منتديات بنات مصر - الانفلوانزا .. صيدليتك لحد باب بيتك

http://banatmisr.com/up3/uploads/1442551501021.jpg

تعالوا نعرف سوا ايه هي الانفلوانزا

مرض فيروسي معدي... بينتقل من خلال الهوا بالعطس والكحه لحد ميوصل الاغشيه المخاطيه للانف والعين والفم وهو فيرس سريع الانتشار

ازاي نقدر نحمي نفسنا منه

1) اول حاجه نغسل ايدنا كل يوم وكويس جدا قبل منلمس بيها عينا او بوقنا ... لان غسل الايد بيقتل الفيرس ده

2) ناخد فيتامين سي يا اما عن طريق الفواكه الغنيه بفيتامين سي زي البرتقال واللمون

او عن طريق حبوب فيتامين سي ( فوار او مص او حبوب )

طيب ايه هي جرعته ؟؟ جرام كل يوم = 1000 ملي جرام

3) وفي طريقه تالته دلوقت بقت ماشيه وهي الحقن بلقاح ضد الانفلوانزا المنتشره خلال السنه

وعاده اللي بياخدها يا اللي وزنه زياده لان مناعته بتبقى ضعيفه او كبار السن اكتر من 60 سنه

طيب ايه هي الاعراض اللي اقدر اقول وقتها انا عندي انفلوانزا

ارتفاع درجه الحراره
الالم في الجسم
رشح وعطس واحتقان في الانف
سعال

وقبل منقول ازاي نعالج الانفلوانزا

لازم نعرف ان ممكن شخص يتعدي من شخص تاني قبل ميظهر عنده اصلا اعراض الانفلوانزا بيوم
لان الفيرس بيكون موجود في الجسم نشط من قبل ظهور الاعراض بيوم لحد 7 ايام

دلوقت انا عندي برد ازاي اخد الدوا واروح اطلب ايه من الصيدليه

الانفلوانزا فيرس مالوش علاج ... اي علاج بناخده بنقلل بيه الاعراض اللي قولناها فوق

فلو عندنا صداع .. سخنيه .. اللام في الجسم (بنادول كل 6 ساعات )

لو عندنا رشح .. احتقان في الانف ..عطس ( زيرتك .. كلاريتين )

لو عندنا كحه (في حاله وجود مخاط بناخد دوا كحه طارد للبلغم زي اميدرامين وممكن معاه مذيب زي البيسولفون ) ... ( لو ناشفه ناخد توبلكسيل او سيكيزان )

بكل بساطه بس بنخفف من الاعراض وممكن نستخدم كمان نقط مراخير لو عندنا احتقان في الانف زي الاوتروفين ومنحاولش نكتر منه لانه بيضر الغشاء المخاطي للانف
ونشرب سوايل كتير ونحاول نريح

دي صورة بسيطه جدا عن الانفلوانزا لو عرفناها حنقدر نعالج نفسنا 70 في الميه من غير منروح لدكتور ولا صيدلي

ــــــــــــــــــــــــــــــــــــــــــــــــــ ـــــــــــــــــــــــــــــــ

النهاردة حنعرف معلومتين مهمهين جدا جنب الانفلوانزا

المعلومه الاولى

امتى اخد مضاد وانا عندي انفلوانزا ؟

الانفلوانزا زي مقولنا مرض فيروسي مش بكتيري يعني المضاد الحيوي اللي هو فايدته يقتل البكتيريا مالوش اي لازمه مع الفيرس

اقولكم انا امتى ... لما يكون عندك احتقان في الزور شديد مع ارتفاع درجه الحرارة وقتها نقول ان ممكن ناخد مضاد حيوي

في الحاله دي المضاد الحيوي نقدر ناخده لان لقينا بكتيريا موجوده يقدر يهاجمها

طيب ايه هو المضاد .. ممكن اموكسيل كل 8 ساعات وممكن اوجمنتين كل 12 ساعه

في ناس عندها حساسيه من الادويه دي بيسموها حساسيه البنسلين .. ممكن يستبدله بمضاد تاني زي الكلاسيد 500 حبه كل 12 ساعه

في ممكن حد يقول طيب منا امن نفسي من الاول واخد مضاد

اقوله ان المضاد الحيوي كتره غلط وابسط حاجه انه بيضعف المناعه بتاعت الجسم واحنا في غنى عن اننا ناخد دوا من غير ميكون له لازمه

المعلومه التانيه

عن دوا كلنا بنستخدمه ( البنادول )

في ناس كتير بتاخد البنادول عمال على بطال

جرعه البنادول حبه كل 6 ساعات واكتر من كده مؤذي جدا للكبد

وحديثا منعوا تماما الاطفال اللي عمرهم اقل من 16 سنه
ياخدوا بنادول حبوب

ومن المهم برضه نعرفه عن البنادول انه امن جدا للحامل في جدود المعقول

استخداماته .. الحراره والالم

يارب تكونوا استفدتوا معانا في صيدليتك لحد باب بيتك

واي سؤال انا واي دكتور في المنتدى ان شاء الله نرد عليكم فيه :103: