منتديات بنات مصر

منتديات بنات مصر (https://forums.banatmasr.net/)
-   عالم حواء العام (https://forums.banatmasr.net/f99/)
-   -   مش كل الستات شوربة (https://forums.banatmasr.net/msryat541200/)

انثى متمرده 01-12-2016 10:10 PM

مش كل الستات شوربة
 
مش كل الستات شوربة


http://photos1.blogger.com/blogger/3...400/MURDER.jpg
أولا –
عشان يبقى الكلام على ميا بيضة
– خيانة الرجل لزوجته أو خيانة الست لزوجها
– اسمها زنا :
زين نون ألف –
و دى من أكبر الكبائر و اللى مايتوبش
قبل ما يتوفى فسوف يحاسب حسابا عسيرا
و لا يوجد هناك معاذير فالحرام بّين و الحلال بّين
والحدود الشرعية
أوجبت أقامة الحدود على الزانى و الزانية.
كما ان الزنا محرم فى جميع الشرائع السماوية
( متفقين؟ )

طيب دلوقتى الست ذلك الكائن الهلامى
اللى قلنا عليه قبل كده
- و اللى جوزها ردئ الخلق جلنف انانى
و فوق كده خاين-
لو ماعرفتش تشتغل خدامه
أو أى عمل آخر شريف بتعمل ايه؟
لو ماأسعدهاش الحظ ببلوج للفضفضة
أو بدماغ حلوة كده لسه ماباظتش ؟

بصوا بقى:
الستات أنواع –
النوع الشكاى الممل
و دى شويتين و كلو بينفضلها فتبتدى تكلم روحها
قدام المراية و بعدين فى الشارع
و بعدين تصاب بهلاوس سمعية و تشوف ناس
بتكلمها فى الهوا و بتاخد و تدى معاهم
وبعدين تبدأ فى أكل المشابك و بوز اللحاف
و تنتهى معلقة كاتانيللا (شبشب)
فى رقبتها و دايره فى شوارع العاصمة
حافية القدمين (بموت فى كاظم) http://forums.banatmasr.net/images/s...0Smiles2/7.gif
و هى بتتلفظ بعبارات من نوعية :
نظمى ياللى امك ماتقولش لأه http://forums.banatmasr.net/images/s...0Smiles/22.gif
سيبتلك العيال فى الشقة
( و كورس أولاد الشوارع بيردوا وراها :ا لأااا لأااا )
أو مثلا جدر البطاطا هو السبب و هراس جاى
و حاجات كده يعنى و فى الأخر يتقبض عليها
بتهمة تفجير كنيسة أو تقطيع الأعضاء التناسلية
لمية و خمسين شخص فى نفس التوقيت
( يعنى برضو بتفيد الدولة).

النوعية التانية
الست العاقلة أوالست البير
( السواد الأعظم من السيدات المصريات) :
دى بقى العاقلة الراسية بتاعت الجواز ستره
و أهو برضو ضل راجل و لا ضل حيطه و أهو برضو
شحط داخل علينا و حركات من دى
الست دى مابتتكلمش أصلا و تانها مربوطه
فى الساقية و هى وكاتمة فى قلبها
لحد ماقلبها بوووووم يطق و يا يجيلها هارت أتاك
بسبب أرتفاع ضغط مفاجئ يا انفجار فى المخ
و العياذ بالله أو بارانويااااااا شيزوفرينياااا

النوعية التالته
و الأخطر و اللى كترت أوى اليومين دول
: الست الخاينة
( اللعوب)
(راجعوا صفحات الحوادث و القضايا اليومية):
الست دى بتتسم بقدر ضئيل جدا من مخافة ربنا
- و ليها برضو حيثيات للخيانة من وجهة نظرها
– ماهو اللى بيعمل أى حاجة غلط
لازم يكون مقتنع تماما بان ده هو الصح
زى الحرامى و بيسميها اعادة توزيع ثروات:
يعنى أنا بشقى أكتر من الناس دى
يبقى المفروض انى أعيش أحسن منهم
- أو الموظف المرتشى اللى بيعوض
من أصحاب المصالح قلة مرتبه و بيسميها أكرامية
نظير تعبه أو الدكتور أو الصنايعى
أو مدرس الدروس الخصوصية .............
و ياما بنشوف كل ساعة
فالست من دول بيبقى جواها رغبة جامحة
فى أخذ حقوقها المسلوبة بمعرفتها
:الحقوق المسلوبة من كرامتها :
يبقى لازم امرمغ كرامة اللى خلفوه فى الوحل –
و حقها فى الدفء اللى محتاجاله :
يبقى لازم أتدفى لأن لبدنى على حقا –
و من تقتير الزوج
و دى حالة واطية شويتين تلاته فبتاخد
أجر نظير الخيانة
و من الأهتمام و من الدلع
و من ومن ومن.
و مش لازم تكون واحدة فاجرة أو من بيئة
واطية أطلاقا
– اللى بيعملوا كده ممكن يكونو بنات سفرا
و ناس أسامى و ممكن تكون

محجبة
الست بطبعها كائن عظيم الكيد
( ده وصف قرآنى جاء فى سورة يوسف)
يعنى ممكن الأسية توصلها لقرارات
هى نفسها ماتحسبلهاش حساب
ممكن جدا و هى بتخون تعرض فى دماغها
شريط 8 مم سكوب ألوان فيه بعض المشاهد
من حياتها مع جوزها -
صورته و هو بيتريق عليها قدام الناس–
صورته و هو داخل مكشر كل ليلة رازع الباب وراه
– صورته و هو بيديها ضهره ليلاتى و يقوللها
ماتعقلى ياوليه بلاش الهيافه دى –
صورته و هو بيضربها على وشها بالقلم
أو مجرجرها عالسلم بقميص النوم فى نص الليل
يالا روحى على بيت أبوكى اللى بلانى بيكى
– صورته و هو بيسفه من أهلها -
ساعتها هتبتسم ابتسامة المنتصر و تقول
ده راجل
مايستاهلش الستر و ممكن تكون هيا أصلا
بل و غالبا لا ترغب فى مثل هذه الخيانه
و تجد ان مؤشر الحقد تجاه جوزها
ينخفض بحده ليه بقى :
مانا كده كده بتعاقب فعشان ماحسش بالظلم
خليها بسبب –
العيال الصغيرين بيفكروا كده برضو –
تأبى مثل هذه المرأة بان تصف نفسها
بالمو......
( مع انها أصبحت على شاكلتها )
لأنها لم تتقاضى أجر بل كل ماتريده هو الزج
بشرف الراجل المفترس الى منطقة
شائكة
و فى هذه الحالة يصبح تقبلها لسفالات
زوجها متاحا جدا و بصدر أرحب من ذى قبل.

يارجال العالم رفقا بالقوارير –
حرام عليكو بقى أرجوكم الست مش ملطشة
ولا حقل تجارب لتجاربكم –
لحد امتى هتنفخوا فى الزبادى ؟
مش كل الستات شوربة .

تحيااتى
http://forums.banatmasr.net/images/s...0Smiles/34.gif

انجي_1 01-13-2016 10:52 AM

لو الكلام ده بقلمك
فاسمحيلي اقول لك برافو
وانا بجد استمتعت وانا بقرا كل حرف
ومتفقة معاكي تماما
تسلم ايدك
ونورتي المنتدى والقسم
اهلا بيكي يا قمر

انثى متمرده 01-16-2016 09:31 PM

اقتباس:

المشاركة الأصلية كتبت بواسطة انجي_1 (Post 4937221)
لو الكلام ده بقلمك
فاسمحيلي اقول لك برافو
وانا بجد استمتعت وانا بقرا كل حرف
ومتفقة معاكي تماما
تسلم ايدك
ونورتي المنتدى والقسم
اهلا بيكي يا قمر

لا طبعا الكدب حراام :17:
بس الموضوع بصراحه عجبنى
وقولت لازم كل الرجاله تشوفه
نورتينى حبيبتى ومتحرؤمش من ذوقك وردودك
:07:


الساعة الآن 02:57 AM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w