منتديات بنات مصر

منتديات بنات مصر (https://forums.banatmasr.net/)
-   فضفضة الأعضاء (https://forums.banatmasr.net/f137/)
-   -   فكرة الزواج من مطلقة (https://forums.banatmasr.net/msryat567324/)

عاشق متيم 04-04-2017 03:32 PM

فكرة الزواج من مطلقة
 
بسم الله الرحمن الرحيم

نسبه الطلاق والخلع اصبحت مرتفعه ولأسباب كثيره ومش موضوعنا ! نظره المجتمع للمرأة المطلقه او حتى الارملة حاجه فى منتهى القبح وكإن كلمة مطلقه حاجه مشينه وعيب ! وده من ضمن الأسباب اللى بتجبر بعض الزوجات انها تتحمل الذل والإهانة على انها تتطلب الطلاق .
موضوعى بيتكلم عن الزواج من المرأة المطلقه :
اولا مش عايز مقارنات فى أيها افضل الزواج ببكر او مطلقه أو أرمله .. ولا هنتكلم عن حديث النبى لجابر ، ولا على كلام علماء ولا حتى تعقيب على الكلام اللى بيختذل الزواج من مطلقه لحاجه بمعنى أخص ( خدامه ) تربى عيال زوجها الجديد !!!!!!!!!!
#########
قصه باختصار شديد
اخت واحد من اعز اصدقائى اتجوزت شخص ( ربنا يسهل له ) والكل حذرها منه ولكنها عاندت الجميع وأنا اللى هتجوز وفعلا اتجوزت ومكملتش معاه سنه وشافت ايام مريرة وصاحبى ده كان هيدخل السجن بسبب اخته بعد ما ضرب زوجها لأنه اعتدى على اخت صاحبى ، المهم أطلقت واتنازلت عن المؤخر والذهب كشرط للطلاق .... فابن خالتها عاوز يتجوز البنت وبيحبها وفجأة نسيت الخالة إن دى بنت اختها وسمعت البنت كلام سيىء وكسرت نفسها وان ابنها مينفعش ياخد واحده كانت متجوزه ودى اول فرحتها وانها مش هترضى ان ابنها ياخد فضلات رجل اخر !!!!! انا وصاحبى بيحكى ليا عن اللى حصل وحاله اخته النفسيه بسبب كلام خالته وكلمه ( فضلات ) ، انا اخر مره شوفت الكلمة دى كانت ف قصة زواج الحجاج من هند بنت المهلب لما طلقها الحجاج وعبدالملك بن مروان سمع عنها فطلبها للزواج فاشترطت أن الحجاج يسوق لها الهودج فلما وصلوا كان عبدالملك عامل وليمه والناس اكلت والحجاج كان تحت فبعت له الخادم
علشان يجى يأكل فرد الحجاج وقال ( تربينا ألا نأكل فضلات الرجال ) فلما الخادم وصل الرساله لعبدالملك فهم أن الحجاج بيلقح كلام انه كان متزوج من هند وطلقها وتزوجها عبدالملك ، وسواء لقصة صحيحه او فيها شيىء لم يحدث زى ما قيل ان هند لم تتزوج عبدالملك مش موضوعنا بس ذكرتها علشان كلمة ( فضلات )
نرجع لكلامنا وان البنت حالتها النفسيه سيئه ، انا مش هلوم على خالتها ده حقها انها ترفض عروسه هى مش شايفاها مناسبه من وجهه نظرها بس اللى مش حقها انها تغتاب وتذم الغير ...
وللأسف الشديد اصبح من العرف أن المطلقه لا تتزوج الا رجل عنده اولاد وهى تشتغل لهم خدامه .
وحالات فرديه ممكن تتزوج شاب ..

حـيـــــآة ❤ 04-04-2017 04:27 PM

ومالها المطلقه مش فاهمه
المشكل ي استاذ ان احنا ف مجتمع ذكوري بكل معني الكلمه
والست مالهاش راي مالهاش شخصيه ف مجتمعها ولو اتجوزت تبقي خلاص مالهاش حاجه عند اهلها ول عند حد
مالها المطلقه طب والراجل اللي مطلق مش معيوب هو كمان ليه
والله مجتمع جاهل بالعلم!
انا بحس انها دمرت نفسيتها اوي حرام كدا
في تحارب بتبقي غلط.. يعني الست تقعد، ف ذمه واحد مش كويس عشان ميتقالش عليها فضلات سوري

تسلم ع الفضقضه استاذنا
ربنا يهدينا

رنوش روشي 04-04-2017 04:59 PM

شاطره يا هاجر يا رافعه من معنوياتنا يخليكي للولايه ياختي هههههههههههاي

bobaOo 04-04-2017 05:33 PM

ينهار اسود فضلات !

ربنا يرحمنا برحمته ويسعد كل البنات باابن الحلال..

فكرة ان المطلقه متتحوزش الا من رراجل مطلق برضو فكره غلط ومسيطره على عقول العرب كلهم مش المصريين بس وان مجالهاش مطلق تقعد بئا!

العاشق الذى لم يتب 04-04-2017 08:47 PM

مرحبا بالاحبة
حياك الله
كلمات راقية
وكلام هادف مفيد
سلمت

دمعه حائره 04-04-2017 09:36 PM

الكلمة صعبه اوى
مجتمعنا بينظر للمطلقه او الارملة انه ناقصهم حاجة
نفس النظرة للرجل المطلق والارمل لكن مش بنفس الدرجة
مع ان ممكن ميكونش ليه ذنب فى الظروف دى
هو من حق الام تفكر لابنها فى بنت لم يسبق لها الزواج
لكن مش من حقها تقول كلمة زى دى
مفروض يختار اللى بينهم تفاهم وتكافؤ مش لظروف هى ضحية فيها
احنا محتاجين وقت كبير وزمن تانى عشان نبقى متحضرين
وعندنا رقى فى التعامل مع الناس
موضوع جميل تسلم اخى

توحد ارواح 04-04-2017 09:41 PM

بالفعل مش من حق الغير انه يغتاب او يذم حد
واحيانا كثيره تكون المطلقه مجنى عليها
ولكن هى ثقافة مجتمع ونظرة ناس
ومهما قلنا مفيش ام هتوافق ان ابنها يتزوج من مطلقه
سلمت على موضوعك القيم

Fatma eissa 04-05-2017 08:28 AM

لاسف دي نظره تشائميه للمجتع
اتجاهها
وكانها خلاص
مع دي ممكن تعويض
من ربنا ليها
وسعات مراية الحب عميه
متخليش الواحد يسمع او يدرك
لا لما تشوف الحقيقه قدمها
وعندي اعتراض علي كلمة خدامه
لانه لو عوز مدا كان جاب خدامه
مش زوجه
ولو كان الزوجه تحب الزوج ولاولاد
هي الي هتبادر
مش بطلب والحاح منه
ومش بس الي سبق
ليهم الزواج هما الي هيتجوزو
كبير وعنده اولاد
فيه بنات عندكم متفرقشي
عادي
وممكن الي سبق ليها الزواج
تتجوز شاب زيها
ومفروض النظره ليها تتغير
وان المجتمع يدها لاحقيه
لدا واستحالة العيش
وهي استخدمة رخصتها
ولا انها تقضي عمرها
كله خوفا
للقيل وقال
لانهم مش هبسكتو
وكانها اجرمة
الحجات دي كلها قصمه
ونصيب
ويمكن مكنشي نصبها
فاراد الله ان يكشفه
ولاكي تستطيع لاختيار
صح بعد كدا
وتسلم علي طرحك القيم

Doaa Hammam 04-05-2017 12:55 PM

الاصدقاء كفوا ووفوا وقالوا كل شئ

طرح مفيد جدا ويا ليت الناس تفهم ان المطلقة دي مش مرض ولا سبه

دي انسانة وممكن تكون اتظلمت واتجرحت وأحوج الناس للكلمة الحلوة والطبطبة

لكن للأسف مجتمعنا ظالم ومعندوش رحمة

تحياتي لشخصك الكريم

سما سمسم 04-09-2017 09:47 AM

ربنا يهدي الجميع


الساعة الآن 02:10 PM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب

a.d - i.s.s.w