|
جعفر يخطف نقطة ثمينة للزمالك ويضع مصيره في يده ! خطف الزمالك نقطة ثمينة من مضيفه وادي دجلة في الثواني الاخيرة ليتعادل الفريقين 2-2 في منافسات الجولة التاسعة عشرة للمجموعة الثانية في الدوري المصري الممتاز. http://forums.banatmisr.com/imgcache...817alsh3er.png تمكن اللاعب طلعت مصطفى من تسجيل الهدف الأول في المباراة لمصلحة فريق وادي دجلة ، بعد تمريرة عرضية من زمليه في الفريق مهاب سعيد. وفي الدقيقة الرابعة والاربعين تمكن عبدالفتاح الآغا من مضاعفة النتيجة مستغلاً خطأ دفاعي مشترك من فتح الله وعبدالواحد السيد ليصعب المهمة على الزمالك في اللقاء. الشوط الثاني ضغط الزمالك على مرمى خصمه في خطوة منه لادراك التعادل, ونجح في تقليص الفارق عبر عمر جابر دقيقة 66, http://forums.banatmisr.com/imgcache...821alsh3er.jpg وفي الوقت الذي كان فيه اللقاء متجها نحو خسارة الزمالك اهدى احمد جعفر الفوز لفريقه عبر رأسية جميلة في شباك الحضري مستغلاً عرضية متقنة. ورفع الزمالك رصيده الى 32 نقطة في المركز الثالث, وينتظره لقاء مصيري في الجولة الاخيرة امام صاحب الصدارة اتحاد الشرطة بـ 35 نقطة, ويلعب صاحب الوصافة بتروجيت 34 نقطة مع الاسماعيلي الرابع بـ 31 نقطة. |
في ماتش نجمه الاول وبلا منازع " الحظ " ! الحمد لله انه الزمالك استمر في عادة التسجيل ف اللحظات الاخيره :d كالمعتاد اتحرق دمنا طول الماتش وفرحنا ف الاخر :07: المفروض يتكتب علي مباريات الزمالك " خطر مشاهده كبار السن وذوي الامراض القلبية " ! كمية كور بتضيع بشكل غريب وعجيب ! تقريبا الشوط الثاني كل دقيقتين انفراد او تسديده خطر ضايعه من الزمالك الحظ كان معاند من كل النواحي , تحس انه له تار بايت عند الزمالك :d 3 كور في العارضه والقائم , و3 جمب العارضه بمللي زيطنا معاهم , و 3 للحضري ! وهما هجمتين طول الماتش واحدة تخبط بالغلط وتدخل لو اتعادت مليون مرة مش هتيجي اصلا ! والتانيه تفاهه وتدخل بفلسفة مدافع وتفاهه حارس ونحس فريق ! لو كان في توفيق للزمالك , كان نهي الماتش ب10 اجوان ! دجلة مش عارف كان معتمد علي خطه ايه بالظبط ؟! من بعد الجونين اللي اتقدم بيهم وهما بيلعبو ب9 مدافعين وبس والمشكلة انه حتي الدفاع مش عارفين يدافعو من الاساس ! في فرق اما بتتكتل بتتكتل صح وبتمنع عندك كل الطرق للمرمي ومتخلكش تشمها لكن دول اتكتلوا ودافعو والزمالك تقريبا كل دقيقة فرصه خطرة وجون محقق ! اداء كبير من الزمالك من كل النواحي وكان احق بالفوز لو في عدالة ف الكورة ! الشوط الثاني الفريق عمل كل حاجة في الكورة ممكنه ! اي حد بعد سكور الشوط الاول هينهار ومش هيقف علي رجله ! لكن الحمد لله الفريق اتمسك بالامل واجتهد وربنا اراد انه يكفائنا علي دا :] اهداف الوقت القاتل دليل علي روح الفريق دا ♥ وحتي بعد جون التعادل حاولوا علي الفوز والتوفيق عاندهم والعارضه منعت لو هتكلم بشكل فردي فاداء مميز جدا من توفيق في استخلاص الكرات وقتل المرتدات في بدايتها وكمان الزياده الهجومية المميزة منه في اوقات كتير لكنه طبعا معندهوش القدرة انه يخلص ومش مطلوبة منه الجزئية دي يكفي الاداء الكبير منه وكونه ثاني نجوم المباراه بعد الحظ ! عمر جابر فاق بشكل كبير ف الشوط التاني عن الشوط الاول حاله حال مؤمن زكريا الاتنين اتميزوا جدا في الشغل الهجومي للفريق الشوط التاني تحركاتهم وتمريراتهم عملت خطورة كبيرة للزمالك وجون عمر جابر كان نقطة فارقة في المباراه ادات الزمالك الامل لاخر دقيقة محمد ابراهيم والانانية والانانية ومحمد ابراهيم دا لسان الزمالكاوية كلها في كل ماتش حتي لو محمد ابراهيم متالق وعامل كل حاجة في الكورة ! محمد ابراهيم كان افضل لاعب في الزمالك في المباراه بعد احمد توفيق ! ومحمد مرر 3 كور انفرادات في اول 25 دقيقة لزملائه واحده لاحمد علي السيئ جدا وواحده لتوفيق وواحده لعبدالشافي اي واحده منهم كانت كفيلة تغير الماتش وكلهم قبل جون التقدم بتاع دجلة ! والشوط التاني كذلك محمد ابراهيم اميز واحد هجوميا ف الفريق وهو اللي بيوزع كل اللعب للفريق وعمل للاجناب تمريرات خطيرة جدا وقدر انه ياخد كور كتيره علي حدود المنطقة فاولات ولو علي ضربة الجزاء فهو الحظ فقط لا غير اللي ضيعها ! ومحمد احسن واحد بيشوط بلنتيات ف الزمالك وفي مصر في نظري ,, ويكفي انه لحد اللحظه مفيش حارس مرمي قدر يصدها منه ياريت نبطل ظلم بقي ونعرف انه اهم لاعب في الفريق ! تبقي الكارثة والمشكلة الكبيرة في الزمالك هيا الجانب الدفاعي والكوراث اللي بيعملوها فينا وحرقه الدم مع كل كورة اي هجمة مهما كانت بتبقي خطر بسبب الاختيارات الخاطئة من المدافعين ! مبشوفش حد بيسيب الكورة تنط غير المدافعين بتوعنا ! لازم وقفه كبيرة مع اللاعيبه دي علشان افريقيا مش كده ابدا واذا كان اي مهاجم تعبان بيتنجم علي حس الدفاع بتاعنا هنعمل ايه مع المهاجمين الافارقة اللي مبيهزروش :20: بالنسبة للاعبين وفي نقاط سريعه : # عبدالواحد السيد بعد بداية موسم خرافية , كوارث خرافية دلوقت , اظنه لابد يكون الختام ! # احمد توفيق معنديش كلمة اقولها غير شكرا ! # محمد ابراهيم المظلوم الاول من الزمالكاوية والوحيد اللي بيصنع الفارق ! # مؤمن شوط , وشوط , شوط سيئ , وشوط ممتاز , ناقصه اللمسة الاخيرة دايما ! # عمر جابر فاق جدا الشوط التاني وتحركاته مميزه جدا بس مشكلته النهايات ! # حازم يعمل 100 عرضية غلط , لكن عرضية الجون لازم تيجي من رجله ! # فتح الله وياسر ابوس ايديكم العبو بغباوة وطفشوا الكورة وخلاص والله هنفرح بيكم ! # مصطفي فتحي فينك ؟! # احمد جعفر عليا الطلاق اسيادنا راضيين عليك :D ميدو كالعادة بيخاطر بكل حاجة , وربنا كرمه كالعادة في تغييره الجون ! لو مكنش ميدو مجتهد وبيتعب وبيعمل اللي عليه , مكنش ربنا هيوفقه كده علطول ! اتحرق دمه زينا بالظبط ♥ لكن الحمد لله ربنا ستر وقدرنا نفرح في الاخر ! الفريق ف المجمل كان رائع والله وعمل كل الامكان وميأسش لاخر لحظه التعادل ظالم تماما والزمالك كان احق بالمكسب ! لو هنلعب بنفس الكورة والاداء دا قصاد الشرطة وشوية توفيق هنقدر نكسبهم :] الحقيقة بتقول انه التعادل النهاردة زي الفوز بالظبط من كل النواحي ! في الحالتين مصيرك بايدك ومتوقف علي هتعمل ايه في مباراه الشرطة الفوز علي الشرطة مطلوب ف الحالتين وهو الوحيد اللي يأهلك للدور التاني وبدون حسابات باذن الله الزمالك قادر علي انه يحقق دا ويتأهل لو بنفس الاداء ربنا يستر اكيد , وياريت ميوصلوناش للاوقات القاتله دي تاني ! الصحة مش مستحملة :d |
انا مش اتفرجت ع الماتش ولكن شفت ملخص وكان معظمه فرص ضائعه للزمالك بشكل غريب جدا وحظ وحش اوى خاصة ف الشوط الثانى المجموعه صعبه ومتقاربه لغاية اخر لحظه مش عارفين مين هيبقى ف المربع الذهبى الاربعه فرصتهم متساويه احى اولا واخيرا مشجعى الزمالك فعلا طول عمرهم دمهم محروق من الفريق ولكن لا مفر برده مش عاد ينفع غيره شكرا ع التغطيه والتقرير تحيتى |
بجد فعلا الحظ عاند معانا بس الحمد لله اتعادلنا فى الدقائاق الاخير كان زمانا كسبنا كتير اكتر من 10 اجوان ضاعوا كوره جعفر اللى جات فى العرضه وضربه الجزاء اللى ضيعها محمد ابراهيم انا مش عارفه ايه اللى حصل دا كان بيشوط ضربات جزاء كويسه بس ضربات الجزاء محدش يضمن فيها الحمد لله فى امل وهو الفوز على الشرطه بس لو الاعيبه لعبت زى النهارده بالروح دى نكسب ونوصل المربع الذهبى يسلموووووووووووو على التوبيك |
اقتباس:
يمكن من حظك الحلو انك متفرجتيش علي الماتش علشان صحتك ودمك ميتحرقش :105: كمية فرص ضايعه وحظ معاند بشكل غريب جدا في المباراه الزمالك حاول 31 مرة علي مرمي الخصم مقابل 3 بس لدجلة !! وهما اتقدموا الاول وهو اتعادل ف اخر الوقت :11: لكن في كل الحالات الزمالك قدم اقوي مباراه له الموسم دا اداء رائع جدا جدا هجوميا ووصول للمرمي من كل الطرق لكن دفاعيا كان الوضع كارثي :] مجموعه قوية جدا والتنافس فيها شديد سواء علي الصعود او الهبوط ! اخر جولة هتحدد كل حاجة ان شاء الله الزمالك يحقق الفوز علي الشرطة ويكون ف المربع باستحقاق تسلمي للمرور والرد يا توحد :] |
اقتباس:
عجيبه جدا الكورة والحظ الغريب في الماتش دا لو في عدالة في الكورة الزمالك يكسب المباراه مستريح وبسكور كبير !! بخصوص ضربه الجزاء اللي ضاعت في نظري دي نحس فريق مش اكتر ! محمد ابراهيم احسن واحد بيشوط ضربات جزاء ولحد اللحظه دي محدش في مصر كلها صد منه ركلة واحده حتي ! يا جون يا في العارضه ! والحظ السيئ بتاع الفريق في المباراه وكمان الضغط الكبير عليه هو شخصيا خلي الكورة ضاعت ومش نهايه الدنيا ولسه عندي ثقة كبيرة في محمد ابراهيم في الاداء وفي ركلات الجزاء كمان :] الحمد لله انه الزمالك حقق التعادل , كانت هتكون كارثة لو محصلش دا محدش بيفتكر عند الكورة ابدا بيفتكروا الخروج والتأهل عدم التأهل يساوي كارثة علي الموسم القادم بكل المقاييس ان شاء الله يحقق الفوز علي الشرطة ولو بنفس الاداء دا اضمن التأهل :) تسلمي للمرور والرد بقي ونورتي التوبيك |
| الساعة الآن 07:17 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب