|
خايف لقاك خايف.. لكني مش مفزوع عارف.. وليا خط رجوع لكني مش متطمن مظبوط عليا الخوف ومقاسه مش واسع وبرضو أنا الملهوف أكون ف يوم راجع خايف لقاك... والخوف بقى ف دمي يجري ويجلي الروح ف صورة م المسموح لكن ده من همي. والخوف من الخوف بيجبرني.. أكون صورة وحيدة ف دوشة الموال لكن على الهامش.. صورة بألف خيال. وأخاف.. لما بسابق الملكوت وأما بخاف م الفوت وأسمع..كأني مش سامع وأقول... لو كنت بيك متطمن طب ليه بمد خطايه وبتوه ف ألف حكاية كأني ليك مش راجع خايف لقاك... لكني مهربتش بمد الخطوة بعيد وبرجعها وأعيد الحالة من تاني ألاقيني ثبتت ف مكاني فأخاف... لأن اللي بيني وبينك طال ومحتاج م الخطاوي كتير معدش يفيد خطوة ع اتجاهين وأخاف اللي ليك يقربني خطوة مبتجيش مرتين. خايف لقاك. |
الله بقا عجبتنى جدا ي دكتور تسلم ايدك دام قلمك المبدع ^^ |
للتوضيح أنا بتكلم عن الخوف من لقاء الله |
والله روعة عجبني المضمون جدا ورشاقة الكلمات وسهولة النقله بين قافية والتانية رائع وحق لنا الخوف من لقاء الله وحسابه فإما جنة وإما نار رزقك ورزقنا الله الجنة بغير حساب وسابقة عذاب أمين |
لأن اللي بيني وبينك طال ومحتاج م الخطاوي كتير معدش يفيد خطوة ع اتجاهين وأخاف اللي ليك يقربني خطوة مبتجيش مرتين. تحياتي لقلمك العظيم يادكتور.💛 |
دام نبض قلبك وقلمك ياانيق |
مناجاه وكلمات رائعه تسلم دكتور ابدعت |
حلوة المناجاة لكن مهما نبعد بنقرب لاننا عارفين اننا لربنا راجعين نخاف بس لما نبعد ونبعد وما نقرب لان ساعتها بيكون الامر صعب لان خالقنا ان تركنا نبعد يبقا مش حابب قربنا سلمتى اخى ودام نبضك |
لقا الله مش بالامر الهين مع انه ارحم من كل حاجه حتى فى لقاه لكن الخوف فى حضرته واجب مناجاه جميله وعاميه سلسه تسلم ايديك يامبدع |
الله جميله اوووى اوى ربنا يقرب قلوبنا ليه ويطمنها بقربه تسلم وياريت من ده كتير ربنا يرضى عنك يا رب |
| الساعة الآن 02:39 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب