|
شالوم شالوم بالعبرية يعني سلام .. بس عامة اشتهرت الكلمة دي عندنا في مصر تقريبا لأن كان فيه واحد كان اسمه شالوم ممثل مصري من عيلة يهودية ايام ما كان اليهود عايشين في مصر ... الكلام ده كان سنة 1900 يعني .. وكان الرجل ده ممثل وكانت كل ادواره في السينما بشخصية اليهودي الرجل ده تم تهجيره بالغصب من مصر بسبب عزوف المنتجين عن التعاقد معاه وعامة كان فيه حساسية لكل ما هو يهودي ف الوقت ده .. الرجل شالوم ده بيقولك مات من القهر في نفس اليوم اللي تم اعلان قيام دولة اسرائيل لتيقنه انه لن يعود لمصر مرة تانية ... اعتقد ان الناس فعليا وقتها كانت مقهورة يعني كان الحزن حقيقي ... بس يا هل الناس النهاردة فعلا حزينة لما الامارات واسرائيل برعاية ترامب اقاموا معاهدة سلام شاملة يبن البلدين وتم التطبيع بشكل رسمي ... ار يو حزين ؟ ولا هل هذا مجرد يوم عادي قد مر بك مثله مثل كل يوم ؟ اعتقد انه يوم عادي لكتير من الناس حتي بعد قراية الخبر ده .. طبعا عشان نحلل الاتفاقية دي لازم نحط شوية تاتشات كدا و شروط للامارات نصرة للقضية احنا مش بنعمل كدا لله ... احنا بنضحي النهاردة بن زايد النهاردة بينقط ... اولا لازم مثلا انت كانسان عربي تزور القدس من خلال ابوظبي علي فكرة انا كانسان مصري عادي الموضوع ... ما انا ممكن ازورها من خلال مطار القاهرة لمهم انا كواحد من الشعب هيتحط في الباسبور فيزا اسرائيل ايوة ايوة .. احنا كمصريين عملنا اللي عملته الامارات من زمان يعني وفاهم فاهم .. كان حرب وكدا والسادات عمل معاهدة سلام ... وكملها مبارك في طيبة وكان ليها ظروفها ... بس في الاخر اسمه تطبيع .. مش هنجملها وقلنا الموضوع هيكون تطبيع حكومي فقط وليس شعبي الا ان تم تصديرالغاز ... والي ان قام فرجلوا بتصدير منتجات ومافيش ما يمنع انه رجل اعمال مصري عامة انه يعمل صفقة او اتفاق اقتصادي بين اسرائيلي ... هي حاجة بتجر وراها ميت حاجة عشان نكون علي نور من الاول ... والاخ اردوغان اللي داخل يزايد ويقولك الدول بتخون ...ايوة انت كمان مطبعاتي كبير .. مش شرط يجمعكم اتفاق باعتراف .... انت كل يوم شغال صفقات مع اسرائبل ... والاخ بتاع قطر ... ايوة انت كمان مطبع ... وما يجمعكم باسرائيل اكبر من اي حد .. وكتير من الدول العربية مطبعين ... مش ناقصة تمثيل اكتر من كدا تمام جبنا المعادلة من الاخر ... عشان نبطل نزايد علي بعض .. الوشوف مكشوفة من زمان وعادي ... اوك انا مايشغلنيش الكلام ده كله ... يعني شوف احنا بنضحك علي بعض من زمان وساكتين .. وفاكر انا لما كان حد يناقشني من فلسطين في المنتدي اللي كنت فيه زمان ويقولي انتم كمصريين مطبعين مع اسرائيل ... وندخل في نقاش حاد والكلمة كانت بتزعلني اوي ... ونقعد ندافع ونبرر والحرب والدنيا والاخرة .. وكلام كتير كنا بنقوله بس في الاخر المصريين في نظر كتير من الفلسظينن اصلا وخاصة بتوع حماس ... ( مصرائيل ) ايوة في كراهية بين جزء كبير من الشعوب مخفية .. سواء بين دول شمال افريقيا وبعضهم ولا حتي من لفلسطينين نفسهم تجاه تخاذل الناس في قضيتهم .. وحقهم والله .. كراهية مش بيخفيها غير شوية دبلوماسيات ... انما لما نغضب كله بيظهر ...بصوا يا جماعة احنا عايشين في تمثيلية كبيرة ... لما تفهم اطرافها اكتر من اللازم هتكفر بكل شئ حلو ... وبالتالي بنختار ان احنا نخلينا مستغميين كدا .. ومتغطيين تحت بطانية الدبلوماسية والضعف والخنوع وعدم المقدرة انا قلت ده كله مايشغلنيش .. احنا دخلنا اصلا في مرحلة الوحش من زما .. فلما اسرائيل والامارات يكون من ضمن الاتفاق بتاعها . ايقاف خطة الاحتلال لضم اراضي الضفة الغربية مؤقتا ... اللي هي فعليا ضمن عشر اتفاقيات مبرمة من ضمن الحقوق الفلسطينة ومعترف بده دوليا ... واحنا بنبارك الاتفاق ده كمصر وغيرها كأنه انتصار ... فاحنا كدا عاوزين ضرب النار فعليا .... يعني يا ريت حتي يا اخي الاتفاق الللي تم كان من ضمنه شروطه انه مثلا الفلسطينين هيبقوا ليهم حق في حدود ما قبل 67 وكلام الامم المتحدة هيتنفذ اخيرا ولا القدس الشرقية هتعود من ضمن بنود الاتفاق وكنا فعلا هنقول ان التضحية صح انما فعليا الامارات جرت الشريط برعاية مستر ترامب اللي من ضمن احلامه ان امريكا تتوقف كونها حارس للمنطقة وان اسرائيل تخش بقا تطبع مع الباقيين بشكل رسمي عشان الليلة تحلي وتبقي تمام والشريط يكر بقا ويسف للاخر .. والله ما هكمل كلام .... اهو طق حنك وخلاص كفاية كده ... عشان ماغلطش هي كدا كدا خربانة . وعلي فكرة النهاردة يوم عادي بالنسبة ليا الخبر لما قريته ماثرش فيا اوي غير لما كتبت كلمتين عشان ماعملش فيها مناضل يعني وبكرة هنسي وكله هينسي .. عادي |
رفعوا العلم الاسرائيل في دبي زغلطوا وافرحوا اسرائيل بقت من الصديقة المقربة طبيعي هذه الحكومات تعمل كدة لكن مش بالوساخة دي كلامك صح كان في معاهدة سلام الي تلت الحرب لكن مبارك قالها عاوز اخذ ارضي جرب الحرب لينهي الحرب ب الجلوس على طاولة النقاش وفعلا مبارك رجع طابا من خلال اجتماعات مكثفة عمل السلام لاجل ارضه ماعمل سلام وتطبيع لاجل المكوث في احضانهم والاستغاثة بهم الحقونا عاوزين كم مليار دولار اكثر رئيس كان يبغضهم وقالها من خلال مقابلته طول ما اليهود محتلين فلسطين احنا مش راضين وحنغط ونضغط على الكنيست الاسرائيلي المهم ياصديقي اصبحت العربان كالخراف ليه اصبحت هم خراف من زمان الراعي امريكا والكلب الي يوجه الطريق للاغنام اسرائيل طبعا هذا اليوم يوم مش عاددي لاي مواطن شريف عفيف فيه ذرة رجولة وذرة ايمان الي يقهر ان الحكومات طول عمرها عم تطبع وهل الشي مش بالأيد إنما الشعوب نحن ننسى فورا ننسى المجازر ننسى محمد الدرة وايمان حجو والكثير الكثير الي ارتكب بحقهم ابشع عمليات القتل الي عاوز يزور فلسطين من خلال دعمه لهذا الكيان من خلال الاتفقيات حب اقله روحة بلا رجعة وبركي كدة بتروح وبستقبلوك الفلسطين الغير شكل عشان يعمل مع الي يروح شيئ غير شكل ارض فلسطين محتلة من عدو غاصب سيبقى هذا عدوي وعدوي حتى لو طبع كل عربي قليل شرف مع هذا الكيان |
التطبيع من زمان يا احمد وليس وليد اليوم ويمكن اتفاقيه الجات وغيرها من أجل السلام مع الكيان ولكن الي أقدر أتكلم فيه هو شالون الكراسي بمعني إلي بيطلع معاهم من دولنا العرييه الموقره ليس من أجل المال ولكن من أجل المكوث فوق الكراسي والدليل سد النهضة هل مافيش دول عربيه مموله اثيوبيا من أجل إرضاء الكيان وامريكا اللعبه صعبه يا أحمد الله المستعان بشكرك على مقالك الجميل تحياتي وتقديري لك |
كانت العلاقات زمان في الخفاء دلوقتي بقي عيني عينك لدرجة التطبيع وتبادل السفارات ورحلات الطيران رحم الله زمن العدو الاوحد ( إسرائيل ) لنبحث عن عدو آخر نوجه له الإعلام ونحمله شماعة خطايانا تحياتي وتقديري ليك احمد |
تصدق انا بدخل مواضيعك علشان افهم مواضيعك فعلا قيمه وبستفيد منها تسلم |
مقال قيم وضح امور كتير وعبر عن مايدور في ذهني مسأله التطبيع هتاخد شكل رسمي في عده دول لتسيير مصالح الدول العظمي لكن الشعوب اكيد في وادي تاني خالص اعتقد كل دي هتكون مجرد اوراق ليس لها علي ارض الواقع اثر تسلم اخي |
لو هتاخد القضية من زاوية الامارات فالخطوة هتخسرها على المستوى الشعبوي لكنها هتديها ثقل اقليمي و هيزيد رصيدها كلاعب اقليمي في المنطقة سواء في ابداء رايها او كوسيط لاي خلاف مستقبلي و دا عموما اللي الامارات بتحاول تعمله خلال اخر عشر سنين . ليه قطر بس اللي تلعب ؟ طب ما العب سياسة انا كمان و بقى عندي سمعة كويسه و واجهة معروفة في العالم . فهو قرار لتعظيم دور الامارات دوليا طيب لو اخدنا القضية من الجانب الشعبوي . الموضوع عبارة عن شوية شعارات لشعوب عايشه في تعصب و كراهية و بتستبد على بعضها . ففين اصلا الخيوط اللي ممكن تلعب عليها ؟ انقسام فلسطيني و حالة جمود . يعني تقدر تقولي مثلا حماس منتظره ايه في غزة ؟ سوريا منتظره ايه في الجولان ؟ طب هل في خطة استراتيجية مثلا ؟ مش هتلاقي حاجه . هو عايش و خلاص و يطلع يتباكى و شكرا . هل مثلا بيفكر بطريقة مختلفة زي انه يوحد الدولة ؟ طيب مثلا يبدا يفكر دبلوماسيا شوية و يتفاوض .. لا .. و حتى لو فكر مش هيقدر ينفذ ببساطه لان الجانب الشعبوي اللي هو رباه و غذاه على فكرة الكراهيه هياكلو لو بس فكر انه يتفاوض . و دا بالظبط نفس الموقف اللي الاخوان حطوا نفسهم فيه مع السيسي مايقدرش يفكر في التفاوض لان الجانب الشعبوي هياكله . و دي سياسه او غباء بتصب في النهاية في مصلحة الخصم سواء كانت اسرائيل او السيسي في المثال . التفاوض و حسن النيه بيحطوا الخصم تحت ضغط دولي و بيبين ان المشكلة فيه ، اما الشعارات و التعصب بتدي مبرر للخصم اللي اصلا حاطت عليك و بيديله دعم دولي احد اهم الكوارث اللي بنواجهها هو الفكر الشعبوي السطحي اللي الساسة عندنا للاسف على مر التاريخ غذوا شعوبهم بيه بدلا من انهم ينوروا الشعوب بالحوارات العقلانية لا هما قضوها شعارات بتخلي اي شخص مسؤول يعاملهم بطريقة ساذجة بعيدة تماما عن الواقع و العاب السياسة اللي المفروض تتلعب خلافا لكل دا فوضع الدول العربية مزري اصلا من خلافاتهم و العابهم الغير محترمة في بعض. بيخلي دولة زي اسرائيل تبان انها محترمة جدا . و بالمناسبة فلسطينيين كتير عايشين هناك و معاهم الجنسية و حياتهم اكرم و اقل اشكالية من حياتنا في دولنا و مش هقولك السبب في حكامنا حتى لو مشاركين في الاسباب . اللوم علينا احنا اللي مش عارفين نعيش مع نفسنا اصلا بسلام و دا هو لب القضية |
اقتباس:
تمام يا سينا بص بصراحة انا مش حابب أخد القضية في اطار الدفاع عن مصر في تطبيعها ولا احكي عن تاريخ مليان مبررات بالنسبة لكل العرب مش مصر بس .. لأن ما رفضه العرب وقاطعوا مصر بسببه بعد اتفاقية كامب ديفيد مارسوه سرا لعقود وحاليا بيقبلوه في موقف الامارات وبيباركوه ومن ضمنهم اكيد احنا تأكيدا لمواقفنا السابقة وتأكيدا لتبعية القرار المصري للامارات وده هكلم عنه بعدين في رد سيلفر وفي قايمة من الدولة هيقبلوه بشكل علني المرحلة الجاية بمباركة امريكية بداية بعمان والبحرين وهيكون بمباركة معظم الحكومات العربية تحت إطارات أكبر من انك تشوفها في صالح القضية او ضدها وهقولك ايه الاطار اللي افقدنا نظرتنا للقضية من وجهة نظري طبقا لتبعية الشعوب لتوجهات حكوماتها بفعل الزمن في التعليق الجاي هكتبه بشكل منفصل .. كلمتين يمكن مش جداد بس افتكرتهم .. فتابع معايا ولو هيكون ليك تعليق بتشرف بيه اكيد .. |
الاطار اللي بكلم فيه .. وهو اطار الدخول تحت مظلة الحوكمة العالمية يعني بتعريف بسيط دارج ...ادارة كوكب الأرض بصورة جماعية بشكل ناعم بالتنسيق والتعاون بين الدول والاندماج الاقتصادي والثقافي وده بيسهل كتير في تقبل الافكار البعيدة عن كل انواع المشاكل وفي نفس الوقت بينزع من الدول دوافعها وعقائدها القايمة عليها وقضاياها المصيرية تحت مسميات وشعارات السلام والحب .. وبالتالي التغاضي عن اي خلفيات او حقائق لن تتغير بالشعارات وبالتالي استغلال المسميات في تبرير الفعل وتنقية الدوافع أمام المشككين او الرافضين فعليا لأي شكل من اشكال التقارب او تحقيق الاندماج ده خاصة الدول الخاضعة لكل انواع الرفاهية والمستقرة اقتصاديا وخاصة لما تكون مستقبل للافكار مش مصدر .. منبهر وليس مبهر مدفوع تلقائيا ليهم .. وليس بمدافع عما تملكه ... او محدث نعمة من لاخر واصلا من مشاكل الامارات انها متأسسة كبلد عام 1971 .. يعني بلد حديث وامريكا في عرفنا بلد حديثا لسا معمولة من 500 سنة واسرائيل كبلد لسا من 50 سنة .. بالتالي من ليس له تاريخ .. لا يتفهم قواعده .. وبالتالي بيحاول يصنع قواعد جديدة تلائم الواقع بتاعه الجديد اللي بيحاول يصنعه .. طبقا للمتغيرات اللي بتحصل والفرص اللي بتظهر وبالتالي قرارها هيكون خاضع لرفاهيتها في المقام الاول وطموحها في تسويق نفسها في ظل فشل دول المنطقة من حولها او اهتزاز استقرارها .. اما الدول الضعيفة اقتصاديا .. فسهل السيطرة عليها طبقا لحاجتها لانك مش هتقدر تعادي وانت ضعيف .. عامة هو النظام العالمي بيقتل اوقات من غير رصاص زي ما قالت القصيدة كدا .. .. وده بيتم تحت مظلة الأضلع الثلاثة الكبيرة اللي تم تأسيسها ( اللي بتجمع بين مركز القوة ومنبع المال وحكم القانون الدولي ) الامم المتحدة ... البنك الدولي ..محكمة العدل الضلع الاساسي في كل دول هو الولايات المتحدة اللي من خلالها تقدر ترفع قدر القضية الفلسطينة او تبخسها .. تبني جسور او تهدها .. وفي ايدها تمارس القوة الناعمة مع العرب في الدخول في تحالفات مبنية علي مصلحة الولايات المتحدة في تخفيض ذات ايدها في اسرائيل وكمية المليارات اللي بيتم ضخها سنويا للدفاع عن اسرائيل والحفاظ علي امن اسرائيل اللي هو عقيدة لامريكا ودعمها في المنطقة ,, وفي نفس الوقت تختصر المسافة و تحافظ بقا علي العقيدة المتكونة عند جماعة المسيحيين البروتستانت الاصوليين اللي ليهم تأثير كبير في صناعة القرار الامريكي وتأثيرهم اكبر حتي من اللوبي الصهيوني اللي بيشاع دايما انه مسيطر اقتصاديا لأن الايمان المطلق بشئ هو دافع أكبر من المال وبالتالي استمرارية العقيدة هو استمرارية لوجود اسرائيل لأن دول عندهم ايمان مطلق ان قيام دولة اسرائيل ضرورة لتتم نبؤات الكتاب المقدس لتكون مقدمة لمجئ المسيح كدا .. وبالتالي تمهيد كل الطرق وكل الصيغ وكل الاعراف الدولية لخدمة اسرائيل .. تحت مظلة حكم كبري .. امريكا هي صاحبة حكم الفيتو الدائم فيها وفي نفس الوقت مصلحة الطرف الاخر في سد نقاط ضعفهم كاتفاق مبني علي تبعية دولية وضعف نتيجة احتياج ضلع يحميهم لانهم كيانات اقتصادية بدون قوي عسكرية .. وما تقدرش فعليا تعتمد علي حلقائها العرب في الدخول في حالة حرب لان القوة الحربية العربية مستهلكة اقتصاديا وضريبتها اكبر من تحالفات مبنية علي استثمارات ومنافع متبادلة مع قوي اجنبية .. وبالتالي تقدر تمنع لتعدي عليها بمجرد بتكوين شراكات امريكية ومن يليها في المنطقة متمثلة في اسرائيل فنقطة ضعف الامارات هي ايران وبالتالي هي في احتياج لدعم دولي مضاعف ضدها وبتتبع الوسايل الموجود في اللعبة العالمية من ضمن الوسايل انها مثلا عندها 3 قواعد .. قاعدة امريكية وفرنسية وانجليزية تقريبا في بلادها وحتي معظم دول الخليج عاملة كدا وهتتبع الامارات عشان كدا .. من ضمن الوسايل انها تقدم السبت في القضية الاكبر ضجة في الوطن العربي وبالتالي تزيد الود اكتر مع الدول المتحالفة وبالتالي تعاون الامارات مع اسرائيل تحت الرعاية الامريكية يجعلهم درع اقوي ضد ايران بالاضافة الي القواعد الاجنبية العسكرية علي اراضيها.. بس فكرة ان انك تستخدم القضية الفلسطينية كغطاء بتقول من خلاله انك هتحقق مصالح للقضية قول اشنع من فعل المشكلة ان الامارات فتحت باب صعب يتسد وهيسف للاخر .. وللاسف ده اكبر انتصار لاسرائيل منذ قيامها .. لانك اقمت علاقات تطبيع مع كيان مش مشكلتك الرئيسية فيه فلسطين بس لأن هو بيحتل الجولان في سوريا ..وتقريبا اشتباكات عالحدود من وقت للتاني مع لبنان كما اتذكر اعترافك بالكيان بشكل علني في الوقت ده ومباركتك ليه في ظل مشاكل مع 3 دول عربية هو اعتراف بأحقيته .. وتلك اكبر مصيبة لا يعيها العرب عند مطالبتهم بعد ذلك حتي بأضعف الحقوق للفلسطينين في أي مشاكل مستقبلية او انتفاضات او غيرها .. من الاخر انت خدته علي عيبه ..فخلصانة .. |
اقتباس:
معلش استحملني في اللغبطة اللي هعملها في الرد انا متفهم طبعا ان التطبيع مش وليد اليوم انا مش مع فكرة التطبيع للبقاء عالكراسي اصلا حكام العرب مجرد كراسي .. المهم ارجع بالزمن 15 سنة للخلف واعلن الخبر بتاع النهاردة وشوف صداه هيكون عامل ازاي يا عم لاء اعلن خبر نقل السفارة الامريكية للقدس من 20 سنة مثلا وشوف رد الفعل .... عالرغم من قوة السوشيال ميديا حاليا .. وضعفها زمان طيب خلينا مقتنعين ان لعبة الاحتلال بيتم ممارستها علي مراحل وكل مرحلة بيتم فيها الاعلان عن شئ او تطور لصالح الاحتلال بيكون مدروس وجداا ... وبيكون طبقا لحالة الشارع .. ومدي ثورته من عدمها .... وحتي لما بيكون مخطط لمظاهرة ضد مثلا غارة اسرائيلة بيكون معروف مداها هيوصل لفين وبالتالي بتلاقي رد الفعل الاسرائيلي متزن طول الوقت ... ومش بيخضع ابدا لاي مساومات .. صح .. الا مرة واحدة في قضية طابا ودي كان ليها بعد استراتيجي هو الضمان النهائي لتحييد مصر عن القضية .. مصر حتي 2011 مجرد متحدث علي المنصة يخاطب شعبه عشان يحسسه انه مع القضية ... بس هو فعليا الحاكم متكتف لانه محاصر في لعبة اكبر منه .. ورضخ لفكرة السلام من اجل الاستقرار وطول ما انت متحدث علي المنصة الخاصة بالامم المتحدة طول ما انت بتلعب لعبة الامم .. وهي تحدث حتي تراك اسرائيل وتطمئن وكان في فترة كنت تسمع كل يومين عن غارة اسرائيلية وتسمع عن مظاهرات عربية قدام السفارات انا من وجهة نظري ده كان مقصود وملعوب من اجل تهميد الناس .. وتكرار الفعل بدون انتظار اي نتائج بيخليك لا مبالي بعد كدا وده اللي احنا وصلنا ليه ... وبالتالي هما نجحوا واسرائيل ماشية في نفس التراك بتاع امريكا ونفس قصة نشأة امريكا و بتمارس نفس لعبة امريكا في التعامل مع الهنود الحمر بفكرة ان التاريخ يكتبه المنتصرون .. وبالتالي قضية اسرائيل انه لو حصل وفي يوم ان للفلسطيننين بقوا عايشين في محميات علي شاكلة الهنود سهل تقدر تبرره والناس تنساه ... انت كل اللي مكتوبلك في الكتب الدراسية مثلا ان كريستوفر كولومبوس هو مكتشف قارة امريكا بس فعليا هو ماكتشفهاش .. هي قارة كانت موجودة وفيها ناس وفيها حياة ... اللي ما تمش ضخه بين الناس ان بالنسبة للهنود الحمر اللي عايشين في محميات كاليفورنيا تحت السيطرة االفيدرالية الامريكية .. والباقيين بيناضلوا عشان يحفظوا باقي تراثهم ان كولمبوس هو من نقل الامراض للهنود وسبب ابادتهم .. بدليل ان في اخر مظاهرات تمت في امريكا بسبب مقتل شرطي لشخص اسود وكدا ... كان اول حاجة تم عملها ان المظاهرات اللي تمت في المكان اللي موجود فيه تمثال كولومبوس اتهدم واتداس عليه بالرجل لانه رمز للعنصرية مش للاكتشاف .. ده في حلقة عاليوتيوب لسا منزله قريب ليوتيوبر اسمه جو حطاب بيكلم عن موضوع الهنود ده ... كلام زي ما انا مقتبس منه كدا وربطته بفكرة اسرائيل ده التاريخ .. وده اللي بتلعب اسرائيل .. ان كل شئ قابل للتغير كل شئ قابل للتكيف.. كل شئ قابل للنسيان .. اما موضوع اثيوبيا ده فيه كلام لسا ماتقالش فيه وكله هيظهر قريب .. عشان كدا مستبعد الحديث فيه . |
| الساعة الآن 01:52 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب