|
العم صابر صوره فى رباعيه م الصبح بدرى قام يزف النور وبكل همه كان فى وسط طابور مستنى من مده قبضه العزيز يجي والفيزا عطلت خد يعينى خابور !! .............................................. راجع لبيته وعرقه كان صابب والا فى جيبه للغدا ميكفيش وابنه الكبير من فتره كان خاطب وابو العروسه بيزن عاوز النيش ............................................... تجرى عليه وبحب الست بدويه بتقوله فين القبض متأب يا سى صابر دا لسه بس الصبح البومه نبويه بتقولى أما الدفع.. ياهدومنا ونهاجر ................................................. ولسه يادوب بيخطى وياريح ياعم صابر افتح الشباك سعد المحصل كان هنا وسيح تلت شهور مدفعتش استهلاك ! ............................................ بيبص جوه الوصل ويخطرف كهربته عليت حتى فى دماغه يقعد فى ركن حزين وبيطرف يضحك على القيمه ودمعه قدامه ................................. الهم من جوفه يخرج كما الدخان يحرق فى تبغ الهم ويعافر فكر كتير فى الحج صاحبه زمان لكن خلاص م الدنيا كان ..سافر ! .......................................... والست بدويه فى طلاباتها مبتخلصش مش عارفه تقعد والسكه مقطوعه ع الخط ترغى حكاويها مبتخلصش والعم صابر جلبيته مقطوعه .......................................... خرج ع القهوه لجل يبقى لحاله قاعد بيحسب ف الديون بالقلم عمال يفكر يعمل ايه فى احواله البيت هيخرب وكل شيء بينهدم ......................................... الكهربا والميه وفاتوره التليفون والمدرسه والدرس وشحنة المحمول واللبس للجامعه والبيت مهش مدهون العم صابر م الحساب باينه كان مذهول ................................................ الفيشه لسعت عم صابر اتلوح عمال بيصرخ عمار يابلدى عمار العيشه حلوه رخيصه رخص البلح والدنيا ماشيه طول مافيها حمار ! ............................................ داير بيخطب فى الجاى والرايح دانا ياما شفت وماشوفت الا العجب غلبان وغلبى ع الضهر كان طايح ولا عندى قصر ولا بقره تحلب دهب ............................................. aya yousef 17/9/2018 |
الست بدويه دى عوزه تتضرب بالنار ههه حلوه اوى رغم اللى فيها تسلمى ياقمرايه بالتوفيق |
الله عليكِ عبرت ببراعة على هكذا حال شياكة الحرف عنوانك فكل الود وتقديري |
يطلقها ويخلص احنا بتوع خير هههه جميلة فناء دام نبضك وبالتوفيق لكِ |
جميله آيه وبتعبر عن واقع فعلا تسلمى وموفقه يآرب |
اعتقد دة حال كل بيت فيه اولاد رب الاسرة مطحون بيكلم نفسه مش عارف يعمل ايه و لا ايه عبرتى عن الصورة حلو يا اروبة ههههه تسلمى |
الاخت ايه باختصار اجدتي و افدتي سلمت الانامل على الابداع تحية و احترام تليقان |
جميل يا اية ومعبر بالتوفيق |
الفيشه لسعت عم صابر اتلوح عمال بيصرخ عمار يابلدى عمار العيشه حلوه رخيصه رخص البلح والدنيا ماشيه طول مافيها حمار ! بلح وحمار كماااان ؟! لا لا الموضوع شكله كبير وديتى نفسك ف داهية :517: موفقة بقا :230: |
الهم من جوفه يخرج كما الدخان يحرق فى تبغ الهم ويعافر فكر كتير فى الحج صاحبه زمان لكن خلاص م الدنيا كان ..سافر ! الصراحة عجبتني الرباعية دي رباعيات معبرة وجميلة أكثر من رائع ... |
| الساعة الآن 12:59 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب