

ما يتم عمله في الخفاء فاعلم أنه باطل
وما يتم وضعه من طائفة تطلق على
نفسها فنانين وهم أهل للعهر فهو باطل
ــــــــــــ

14_ ما هو رأيك بقانون التظاهر الجديد وهل تعتقد أنه سيحد
من المظاهرات أم سيزيد من قوتها ؟


ما هو إلا شكل قانوني لما يحدث من قبل
قوات الأمن لمواجهة التظاهرات المؤيده للشرعية
يعني كان فيه قانون تظاهر أيام فض رابعه والنهضه ,,, لأ
كان فيه قانون تظاهر لدخول الحرم الجامعي في كل الجامعات ,,, لأ
هما بس عاوزين غطاء قانوني لأفعالهم الإجرامية
وربنا هيرده لهم عن قريب إن شاء الله
ــــــــــــ

15_ ما هو رأيك بالقضاء الحالي وكيف تقبلت فكرة إعتقال الفتيات
في الإسكندرية والحكم عليهم لـــ فترة ما بين 11 _ 15 سنة تقريبا ً ؟


القضاء الحالى اول من يكسر القوانين الذي يضعها
وهذا بغض النظر عن أنه مستنقع للفساد
مهو القاضي دلوقتي عباره عن إيه واحد جاب 60 %
في الثانوية دخل حقوق طلع منها بمقبول بس أبوه
قاضي بقى قاضي زيه
هي دي الحكايه كلها
أما من يدخلون حقوق ويحصلون على
إمتيازات بتلاقيهم شغالين في أعمال البناء
والخرسانه #حقيقة مؤكده
ــــــــــــ

16_ما رأيك بالرئيس الحالي عدلي منصور وهل تعتقد أن الأزمات
الإقتصادية والسياسية والأمنية قد إنتهت أم أنها إزدادت بشكل أكبر برأيك ؟

حماده بالجنزبيل
أولا عليه من الله ما يستحقة
لأنه أثبت للعالم أجمع أنه كان قاضيا فاسدا
كيف أنه كما يطلق على نفسه رئيس أعلى محكمه في مصر
وهو بنفسه يكسر القانون الذي وضعه
هو افضل من تنطبق عليه مقوله " لولا أنت ما ظلموا "
ويستحق لقب طرطور عن جداره
،،
الأزمات في تصاعد مستمر يوما عن يوم
وللأسف إلبسطاء يخافون أن يطالبوا بحقوقهم
خوفا من القتل والاعتقالات
وإن استمر الوضع الحالى على ما هو عليه
فخوفنا الشديد من حدوث ثورة جياع
لأننا نريدها ثورة كرامه أولا
ــــــــــــ

17_ ما هو رأيك بالإعلام الحالي وهل تعتقد
أن نقده إختلف حاليا ً عما كان عليه زمن الرئيس
محمد مرسي ام لم يتغير؟


الأعلام إعلام موجه له رسالة يؤديها فقط
عاش الملك مات الملك
ولكن ليس كل ملك بل الذي يدفع لهم أكثر
باختصار هم يسعون وراء مصالحهم الشخصية
ولا يهمهم نقل الحقيقة من عدمها
،،
أفضل مثال على ذلك
حوادث القطارات
سد أثيوبيا
وصاحب المقوله الشهيرة " طول ما الدم المصري
رخيص يسقط يسقط أي رئيس "
دا كان أيام مرسي
إنما دلوقتي
لو دم الاخوان وأنصارهم عادي إيه يعني
ــــــــــــ

18_ ما هو رأيك بموقف حزب النور
والأزهر والكنيسة من كل ا لأحداث فيما
بعد 30 يونيو ليومنا هذا ؟


حزب النور : اختلافي معاه دينيا من زمان جدا قبل ما يكون سياسيا
ونشأت بيني وبين بعض أتباعه مناظرات كبيره في مساجد
مختلفه وفي النهايه كانوا بيحطوا نفسهم في موقف
وحش جدا بسوؤ فهمهم للدين كويس
أما رأيهم السياسي فهو لا يعدوا كونهم عصا
لأمن الدوله كما كان ايام مبارك كنا نمنع من
الاعتكاف في المساجد في رمضان وهما كانوا
يعتكفوا بكل حرية فدا إن كان يدل على شئ
فيدل على انهم أمن دولة من زماان جدا
دول الأزهر : من يتحدث باسم الأزهر الآن
ما هو إلا قله قليلون من علماء الأزهر
هذا بغض النظر عن شيخ الازهر إللى
هو لجنه سياسات الجزب الوطني أساسا
وأحمد كريمه وسعد الدين الهلالي ودول كلنا
عارفين تفكيرهم وآرائهم منحطه إزاي
فالأزهر كإدارة الآن ،، فاسده بمعنى الكلمه
الكنيسة نفس النظام : مشكلة إدارة ورؤساء لهم
،،، أعرف ناس نصارى كويسين جدا وآراءهم السياسة
رائعه بغض النظر عن اختلافهم مع الاخوان
وفي نفس الوقت أعرف واحد معرفة شخصية كان
واعظ سابق في كنيسة مش بحب آراؤه السياسة
فالمشكله مش مع اخواننا النصارى ،، المشكله
في إدارة الكنيسة ليس أكثر

ــــــــــــ

19_ كيف تفسر موقف قطر وتركيا من رفض ما حصل في 30 يونيو؟

قطر كان موقها واضح من نظام مبارك من زمان
أما تركيا فهي لقت دولة عاوزه تكون فيها نهضة حقيقة
فأرادت أن تأخد بيدها لكي تكون قوة معها في منطقة الشرق الأوسط
ــــــــــــ


20_ برأيك لماذا تم طرد السفير التركي وعلاقة شبه منقطعة مع تركيا
وهل انت مع ذلك أم لا ؟


دا من حسن حظة
وهي فين الدولة إللى لسه علاقتنا منقطعتش بيها غير الامارات واسرائيل
ــــــــــــ


21_ هناك من كان يتهمكم بأن قادة ا لجماعة
يتاجرون بالفقراء وهم وأبناءهم يعيشون في القصور كيف ترد على ذلك ؟

لو أن الاخوان يتاجرون بالفقراء وموضوع زيت وسكر
كان ذلك لينقطع بعد الانتخابات أو انه ينقطع في ظروف مثل هذه الأيام
ولكن لم يقطع الاخوان مساعداتهم لأي شخص حتى يومنا هذا وانا شاهد على ذلك
موضوع يعيشون هو أبنائهم في قصور دي حلوة قوي
أعرف واحد معرفه شخصيه من قيادات الاخوان معاه فلوس
انه يعيش كل يوم في قصر دا بناءا على تجارته وانه من عائله غنيه
بس تيجي تشوف حاله
عايش في بيت عادي جدا في قرية صغيرة
ولكن شهاده حق انه يعمل عمل الخير ولا يحصيه على أحد
وأولاده عاديين جدا أصحابنا وأصدقائنا
وفيه واحد من أبناؤه من كان من مصابين موقعه الجمل
ومن مصابين محمد محمود ومن مصابين الحرس الجمهوري
ومن إللى حضروا فض رابعه ومن اللي استشهدوا في أحداث مسجد الفتح
دا حال قيادات جماعه الاخوان
ــــــــــــ

22_ محمد البرادعي ...عمرو حمزاوي ..محمد الجوادي ..هشام قنديل
حركة 6 ابريل ...الخ كل هؤلاء لا علاقة لهم بالإخوان كيف تصف مواقفهم
التي تغيرت بعد احداث رابعة والنهضة فجأة ضد النظام الحالي وغيرهم الكثير؟

فيه من الأسماء المذكوره دي من لم يتغير موقفه
مش معنى ان البرادعي قدم استقاله وسافر خارج البلاد انه غير موقف
ومش معنى ان حمزاوي قال له لمتين انه غير موقفه
هؤلاء أناس رضوا بالظلم فلن يتحرروا أبدا
هشام قدنيل من الناس إللى كان موقفها واضح من البداية
ــــــــــــ

23_ تأسست جما عة الإخوان المسلمين عام 1928
هل تعتقد أن الفترة الحالية هي أشد الفترات عليها
أم أنها فترة وستنتهي كسابقاتها ؟


الفتره الحالية بالنسبة للإخوان من حيث الشده فهي أقل من المتوسطه
لأن ما يحدث الآن ما هو إلا تكرار لسنه 1954
مع العلم أن من مات من جماعه الاخوان في هذه الأيام
هو عدد الاخوان ككل عام 1954
وهي فتره وستنتهي عندما ينتبه عامة الشعب ويفوقوان مما هم فيه
ــــــــــــ


24_ نــود منك رسالة معينة لكل من :_


1_ الإمام الشهيد حسّن البنّا
رحم الله رجلا عرف الحق فاتبعه وحمل الناس على اتباعه
ــــــــــــ
2_ فضيلة المرشد د. محمد بديع
عظّم الله أجر رجل في شيبته وجزاه عن ابنه عمار كل خير وتقبله في الشهداء
ــــــــــــ

3_ المهندس خيرت الشاطر

عقليه نادره الوجودد في زمننا ،، لا تجزع مما أنت فيه الآن فهذا ليس بالجديد عليك
ــــــــــــ
4_رجب طيب اردوغان
قائد نهضة تركيا ،، استمر في حلمك وما تريد فعله ولا تنتظر
من أجيال العرب التي ارتضت الظلم شيئا عليك بالأجيال القادمه عليك بالأجيال التي تربت على العزة والصمود فمهم من تحتاج إليهم من أجل تحقيق نهضه للإسلام والمسلمين
ــــــــــــ
5_ د. محمد البلتاجي
الثائر والمناضل الشجاع ، جزاك الله خيرا عن ابنتك وأولادك ،، دمت صامدا كما عهدناك
ــــــــــــ
6_ الفريق عبد الفتاح السيسي
رجل مخابرات من الطراز الاول ولكنه استغل منصبه كوزير
للدفاعه ورغمته الوصوليه للحكم ، فلم يعمل لصالح
البلاد بل أنه أغرقها في بحر من الدماء ،، فجزاه الله بكل ما فعله
أقول له ، اتق يوما تقف فيه بين يدي الله
ــــــــــــ
7_ الشهيد سيّد قطب
المفكر العبقري والفيلسوف المسلم ، تقبلك الله في الشهداء والصالحين
ــــــــــــ
8 _الراحل جمال عبد الناصر
نفس عقليه السيسي انقلابي ووصولي وراغب سلطه وحكم
دا بغض النظر عن انه ضيع سوريا والسودان وسيناء
له انجازات بس عيوبه تفوقت بكثيير
ــــــــــــ
25_ برأيك كيف ستكون نهاية الثورة السورية المباركة ؟

عندك في سوريا حاجتين
جيش حر وجيش نظامي
الاتنين فيهم الحلو والوحش
لما الصالحين في الجيش الحر والصالحين في الجيش
النظامي ينضموا مع بعض ويقضوا على المخربين في الطرفين
بكده هتنتهي الأزمه السورية
لأن الوضع في سوريا صعب جدا ومختلف تماما عما
يصل إلينا في وسائل الاعلام
ــــــــــــ

26_ كيف تقبلّت محاكمة الرئيس محمد مرسي وما رأيك بها؟

محاكمة الشريف ،، هكذا الأحرار في دنيا العبيد
دي مش أول مره يتحاكم فيها مرسي
ودي مش أول مره يتحاكم فيها رئيس بعد انقلاب
محمد نجيب كان نفس النظام برضو بعد انقلاب 54
ــــــــــــ

27_ هل تعتقد أن هناك ثورة قادمة في مصر لإسقاط النظام الحالي
أم أنه سيضبط الإمور بالقوة ؟


سيضبط بالقوة لفتره إلى أن يقوم الشعب بثورة كرامة ولكن الثورة آتيه لا محالة

ــــــــــــ

28_ هناك من طالب بترحيل
الإخوان المسلمين من مصر إلى تركيا وقطر
كيف ترى ذلك؟


تصدق فكره ،، بس ياريت ببدؤا بيا كنموذج هههههههه
وأجيلك بقى يا هندسه في تركيا ونعمل احلى شغل هناك ههههههههههه

دا إنتا تشرفنا والله هههههههه

ــــــــــــ

29_ أغنية علي الحجار إنتوا شعب
وإحنا شعب كيف تفسرها وهل تعتقد أن الوضع
الحالي المؤسف أوصلنا لهذة النتية فعلا ً ؟


انت عندك طائفه كبيرة من الشعب بتحب الحاجات دي
أي هيصه وخلاص
ومفيش أي وعي خالص
بالنسبه للاغنيه فهي فيها تجوزات كتير جدا في
موضوع تعدد الربوبية وكلام كبير قوي إللى دارس
علم كلام أو توحيد هيفهم قصدي ايه
ــــــــــــ

30_ حدثت مجازر في رابعة والنهضة ومستمرة ليومنا هذا وفي المقابل
كان هناك شهدا ء من الجيش سؤالي :- كيف ترى العقلية العسكرية وهل
تؤمن بالمصالحة العامة أم لا ؟


جنود وضباط الجيش ليس في يدهم أي
شئ غير تنفيذ الأوامر التي تاتيهم من قياداتهم ليس أكثر
مشكله إذاره برضو
ــــــــــــ

31_ كيف تفسر ما يحدث في جامعة الأزهر والجامعات المصرية سواء ؟


محاولات عنيفه لتكميم الأفواه
جامعه الأزهر توضح المعنى الحقيقي للأزهر هم يخافون من
ذلك لأنهم أوصلوا للشعب أن الأزهر كاملا موافق على ما
يحدث من انتهاكات واعتداءات على الشعب
وبحكم أن أغلبيه طلاب الأزهر يحفظون القرآن ومنتشروف
في كل مكان فلهم تأثيرهم على الناس
فهم يريدون تكميم هذه الأفواه التي تثور ضد الظلم
أما باقى الجامعات فحالها ليس بالبعيد عن جامعه الأزهر
يسلطون البلطجية يوميا على الجامعات من أجل ردع التظاهر ولكن هيهات هيهات
ــــــــــــ

32_إعتقال علاء عبد الفتاح والمطالبة
بإعتقال احمد ماهر وإستقالة عدد من
اعضاء تمرد بعد أحداث مجلس الشورى كيف تفسر ذلك؟


الانقلابيين خايفين ان الشباب إللى صعدوا على
ظهره مثل تمر وعلاء عبدالفتاح وأحمد ماهر
وغيرهم انهم ينضموا لصفوف المناهضين للانقلاب وانضمامهم لتظاهرات الاخوان
من أجل ذلك قاموا بتلك الحركه
ومن الممكن تكون لعبه كبري من أجل تلميع القضاء ويخرجوهم بعد فتره جس بسيطه
لعدم اكتفاء الادله
ــــــــــــ

33_ هل تعرض أحد من أصدقاءك أو المقربين لك أو أنت شخصيا ً لسوء
في ظل الأوضاع الراهنة أ م أن كل شيء بخير والفضل لله ؟

بالنسبه للاستشهاد
فأستاذي والصديق المقرب جدا من والدي استشهد في فض رابعه
وأصدقاء أصدقائي استشهد منهم كتير جدا في رابعه
وفي كل مقابله او أي لقاء أو حتى كلام عادي لازم نقعد نتذكرهم دائما
وبالنسبه للإعتقالات ففيه 5 من أعز أصدقائي في المعتقلات
دلوقتي وفيه منهم إللى أخد أحكام ومستقبله ضاع
ــــــــــــ

34_ مع أم ضد مع التوضيح لو احببت:_

1_ الإفراج عن المعتقلين ووقف الملاحقات في سبيل حل سياسي عام
أعد الحق لأصحابة وأنا أوافق " الحق كاملا "

2_الفكر الليبرالي هو فكر حر يدعو للحرية ويحترمها
الليبراليين يفهمون الحريه بطريقه خاطئة جدا
مفكرين إن أي حد مش معاهم يبقى ضدهم
لهد فكر عجيب جدا
وهو الاحساس بالظلم دائما
ليا واحد صاحبي ليبرالي قوي ومن الناس
إللى اعتقلت في احداث مجلس الشورى الأخيره بس افرج عنه في نفس البوم
المهم دا بقى كل ما يشوف واحد راكل عربيه كويسه
يروح يبوظ له فيها حاجة ويقول أصل دا غني ومش حاسس بالفقراء
طيب انت إيه إللى اطلعك على إللى جواه
،،
حاجة كمان في الليبراليين
شاركوا في 30 يونيو
وساهموا بشكل رئيسي في الانقلاب
وفضلوا ساكتين على قتل وسحل وسجن الاخوان
المسلمين طيله الفتره دي كلها 5 أشهر
وأول ما الداخليه فضت مظاهره لهم بدأنا نسمع
صوتهم ويقولوا انهم الثوار الحقيقيون
ثوار إيه دول إللى بيعملوا بيات صيفي دول
ــــــــــــ
3_الفكر الإخواني فكر متشدد
مش متشدد أكتر ما هو بيحترم الديموقراطيه وبينفذ ما اتفق عليه الأغلبيه
ــــــــــــ
4_السلفيون هم رجال المرحلة القادمة في اي انتخابات
ولا عمرهم هيكونوا حاجة تاني للأسف
ــــــــــــ
5_مصر في طريقها للتطور
ولكن بعد أن تسترد كرامتها من خاطفيها ومن انقلبوا عليها
وبعد أن يأخد كل مواطن مرامته المهدره
ــــــــــــ
6_ حلمي القادم هو الهجرة من مصر
إذا كان كذلك فهو من أجل البحث العلمي ليس أكثر
لأن ما أخطط له في مجال البحث العلمي صعب يتم
في مصر أو في دوله بتتسرق زي هنا
خلاف ذلك فأنا أعشق تراب هذا الوطن واأتمنى اني
أعيش في قرية صغيره وأساعد الناس هناك على قد استطاعتي
ــــــــــــ
نخرج من السياسة بقى :_

أخيرا دا أنا تعبت من الكتابه
وإللى وصل في القراءه لحد هنا زمانه بيشتمنا في سره

ــــــــــــ

35_ بما أن تواجدك في قسم الصفحات كثيرا ً نود معرفة التالي :-

1_ ما هي أكثر المدونات تنال إعجا بك ولماذا ؟

في كل دقيقة شخصية
السبب لأن البشمهندس عبدالرحمن كتاباته بتدل
على انه مثقف على اعلى درجات الثقافه ومحترم ومتدين
وبيقول إللى في قلبه وبيتكلم بكل صراحه في أي موضوع
وكمان فرق السن بيني وبينه حوالى شهرين أو أكتر بحاجات
قليله فالأفكار قد تكون متقاربه بشكل كبير بالرغم اني
متكلمتش معاه قبل كده كتير أو كلام سطحي مرتين أو تلاته
ــــــــــــ

2_ رأيك الشخصي بالمدونات التالية :_

1_في كل دقيقة شخصية ؟

مدونه أبا خديجه ،، اتكلمت عنها في السؤال إللى قبل ده
ــــــــــــ

2_تنآسيت صمت عآلمي وأيقنت وتأكدت بأنني ? آستثنآء ? ( وردة خجوله )!

