|
مصر الخربانة مصر الخربانة كلمة صعبة وتقيلة عليا اني اكتب ان بلدي خربانة مفهوم الخراب بالنسبالي كمواطن مصري لازم يكون الكام حاجة الى جاية فى السطور 1 - ملاقيش مياه شرب 2 - الشوراع مقفولة من طفح الصرف الصحي 3 - ملاقيش السلع التموينية ولا رغيف العيش 4 - ملاقيش مواصلات اروح بيها شغلي 5 - ملاقيش طرق امشي عليها 6 - ملاقيش شغل اساسا 7 - ملاقيش محلات سوبر ماركت , كافيهات , اي محل والسلام 8 - اتسرق واتثبت فى شقتي ويخدو مني اهل بيتي يغتصبوهم 9 - مفيش جيش والحرب العالمية تكون على ارض بلدي 10 - امارس حريتي بامتلاك خيمة 5 نجوم ميفنعش يكون معايا موبايلي ولاب توب وقاعد ع السرير بشرب شاي بحليب وادخل اكتب البلد خربت يا جماعة ,, كده فيه حاجة غلط بلدنا مش جنة بس مش جهنم الحمرا كفاية نشر طاقة سلبية دا الواحد مش عارف يمشي فى البلد من كتر المشاريع الى بتتعمل والى بيتقال عليها مالهاش لازمة طب وبعدين اقسم بالله احنا فى نعمة ومش نعمة واحدة لا ده نعم ----- وضرب الله مثلا قرية كانت آمنة مطمئنة يأتيها رزقها رغدا من كل مكان فكفرت بأنعم الله فأذاقها الله لباس الجوع والخوف بما كانوا يصنعون ----- |
مصر فيها حاجات كتير عوز تنظبط وفيها كل يومين يصحو من النوم يعالو الاسعار بس برضو فيها مشريع كتير بتتعمل مصر دوله كبير عملها ما تكون خربانه |
( ألم تر إلى الذين بدلوا نعمة الله كفرا وأحلوا قومهم دار البوار جهنم يصلونها وبئس القرار ) صدق الله العظيم يعني افهم الاية الكريمة كانت نازلة في ايه الاول وماتحطش السم في العسل لو سمحت ... بص انا دايما بكلم بشكل عام وباطار اوسع وبحاول اتفلسف علي المدي البعيد وان احنا لازم نعاني وده طبيعي ولازم نمر بالمراحل اللي احنا فيها دي ... واللي احنا عاوزينه لازم هييجي بعد شوية فوضي هنعيشهم ونتفائل وكدا ... بس انا النهاردة هكلم عن الفترة اللي احنا فيها دي بعيدا عن اي تفكير في بكرة.. بصراحة انا مش بفهم النوعية دي من المواضيع ومش بكون فاهم المفروض اقول ايه فيها او ارد عليها بايه ايوة يعني عاوزني اقولك ايه ... يعني بالنسبة ليا هو مين قال انه احنا مش بنشكر ربنا علي نعمه واللي بتتكلم عليه هي المفروض حقوق عادية في اي بلد طبيعي .. موجودة في بلاد الكفر عادي .. وفي بلاد مسلمة زي الصومال المفروض مسلمين وعايشين في مجاعات وبيشكروا ربنا وهما في صورة من صور الابتلاء .. الحياة صورها مختلفة واكبر من اننا نتعامل معاها بمعطيات بسيطة نحطها في دماغنا لأن ربنا عامة بيحيط العالم بنعمه الفكرة في تقدير النعمة انك تحافظ عليها ومن صور الحفاظ عالنعمة انك تتدبر الحياة حواليك وفيها ايه غلط وتنقده وانك تحس بالناس اللي المفروض متضررة عكسك .. يا صاحبي لو انت قاعد في بلاد بره هتعرف انك في ابتلاء في بلدك لما تعرف ان الاطار اللي ماشيه فيه البلد هناك بتوفرلك كواحد مش لاقي شغل حياة كريمة افضل من موظف درجة اولي في بلدك ... عامة برضه الموضوع نسبي .. اللي بالنسبة ليه يزعلك يفرحك لو تم ربعه في بلدك ... وده من اشكال الرضا والقنوع لو تاخد بالك .. ايوة احنا قاعدين علي كمبيوتر بننظر وبنهري ..بس فيه غيرنا قاعد في عشة يعني من سخرية الحياة انك انت لو انسان مالكش لازمة في الحياة ممكن قاعد اهو بتقول ان فلان ليه لازم يكون ليه حق في الحياة الكريمة والمفروض ياخد فرصة وانك توفرله سبل الدعم وغيره من الامور ... وتبين المنظور السلبي ليها ودي حكمة من حكم ربنا ان احنا نكمل بعض .. البلد خربانة ده لفظ ممكن حد يقوله لما يحس ان الحياة بتتراكم عليه بأكتر مما هو قادر يتحمل ... ايوة انا مثلا كشاب هعمل ايه بعمارات بتتبني وكباري بتزيد .. وحاسس ان فرصي في البلد قليلة ومش قادر اعيش فيها وبعدين سبحان الله هو المية بتاعة