|
مطلوب مرضعه فورا اكيد طبعا العنوان غريب شويه بس لما تكملوا الموضوع هتعرفوا سبب العنوان انا بقالى كتير جدا جدا مكتبتش اى مواضيع بدخل المدونه بتاعتى بكتب وبخرج نخش بقى فى الموضوع من كام يوم كدا جت قطه فى العماره شكلها جميل ولونها ابيض ومكنش باين عليها انها حامل سكان العماره كانوا بيعطفوا عليها من اكل وشرب وخلافه وفجأه كدا لقينا القطه وضعت 3 قطط وبقت ترضعهم وتحتتضنهم بحكم انها امهم بقينا نحطلها اكل ونشربها لبن عشان تقدر ترضع اطفالها التلاته انا عملت ليها ولأطفالها فرشه كدا متواضعه وفجأه اختفت الام اى والله كدا زى ما بحكيلكم انا قولت احتمال امهم راحت هنا ولا هنا وهتيجى تانى يومين تلاته الام مظهرتش واطفالها هيموتوا عشان معتمدين على الرضاعه منها ربنا قدرنى على فكره انى اشترى ليهم ببرون واحط فيه لبن واحاول اخليهم يرضعوا من الببرون لقيت ان الببرون كبير على بؤهم خدتهم عندى فى البيت فى كرتونه وفكرت فى فكره تانيه ا شتريت سرنجه بتاعت الحقن وشلت منها الابره وخليت امى تسقيهم اللبن بالسرنجه والحمدلله نجحت الفكره وبقيت وانا فى الشغل كل شويه اتصل بأمى عشان اطمن عليهم وحاليا هما عندى وحاطتهم فى بلكونه اوضتى على فرشه وان شاء الله لو كان فى العمر بقيه مش هسيبهم الا لما يكبروا ويعتمدوا على نفسهم فى الاكل والشرب بس كنت اتمنى ان امهم تكون موجوده عشان ترضعهم وياخدوا منها العطف والحنان الاموى وياريت كان ينفع انى اشترى ليهم قطه عشان ترضعهم بس هل ممكن قطه غير امهم ترضعهم؟ لو كان ينفع يبقى مطلوب مرضعه فورا وبأى ثمن مهما كان |
مش عارفة ينفع قطة تانية و لا لا بس ربنا يجازيك كل خير اخى انك اهتميت بيهم و بتراعيهم ربنا يجعله فى ميزان حسناتك |
اولا أشكر لك احساسك الرائع بهذه الحيوانات جعلها الله فى ميزان حسناتك وحاول تلقى نظره يمكن امهم ترجع فى المكان اللى انت أخدتهم منه ولو مرجعتش انسى ان قطه تانيه ترضعهم حتى لو كانت عندك اصلا فى البيت وكانت بترضع فى نفس الوقت لأن حدث معى امر مشابه لهذا الموقف كمل معاهم وامرك لله بالسرنجه دى وخلى طبعا اللبن يكون فيها دافئ الموضوع مش هيطول شهرين بالكتير وهيبتدوا ياكلوا عموما تأكد ان أجرك عظيم لأن دول فى حكم اليتامى دلوقتى وانت الأن تطعمهم لوجه الله ولن تنال منهم جزاء ولن تسمع منهم شكورا اجرك عند الله الذى لا يضيع اجر من أحسن عملا |
سلمت أخي العزيز واشتقنا للمدونة للأسف معتقدش قطة تانية ترضع غير ولدتها جزاك ربي الجنه ، تحياتي أكيد وكل التقدير |
امهات اخر زمن في يوم صحيت وبنظف الشباك لقيت عش علي الوحدة الخارجية للمكيف لقيت في يمامة تحتها بيضتين فرحت بيها وبقيت افكر ازاي اساعدها او علي الاقل مش هنظف الشباك عشان مش تخاف ولقيتها مشت يوم العيد ومش رجعت تاني البيض والعش موجودين لحد دلوقت مش هاين عليا اشيلهم مع اني فقدت الامل في رجوعها |
اولا ربنا يجازيك خير و ممكن يكونوا سبب في دخولك الجنه تاني حاجه ام القطط مش ممكن تسيبهم كدة وتمشي اكيد فيه سبب و قوي ممكن تكون خرجت و حصلها حاجه او حد خوفها جريت معرفتش ترجع او حد شافها اخدها ممكن اسباب كتير الا انها تسيبهم وتمشي لان القطط بتخاف جدا على ولادها حتى من اهل البيت لو متربيه في بيت ودة انا شوفته بنفسي تالت حاجه انك مش هتسيبهم لما يكبروا ويعتمدوا على نفسهم لانك هتتعلق بيهم و بلعبهم معاك لان القطط الصغننه حلوه اول و لعبهم يخليك متسبهمش ابدا |
اشكركم جميعا على ردودكم وبعتذر عشان مريض شويه مش قادر ارد على كلامكم منفردا وربنا ان شاء الله يقدرنى والحمدلله القطط انا مهتم بيهم وعرضتهم على دكتور بيطرى وهو هيتابع معايا وحالتهم الصحيه كويسه بشكركم مره تانيه جميعا ومع تحياتى لكم |
هههههههه شكل امهم اندعست المسكينه بس عادي الحيوانات ما بدهم مرضعه هههه بس بدهم رعايه شكرًا ل اهتمامك فيهم |
| الساعة الآن 03:37 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب