منتديات بنات مصر - فكرة لمشروع برأس مال بسيط

ابدأ مشروعك ب 5000 جنيه فقط وجمد قلبك

المشروع عبارة عن انتاج ملابس شبابية

لما عملت دراسة جدوى حسبت تكلفة التيشرت الشبابي سواء ( ليكرا او بولو )
لقيت ان 5000 جنيه كافية انها تعملي تقريبا 150 تيشيرت ليكرا مقاسين ولون واحد
توب القماش نفسه الى بتشوفوه على هيئة رول كبير يعمل من 2800 لـ 3100 جنيه
وتصنيع التوب ده هيكلف تقريبا فى حدود ال 2000 جنيه يعني القصة كلها 5000 جنيه
ويكون معاك 150 تيشيرت نص كم لون واحد يعني التيشرت الواحد وقف عليك بمبلغ موصلش ل 35 جنيه !!!
وانت عارف ان اقل تيشرت من الخامة دي بيعدي ال 65 جنيه ده بالنبسة للتيشرت اليكرا
نيجي للبولو كل الى فى السوق بيقلد الماركة وكل الاكسسوري متاحة
ومحدش بيقول لحد انت بتعمل ايه
الفيصل فى السعر هو الجودة
توب البولو يعمل تقريبا 2200 جنيه وده بيكون توب مربع مش رول ,,
التصنيع للتوب هيكون تقريبا نفس سعر التوب يعني بنتكلم فى حوالي 4500 جنيه يعملو حوالي 115 تيشيرت يعني التيشرت الواحد واقف بـ 40 جنيه تقريبا
تيشير بولو سادة واقف عليك بـ 40 جنيه وانت اساسا بتشتريه من 100 لـ فوق
(الخامة عالية الجودة )
كل الى فات ده مش هينفع تستغله فى تسويق موديل واحد
لان الموديل الواحد بيحتاج يكون ليه اكتر من مقاس واكتر من لون
والسوق عايز التنوع فالحل الوحيد هو التبادل التجاري
بمعني انت تشتري توب لون احمر , غيرك هيشتري الاصفر , وغيركم هيشتري الابيض وهكذا
انت هتعمل مقاس xl/m غيرك هيعمل xxl/l
هيحصل التبادل ان كل واحد فيكم هيكون معاه اكتر من لون واكتر من مقاس
ساعتها تقدر تنزل تسوق الموديل الى معاك بنظام جملة او قطعة
سواء على الفيس بوك باعلان مدفوع سواء على اولكس الخ الخ من انواع التسويق الالكتروني
وليس التسويق الشبكي والكلام الفاضى ده
طبعا الاكسسوري والتكت والتغليف الى بتلاقيهم جوه الملابس بتكون متوفرة فى السوق
وكمان تقدر تعمل اسم ولوجو خاص بيك انت وفى الحالة دي بتروح لمكتب تصميم هتلاقي اقل كمية تقدر تعملها مكلفة 5000 جنيه ع الاقل غير ال 5000 جنيه بتوع الاتواب
بس ال 5000 جنيه اكسسوري دول ممكن يتقسمو على 10 افراد تقريبا
لان الحاجات دي بتكون كميات كبيرة تكفي ل 5000 تيشرت وطالع طب هتبدأ ازاي ومنين
- اول مرحلة شراء توب القماش ..
ودي هننزل نشوف الالوان وانت الى تشتري وتورد القماش لغاية المصنع واسواق القماش منتشرة سواء فى القاهرة اوالمحافظات
- تاني مرحلة شراء الاكسسوري الجاهز او الاكسسوري الى عليه اسم انت عايزه لمنتجك
- تالت حاجة مرحلة التفصيل ودي ممكن تدفع فيها نص التكلفة والباقي وقت ما هتستلم
وقبل كل دهـ لازم تنزل تشتري كيلو قماش كعينة شغل والكيلو ده ممكن يعمل 4 تيشيرت
والقصة دي ممكن تكلفك 200 جنيه وساعتها هتكون قدرت تعمل دراسة جدوي فعلية
وتقدر تنزل تجيب عينة قماش لاي موديل انت شايف انك تقدر تسوقه وبعد ما تعمل العينة
تعمل دراسة الجدوي وتشوف انت كده مطلوب منك راس مال كام هل مطلوب منك ان بعد كل ده تسيب شغلك ؟!
طبعا لا .. استغل ده انه يكون دخل جانبي شهر شهرين 6 شهور وبعد كده وقت اما تلاقى ان المكسب تجاوز ال 100% وخبرتك زادت واصبح ليك راس مال محترم وليكن 50 الف جنيه ساعتها تقدر انت والى معاك تعملو مصنع وتجيبو صنيعية وتقولو بسم الله

كل ما سبق خطوة من كذا خطوة

الخطوة الى بعد كده ان يكون ليك محل تبيع فيه منتجك ويكون بنفس الاسم الى هتختارو للمنتح وخلي بالك انك هتوثق الاسم بتاعك وشعارك هيكون ماركة مسجلة

والخطوة الى وراها انك تفكر فى التصدير لمنتج مكتوب عليه صنع فى مصر

وعلى فكرة انا بدأت