ربنا اللي بنشربها المفروض حد هيمن علينا بيها كمان وادعي ربنا بس الحنفية ماتقفلش في سنة كدا ولا حاجة وتبقي جفاف .. بلدنا مليانة مشاريع .. بس حقي اقول ان الاستراتيجية المتبعة في عمل المشاريع دي غلط وانها هتعود عالبلد يمكن بديون مستقبلية ترجعها لقرون ورا ... وتضخمات وافلام كتير عشان انت مش عاوز توضحلي وجهة نظرك في عملك للمشاريع دي المبنية علي الدين ولاغي الشفافية اصلا ... المفروض فيه ميثاق بين الحاكم والمحكوم ومش من ضمنها اني اقول امين علي اي حاجة مش فاهمها .. انت ممكن تكون صح .. يا اخي فهمني انت صح ليه .. ده حقي يا اخي انت مش واخد بالك بس انت بلدك رجعت تاني لبلد الحزب الواحد مافيش معارضة اساسا من جوه البلد ... كل الناس بقت بتخاف او بتعرض عشان تعيش ... دي لوحدها علامة يبين ليك انك في ابتلاء اساسا اكبر من الاكل والشرب بس انت مش واخد بالك .. يا اسطا دي الدكاترة اللي المفروض العالم كله بيقدرها في ايام كورونا لما كانت شادة حيلها لما كانت بتقول ان المستشفيات مليانة ... والحالة بؤس في بوست عالفيس اتقبض عليها .. بتهمة اشاعة اخبار كاذبة ... يعني مافيش رفاهية انك تقول رأي اساسا ... وده موثق علي فكرة .. يا اسطا انت في بلد مجلس الشعب بتاعه المنتخب انه يحافظ علي حق الشعب من السلطة التنفيذية عمل لرئيس البلد قانون انه يحكم 20 سنة ... والكلام ده بعد ثورتين .. يعني حتي الواحد لما كان بيقول عادي ونصبر لحد 2022 وهيبقي فيه تبادل سلطة الموضوع ده اتاخد مننا كدا .. في دقيقة بدون اي رد فعل ولا حق ان يتم الرجوع لينا ... فيه حد كدا افتكر انه لو مش هو اللي هيحكم البلد هتخرب ... وفجأة خد مكان صاحب الكورة .. وقالك بتاعتي وانا بس اللي هختار مين اللي هيلعب معايا وامتي ارميها واسيبها .. انت فاهم احنا فين .؟؟ يا بني احنا بنأسس لسلطة مطلقة يا اسطا السلطة المطلقة مفسدة مطلقة وده لوحده كفيل انه يحطم اي امل فيك ويبين ليك ان ده اصلا شكل من اشكال البلاء ربك بيسلطه علي عباده لأنك حتي بقيت محروم الرأي يا اسطا الكلام ده انا اخاف اكتبه عندي عالفيس بوك بحسابي الشخصي عشان ممكن واحد مالوش عازة ممكن يبلغ عني واروح اتحاكم اني تبع جماعة محظورة ؟ |
بعد ما قرات موضوعك خطر ف بالى جملة احسن من سوريا و العراق بتفكرنى بوالدى ديما لما كان يحب يشجعنا ف المذاكرة يقول ليه تبص ل اللى أقل منك وماقصدش اقل كبلد أو تقليل منهم اقصد كحال البلد ووضعها و استقرارها ف ليه بنبص ل اللى حالهم اصعب ومش بنبص أن فى دول تانيه متقدمه علينا بمراحل فى حين أن احنا عندنا كل المقومات اننا نكون افضل معتقدش انتقاد اى شخص لوضع البلد بيكون قاعد فى جنينة الفيلا الخاصه بيه و بيقول مصر خربانه انت تسمع عن ناس بتموت من الجوع أو بتموت نفسها لانها مش معاها تمن العلاج ف يأسوا من الحياة احنا نحمد ربنا على حالنا لكن فى ناس معدمه حرفيا والناس دى كتير و اللى اسمه عايش ف هو بيقضى يومه بالعافية وف اخر اليوم بيحمد ربنا أنه اليوم عدى بستر ربنا أولاده نايمين مش جعانين تعالى نتكلم عن الخدمات و كلمنى عن المستشفيات مثلا اللى هى من أبسط حقوق أى مواطن وشوف المنظمه الصحية عندنا ماشية ازاى و المستشفيات الحكوميه حضرتك لو قررت تتعالج فيها يبقى بتنتحر ! طيب بلاش الصحه تعالى نتكلم ف التعليم حضرتك احنا خارج التصنيف العالمى للتعليم اصلا ! مصر كدوله غنية فى كل الموارد ده غير العنصر البشرى احنا عندنا عقول لو استغلناها هننافس كل الدول إلى بتحرك العالم دلوقتى بس مش لاقين فرصه ف بلدهم ف بيتدفنوا و بيتفرجوا على واحد زى حمو بيكا وهو بيلعب بالملايين علشان طلع قال شوية كلام فاضى ف انا مش فاهمه مفهوم الخراب ايه بالنسبالك اكتر من كده |
مصر دوله كبيره بس فيها حرميه كتير علشان تنضف |
اقتباس:
انا عارف انا كاتب ايه وايه الهدف من الى كاتبه لا لي فى جو السم فى العسل ولا العسل مع الطحينة من 2016 من وقت ما رجعت مصر وانا بلف على مشاريع البلد مشروع مشروع بمرتب فى الارض والنغمة " الكدابة " زي ما هي من مشاريع لناس مش لاقية الغطا وبتستلم شقق مفروشة بالتموين ومجانا وبيتقال ملهاش لازمة لمشاريع صناعية وزراعية واستثمارية وسيتركون العاصمة القديمة تحترق وتخترق وتتبعثر فى الهواء تصنيف مصر الائتماني واضح وضوح الشمس رؤية مستقبلية محسومة الازمات واخرها كورونا العالم شاف استقرار البلد وثباتها فى الازمة واشاد بكده وارتفعت صادرات المحاصيل الزراعية اكتر من الاول الغاز الطبيعي اتحقق الاكتفاء الذاتي ولله الحمد والسعر مرخصش عشان ولله الحمد بندفع تمن الحاجة والتكية بتاعة مبارك وعبد الناصر رحمة الله عليهم ... بح الكهرباء ولله الحمد نفس قصة الغاز الطبيعي والحمد لله مشاريع الربط مع الدول العربية شغالة الغلابة وحقوقهم علينا اخطف رجلك للاسمرات 1 و 2 واهالينا 1 و 2 والمحروسة 1 و 2 وغيط العنب وتل العقارب وشوفهم بعينك متخليش حد يغسل دماغك ولا يحطلك السم فى العسل واحمد موسى والجو ده القلق والخوف على الوضع الاقتصادي لبلدنا يبقى امتي ؟ لما الديون الخارجية منعرفش نسدها وتتحول من البنك الدولي لنادي باريس ويتحكمو فيك ويقولو خصخص ده وبيع ده وحاولو فى القصة دي مع مبارك ورفض لما الديون الداخلية تبقى فى الكنافة والقطاع العام ميجبش همه واهه السكك الحديد نموذج زي الفل من قطاع كان عاله على الدولة وخربان لقطاع بيطور من نفسه وبيجيب عربات وجرارات جديدة لما تنزل السوق متلاقيش عيش ولا خضار ولا لحمة ولا فراخ والحمد لله الامن الغذائي زي الفل فى مصر شايل شعب وشعوب تانية مقيمة عالجناهم بردو فى الحملة الاحيرة لفيروس سي ودي قصة تانية خلاصة الامر فى حديث نبوي شريف قال رسول الله صلى الله عليه وسلم : من بات آمناً في سربه مُعافى في بدنه عنده قوت يومه فكأنما حيزت له الدُنيا بحذافيرها " تحياتي ليك |
اقتباس:
الى بيحصل مع مصر هو مقارنة ايجابيات الخارج بسلبيات الداخل الخارح بياخد نصف الدخل ع الاقل ضرايب وده لو حصل فى مصر هنكون زيهم ان شاء الله وده الى بيخليهم يشترو الاكل والشرب على قد الاستهلاك مش بالكيلو زي ثقافتنا المعهودة عندهم بردو عشوائيات وعشش وجرايم وناس مرمية فى الشارع بس محدش بيشوفهم الا لو دور عليهم عشان يعرف هل هما عندهم نعيم مكتمل الاركان ولا اشتغالة مش مفهومة على فكرة السوري والعراقي واليمني والسوداني لما لقو مصر مستقرة استثمرو فيها وفتحو محلات زي ما هو معروف فلوسهم لوحدها مكانتش هتعمل حاجة فى مصر والا كانو استفادو بيها فى بلدهم فك الله كربها واعاد لها الامن والامان |
اقتباس:
الحرمية فى بلدنا للاسف من اول عامل النظافة الى بيسيب وظيفته ويروح يقف عند اشارة يشحت فيها لغاية المحليات ورؤساء الاحياء الى بياخد رشاوي عمرة ومبالغ نظير تراخيص مباني |
اقتباس:
لو متوفر له راتب تقدر يصرف منه هوه واولاده مش هيشحت مصر احسن من بلاد كتير لكن احنا فين من الخدمات الطبيه والتعلميه |
اقتباس:
بيستسهل لما تكون شغال بمرتب 1000 جنيه والتزماتك 1500 جنيه ومستني الى يديلك وانت واقف محلك مش بتدور على مكان تاني يبقى العيب فيك بيصعب عليا شاب كده زي الفل ماشي وفيه الصحة وداخل بمبخرة على محل عشان يطلعله جنيه طب ما انت فيك الصحة بتشحت ليه لكن بحترم اوي الى واقف على الدائري مثلا بيمسح عربيات او بيبيع حاجة فى اشارة لان مع الوقت بتلاقيه فتح باترينة او محل صغير فى مثل بيقول الايد البطالة نجسة الامر تحول لادمان او مرض او تعود للاسف |
| الساعة الآن 05:28 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب