|
الحلقه الاولى من الــ ( supe ) مع ( SiLver Spectra ) بسم الله الرحمن الرحيم مزاج الخير :103: ( السوبر ) ( ELSUPER ) برنامج جديد زى ماتم الاعلان عنه وزى ما قولتلكم الضيوف هيكونو ( سوبر ) عشان كدا البدايه كانت مع نجم من نجوم المنتدى صاحب فكر مميز ليه مواضيع وافكار كتيرة جدا ليه مسابقات تقريبا اعضاء كتير سجلت فى المنتدى وكانت بتدخل المنتدى بسببها . فترة أدارته للمنتدى كانت مميزة جدا حتى اسألو صاحب المنتدى http://forums.banatmasr.net/images/s...les2/photo.gif كان الوحيد الى عارف ان المنتدى هيوصل للشكل دا وحظر كتير لكن محدش كان مهتم مش عايز اطول عليكم لكن ضيفى اعتقد يعنى لما يكلم لازم الجميع يعرف ان فى شخص بيقول كلام مهم وممكن يفيد الجميع والمنتدى . معانا النهاردة ( عريس المنتدى ) ( سيادة المشير ) SiLver Spectra http://www7.0zz0.com/2016/10/19/22/974050962.png تعالو نشوف ( السوبر ) قال ايه النهاردة . س / في البدايه منور المنتدي ومبروك يا عريس ؟ و الله زمان يا استضافات :) دا نورك أمورشو الله يبارك فيك عقبال الجوازه التانيه عشان تقولنا ايه نظامها :) س/ هبدء معاك من البدايه وبدايه معرفتك بلوست ؟ ايه الي لفت نظرك ليها ؟ لاقيتها بنت غلبانه كدا فقولت زي بعضه اتجوزها ههههه لاقيتها مش بتاعت مشاكل و طيبة و بنت حلال و دا كان سبب اننا حطيناها في المراقبة من زمان 2012 و دلوقتي برد عليك من اللاب بتاعها http://forums.banatmasr.net/images/s...2/aa_cool3.gif س / كنت بتقدر تفصل ف التعامل بينك وبينها ف المنتدي ازاي ؟ عشان مكنش باين ان ف علاقه بينكم ؟ العلاقة جت في 2014 يعني في اخر ايامي في الادارة س / ايه الصعوبات الي واجهتك مع لوست في بدايه معرفتكم ببعض ؟ المسافة بيني و بينها و ماكنش عندي عربية كمان لكن اسرتها كانت منفتحة و مش معقدة س / شايف ان اهلها كانو متفقين ومش معقدين عشان يخلصو منها ^_^ ؟ والا ايه رائيك ؟ ماهو احنا مجتمع معقد و كتير من الاهالي مش بيكونوا معقدين بس بيضطروا يعقدوا عشان الكلام دا . يقولك لحسن يقول علينا ما صدقنا ! اوعي تقوليله كذا و اوعي تعمليله كذا لحسن يفكر انك معرفش ايه . و غيرها من الحوارات الفاشلة دي ..لذلك انا عمري ماكنت هتجوز جواز صالونات لان شغل التمثيل و معاينة البضاعة ماليش فيه . مافيش احلى من انك تبقى طبيعي و صريح سواء كنت اب او ام او عريس او عروسة دا لو اتحقق مش هتلاقي اي مشاكل خاصة من الاهالي ..فمن ناحيتها و من ناحيتي ماكنش في الكلاكيع و العقد دي لذلك بعتبر نفسي محظوظ في مجتمع معقد http://www7.0zz0.com/2016/10/19/22/138282840.jpg س/ شايف انها كانت مقتنعه بفكرة الارتباط بينكم ؟ اه ماكنش في مشكلة . بيبقى خوف شوية و قلق طبيعي قبل الارتباط بشوية و بيروح لحاله السؤال عموما يوجه للبنت مش ليه :)) مافيش بنت بترتبط بحد بدون هدف الجواز الا ما ندر لكن للذكور فدا الشائع عادي س/ كنت مقتنع ان الموضوع هيوصل للجواز ومكنش ف اي اعتراض ف البيت عندك بسبب انك من محافظه وهي من محافظه تانيه ؟ مافيش علاقة ليه كانت بدون هدف بمعنى اني مش من النوعية اللي بتقضيها تسلية او تعالى نحب عالنت شوية و نكذب و نقضيها بدون هدف بعد كد و يبقى يحلها حلال اللي غالبا بيكون كفايه عليها كدا أو انها تكشف كذبه او انه يتحجج باي حجه يطلعها فيها وحشه أما موضوع المحافظة فدا ماكنش عائق س / لوست كانت حنينه ف اختيارتها لحاجات البيت والا شرسه زي بنات مصر ؟ لا متفاهمين و بنمشي بدماغنا ضد التقاليد س / ايه الاختلاف الي حصلك بعد الزواج يعني الحياة اتغيرت معاك ؟ أكيد . المسؤولية هم لواحده :) عامة دا امر لابد منه و الا هتزهق من حياتك كل فترة من عمرك لو زادت عن حدها هتزهق . يعني لو فضلت عايش مراهق او طفل او اعزب لفترة اطول من الازم هتبقى الفترة دي مملة من حياتك مش حلوة زي ما في دماغك من ذكريات س / اخبار الاكل ايه واكيد المطاعم بتسترزق عليكم ؟ س / شايف ان لوست هي البنت الي كنت بتحلم بيها والا انتا غيرت احلامك عشانها ؟ البنت اللي ماكنتش اتخيل اني هرتبط بواحده زيها لاني سوداوي . حاجة كد و لا في الاحلام ((شوية رومانسية اهو عشان هي قاعدة جنبي)) بتطبخ حلو على فكرة و بتتعلم بسرعة . مش بتخلص باقة النت في الطبيخ عالفاضي س / ندخل علي المنتدي ايه سبب غيابك ؟ وليه مش بتحاول تتواجد ؟ غيابي بدأ في 2014 كان لاسباب دراسية بعدها لاقيتني مش متحمس أخش المنتدى تاني . بفتح و بلاقيني مش عايز اعمل حاجه . عايز اتفرج على اليوتيوب مثلا . افلام اخبار. س / اكيد ف اختلاف حصل ف المنتدي ؟ ايه الي لاحظته لما دخلت ؟ اللي عجبني الصورة الرمزية اللي جنب صندوق الرسايل اللي مش عجبني حاجات كتير هبقى اكتبها في موضوع منفصل س / شايف ان المنتدي يستاهل كل الاداريين المتواجديين والمراقبين ؟ مش هيضروا في حاجه لو في تناسق بينهم ممكن تعتبرها نوع من التشجيع و زيادة النشاط خاصة في الوضع الراهن لكن لو مافيش تنسيق هيكون الوضع كارثي س / كانت ايه الفكرة وقت وجودك كا أداري انك تفضل أداري لفترة طويله واعتمادك كان علي المراقبيين ؟ ما كان في اداريين كتير . ماكنتش لواحدي من اول تكنيكال لضياء و الاداري المنتخب و اخيرا امجد و منه . كنت بحط مراقبين و اداريين حسب الحاجة فقط عشان ماتحصلش خلافات كتير لان المراقبين بيكون عندهم صلاحيات شاملة فدا بيعمل تداخل في المهام ممكن ينشأ عنه اختلافات . فكان دايما الانتقاء بيكون لحد هادي مش بتاع مشاكل من المتابعة المستمرة ليه بتعرف .. في ناس كتير كنا بنستبعدها للمنصب و في ناس استبعدناها و بعدين دخلناها بعد فترة لما باقيت احسن . زي العصبية و غيره http://www7.0zz0.com/2016/10/19/22/138282840.jpg س / فين مسابقاتك وفي وقت عندك حاليا انك تفكر ف مسابقه وتشتغل عليها ؟ عندي الوقت بس لمسابقات بسيطة . الفلاشات و خلافه كانت بتاخد وقت جبار . اخرها كان semogein دا كان واخد مني اسبوعين شغل بمعدل 12 ساعة في اليوم و اتعملت في شهرين و طبعا عشان تعمل مسابقة بتحتاج تشوف حماس للاعضاء ليها . و دا مش حاسه موجود هنا دلوقتي و هيبان في كام واحد هيردوا هنا ماعتش حد يعرفني اصلا :) س / ايه اكتر مسابقه تعبتك ف تحضرها والاعضاء اشتكولك منها ؟ لسه كنت بقولك المسابقة الفلاشية الاخيرة . كانت على سيرفر المنتدى بس اظن الدومين اتغير فمش هشتتغل ماكنش في شكاوي بالعكس كانوا بيحبوا المسابقات دي عشان كانت بتعتمد على المهارات ..و سجلي كبير و كلهم تقريبا كنوا بياخدوا مجهود كبير س / ف مسابقه كنت متوقع نجاحها وفشلت ؟ مافيش مسابة ماقفلتهاش للاخر لاني بعملها دراسة و مراجعة . و كان عندي مرونه في تعديل الاخطاء و في التصحيح من ملاحظات الاعضاء .في مسابقة بس ماحدش حلها كانت موسيقية و بتلحن مقطوعة و اكتشفت ان ماحدش له اذن موسيقية في المنتدى :)) و في مسابقة كانت في 2009 عن شرطة المنتدى ..كنت عامل 4 فرق و كل فريق 4 اعضاء وظيفتهم يبلغوا عن المخالفات (طبعا ايام ما كان بيسجل 150 عضو في اليوم) و كل مخالفة بيبلغ عنها عضو في الفريق بيتم حسبها له كنقطة و كنت بعمل جرد في اخر كل يوم و كان متعب جدا لاني كنت بلاقي تبليغات بال 300 مشاركة :)) فاضطريت اقصر من عمر المسابقة لاسبوع واحد بدل اسبوعين و ما اتكررتش تاني س / انتا جيت فترة تقريبا قفلت اقسام التحميل الاغانى والافلام تقريبا ؟ كان ايه السبب ومع وجودها حاليا والا لا ؟ لأ مش مع وجودها كمبدأ انا كتبته وقتها و هو حقوق الملكية . حتى لو كنت بتفرج على حاجات مقرصنة لكن ماحبتش اكون ناشر لانتهاكات حقوق الملكية الموضوع دا مهم جدا مش حاجه عبيطه ..صناعة الفن لما تتقرصن كفائتها بتقل و بتدهور أكتر ..اي حجه عموما بتنتهك حقوق ملكيتها بتعمل مساوء رهيبة . و ممكن تلاحظ دا في مستوى السينما المصرية في الالفينات و ما بعد 2010 هتلاقي فرق كبير و الاغاني كذلك و كلو برا بيدوا اهمية لحقوق الملكية عشان يحموا صناعاتهم لذلك مستحيل تشوف عاليوتيوب فيلم امريكي متقرصن عندك كمان الروايات برضو اتاثرت جامد ..شوف مثلا روايات مصرية للجيب ازاي كانت مزدهرة في التسعينات و اول الالفينات و ازاي الصناعة دي اختفت دلوقتي بسبب القرصنة (التحميل المجاني عالنت) احنا بنفرح بان الحاجه عالنت ببلاش بس مش عارفين اننا بنتضرر بشكل غير مباشر في التاثير على كفاءة الفن و الكتابه و غيره ..ماحدش هيجتهد لو مافيش مردود مادي للفن ..بمعنى ماحدش هيشتغل ببلاش ..لما تسالني مش هتعمل مسابقة ..اكيد مثلا لو كان ليها مردود مادي كنت هتفرغ للالعاب دي و هطور فيها ..انت هتستفيد انك هتلاقي مسابقة حلوة و العاب مسلية و انا هلاي مردود مادي اقدر اعتمد عليه في اني افتح بيتي مثلا ..لكن لما مايكونش في المردود دا هيبقى الموضوع تضييع وقت ليه عالفاضي ..كفايه كدا بقي و ماحدش يفهمها على اني بطالب بمردود مادي دا مجدر مثال لاهمية حفظ حوق الملكية و ازاي بتساهم في تطوير الصناعة و بالتالي انت المشتري بتتسلى اكتر http://www7.0zz0.com/2016/10/19/22/138282840.jpg س / بتزعل لو حد فكرة ليك وحاول يعيدها زي مثلا المتحدث باسم الاعضاء او الاداري المنتخب ؟ هزعل ليه . لا خالص . هي بتبقى حاجه ذوقية مش اكتر انك تحط تاريخ الموضوع او الفكرة كان في السجل الاداري صفحة كنت حاطت فيها زي لوحة شرف لكل الاداريين .حاجه زي المتحف كدا تشوفها تحس انه مكان اصيل . معرفش راحت فين دلوقتي س / لو طلب منك تتواجد وترجع تاني كا أداري توافق ؟ و أضايق الناس اللي موجودة ليه يا ابني :) خليني زي الجنزوري . قاعدوا يحكوا عنه كلام و الراجل دا لو مسك دلوقتي هيعمل و يسوي و احسن رئيس وزراء و بتاع و لما مسك شتموه :)) خليني ذكرى يمكن تكون حلوة مع الناس س / مش خايف حد يزعل منك بما انك هتنزل موضوع بالى معجبكش فى المنتدى ؟ وتفتكر ممكن محدش يعتمدهولك زى ما بيحصل هههههههه ؟ انا مش هكتب موضوع شتيمة او تهكم انا بس هدي بعض الملاحظات مش اكتر تفيد المنتدى يعني مش غرضي اني اغلس او انتقد يعني قسم مالوش داعي او حاجه متركبة او قانون قديم مالوش داعي حاليا و هكذا ..و هي فقط على شكل ملاحظات يا ابني انا جاي ضيف هنا و بنفهم في الاصول س / مين من اعضاء المنتدي الي ماتقدرش تنساهم لو جت سيرة المنتدي ؟ قلم بلا حبر . ضياء . مورشو (مش مجاملة على فكرة) دول ليهم نشاط مميز . طبعا كل فترة و ليها ناسها بس بما ان السؤال عام فجاوبت بشكل عام خلينا نخصص و هكتب اللي هقدر افتكره 2008 هيثم و محمود و ابو ادهم و قلم بلا حبر القلب الطيب حنون و ناس تانيه كتير :) 2009 ضياء و noona 2010 rona eltota و صفية و تقى و ماتركس و نوررر :) و خارج عن القانون و تكنيكال و ناس تانيه كتير 2011 و ما بعده مورشو و الماجيك منه و امجد و علاء و لوست و اخيرا عاشق الاحزان و نور و نار س / بتكون مبسوط لو حد اكلم عنك كويس وجاب سيرة وجودك وانت اداري ؟ أكيد .. في موضوع كنت شوفته في رمضان عن الاعضاء القدام و كان في حلقة عني . دي الحاجة الوحيدة اللي بتحسسك بقيمة ال 6 سنين اللي ضاعوا في المنتدى :)) س / شايف ان الاداري لازم مايكنش ليه خلافات والا دا وضع طبيعي ؟ وف حاله الخلاف كنت بتستغل صلاحياتك والا بتتصرف ازاي ؟ الاداري انسان و اكيد بتجيله لحظة انفعال ممكن يتصرف باستغلال لصلاحياته . بس الفكرة في مراجعة الموقف و التفاهم و قدرتك في التحكم بانفعالاتك مافيش حاجه اسمها مالوش خلافات لانها بتحصل غصب عنك خاصة لما تكون اداري .. بس عموما انا كنت بستبعد الشخص اللي بيعمل مشاكل او كثير الخناقات او سريع القمص . كنت بعد مع ضياء كدا و ننم عالاعضاء و نعد نرشح و تاني يوم نلغي الترشيحات دي بسبب ان المرشح اتقمص و اتخانق مع حد :)) و بيكون ملاحظ ان في ناس سلوكها بيطور للافضل س / فترة وجودك كنت بترفض نزول اى موضوع بيكلم عن سلبيات المنتدى وكنت بتحزف المواضيع زى دلوقتى ^_^ ؟ شوف بيستفز ازاي يا ابني بطل لحسن اديك حظر دلوقتي هههههههه الكلام بشكل عام المعارضة او الانتقاد بتدي متنفس للاعضاء و بتفيد عموما لانك بتعرف الناس بتفكر ازاي من جواها بدون مجاملات و بتدي فرصة للادارة للتوضيح و الاقناع و بتعمل نوع من الضغط الايجابي على الادارة انها تراعي امور ممكن ماتكونش بتاخد بالها منها المهم في دا ان النقد يكون بناء . بمعنى يكون في اسلوب متقبل اللي يشوفه يحترم الكاتب مش تهكم و سخرية و غلاسة و يكون المتلقي صدره رحب و منفتح . مايكونش اللي هامه المنظر ادام الناس او كلمته تمشي و الحوارات دي ولما بقولك دلوقتى متاكد من كلامى لانها حصلت معايا اكتر من مرة ؟ ما حضرتش الموقف من اوله فمش هقدر احكم و عامة انا جاوبتك فوق بشكل عام / انتا مع ان الاعضاء تفضل تشكر فى المنتدى ومحدش يكلم عن سلبياته والا المفروض تسمح بالكلام دا على الاقل تشوف رد فعل الاعضاء وتشتغل عليها ؟ لسه كنت بقولك ان النقد بيفيد العامة في توضيح الاراء حتى كنت بكتفي بالاعجاب على الردود الشكر و برد على النقد و ممكن كان في ناس بتزعل و تقولك ماردش عليه و كنت بوضح اني برد على المشاركات اللي فيها اضافة او جدل http://www7.0zz0.com/2016/10/19/22/138282840.jpg س / هفرض انك وافقت ترجع أدارى ؟ عايز اعرف هتعمل ايه يعنى هتحاول تنشط المنتدى والا عادى هتسيب الامور زى ماهى وزى ما بيقولو هتحافظ على الموجودين ؟ كلمة تنشيط دي واسعة و اي حد بيشارك و لو بيسلم عالناس بس فهو كدا هيتقال عليه بينشط ..الفكرة في طرح مواضيع و افكار مميزه جذابة . حتى لو هتشارك مشاركتين في اليوم بس يكونوا جذابين و ليهم قيمه تخلي المتابع مستني اقل مشاركة تكتبها و تخليه قاعد في بروفايلك كل يوم يشوف نزلت مشاركة جديده و لا لأ . دا التنشيط اللي بحبه مش بعدد المشاركات و لا بمواضيع التحصيلية س / شايف ان تنشيط المنتدى الحل الوحيد ليها المسابقات فقط ؟ عشان ملاحظ ان عايز تنشط اعمل مسابقه المنتدى بقا كل قسم فيه مسابقه وتقريبا دخل من ضمن التقييم الشهرى ان لازم مسابقه تتعمل ؟ اكيد لأ طبعا . المسابقة ضمن التنشيط لكن مش هي الحل الوحيد . وضحت في السؤال اللي قبله اهمية جودة الموضوع مش بعددها و لا باسئلة تتعمل مسابقة حلها كوبي و بيست س / انتا مع ان ممكن يتم تعيين عضو أدارى والا لازم يطلع السلم الادارى ويوصل للمكانه ؟ ولو انت مع الحكايه دى اكيد العضو دا لازم يكون ليه مواصفات خاصه انك تغامر وتقول انا هعين فلان مثلا ؟ مش شايف فيها مشكلة . التدرج دا بيكون بيروقراطية ..بمعنى انك تشوف حد كفاءة و مش تعينه عشان في ناس اقدم منه ..و دي ممكن تشوفها في اغلب المصالح الحكومية . هتلاقيهم بيعينوا بالاقدمية بغض النظر عن الكفاءة على خلاف القطاع الخاص اللي بيهتم بالانتاجية في مشكلتين بس في الحوار دا اولهم في قدرتك على اختيار الشخص دا اللي هتصعد بيه بشكل مفاجئ . التانية في زعل الناس القديمة و دا امر طبيعي الذكاء بقى انك توازن في الموضوع دا و تقدر تجيب حد بدون ماحد تاني يزعل . يعني ياخد وقت كاف في المنتدى بنشاط ملحوظ و تدرجة سريعا في المناصب . او تنظم اليات اختيار سواء انتخابات او ترشيحات و خلافه الخلاصة اني مش ضد الفكرة بس مع الذكاء في تنفيذها و في الاختيار الصح . و طبعا ماحدش اداري هيختار و هيقولك انا اخترت غلط . لذلك انسب شيء يرضي الاعضاء بيكون بالترشيح و الانتخاب او اعطاءه وقت كاف قبل ترقيته .. على الصعيد الشخصي هتحس اني ماكنتش بقفز بحد بس في الحقيقة كنت بقفز بس بدون ما تحس ..هل مثلا كنت بعين اقدم عضو مراقب ؟ اكيد لأ بس هنا الذكاء اللي بقولك عليه في انك تدرجة و تديله وقت بحيث انه في خلال سنة مثلا من نشاط متواصل يبقى مراقب بعد مايمر بترقيات كتير ساعتها ماحدش هيحس انه تم القفز به مباشرة لمنصب عالي مره واحده و كمان الناس هتكون عرفاه بشكل كاف فهتتقبله اكتر س / ايه رئيك فى الاعضاء الى بتقتبس مواضيع او خواطر او افكار وتنزلها فى المنتديات باسمها ؟ مش بفضلها . الاقتباس حلو و بيفيد انك بتشوف ابداعات مختاره بس بقبله لما صاحبه ينسب الاقتباس لمصدره ..لكن تاخده على انه بتاعك دا هيعيدنا لنقطة الملكية الفكرية تاني س / بص ياريس دا اهم سؤال عندى هههههههه ؟ فترة وجودى على صفحه الفيس اولا انت كنت مهتم بالصفحه والا لا ؟ لا ماكنتش بهتم بصراحة . كان النشاط عليها ضعيف شوية وياترى الاعضاء اصلا كانو بيفتحوها والا لا ؟ وياترى كان اجبارى على الى ماسك الصفحه انه يمدح فى المنتدى فقط والا من حقه انه يهاجم الادارة لو رفضت انها تحزفلك اى توبيك تهاجمهم فيه هنا ؟ هو مافيش صفحة فيس بيكون ليها هدف غير الدعايه للموقع . فاكيد الدعاية مش هتبقى بالنقد و نشر الغسيل فيها :) ..لو قصدك عالنقد فدا مكانه في المنتدى . اما ان النقد ينتقل الى صفحة فدا معناها ان في خلل في التعبير جوا المنتدى زي مابيحصل لما تلاقيه بيقولك المعارضة في الخارج http://www7.0zz0.com/2016/10/19/22/138282840.jpg قبل مانختم الاعضاء دى عرفت انك ضيف الحلقه فبعتتلك الكلام دا Eng Esraa اخيرا ظهر ! هههههه اقوله .. انه يرجع معانا زي الاول هنا بقا علشان هو من الناس المهمةهنا .. منور من جديد بقا :) حيــــــاة ❤ اهلـا بحضرتـك اكيد، منور ياسوبر مع اني محضرتكش بس باين من كلام الاعضاء انه شخصيه تحترم وشخصيه مجتهده ذات طابع مسؤول بُس فأحب اقوله انه منور وربنا يسعده ف حياته دائما ويرزقه الجنه في اخرته باذن الله Aya 7ekaya د/ طارق من الناس المميزة اللى سابت بصمه فى المنتدى للحظة دى افكاره وطريقه اداراته للمنتدى كانت ناجحه جدا بتمنى تواجدك ي دوك يكون دائم بقا وتنورنا ^^ big bốss احب اقله اننا مفتقدينك جداً يا كبير و وحشتنا اوى و ياريت ترجع معانا تانى و احب اسئله سؤال - ايه رايك فى الجواز و هل هو بلا لابد منه ؟ http://www7.0zz0.com/2016/10/19/22/138282840.jpg وبكدا بتخلص اول حلقه من ( السوبر ) :m57: |
انا بقا من الناس اللى حضرت فترة اداره دكتور طارق و فعلا كانت فترة ناجحه جدا الاجابات متوازنه و عقلانيه والف مبروك بقا ع الجواز ^^ |
مجهود عالي أ/احمد وعرفنا اكتر عن أ/طارق او عرفت منور اخي وربي يديم تواجدك بين اسرتك هنا واكيد انت شخصيه كما سبق واخبرت مسؤوله وكلام الاعضاء عنك مش، من فراغ تسلم مورشو دمتما في، حفظ الله |
الف مبروك ياطارق منور المنتدى واتمنى تفضل متواجد اكتر معانا وكتير اعضاء فى استضافات معايا اتمنوا ترجع عن نفسي اتعلمت منك كتير وبشكرك على كل حاجة علمتهالى وقدمتها للمنتدى ربنا يوفقك ويسعدك شكرا مروشو |
الف مبروك للعروسين وبرنامج حلو مورشو وبداية موفقة وجميلة واجابات ضيفك كمان عقلانية وعجبتني الحقيقة |
شخصيه ذكية بتعرف توصل المعني بشكل متميز بعيد عن اى أمور اخرى متدنيه ،، وعشان كداا بأقدر جدا عقليتك وتفكيرك واكيد من الناس اللى لازم اتابعلها اى جديد ينزل بالنسبه للإرتباط فا ربنا يوفقك مع آلاء كانت شخصيه طيبه وجميله ربنا يسعدكوا بإذن الله ويرزقكوا بالذرية الصالحة ،، موفق دايماً في حياتك |
انا بس ليه توضيح اخير بخصوص اخر سؤالين لان كان ف شخص غير سوي اكلم عن النقطه دي فالحمد لله الاعضاء دلوقتي مين سوي ومين غير سوي وكان بيكلم كلام فاضي من خياله هو هههههههه طارق نور التوبيك طبعا ونور المنتدي ونور الاستضافه ووضع امور كتير مهمه . بالتوفيق يا عريس |
ياااااه والله كان نفسى اعرف اخبارهم دكتور طارق كان من الناس الخلوقه المحترمه الى بجد خلانا نحترمه ونقدره ووقف جمبنا كتير وحافظ علينا كتير ولوست حبيبة قلبى والله وحشانى ياقمر ومليون مبرووووووووك فعلا تستاهلون بعضكم ونعم الاختيار للطرفين من كل قلبى مليون مبروك وبنتمنى عودتكم بسرعه شكرا مرشو لانك طمنتنا على الناس المحترمه والله |
ايون بقا الحاجات الحلوة ظهرت اهي :) طارق منور اكيد و الف مبروك ليه .. تسلم يا احمد ع التوبيك و الافكار منتظرة الجديد بقا |
اهلا دوك طارق منور اكيد والف مبروك وربنا يسعدك انت و الاء واتمنى ترجعوا تاني تتواجدوا كلامك طبعا كلام انسان عاقل وفاهم ومتميز في تفكيرة ودة كان واضح في فترة ادارتك هنا وافكارك الجديدة دايما في انتظار توبيك الملاحظات لان دة هيفيد كتير اكيد مشكور احمد على البرنامج والحوار الرائع تحياتي |
| الساعة الآن 05:43 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب