مع احترامي
 

عشان تعيش في بلدنا لازم..
تبقي حاجة من الاتنين
مع احترامي.. تكون حرامي
او تكون ماشي بوشين
يعني تبقي عارف اصل الحقيقة
وتكدب كده وخلاص
متقولش الحق ابدا ..
علشان متزعلش ناس
تبقي فاهم اننا في الوضع الجديد
تمشي ويا الركب توصل
او تعيش مكسور وحيد
وكل يوم تهمة ومشاكل
مرة خاين.. مرة قاتل
باختصار
متحاولش تكون مفيد
متحاولش تكون ايجابي
او تقول ده كان غلط
علشان مفيش فلتر ينقي
الظلم والعدل اختلط
والمسئول مبقاش مسئول
طبعا يكدب لما يقول
اي كلام علشان مشغول
وينهي كلامه بكلمتين في حب مصر
ومفيش مشاكل.. مصر جاية
قوة عظمي.. واي هجص
ومفيش مجال علشان تعارض
مش وطني انت عميل وقابض
اعلام كمان.. اسفاف وهابط
انت مجرم.. والشعب ده محتاج ترابط
والمحاكم .. ممنوع تحاكم اي ظابط
والقضاء.. جاي من الفضاء
عدل ونزيه .. مالوش اخطاء
ليه تقلق ليه ياعم انت بتخاف
قضائنا علي كل الالوان
مرة بني.. مرة مرة احمر
وفي الغالب يكون شفاف
والكلام ده بقوله من غلبي وهمي
ياشعب مصر.. بجد انتو خنقتو امي

Ahmed adel
2-12-2015

منور ياكبير ساعت الصبح
ابو نصير
هى ديه البلد طالما فيها رقاص كبير يطبلون له صبيان العالمه ويمسكون له القضاء الصاجات ويغنون له العبيد
ويفتون له بعض علماء الدين والفته والسلطه الذين خلعو العمامه ولبسو بدلها البمبرز
عندى أمل

صح لسانك. كلامك كله صح
بقينا عايشين فى بلد الهجص . طبطبه ونحنحه وكلام حلو وتبص ع الفعل تلاقى قتل واعتقال واغتصاب واهانة واللى يفتح بقه يبقى خاين وابن كلب ومش مصرى كمان.
والمطبلاتيه فى كل مكان ويتعيش طبال ياتموت انسان
والله المستعان

الله ينور عليك