|
نوستالجيا انا اول ساكن للصندوق بطريق الشوق ... في قلب مدينة اوعي تفوء ... خليك في الحلم .. خليك بخيال القعدة هناك لما كان صاحبك بيقول بكرة الصبح ... الفجر نقوم نجري بأحلام .. الدنيا تمام مالناش للوحدة مكان في قصور والقصر بتاعنا كان مفتوح كان فكرة بتاخد منا اليوم كان قصر بروح الحب تملي ومش بدروم ... وفي وسط الصحبة الحلوة تملي كان بينا احلام .. امل وشروق كان بينا الصوت اقوي ما في الروح كان دايما يدوي .. دايما بيرج في ضل السوء كان بينبه مش بيسوق عمره ما كان اجبار من فوق .. كان بيخير فينا الحلو لما يلاقي سواد بيزن .. اصل الصوت كان ابيض فاقع عكس الاصوات كان يتشاف ... لما بقينا نسمعه عالي وقتها كان الابيض مات .. انا اول ساكن للقربين ..... الاول كنت في اعدادي بثوابت بس بجناحين .. عرفت الدنيا بشكل الفينتاج .. ابيض واسود كانوا مونتاج .. لسا الهم شكله ماجاش .. شكل الدنيا لسا بخير .. والتاني وكان يوم الاتنين ... عدي يومين يومها كنا بس اتنين .. روحنا بدري نصلي العيد ولاقينا الفرحة بوشين .. والعمر بقا فجأة كبير ولاقينا حسام جمب عبير .. ناس بتصلي وناس بتكبر بس احنا كبيرنا بتصغيرر .. لعقول بتهوهو وتغني .. والدنيا بقا حالها عسير .. والدنيا زمان احلوت فجأة لما اصطبح العقل بتاعنا واشتري منا بضاعة اليوم .. |
جميل ما نثره قلمك رائع انت تحيتي اليك قلم |
كلمات جميلة تحياتى اليك و لقلمك المبدع |
أحمد... أنا مش فاهم انت تقصد ايه استنتجت انك بتتكلم عن الاصحاب زمان مش عارف صح ولا غلط لكن الجمل نفسها مش فاهم معناها. ممكن توضح ... |
طبعا بعتذر اولا لتخطي الردود والله يا دوك انت صدمتني انا كنت فاكر اني اول مرة اكتب من غير ما تفلفسف والله ههههههه بس يمكن فعلا يكون الفكرة مش واضحة او الجمل فيها ارتباك في موطن او اتنين .. فشكرا لتنبيهك .. هو اولا عنوان الموضوع نوستالجيا ... الحنين الي الماضي ... مش الصحاب ولا حاجة ببساطة الموضوع متقسم ل 4 اشكال من الحنين الاول ... شكل الصداقة عموما اللي كانت في فترة ما من عمرنا باحلام وامال وحنينا ليها ... الثاني .. اعتقد الكلمات اللي قصدك عليها .. الصوت ... الابيض = الضمير بس حاولت اشكل بيهم جمل توصف بيهم نقاء الروح والضمير وصحوته .. في الفترة دي من حياتنا ... وقت ما كنا صغيرين .. يعني تشكيلات بسيطة لأن الشعر بالعامية .. فدايما مش بيكون ليه شكل يحكمه بقدر ما تقدر تطلع بتفاصيل جديدة بتوصف المواقف بشكل متجدد .. لان كتير اتكلموا عن النوستالجيا .. بس الفكرة أنك تجدد الروح بتاع الموضوع والجمل يعني تخليك الي حد ما متفرد في اسلوبك ليس اكتر .. التالت .. بقا نقد لفكرة النوستالجيا نفسها في الوقت الحالي .. يعني تلاقي الواد لسا ابن امبارح يقولك انا كنت ملاك بجناحين ... وبعد يومين يقولك زمان كنت وكنت واتغيرت وكبرت والفرحة اتغيرت وبتاع والناس اتغيرت وهكذا .. وده يظهرلك الناس حاليا ازاي بقت في بؤس وان الحنين مابقاش سنين ... وبينا وبينك لقيتنا دخلنا العيد في الموضوع قلت ادخل اسقاط في الختام بسيط للوضع دلوقتي عن زمان وازاي الناس اتغيرت لما البنت جمب الولد بقوا بيصلوا في العيد وكدا ... وقلت الدنيا بتحلو زمان لما الناس تستبدل بضاعة امبارح بالنهاردة .. البضاعة المقصود بيها السلوك يعني ...وده الجزء الرابع اتمني تكون الفكرة اوضح كدا يا دوك والعذر لو فيه التباس حصل ولا حاجة في شكل الجمل وانا مش واخد بالي منه .. |
طبعا يا ابواحميد انت اكتر واحد بقول رأيي في اللي كاتبه بصراحة ومن غير خوف من الفهم الخاطئ لاني عارف انك بتتحاور بكل موضوعية. أعتقد يا ريس انك اتفلسفت كتير هههه يعني الجزء الاول أقدر أقول الى حد ما فهمته الجزء التاني فيه كلمات زي ما انت قلت محتاجة تفسير تقصد ايه بالصوت؟ الجزء التالت بقى مش ممكن يتفهم من غير الشرح يعني ايه اول ساكن للقربين؟ بص..بالنسبة لي الموضوع كله غامض ومكنتش هفهمه من غير شرح... يمكن انا مش مركز اصلي عندي صداع بعيد عنك. |
اقتباس:
الروعة بطيب حضورك اكيد كل التقدير .. |
اقتباس:
شكرا لحضورك الأنيق كل التقدير |
اقتباس:
والله يا دوك انت تدخل هنا و تقول رأيك براحتك ده متصفح الشعب ههههههه بص يا دوك انا مؤمن ان النقد عامة متعة الرد عليه افضل من كتابة الموضوع نفسه وبيبين جوهر كل شخص ومدي صدقه مع نفسه ومصداقيته مع اللي بيقري ليه ومدي معرفته بقدراته الفعلية .. مش المبالغ في تقديرها بالمجاملات عامة والانخداع بما ليس موجود .. يعني اسوأ حاجة هتتقالي مثلا اني ماليش في الكتابة هو انا يعني كنت كاتب دواوين ومنزلها لسوق وخايف علي السمعة ... انا مجرد هاوي .. بيضيع وقته في انه يعمل شئ مختلف مش اكتر .. اما بالنسبة للنص بقا فهو مشكلتي عامة اني احيانا بكثف في الكلام بتلقائية ومتخيل ان اللي هيقرأ هيقدر يستوضح المعني بسهولة .. لاني لما بقراه لما بخلص كتابته بحس انه نص عادي وسهل يتفهم .. يمكن ده عيب ... الله اعلم .. بس هو اسلوب في الكتابة مش ممنوع .. بقدر انه ممكن يداعب خيال القارئ .. لاني برضه مش بنسجم مع النصوص الصريحة .. بحسها بتفقد جزء من متعتها ... بس بقدر جدا اللي يقدر يكتب نص سهل ممتع يداعب القلوب ويرسم البسمة علي الوجوه والابهار في تركيبة الكلام اللي بيرسم لوحات بأبسط الالفاظ اللي ممكن تتخيلها .. لانه اصعب ما يمكن .. ولحد النهاردة مش قادر حتي اكتب جملتين علي بعض فيه .. اما بالنسبة للقربين دي .. اقصد بيها تقريب او دنو المسافة بين متناقضين .. يعني مكثفة شوية اعتقد اني عشان عاملها بصيغة المثني فعاملة لبس .. بس اعتقد الكلام بعديها بيشرحها عامة .. اما الصوت بمعني الضمير .. زي ما قلت في الرد اللي فات بس والله يا دكتور انا حاسك ظالمني في موضوع الصوت ده هههه بيتهيألي واضحة والله .. هو استعارة مش اكتر يعني ... والابيض صفته .. |
طبعا انا معاك في كلامك واللي بيتقال هنا مبيبقاش نقد بالمعنى الفعلي ده مجرد رأي بيتقال بس للأسف بقيت أخاف أقول رأيي لو فيه حاجة شايف انها ممكن تبقى أحسن وبكتفي بالرد التقليدي. بالنسبة بقى للفلسفة في الكتابة أو وضوحها فأنا رأيي ان النص لازم يبقى مزيج بين تلاتة: جزء واضح وصريح يفهمه الجميع وده ياخد نسبة بسيطة وجزء محدش يفهمه غير الكاتب ويكون زي نسبة الصريح وجزء يتفهم بس بشكل غير مباشر وده ياخد اكبر نسبة. وممكن تلاقي نص طول ما انت بتقرأ مش فاهم الكاتب يقصد ايه..وتيجي كلمة او جملة ف الاخر توضحلك كل حاجة اما النص كله يبقى غامض او كله صريح ...مش كويس طبعا الكلام والحوار كله بصفة عامة بعيدا عن موضوعك المهم اننا نوصل لفايدة احنا مش داخلين مسابقة يعني وانا عارف انك ميفرقش معاك.. بس يا عم ..ده كل الموضوع |
| الساعة الآن 08:03 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب