|
بعد مباراة الزمالك و مصر المقاصة ! http://forum.kooora.com/user.aspx?id...Besm_salam.gif السلام عليكم ورحمة الله وبركاته -- http://banatmisr.com/up3/uploads/1451356358611.jpg إنتهت منذ قليل مباراة الزمالك ومصر المقاصه ضمن مباريات الاسبوع الـ 12 من الدوري المصري لهذا العام بتعادل الفريقين بهدفين مقابل هدفين ولكن كما يعلم الجميع من محبي ومتابعي نادي الزمالك داخل أراضي الوطن وخارجها بأن هذا التعادل بطعم الهزيمه لغياب الروح عن الفريق والعشوائيه في الاداء لم ولن أتحدث عن المباراه بشكل عام ولن اتحدث عن فنيات المباراه ولكن كل ما أريد قوله ان الزمالك في الفتره الاخيره يلعب بدون لعب جماعي الزمالك في الفتره الاخيره كل لعبه فردي ويعتمد علي المهارات فقط لاغير محمود كهربا في الفتره الاخيره أصبح محفوظ تماما وكل مدافعين الانديه المصريه أصبح لديهم قراءه كامله علي طريقه لعب كهربا لاعب الزمالك وبالفعل ياساده وكما نشاهد جميعا بأن كهربا أصبح غير مؤثر مثل الاول اللاعب الوحيد الذي يصنع الفارق مع الزمالك طوال المباراه هو ايمن حفني ولو هبط حفني هبط الزمالك ايضا ولاحظنا هذه النقطه في أخر ربع ساعه الولد الشقي مصطفي فتحي والذي ينقذ الزمالك دائما وابدا بأهدافه الساحره لا يلعب أساسي ولا اعلم لماذا هو ايضا لعبه فردي ولكنه يصنع الفارق بنسبه كبيره و كبيره جدا واتمني مشاركته في المباريات القادمه احمد حمودي منذ ان لعب اساسي مع الزمالك أصبح لعبه فردي بحت ونضيف علي هذه النقاط ايضا عدم التوفيق لكل لاعبي الزمالك ! وأحب ان اضيف معلومه بسيطه ردا علي كلام المشرف الكبير جدا معايا والأخ الاهلاوي الفاضل محمود ساد لف الذي يقول بان الزمالك لا يستحق التعادل اليوم أمام مصر المقاصه ولا اعلم لماذا لا يستحق الزمالك التعادل ؟ خرج علينا بعض الاهلاويه بعد نهاية المباراة بتصريحات غريبه جدا علي حكم المباراه الذي احتسب 7 دقائق وقت بدل ضائع لهذه المباراه ويقولو بأن جهاد جريشه ساند الزمالك في هذ التعادل ولكن لو لاحظنا جميعا ولكل من تابع اللقاء كامل بالتأكيد لاحظ اشتراك مصطفي فتحي مع حارس مصر المقاصه واشتراك كهربا مع حارس مصر المقاصه وكل هذا وقت ضائع بخلاف الوقت الضائع طوال المباراه ولكن لي سؤال أيضا لجميع الاهلاويه جهاد جريشه احتسب 7 دقائق وقت بدل ضائع وهدف الزمالك أتي في الدقيقه الخامسه من الوقت الضائع ولكن ما رأيك في محمود عاشور الذي أعطي في ماتش الاهلي و اسوان دقيقه واحده والاهلي سجل هدفه الثاني في الدقيقه الثالثه ؟ ثم يخرج علينا هذا الحكم بعد مباراة الاهلي ليقول " معلش أصل الساعه وقفت " الحمدلله رب العالمين علي هذه المباراه وهذا التعادل أمام فريق من أقوي أنديه الدوري هذا الموسم وهو مصر المقاصه قاهر الاهلي أحمد الشناوي : لا تسأل عن الهدفين ! علي جبر : مستواه قل جدا وربنا يسهل ! أحمد دويدار : أفضل مدافع في الزمالك إن لم تكن في مصر ! حماده طلبه : اتمني الاهتمام منه في المنطقه الدفاعيه أكتر من الهجوميه ! عمر جابر : مستواه كان سيء في مباراة اليوم ! أيمن حفني : برغم انه سجل هدف وصنع هدف ولكن مش ده الحاوي اللي نعرفه ! احمد حمودي : علامة استفاهم في مباراة اليوم بالتحديد ! ابراهيم صلاح : اداء سيء في السابق واليوم اسوء جدا ! طارق حامد : مسمار الزمالك واداء ممتاز جدا ! كهربا : سبب رئيسي في تعادل الزمالك اليوم بالانانيه اللي شوفناها ! أحمد مكي : اسوء صفقات الموسم في الزمالك ! مصطفي فتحي : كالعاده خطير جدا وجدا كمان ! محمد ابراهيم : محستش انك نزلت المباراه اليوم ! معروف يوسف : يجي منك وربنا يسهل ! ( فريق المقاصه ومدربهم ايهاب جلال ) - مجموعه من اللاعبين وأكثرهم لا يصلحو لـ اللعب في الاهلي او الزمالك ولكنهم متصدرين جدول البطوله ويقدمون أداء قوي جدا والدليل انهم جعلوا الاهلي وجماهيره يتألمون في مباراتهم وفازو علي الاهلي بهدف مقابل لا شيء واليوم تعادل أمام بطل الدوري وحامل اللقب الزمالك وكل هذا بقياده مدرب كبير الذي يدير مبارياته بشكل أكثر من جيد وربنا وربنا معاكم في افريقيا ان شاء الله وتشرفونا وتوصلو دور المجموعات ! ( اسئله للنقاش ) - ما رأيك في اداء الزمالك في مباراة اليوم أمام مصر المقاصه ؟ وهل يستطيع مصر المقاصه الاستمرار في عرض هذا المستوي الرائع في البطوله هذا العام وسيزاحم الكبار دائما ؟ http://forums.banatmasr.net/imgcache...506alsh3er.jpg تحياتي للجميع محمود الصاروخ http://l.yimg.com/lo/api/res/1.2/fxz...s/xcR12773.png |
اغلب الناس هتاخدها الحماسة بتاعت المدرب يمشي ونجيب ميدو وياه فين ايامك يا فيريرا والخ من كلام ! لكن الحقيقة انه المدرب ملهوش دور في الهزيمة النهاردة كل الحكاية رعونة لاعبين , سوء افراد , وتوفيق غير عادي للخصم تقريبا المقاصة موصلش باي هجمة منظمة في طول احداث المباراة من الاساس وسجل من تسديد بعيد بتوفيق غير عادي حتي الكورة اللي اتشاطت ولبست في العارضة تترد للمهاجم وسط اتنين مدافعين من الزمالك ! بينما علي الجانب التاني الزمالك وصل عدد كبير جدا من الفرص الحقيقية والساهلة لكن رعونة اللاعبين او سوءهم منع يمكن فقدت عدد الفرص الحقيقية من كثرتها بالاخص في اخر الشوط الاول واول ربع ساعة في الشوط التاني تعامل غريب من كل لاعبي الزمالك في الكور اللي وصلتلهم سواء كهربا ولا حمودي ولا احمد حسن مكي وفي الاخر الكلام كله يتقال علي المدرب اللي دوره انه يوصل اللاعيبة بطرقه للمرمي مش انه يسجل الاهداف هو !! ومع انه الزمالك وصل للمرمي في مباراة واحدة اكتر ما بيوصله في 5 مباريات كاملين مع فيريرا ! خططيا ,, كان غريب جدا اسلوب لعب المقاصة النهاردة وشايفه كان سيئ جدا من ايهاب جلال الزمالك بيتعبه الخصم اللي بيلعب بدني وبيضغط عليه ضغط مبكر وبيربك حساباته , تمام بس دا مش معناه انك تضغط علي الخصم من نص ملعبه ب 4 و 5 لاعيبة واحيانا اكتر الخطة سلمت مساحة 40 ياردة ورا في الدفاع للزمالك تسليم اهالي ولولا سوء التعامل كان عمل سكور عليهم النهاردة كان اولي يلعب بطريقة لعبه اخر تلت ساعة من المباراة من البداية كنت متوقع افضل من كدة منه بكتير لكنه لولا التوفيق مكنش خرج بنقطة المباراة دي اسلوب باكيتا وطريقة لعب كل مرة مجتش ليها فرصة من الاساس وهدف المقاصة اربكها الزمالك تقريبا كان بيلعب 2 4 3 1 في اغلب اوقات المباراة لانه كان متأخر في النتيجة التغييرات معلهاش اي علامات استفهام وكانت منطقية وطبيعية في الغالب مستغرب من خوف عمر جابر الغير مبرر في اللعب رغم امكانياته الكبيرة , وجرأة طلبة رغم تواضع مستواه الفني طلبة بيجتهد وبيحاول وبيتقدم , وعمر جابر بيستخبي في التمرير القصير والسلبي ومبيقدمش اي حاجة تذكر فرديا ,, · الشناوي اخد خطوة في الجون الاول نفسي افهمها بس مش قادر ! · قلبين الدفاع قدموا مباراة كويسة الحقيقة وكانو جيدين الاتنين بالاخص دويدار كان اكثر من جيد · عمر جابر سيئ جدا ومختفي جدا ومقدمش اي اضافة · ابراهيم صلاح مخيب تماما في الضغط والتغطية والالتحام والكرات المشتركة وفي كل حاجة · طارق حامد قدم مبارة ممتازة وكان بيحارب لوحده في النص · دايما بقدر دور احمد توفيق في الزمالك وبفتقده جدا لما بيغيب · كهربا سيئ لكنه بيظهر وبيحاول وبيجتهد ودي في حد ذاتها تخليه كويس بعيدا عن الانفراد ورعونته فيه · احمد حسن مكي بدأت اتسأل اذا كان هو مجرد مش مستوي الزمالك ولا مش مستوي كرة القدم حاليا ! · حمودي كنت بقول ولازلت بقول رتمه بطئ واظن حاليا شيكا مش هيلاقي منافسة · حفني افضل لاعبي الزمالك في المباراة وقدم اداء ممتاز سواء في التهديف او في صناعة اللعب والبينيات · باسم مرسي من اسباب خسارة النقطتيتن بعصبيته وانزاره التالت اللي لبسنا في مكي من جديد · محمد ابراهيم لسه مجاش · شيكابالا القيمة اللي محتاجها الزمالك حاليا المجمل ,, بدأت اكون وجهه نظر وهيا باكيتا مدرب جيد وعنده شغل ممتاز وهينقل الزمالك لمرحلة جيدة جدا بالفعل , ناقصه التوفيق فقط مش اكتر الظروف مش خادماه سواء في قرب المباريات , او قوة الخصوم , او سوء مستوي بعض الافراد , او الحمل البدني , وتوفيق الملعب فيريرا او باشيكو من قبله قدمه مباريات في غاية البؤس وقدروا يحققوا الفوز بالاخص كمان في بدايتهم نتايجهم ساعدتهم علي التأقلم لكني لازلت شايفه جيد جدا ومتفائل بيه شخصيا واتمني التعادل النهاردة مياخدش الزمالك لمنحني سلبي اسمه الاقالة . |
والله انا نفسى اعرف انته شاغل نفسك بينا ليه ياكبير وبعد كده الختلاف لا يفسد للود قضيه وفعلا الكلمه فعلا ف محلها لانى الزمالك الشوط التانى وانا شايف انى هدف الزمالك توفيق مش اكتر انا عن نفسى من الناس اللى توقعت الفوز للزمالك قبل المباراه ولكن مع انطلاق الشوط الاول توقعت الهزيمه ولكن هدف توفيق من الله لااكتر عذرا لراى ياحوده طبعا مع احترامى لنادى كبير زى الزمالك بس دى وجه نظر |
صراحة مش اتفرجت ع الماتش ولكن اتمني ان الزمالك يتدارك اخطاؤه ويحاول يصلح شويه لان ف منافسين كتير هيظهروا ولو استمر ع المستوى ده مش هيقدر ينافس بعد تعادلين بالعافية شكرا ع التغطية والمتابعه |
انا مع كلام محمود ان الزمالك لا يستحق التعادل الزمالك كان ماسك الكوره كتير لكن كله في وسط الملعب حتي الكوره الخطيره بتاع الزمالك تحس انهم خايفين يجيبو جون اللي يقع وهوه بيشوط الكوره واللي يطلعها بره مش ده مستوي الزمالك خالص انا من رائئ ان كهربه يقعد علي الدكه شويه علشان يلعب جماعي بعد كده المقاصه هتكمل ممكن تحتل التالت او الرابع |
بصراحه كدا متفركتش علي ماتش يعني مش هعرف افيدك بس متهيقلي كدا انه قادر وخصوصا انه متطور كتير في لعبه وبقي احسن طرح قيم تسلم ايدك |
سمعت النتيجه دي صحيح الزمالك مع انه كان بيلعب كويس ده ال سمعته عامة افضل من الخساره ودايما موفقين مجهود جميل محمود |
بُص يا حوده أولاً بصراحه هقولك مبروك على النقطه وفعلاً غير مُسحتقه .. إستحواذ بالكُره سلبي بدون أي جدوي بصراحه ورعونه فى الأداء من وجهة وتقاعُص فظيع من اللاعبين أحمد حسن مكي كان من الخطأ التعاقد معاه من البدايه وخصوصاً إنك المفروض بتدعم فريق .. كان الممكن إن الزمالك يتعاقد مع مهاجم إفريقي شاب أو البحث عن أي مهاجم صغير فى السن ومع ذلك تعاقدو معاه وهو سنه معدي ومش هيبقي فيه منه إستفاده *كهربا علامة إستفهام من وجهة نظري من وقت أمم أفريقيا الأوليمبي حاسس إنه نسي الكوره وفقد حلوله فى الملعب *حماده طلبه من وجهة نظري مش ده اللاعب اللي يلعب فى نادي بحجم الزمالك فنياً ضعيف جداً ولاعب غير مُتكامل *محمد إبراهيم مكنش يلعب لأنه مش بيُستعان بيه فى الفتره الأخيره وبالتالي إمكانياته البدنيه متواضعه لأنه فقد فورمته *الأطراف عند الزمالك النهارده كانت عامله زي الشوارع بصراحه سواء من ناحية عُمر جابر أو طلبه أنا شايف إن صفوف الزمالك محتاجه تدعيم فى الجانبين الأيسر والأيمن ووقتها يرجع عمر جابر لمكانه الأصلي وهيكون فعال أكتر ومحتاجين رأس حربه كويس مكان مكي خصوصاً فى ظل المشاكل اللى حصلت مع باسم وإبتعاده عن مستواه المعهود وضعف المردود الفني لمكي وفي النهايه أنا حاسس إن الدوري السنه دي لا هيبقي لينا إحنا كأهلاويه ولا للزمالك لو متداركناش أخطائنا وبالتوفيق دايماً لقطبي الكُره المصريه |
اقتباس:
هاخد الردود اللي بعد كده و هكون معاك ونقاش مفتوح عن زمالكنا ان شاء الله لي عودة |
اقتباس:
اقتباس:
بشغل نفسي بيك عشان انت حبيبي ياحوده ودايما بحب اتناقش معاك سبحان الله ياحوده يعني لو راجعنا الماتش مع بعض كوره كوره وثانيه ب ثانيه هنلاقي ان الزمالك وصل ب 7 هجمات محققه وكلها اهداف مؤكده ولكن غاب التوفيق عن الفريق اما المقاصه راح ب كورتين ومش فرص حقيقيه اصلا ! وجات هدفين وفي الاخر تقولي الزمالك مايستحقش ؟ الزمالك كان زي الزفت النهارده متفق معاك ولكن صاحب أكبر عدد هجمات محققه وفيديوهات الماتش موجوده ! غاب التوفيق عن الزمالك فقط لاغير ! والنقاط اللي انا اتكلمت عنها فوق منور ياحودة |
| الساعة الآن 06:44 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب