منتديات بنات مصر - يا خوفي يا أبويا لتسبني ..((شاعر العامية))

منتديات بنات مصر (https://forums.banatmasr.net/)

- ابداعات الاعضاء العامية (https://forums.banatmasr.net/f241/)

- - يا خوفي يا أبويا لتسبني ..((شاعر العامية)) (https://forums.banatmasr.net/msryat556584/)

يا خوفي يا أبويا لتسبني ..((شاعر العامية))

تعالى ف حضني واستنى

ده حضنك حتة م الجنة

أنا اللي كبرت ونسيتك

وحضنك عنه ما استغنى

في عز ما ببقى ف الأزمة

مكنتش باجي وأشكيلك

وتيجي بضعف وبلهفة

أبعد.. حتى لو أجيلك

وأرفض كل ما تقرب...

منك حاجة تجمعنا

مكنتش يابني لسه فهمت

سنين العمر مش مادة بتدرسها

أنا اللي درست واتعلمت

وعشت الدنيا ودروسها

وشوفتك جاي للدنيا

ف قلبك خضار من نور

وكل الباقي من خيرها

في روحك بيجري بحور

خفت عليك وضميتك

وبدعيلك تعيش مستور

مشوفتش يابا ف سنيني

حاجة تقولي حلاوتها

ومعرفتش حنانك إلا

بعد ما دقت قسوتها

كنت تداري أوجاعك....لمّا الشقا بيحن

تشيلني العمر ودراعك....من الوجع بيئن

بصبر طويل ما تتكلم

وتفضل ماشي تتألم

وضعف الشيبة ف عروقك أهو ظاهر

وأعمل نفسي مش شايف.. ولا بهتم

عارف.. ضحكتك لمّا يروق البال

عارف.. قعدتك جنبي وأنا شغَّال

كانت عندي بالدنيا وما فيها

مكنتش لسه بتعافر في أوصافها

كنت يدوب بتتعكز على أكتافها

وكبرت لما عرفت إنها لعبة

والضحكة من ايدها..يدوب بتخطفها

وأنت السند لمّا تلاعبني

وأنت الحمى لمّا بقع ليها

سافرت والغربة.. بالنار بتكويني

أدوق الأسى مرّة

ألاقي مرارها يرويني

وتيجي ف بالي بالضحكة اللي بشتاقها

لكنّك جاي متسنّد

خلاص عجّزت؟..لو ناوي يا أبويا لفراقها

استنّى أمّا اجي ونعيّد

يا خوفي يا أبويا لتسبني... بلا كلمة ولا إثبات

واسمع صوت الفرقة بيقولي...أبوك أهو مات

ومسمعش وصيتك ليا

وملحقش أدفنك بايديا

أنا اللي كنت بداري الحبّ لتشوفه..

هييجي اليوم وهتمنى.. نقعد سوا شوية

وتبقى الذكرى جوايه ..أحن لسنا طيفك

أعيش العمر ومنايا.. في لمّتنا إننا أشوفك

ومين قبل الأدان هيسبقني

ومين هيقولي الصلاة يابني

وأسمع صوته بينادي ويكبر

الله أكبر الله أكبر

يا خوفي يا أبويا لتسبني

هيسألني مصحفك عنك

وكل حروفه تشتاقلك

أشهد بأنه احتوى قلبك

وبإذن الله هيشهدلك

يا خوفي يا أبويا لتسبني

قبل ما أقولك أنا آسف

وتقولي رضيت عنك

رضيت برضو أنا عارف

وأسمعها ياريت منك

عشان منك..تطمني

يا خوفي يا أبويا لتسبني

الاب هو السند
اللى بعده الانسان بيتكسر و يحس انه كبر فجأه!
ربنا يحفظ ابآئنا وامهآتنا بحفظه ان شاء الله
تسلم د/ عبد اللَّه على الابداع

فالغربه وسايب احباب
خايف الموت يدق الباب

لا الحق حضن من امي
ولا كلمه راضي عليك يابني

لامتى روحي هتروح مني
انا راجع قبل الايام ما تسرقني

كلمات جد رائعه دوك
احساس الخوف من فقدان الاب طاغي فيها
موفق

عزفت ب حرفكـ على أوتــآر قلوبنــآ
وظهرت لنــآ نزفكـ
وصرخكـ ب كلمـآتكـ فى وجوهنـــآ
ابدعت لآ خلآف على ذلكـ
ف كنت انت القـآئد لنــــآ
ودومـآ تُبهرنـــآ ب روآئعكـ
لديكـ آلآمكـآنيه ل تكون رقم وآحد
ولآ آحد يشكـ فى ذلكـ
حتى مُنـآفسينكـ فيبحثون دومـآ على المركز الذى يليكـ

رآئع أنت وملهم لنــآ ب كل حرفكـ
نعلم جيدى ان تقييمنـآ لكـ لن ينصفكـ
فدومتآ تحتـآج مرتبه اعلى مـمـآ س نضعكـ عليهـــآ

مشكور اخوى ..
وردى عليكـ هُنـآ مـآ هو إلآ إثبـآت حُضور
ردى علي رآئعتكـ فى موضوع خَــآص
يليق بكـ

مشكور اخوى
ودمت ب أمــآن الله

كا العاده صاحب حروف راقيه
بالتوفيق

ما شاء الله كلمات جميله والخوف فيها واضح لغالي القلب والروح

والله من امس تاثرت من كلمات علي الاب

الاب هو السند بعد الله

واسال ربي ان يطيل عمر ابيك ويحفظه ويرعاه

واسال الله ان يرزقنا برهم احياء وامواتا

تسلم دكتور وربي يوفقك

خدتها من ع طرف لساني..وجيت عالجرح يا دكتور

والدي بقاله يومين تعبان وحتى الأطبة مش قادرين

يكتشفوا عنده ايه ..بس الحمدلله على كل حال

كلماتك جميلة وأثرت فيا والعنوان شدني

بالتوفيق ليك يا دكتور عبدالله

حوار رائع وكلمات تم صياغتها بأسلوب راقى
تمنياتى لك بالتوفيق اخى الكريم
تقبل تحياتى

مفيش شك آنك مُتمكن وحساس
وكتبت رائعه من روائع قصائد المُحكاه
مابين آبن وآب ..
/
ومفيش شك آن ليك آسلوب وشخصية مستقلة ف الكتابة
القصيدة آحتوت معاني كتيرة وخرجتلنا كا قصة واقعيه
يعني حسيت وآنا بشوفها آني شايفك آنت والوالد ..
محستش ف لحظة آني بشوف مجرد كلام ..
قوية ياعبدالله
وبتمنالك التوفيق ف المرحلة الثانية آن شاء الله

حوار غلفه احساس ومشاعر
وخوف من فقدان الأب الحنون
في غياب الغربة ومن قبله
ذكريات الطفولة وحنان الأب
ولهفة الأبن ، د. عبد الله
مميز وممتع ، مشكور أخوي
اتمني لك التوفيق