|
بلد غريب من فترة مش قصيرة كان في ايفنت علي الفيس لزيارة شارع المعز فقلت اجرب كدا واشوف الحوار .. فكنا في مدرسة السلطان قلاوون فكان الرجل المرشد بيكلم عن الفرق بين التعليم زمان ودلوقتي وكل ما ييجي وجه مقارنة بيتريق علي الحال دلوقتي وكدا... وازاي ان مصر في الفترة دي كانت منارة للعلم وغيره .. واهتمام الفاطميين بالحاجات دي عشان يغازلوا المصريين ويتقربوا منهم وان مثلا منطقة شارع المعز كان فيها اكتر من 36 مدرسة في محيط كيلوهات محدودة انا فجأة حسيت أنه في كلام مش منطقي بالنسبة ليا ماكنتش عارف ليه وقتها .. بس لما قعدت افكر شوية جالي تفكير غريب .. مش عارف منطقي ولا ايه قلت .. طيب احنا في مصر من كام ميت سنة كان في مركزية في التعليم بمعني أن كل الكفاءات العلمية كانت بتتركز في منطقة مصر القديمة مثلا اللي هي في شارع المعز وبجانبها الازهر وكدا .. وبالتالي المنظومة هناك متحددة علي أشخاص بعينهم في محيط ضيق لو حصل انتكاسه علمية في المنطقة دي كله هيتأثر بيها زي السرطان كدا... وماحدش هيكون ليهم ساند او مصحح ... وده اكيد حصل .. لو رأس المنظومة كان ليه فكر ركيك هتحد من كفاءة المنظومة .. لو حصل خلل في تعاقب الأجيال المنظومة هيتفكك ترابطها.. ومعرضة أكتر للفساد .. لأنه انت اهتميت بالمركزية وماهتمتش بالانتشار ... فعلي حساب مليون كيلو متر من مساحة مصر خطيت اهتمامك كله في 15 في كيلو من النهضة المعمارية الهائلة والفشخرة الكدابة وحلقات العلم المركزية ونسيت تأسس لدولة المفروض كل من فيها سواسية ... لهم الحق في أن تصل لهم جميعا كمتعلمين وتعطيهم اقل حقوقهم عشان يكون في استمرارية ... وقتلت نوابغ وقتها في ريف بلدك كانت ممكن تغير من شكلنا 100 سنة قدام لأنك ماوصلتش ليهم غير بالكتاب اللي بيحفظ القرآن الكريم .. اعطيت الانطباع وقتها ان 90 في المية فلاحين عليهم الزراعة ويورثوا ده لابنائهم و10 في المية عليهم الاضاءة وياخدوا كل النجاح... وبالتالي بقينا بلد منذ القدم ترسخ فيه حب الظهور امام العالم كمنارة ونسينا أن هناك من يضيئها .. وهناك ضريبة نسيت أن تدفعها لكي تواصل اضائتها وفي الوقت الذي كنت ترسل فيه كوادرك الي العالم العربي كما يقولون ... كان من الأولي أن توجه حملاتك الي كافة قراك وبدلا من أن تبني 50 مدرسة في مكان واحد كان وقتها يجب أن ترسل في كل محافظة مدرسة واحدة علي الأقل وحسست الفلاح اللي في الوجة البحري والصعيد أنه درجة عاشرة وعشان ابنه يتعلم لازم يجيلك مصر ويسعالك ويجري وراك .. وبالتالي برضه انت رسخت مفهوم داخل المصرييين باستصغار أنفسهم اسست لمفهوم السادة والعبيد .. لأن عندما اسست ثقافة التهميش والتفرقة .. فقد اسست وقتها لكراهية بعيدة المدي وسياسة عدم الرضا .. فبات من الصعب الآن عندما تستيقظ ان تسامح او تغفر .. فحسيت أن في الوقت اللي هما قالوا فيه كانت مصر رائدة في التعليم هي كانت بداية انتكاستنا ووصولنا لما نحن عليه الآن واسسوا لكل مبدأ غلط احنا عايشينه دلوقتي ... ولو شوفنا الموضوع من حتي عهد الفراعنة .. هنلاقينا ماشيين بنفس المبدأ وهو ان احنا كل يوم من سخرية القدر بنصحي الصبح بنتفاخر ونغني لسبب وجودنا باللي احنا فيه دلوقتي .... |
ربنا يهدي الحال احنا فعلا دوله بنحب تغني كتير من غير اسباب وعايزين نتقدم برده من غير اسباب واكيد دا يرجعلنا فقط ميرجعش لحد، قبلنا الوضع كان افضل، بكتير برده من دلوقتي انت بتقصد المبادئ ودي ممكن تكون فعلا البلد عايزه رثاء خلصت خلاص تسلم لفضفضتك.. احطها فين المرادي هههه |
هو حلو في مكانه كدا ههههههه هو يمكن يكون الكلام مرجعيته مش مظبوطة 100 المية ووجهة نظر قد يصاحبها الصواب او الخطأ بس هو مش رثاء او ان الوضع كان افضل بقدر ما انا بكلم عن ازاي كتير من الافكار عن بلدنا اترسخت فينا زمان وفاكرينها صح وليها اثر ثابت لحد دلوقتي بيهز في اركاننا بسلبية .... وان ازاي المفروض حاجات بنتفاخر بيها زمان هي ممكن تكون اسست بشكل ساخر لمآساة احنا عايشينها حاليا |
احنا لا مناره ولا غيره عايشين على الفشخره الكدابه واننا أم الدنيا طب سؤال صغير أم الدنيا بامارة أيه ؟ بنعمل ايه أصلا له تأثير فى العالم ايه الشئ اللى بننتجه أو بنقدمه العالم كله هيتأثر لو بطلنا نعمله ولا حاجه حتى جهاز الكفته الواحدين اللى كانوا مرعوبين من أنه يطلع بجد محلات الحواوشى وبدل ما نحاول نطور نفسنا ونعمل حاجه ويبقى لينا دور وقيمه والعالم كله يحترمنا فضلنا واقفين مكانا وبقت حياتنا كلها بتدور حوالين حضارة 7000 سنه و شوية كلام على حجر رشيد على أغانى بتطلع مصر انها المعلم الأول والعالم كله كان بيتخبط فى ظلام الجهل واحنا اللى جينا خدنا بأديهم وعدناهم الشارع جتهم خيبه فوق خبيتهم موضوع رائع أخى الغالى تقبل تحياتى |
تصدق موضوعك ذكي وجديد وغير مستهلك وبينمي التفكير في الأمر بس أن يكون في 36 مدرسة أو 50 مدرسة في محيط واحد أعتقد دا يدل على أهمية الأزهر الشريف مش يصنف على أنه مركزية التعليم في العاصمة وكلامك هيكون صح في حالة واحدة لو فعلا باقي المناطق كانت خالية تماما من المدارس والتعليم والثقافة مفروض نبحث في الأمر دا الأول |
اقتباس:
الروعة في حضورك اكيد بس علي فكرة انا مش كاتب الموضوع لغرض جلد الذات لأنه مش حل اكيد برضه انا بحاول اوصل لحالة ليس الا او اعرض مسار تاريخي من منتصفه .. بحيث نقدر نوصل من خلاله لنقطة بداية جديدة .. او نقدر نوصل لحقيقة تاريخية نعرف بيها الخلل وعلي فكرة كلامك قدرت اوصل من خلاله لحاجة برضه انه يمكن شعارات ام الدنيا والمنارة والكلام ده كان حمل كلامي احنا حطيناه فوقنا .. وضغطنا فكمشنا فبقينا غير عفويين ... فبقا عندنا حاجز الكبر أعلي من متطلبات المعيشة فبقي مستوي افكارنا ابطأ من سرعة العالم حوالينا لأننا كنا يمكن بنشوف الدنيا من فوق ليس اكتر فصدقنا نفسنا .. ومع الوقت كدبتنا الدنيا كلها .. وبالتالي عندنا خلل في السلوك لازم يتعدل اعتقد |
اقتباس:
تمام جدا انك اكلمتي في صلب الموضوع أنك تعمل اهمية للازهر مش معناها أنك تفرع منه متاهات بقدر ما أنك تخلي المكان نفسه غاية بتفلتر ليها الناس لحد ما يكون الاذكي والافضل قادر يكون نوع من النخبة فيبقي المكان زي تارجت عالي كله بيطمح ليه انه بيخرج كوادر قادر تقود امة بكاملها .. انا مش بكلم علي الازهر كقيمة دينية في المقام الأول.. انا بكلم كقيمة علمية المفروض يكون فيه اقتداء بيها او تمثل قبلة لكل جامعة مثلا عاوز تكرر تجربة نجاح .. زي مثلا ما بتلاقي قلة مختارة بتدخل كامبريدج او هارفارد او غيره او المتفوقين بينتظروا منحة من المكان ده ... وبالتالي برضه اي قيمة علمية كبيرة المفروض هي اللي تبحث عن كادر قادر يقوم بالبلد وترشده وتقومه ... مش العكس أنك تلاقي موهبة بتلهس وراك ... ومش قادرة تظهر او قيمتها بيكون زي اي شخص عادي ... فلو نجح بيكون ده وليد الصدفة ليس الا ... وبالتالي في سلسلة مفاهيم اتكونت غلط في الفترة دي بتركز اكتر علي قيمة المكان وقيمة المعلم وليس قيمة المتعلم اللي هو الاساس في المعادلة التعليمية واللي المفروض كل ده بيتعمل من الدولة عشان يتم انتقاء 16 او 20 طالبا من قيمة ميت الف يقدروا ينهضوا بالبلد.... ولو أنك نابغة و انت صغير وكان عندك بعض السلوكيات الغلط بيتم نبذك ..مش تقييمك .. فبتفقد الأهلية بعد كدا .. والحاجات دي بتتورث مع الوقت ومافيش حد وقف وعمل نقطة نظام وصحح ام ان الفترة التاريخية بتاع الفاطميين مش قادرين نحكم علي ان كان فعلا فيه مدارس في غير القاهرة ولا لاء ... فعلي حد علمي انه كان كل الفاطميين مثلا بيكلموا عليه هي مدرسة في الاسكندرية كمان ... والقصة مش في المدرسة بشكل عام ... القصة برضه في أنك تحط نقط مضيئة في كل مكان في بلدك ماتحسس فيها المتعلم انه قيمته أقل من غيره .. |
| الساعة الآن 11:58 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب