منتديات بنات مصر

منتديات بنات مصر (https://forums.banatmasr.net/)
-   إستراحة آدم الثقافية (https://forums.banatmasr.net/f267/)
-   -   محمود كامل في رمضان (https://forums.banatmasr.net/msryat553991/)

ايمان طلعت 06-10-2016 10:47 PM

محمود كامل في رمضان
 
http://banatmisr.com/up3/uploads/1465115469573.jpg







السلام عليكم ورحمة الله وبركاته

كل عام وانت بخير

بعمل برنامج بمناسبة الشهر الكريم
ادم في رمضان
يشرفني ان تكون ضيف فيه




وعليكم السلام ورحمه الله وبركاته

وانتي بخير وبصحه وسلامه
ورمضان كريم عليكم

الشرف ليا


http://banatmisr.com/up3/uploads/1465115600412.png

كيف تستعد لاستقبال الشهر الكريم ؟

والله الواحد مبقاش يحس برمضان زي الاول يمكن اختلاف الظروف
اللي هو فيها بس استعدادات رمضان بالنسبه للكل
بتكون متشابهه الى حد ما في التركيز علي الجانب الديني و العمل الخيري
و التطوعي ودا اللي المفروض يحصل طول السنه مش شهر رمضان
بس الواحد بيحاول يكون قريب لربنا اكتر لانه من افضل شهور السنه .


http://banatmisr.com/up3/uploads/1465115600412.png


شهر رمضان شهر مختلف عن باقي الشهور
فماذا يعني لك رمضان ؟

شهر رمضان زي ما ذكرت من افضل شهور السنه
و ربنا فضله وهو شهر القرأن
بالنسبه للجانب الاجتماعي والله هو بيكون افضل لانه بيقرب الاهل
والناس وصله الرحم بتكون كويسه فيه بغض النظر عن باقي الايام التانيه
اللي المفروض تحسي بالفقير و اننا نبعد عن اي مظاهر دنيويه .

http://banatmisr.com/up3/uploads/1465115600412.png


ما هي مظاهر رمضان في بيتك و مدينتك ككل ؟

بالنسبه لمظاهر رمضان في مدينتى
يمكن الظروف اللي بتمر بيها مصر ككل مفيش المظاهر اللي كنا بنشوفها
كـ الاطفال والشباب بيركبو زينه رمضان وفوانيس
كنا قبل رمضان باسبوع او اتنين نلم فلوس من الجيران كلهم
ونعمل حاجه مشتركة كـ زينه في الشوارع
والمسحراتي اللي كنا متعودين عليه بيعدي علينا قبل الفجر
بينبهنا بالسحور كل دا مبقاش موجود

اما بالنسبه في بيتي والله زي ما تقولى فضيت علينا الدار
احنا كنا 6 اخوات 3 بنات اتجوزو وانا كل وقتي في شغلي واخويا كذالك
الامر يعني مبقاش غير اختي وامي وابويا فـ لمه الفطار واماكن كتير فاضيه
ودي سنه الحياه فـ الحاجه الوحيده اللي بتحسسني باللمه لما اولاد اختي
ميرضوش يروحو يفطرو مع ابوهم وامهم ويجو يتلمو معانا ع السفره
بحس وقتها اننا في رمضان .


http://banatmisr.com/up3/uploads/1465115600412.png


ما الشيء المميز جدًا بك في رمضان؟
هي مش مميزه لان كتير بيعملها
وهو حفظ القرأن وان مبخليش فرض عليا يروح ودي حاجه بالنسبه كويسه الحمدلله


http://banatmisr.com/up3/uploads/1465115600412.png


يومك الرمضاني كيف يكون ؟

والله في رمضان والواحد صايم بعكس الناس
بيبقي في الواحد طاقه وتركيز عن الايام التانيه بستغلها في شغلي
لهدف انا بسعي ليه وان شاء الله هيتحقق
طبعا بعد صلاه الفجر بقرأ شويه قرأن ولو نمت شويه بقوم علي 10 او 11
بطلع ع المسجد صلاه الضهر الجو بيبقي جميل جدا في الجوامع خصوصا
في رمضان بيبقي غير عادي انا ممكن اغفل عيني هناك لمده ساعه
ولا حاجه وكذالك لغايه قبل المغرب بنحضر طبعا انا واصحابي حاجات مرطبات
وعصاير للي مسافرين علي طريق الصحراوي بيكون فيهم ناس صايمه
لعلى وعسي ناخد ثواب علي دا .


http://banatmisr.com/up3/uploads/1465115600412.png


موقف حدث معك في رمضان ولن تنساه ؟

هو موقف اني كنت وسط الناس قاعد بس دا زمان
وفي عز نهار رمضان قومت جبت مايه ساقعه وشربت والناس عماله تبصلى
و كنت ناسي اننا في رمضان كان منظري وحش جدا وكانو بيبصولى
ويستغربو اني بفطر .. بس انا كنت ناسي والحمدلله ان حد فيهم قالى
تقدر تكمل صيامك انت كنت ناسي بس دا الموقف اللي مش قادر افتكر غيره


http://banatmisr.com/up3/uploads/1465115600412.png



رمضان مشهور بالأكلات و العصائر والحلويات
فما هي الأكله المميزة لرمضان في بيتك
وأي من الأكلات تحب و المشروبات والحلويات ؟


بصي انتي ممكن تقولى عليا الاكل
دا مزاج وحاجات كتير مباكلهاش
في الاكلات زي الباميه , الكوسه , السبانخ وحاجات كتير
بس اللي بعشقها البسله و البشاميل , والبطاطس في الفرن http://forums.banatmasr.net/images/smilies/biggrin.gif

اما الحلويات القطايف بالعجوه , الكنافه من غير مكسرات مع اني بحب المكسرات
بس باكلها عادي مش محشيه مع الحلويات
العصاير انا بعشق حاجه اسمها قمر الدين ..
والمانجه مع ان الاملاح بتاعتها زياده وهي مبهدلانيhttp://forums.banatmasr.net/images/smilies/biggrin.gif


http://banatmisr.com/up3/uploads/1465115600412.png


هل تدخل المطبخ في رمضان وان دخلت ماذا تفعل ؟

بدخل في حاله انى قاعد لوحدي بظروف شغلي في القاهرة
طبعا مش بطبخ بس الحاجات السريعه


http://banatmisr.com/up3/uploads/1465115600412.png


اذكر أكلة مميزة أعددتها بنفسك و طريقتها ان أمكن ؟

بطاطس الفيجيتار
دي بتسلقي بطاطس وتكسري بيض في طبق و تجيبي فيجيتار حار او عادي
بس انا بحب الاسبايسي
بعد ما تسلقي البطاطس تقدري تعمليها زي الكفته كده وتنزليها في البيض
وتطلعيها في الفيجيتار وتقليها بتبقي جميلة
دي اكله بحب اعملها
طبعا ممكن جنبها سلطه ورز
واوقات بيبقي بطاطس محمره وبانيه


http://banatmisr.com/up3/uploads/1465115600412.png



متى أخر مرة ملكت فانوس رمضان ومن أهداه لك ؟


لغايه 5 ابتدائي كانو اعمامي بيجيبو ليا فوانيس
بس كان ايامها الفوانيس اللي بيركب له شمعه http://forums.banatmasr.net/images/smilies/biggrin.gif



http://banatmisr.com/up3/uploads/1465115600412.png


هل تتابع المسلسلات التي تعرض في رمضان ؟

مبقتش اتابع مسلسلات من ايام الف ليلة وليلة
و ايام سوق العصر دول اخر حاجه تابعتها


http://banatmisr.com/up3/uploads/1465115600412.png



ما هو المسلسل أو البرنامج الذي يذكرك دائما برمضان قديمًا ؟

برنامج عمو فؤاد , الشيخ الشعراوي , فوازير نيللي وشريهان


http://banatmisr.com/up3/uploads/1465115600412.png


كيف تستعد لاستقبال العيد ؟

لا عادي مش بستعد ولا حاجه العيد للعيال الصغيره


http://banatmisr.com/up3/uploads/1465115600412.png


ما هي مظاهر العيد في مدينتك ؟

طبعا قبل شروق الشمس بيكون استعداد الواحد لصلاه العيد
بيطلع بلاقي الاطفال صاحيين من النجمه صواريخ وجري والسعاده في وشهم
دا العيد بالنسبالي
الواحد بيفتكر ايام زمان لما كان يجيب البلونه الكبيرة ويحط جواها شويه رز
علشان وتعمل صوت
او البومب اللي كنا نفضيه في ورقه ونربطها بسلك ونرميها من فوق السطوح
تعمل صوت زي القنبله بالظبط اهوو ايااام .



http://banatmisr.com/up3/uploads/1465115600412.png


هل تشتري ملابس للعيد الى الان ؟

مش شرط , اوقات واوقات


http://banatmisr.com/up3/uploads/1465115600412.png


هل تأخذ عيدية ام تعطي؟


لا بسم الله ما شاء الله اطفال العيله كتير جدا
ممكن تقولي 50 - 60 عاملين الواجب



http://banatmisr.com/up3/uploads/1465115600412.png



الكحك و البسكوت واخواتهم من مظاهر العيد عند الجميع
هل تصنعه في البيت ام تشتريه وماذا تفضل ؟

طبعا ست الكل هي اللي بتعمله



http://banatmisr.com/up3/uploads/1465115600412.png


موقف حدث معك في العيد ولن تنساه ؟

رميت صاروخ جه في راس بنت ولع في شعرها
روحت اخدت علقه من الحاج وقتها مبقتش اجيب صواريخ http://forums.banatmasr.net/images/smilies/biggrin.gif


http://banatmisr.com/up3/uploads/1465115600412.png


كلمة لاعضاء منتدى بنات مصر؟

كل سنه وانتم طيبين ورمضان كريم عليكم يارب
وياريت لو في اي حد شايل من شخص ياريت تتصافو احنا في شهر كريم
ونحاول نكبر مخنا شويه احنا بندخل هنا في وقت فراغنا
يعني بندخل نرفه عن نفسنا شويه
مش محتاجه تكتلات ولا شد اعصاب
ورمضان كريم عليكم يارب



http://banatmisr.com/up3/uploads/1465115600412.png

الى هنا تنتهي حلقتنا
شكرًا لك نورت الحلقة
وكل عام وانت بخير
هدية بسيطه من البرنامج يارب تعجبك

http://banatmisr.com/up3/uploads/1465591358251.gif



انتظروني بكرة ان شاء الله وحلقة جديدة

تحياتي

















دمعه حائره 06-10-2016 10:56 PM

محمود منور المنتدى كلهاجابات مميزة ربنا يوفقك ويخليلك اسرتك كلها
تسلمى ايمى

جنون قلب 06-10-2016 10:59 PM

جميله جدآ آلآجــآبــآت وبزخ فيها حقــآ
منور اخوى الفــآضل وكل عام وانت بخير


مشكوره اختى ايمــآن على الحوآر الطيب هذآ
سعدت كثيرآ ب قرآئته
دُمتى ب امان الله

morshooo 06-10-2016 11:10 PM

منور ابو كامل
وماشاء الله عندكم50 والا 60 عيل
دا انتا بتتظبط بقا عيديات
والا بتنفض ههههههههههه
منور التوبيك والمنتدى

ايمان توبيك جميل فى انتظار
باقى الحلقات

Aya 7ekaya 06-10-2016 11:27 PM

استضافه جميله ^^
منور استاذ محمود طبعاا
تسلمى ي ايمى ع المجهود الجميل

احساسى صحيح 06-11-2016 12:23 AM

حلقة حلوه
واجابات جميلة تدل على الاصول واولاد البلد
كل سنة وانتا طيب محمود
وتسلمى ايمان على الاختيار
تحياتى

جبل عالي 06-11-2016 10:54 AM

اهلااااااااا ابوكامل منورنا والله
كل سنه وانت طيب وكل اسرتك بخير يارب
ويبارك لك في الست الحاجه اللهم آمين


بس مفاجأة انك لحقت الفانوس ابوشمعه بجد
ماشاءالله ....تقريبا البرامج هي نفسها
اللي آخر حاجه فاكراها كانت بتشد الواحد
وع رايك اييييييبه اهي أيااااااااام



شكرا ايمووو ع الاستضافه المميزة هنا
رمضان كريم عليكم جميعا يارب

حازم34 06-11-2016 12:38 PM



يا هلا ومرحبا اخي الكريم

محمود كامل منور والله الاستضافه الجميله دي


اسال الله ان يبارك فيك واسرتك

واجابات جميله ربنا يتقبل منا ومنكم يارب


تسلمي يا رب يا شمس المنتدي ايمان علي برنامجك الجميل

وكل ما تقدمينه حقيقيه شئ جميل

اسعدك الرحمن وبارك فيكي


الساعة الآن 10:22 AM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w