منتديات بنات مصر - صـعـب أوصـفـك .... ( شاعر العاميه )

منتديات بنات مصر (https://forums.banatmasr.net/)

- ابداعات الاعضاء العامية (https://forums.banatmasr.net/f241/)

- - صـعـب أوصـفـك .... ( شاعر العاميه ) (https://forums.banatmasr.net/msryat556593/)

صـعـب أوصـفـك .... ( شاعر العاميه )

مهما أقول عنك يا أمى
صعب أوصفك
ومهما طال بيا الكلام
صعب كلامي ينصفك
وصفك يا أمى شئ مستحيل
شمسك بتشرق فى عمرى كله
ونورك إنتى ماله بديل
ولو هقول عنك يا أمى
ولا ألف عمر ممكن يكفي
وألف عمر عشان أقول برضه قليل

وأنت حبيبي وكل حاجه فى دنيتى
وأجمل فرحتى
وأخر العنقود
بخاف عليك من كل شئ
وخوفى عليك ماله حدود
إن غبت لحظة تروح روحى منى
ولما تيجى بلقى فى عيونك كل الوجود

فاكره يا أمى أول كلمة نطقتها
كان أسمك إنتى أول كلمة أنا قولتها
يا أول بيت جواه سكنت
وفى حضنك انتى أول دنيا عشتها
كل حاجه جميلة عدت عليا
بعنيكي أنتى شفتها وعرفتها
حتى أبتسامتك قلدتها
يا أول بسمه فوق شفايفي رسمتها
صعب أوصفك
هو إنتى كلمه ولا صفحه من حياتى
دا انتى حياتى كلها

يا حتة منى يامالى الدنيا حوليا
شفتك بقلبى قبل ما تشوفك عنيا
أجمل هدية من ربنا إداها ليا
كل حاجه عندى ممكن تهون
وضفرك انت بالدنيا ديا

أى خوف كان بيقابلنى كنت بهرب منه ليكي
أى حزن كان بيحوطنى كان يدوب قدام عنيكي
ولما أيامى تعاندنى أجرى أجيكي
وألقى فى حضنك براحى وتهون جراحي
ويا ضمة من إيديكي

لسه فاكر أحضانى ليك ؟
لسه فاكر خوفى عليك ؟
بكره تلقى حضن غيرى يلهيك
وينسيك
وتيجى اللى عليا تعرف تقسيك

إزاى يا أمى ممكن أقسى
ولا يجى يوم وأنسى
هو الغريق ممكن فى يوم ينسى بر الأمان
دا انتى إديكى شطآن ياما ضمت سفينتى
وأحضانك عندى ألف نهر حنان
فاكر يا أمى
ولا عمرى هنسى كل اللى كان
يا أول خطوه فى طريق حياتى
يا بداية العنوان

بقلم مهيب

جميل مهيب ماشاء الله
بالتوفيق اخى الكريم

هانحاز ليك ومن غير زعل
اجمل حاجة اتكتبت من وجهة نظري لحد دلوقت
بص انا بعشق بعشق الاحساس في الكلمات
ودي باختصار احساس متزين بشوية كلمات
انت في النهائيات يانجم وافتكر كلامي
روعة بجد ياراجل دانا اول مرة اقرا حاجة. للاخر وماملش
تحيااااااااتي

مهيب
/
هتحطتنا ف مأزق ف التقيمات آنت ههههه
مكنتش متوقع بصراحه آنك تجاري الفكرة بقلمك
وتخرج بحاجة قيمة زي دي ..
آنا شايف فيك مبدع جديد بيتولد ف القسم العامي
ومتوقعلك مُتابعين كتير بعد آنتهاء المسابقة آن شاء الله
لآنك ف كل مرحلة بتثبت آن ليك حالة وقلم كلهم آحساس
وآنا واحد من الناس مكنتش بشوف ليك حاجات
بس بعد شغلي ف المسابقة هتابعك لآنك حببتني ف قلمك
وآكيد مش آنا لوحدي
روعة القصيدة
وبتمنالك التوفيق من كل قلبي

ممتاز مهيب ومميز وصفك ومشاعرك
والأم حاجة تانية أنت قدرت تكتب
بتميز اتمني لك التوفيق
مشكور أخوي على ما أجدت به وتفضلت

الله عليك
خاطرة رائعه بجد
مضمون واحساس
موفق

الله عليك ..

فعلا الوصف صعب ..بس الإبداع سهل عندك

إنك اطربتنا الحقيقة بكلامك

والحوار المترتب والمتسلسل بشكل جميل

جميلة جدا يا مهيب..بالتوفيق ليك

ربنا يوفقك ويسعدك

مهيب...
في المرحلة الاولي فوجئت بمستواك العالي جدا
و لكني لان الامر هذه المرة مقيد فالامر صعب
و لكنك اثبت لي هذه المرة ايضا ان لك قلما مهيبا
و مشاعر تستحق ان تنال درجة عالية جدا
اتقنت الوصف و الاحساس
تحياتي ايها المبدع

ياربي
روعه جدا فوق الوصف احساسك بيتقرأ قراءه

قرات القصيده مرتين وكل مره ازداد اعجاب فيها

قيمه جدا بصراحه رائعه.. مجهود جميل

تسلم ايدك
دمت ف حفظ الله ورعايته
موفق~

مهيب
كلنا متفاجئين بقلمك فى العاميه
حروف جميله واحساس اجمل
بالتوفيق يارب