للاسف مش متابعها ،، بس هبقى أتابعها إن شاء الله
ــــــــــــ

3_حائره..على جسر من الذهب

صاحبة الكلمات الراقية
ــــــــــــ

4_حياة الزبادي

سهر ،، إللى في قلبها على لسانها برضو
أحيانا بتكتب على طول وأحيانا بنتقطع على الكتابه بشكل مفاجئ
بس من المدونات إللى بتابعها دائما
ــــــــــــ
36_هل سنرى د. أحمد خارج الصفحات قريبا ً
أم أن الأمر بعيد عن ذلك؟

على حسب الوقت أو الظروف المحيطه
أو إذا كانت هناك حاجة تستدعى المتابعه
ــــــــــــ

37_ ما هي المواضيع التي تحرص على متابعتها
في المنتد ى وإن لم ترد عليها ولماذا ؟


لما يكون حد كاتب قصه من حلقة واحده بس طويله
زي إللى كان د.طارق بيكتبهم زمان ،، بس شكله مكسل قوي اليومين دول
وكان فيه واحده كاتبه قصه طويله من حلقة واحده وجت
في المواضيع التي يجب مشاهدتها نالت اعجابي بصراحه بسرد الأحداث وموضوعها ككل
بس للأسف متسعش الوقت ساعتها اني أعلق وأقول رأيي فيها والملاحظات عليها
ــــــــــــ

38_ كيف يكون القلم حرا ً من وجهة نظرك ؟


لو كان أولا صاحب مبدأ
ثانيا لو كان مش هيتعاقب لو هاجم القيادات أيّن كانت نوع القيادات دي
ــــــــــــ

39_ وجه رسالة معينة لعضو معين وفق إختيارك أنت ؟


لأي عضو
حكم عقلك وقلبك قبل كل شئ
تعلم دائما
اكتسب مهارات
حب الناس ،، كن اجتماعيا ،، متسمحش لحد
انه بحجر على رأيك أبدا ،، شارك ،، ابدع ،، اعمل إللى
انت شايفه مناسب ،، اخطئ وتعلم من أخطائك
ــــــــــــ

40_ رسالة للإدارة ؟


فيه قوانين مكتوبه في قوانين المنتدى
والإداره عارفه ان المعظم بيخالفها ومع ذلك بوضو موجوده
بس هي مش مسببه مشكله مع حد فخلاص عادي بقى
دي كانت ملاحظه مني على الاداره من اول ما دخلت هنا
ــــــــــــ
41_ نصيحة لأخوك خالد ؟
وفقكم الله يا بشمهندس لما فيه الخير دائما
وابقى قلل الأسئلة شويه =D =D

ربنا يسعدك يا غالي
وسامحنا ع الاسئلة قلنا اول مرة نستضيفه
واخرجناه من قسم الصفحات شويا هههه
فلازم تكون الاسئلة طويلة شويا ع الاقل
ــــــــــــ


42_ كلمة أخيرة من د. أحمد للجميع ؟
"واتقوا يوما ترجعون فيه إلى الله "
ــــــــــــ

ربنا يكرمك يا رب ونورتنا وشرفتنا
بشكرك ...
ــــــــــــ

ابراهيم دياب 11-30-2013 11:05 PM

موضوع رائع

حوار شيق جدا وضيف محترم

نحترم ارائه

موضوع جيد بل ممتاز اخى خالد

وضيفك ذو عقليه ممتازة

شكرا لكم على هذه المتعة الراقية






احساسى صحيح 11-30-2013 11:18 PM

حلقة جميلة واراء راقية
تدل على رجاحة عقل دكتور احمد ربنا يحفظه ويحميه
انا من متابعى مدونته وبيعجبنى جدا اراءة
واتفق معاة مائة بالمائة فى كل ردودة بدون استثناء
ربنا يوفقه بحياتة يا رب
وبعلمة ينفع وطنة
شكرا خالد حلقة فوق الممتازة
تقبل تحياتى لك ولضيفك الكريم

morshooo 11-30-2013 11:29 PM

فى البدايه منور يا خالد اليوميات
وتوبيك مميز كالعادة والضيف منور اليوميات
بس طبعا بختلف معاه فى تقريبا 80% من كلامه
بدايه من كرمع عن المنتدى وعالم النت


اقتباس:

لأني بعتبر دا عالم وهمي


يعنى معتقدش انه لدرجة الوهم والا مكنتش عملت صداقات
مع اشخاص من المنتدى وبتقول نفسك تقابلهم وتشوفهم

كمان كلامه عن براءة مبارك بس حابب اقوله
مخدش بالك من مهرجان ( البراءة للجميع )
الى كان عامله مرسى ومش كدا وبس
دا كان بيكرمهم كمان ^_^ والا ناسى الزمر
استقبله فى القصر الجمهورى
تقريبا كان بيحتفل معاه باغتنيال السادات .


بخصوص الطرطور يعنى اخدنا ايه من الاستبن
عشان دلوقتى تهاجم الطرطور لو حسبتها
مين نجح الاستبن ومين خله الطرطور رئيس
هتلاقى الشعب نفسه وانتا واحد من الشعب


بخصوص كلامك عن الازهر والكنيسه
مش شايف انك اقل من انك تقول عليهم
ان أرائهم منحطه .


يعنى مش عايز اطول بس بجد
اكتر رد حسيت انك والا بلاش عشان
محدش يزعل هو ردك دا عن الشخص دا


[color=#]
اقتباس:

د. محمد البلتاجي
اقتباس:

الثائر والمناضل الشجاع ، جزاك الله خيرا عن ابنتك وأولادك ،، دمت صامدا كما عهدناك


بزمتك انتا مصدق الكلام دا


سؤالى ليك انتا وكان نفسى خالد يسئلهولك

1 / ياترى الاخوان ركبو ثورة يناير والا هم مفجرين الثورة ؟


2 / كنتو فين ايام مبارك لما كان الاخوانى بيخاف يقول انا انتمى لجماعه الاخوان مشوفنكوش ليه فى الشارع بتتظاهرو ؟

3 / ياترى انتا مقتنع بان ( مرسى ) يستحق ان يكون رئيس والا عشان مرشح من ( الاخوان ) ؟


دمعه حائره 11-30-2013 11:34 PM

حوار رائع مع دكتور احمد انسان خلوق ومحترم واكيد بتابع مدونته وبتعجبنى جدا
وطريقه تفكيره ماشاء الله عقليه ممتازة ربنا يحميه هوا وكل اللى زيه
شكرا لرائيك فى مدونتى من بعض ماعندكم
بالنسبه لمخالفات القوانين اى مكان فى الدنيا مش بيمشي تمام على طول الخط
اكيد فيه اخطاء ومخالفات المهم حجمها ومدى ضررها للاخريين والقدره على تحجيمها
والقوانين ماهى الا للتنظيم واحترام الاخريين مش اكتر
تسلم خالد مجهود عالى واستضافه جميله

خارج عن القانون 11-30-2013 11:49 PM

اقتباس:

[color=#]_إعتقال علاء عبد الفتاح والمطالبة
بإعتقال احمد ماهر وإستقالة عدد من
اعضاء تمرد بعد أحداث مجلس الشورى كيف تفسر ذلك؟


الانقلابيين خايفين ان الشباب إللى صعدوا على
ظهره مثل تمر وعلاء عبدالفتاح وأحمد ماهر
وغيرهم انهم ينضموا لصفوف المناهضين للانقلاب وانضمامهم لتظاهرات الاخوان
من أجل ذلك قاموا بتلك الحركه
ومن الممكن تكون لعبه كبري من أجل تلميع القضاء ويخرجوهم بعد فتره جس بسيطه
لعدم اكتفاء الادله
[/color]
التخوين

ديه اكتر حاجه بكرهه فى مؤيدين نظام مرسى

ان اى حاجه واى حد مش معاهم يبقا ضدهم

لو اتحبسو يا عم دول سجنوهم علشان خايفين منهم

ولو طلعو براءه يا عم ديه تمثلية وكل حاجه مطبوخة


ارحمو امى التعبانه

اندرسون 11-30-2013 11:49 PM

افضل برنامج حوار في المنتدي

اسلوبك اعجبني في الاسئله

واجابة الدكتور احمد كانت ممتازه

تقبل تحياتى

مِسكُ الشَهادة 12-01-2013 12:10 AM



أولا ً يشرفني حضور الجميع ...
وعاوز أقول حاجة بس ...
التوبيك دا أنا إستضفت فيه ممكن عدد كبير جدا من الأعضاء لا حصر لهم
ولو الكل يرجع للحلقات حيشوف إنها متنوعة ومن كل الإتجاهات
وممكن إلي بيتعارضوا مع تفكيري هم ليهم نصيب الأسد في كل الأإستضافات دي
متلا في ناس معارضة ليا كنت بستضيفها مرة واتنين وتلات
وطبعا ً زي ما الكل بيعرف انا من أول ما عملت الموضوع دا بحب أترك مساحة كاملة لأي عضو يتكلم
والكل يرجع لكل الحلقات حيشوف دا ...لا عمري حجرت ع رأي الضيف أو قللت منه أو تدخلت بشكل مباشر في رأيه لاني بجد بحب أسمع وأشوف كل الأراء ووجهات النظر بغض النظر عن مدى توافقي معها او رفضي لها
إلا اني بقول في الاول والاخير هيا وجهة نظر تخص الضيف فقط من اجل كدا انا لما بكون ضيف في برنامج معين بختلف جدا عن اني اكون مضيف ...فلما بكون ضيف انا بناقش رأيي الشخصي مع الكل ومع اي استفسار سواء كان كبير او صغير بينما لما بكون
مضيف زي دلوقتي بحاول ادي فرصة كاملة للضيف يتكلم ومبحبش اتدخل في رأيه أيا ً كان مع او ضد ودا من اول حلقة في البرنامج دا لدلوقتي ...
يحق لكل عضو بغض النظر عن رأيه وموقفه من رأي الضيف مناقشتة في رأيه ووجهة نظره كما يحق للضيف أن يرد أيضا ً
ولكن الأهم في كل هذا الأمر هو عدم تجاوز القوانين
سواء في النت او في الواقع وفق الاحترام المتبادل لوجهات النظر كلها بغض النظر عن صاحبها ...
انا حبيت اوضح النقطة دي عن البرنامج بشكل عام وبتمنى محدش يخرج عن الاطار القانوني العام وكلنا امل بالجميع خير ومحبة
مع خالص التقدير والإحترام للجميع ...
خالد

العاشق الذى لم يتب 12-01-2013 12:11 AM

وحشنى انت ياخالد
ووحشانى حوراتك من زمان
حوارسياسى بالدرجة الاولى
واكييدي انا مماراق لى ماوجدته هنا
الاول اسلم على اخى الدكتوراحمد
صراحة اول مرة اشوف لها اى حاجة مش عارف العيب عندى ولاهومابيكتبش
المهم انسان رائع وراقى
وكل ماقاله انامعها قلبا وقالبا
كل التوفيق لكما
تشرفت بصحبتى ليكو
تقبلواتحياتى وودى

رووكه 12-01-2013 01:12 AM

بصراحه أول مره أتعرف على د/ أحمد

واضح أنه شخصيه محترمه موفق آن شاء الله

بس تعقيبى بلاش تغلط او تشوه صوره رمز

من رموز مصر جمال عبد الناصر

جمال عبد الناصر حارب وجاهد علشان انا وانت وغيرنا نعيش

وراح فيها شهداء ع حق الله .... والطبيعى انه مش لقى من الاخوان

غير الهروب وقت الجد ...

السادات طلع الاخوان من السجون وكان جزاءه مشاء الله

الموت وهو وسط ولاده

راجع تاريخك والووجه المشرفه اللى حكمت مصر

وانا مصريه وانت مصرى ويادوب أنت لسه بتطلع

للدنيا وانا عشت 32 سنه من عمرى

ومش هاجمت ولا اتعاملت زيك آنت بتتكلم

وكان الأخوان ملايكه وان الجيش او المتابعين ليه

شياطين

أنا بحترم وجهه نظرك واتمنى انك تحترم الراى الاخر

ومش نغلط ف الاول والاخر آحنا مصرين

مش نصين والمفروض مش نسمى بعض ده اخوانى

وده علمانى ولا ولا

دورك ودوى نوقف مصر من جديد بعيد عن اى

شعارات تانيه


ربنا يوفقك

ودائما يا خالد البرنامج ليه ضيوف مميزه

موفق دائما دعواتى


الساعة الآن 06:38 PM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w