الصحبة الحلوة مش بالكلام بس
 

ما تشتكيش كل شوية من صاحب و تقول مبقاش في الدنيا خير لأن انت اللي بتدي لقب صاحب لأي حد.

الصاحب الحقيقي مش اللي ييجي في فرحك يرقص طول الليل، الصاحب الحقيقي اللي بعد ما فرحك يخلص يفضل أيام فرحان من قلبه عشان انت فرحان.

الصاحب مش اللي ييجي في عزا يقعد نص ساعة و يخرج منه يروح يلعب بلاي ستيشن و يكمل يومه عادي، الصاحب الحقيقي اللي يفضل زعلان عليك حتي وهو مش معاك و ميبقاش كويس غير لما يحس انك كويس، يعني مش اللي يقولك شد حيلك، لا .. ده اللي بيشد حيلك بالفعل مش بالكلام.

الصاحب اللي ممكن يدعيلك في صلاته و انت مش عارف، اللي بيحبك لشخصك مش عشان فيه مصلحة بينكم، اللي بيفرح لنجاحك حتي لو هو مش مستفيد منه، اللي لما تقع يمد ايده يقومك مش يهرب من فشلك، اللي و انت مسافر يفضل قلقان عليك لحد ما توصل، اللي ممكن يعمل حاجة من وراك في مصلحتك و ما تفرقش معاه تعرف و لا لأ، اللي بيفخر بيك مش بيغير منك، اللي بيخاف عليك و بينصحك مش بيسقف لك ع الفاضي و المليان.

مش كل واحد قعد معاك قعدة لذيذة او حتي الظروف خلته بالصدفة يبقي جنبك في موقف صعب يبقي صاحب، الصداقة الحقيقية لازم تختبر، و تختبر كتير في أماكن و أزمنة مختلفة.

الصاحب الحقيقي عملة نادرة، و العملة النادرة مش بتصادفها في حياتك كتير و طبيعي يبقي عندك عدد قليل جدا من الأصدقاء الحقيقيين، فيه زمايل مهنة و معارف و ناس في حياتك لمصالح مشتركة و مسميات كتير انت اللي ملخبطها في بعض.

عد علي صوابعك دلوقتي في كام صاحب حقيقي في حياتك و ما تستغربش لو ما احتاجتش غير كف إيد واحدة، و غالبا مش هتحتاجها كاملة

كلام صح
ميرا
لازم نبدأ بأنفسنا
لك عظيم التحية

الصاحب الحقيقى رزق
مش اى حد يتقال عليه صاحب صدقتى

الصديق الحقيقي من الاخر اللي

مثل ماهو قدامك وراٍك

مبينافقش معاكي

وبيتمنالك الخير قبل نفسه

احييكي حبيبتي على فضفضتك المميزه