|
الحلقه التاسعه من حلقات استضافه معانا المبدعه ( أيه حكايه ) السلامه عليكم ورحمه الله وبركاته تحياتي لكل اعضاء المنتدي وكل المبدعين فيه حلقه جديده من حلقات استضافه ومعانا عضوه تعبت كتير في المنتدي تالقت وابداعت لحد ما وصلت سلم الاداره معانا ومعاكم القلب الطيب والاخلاق الجميله صاحبه الاسلوب الجميل في الكلمات والقدره علي الابداع في كل مكان وزمان معانا ومعاكم المبدعه أيه حكايه منتديات بنات مصر - مشاهدة الملف الشخصي: Aya 7ekaya اهلا بيكي في برنامج استضافه اهلا بيك ي محمد عرفتي المنتدي ازاي كنت بدور على منتديات بنات و ظهرلى دخلت لقيت اولاد فيه وكنت مستغربه جداا 😂😅 سبب تسجيلك في المنتدي وقتها كانت المنتديات عليها اقبال و حبيت الروح اللى هنا و الفاعليات و المسابقات كان فى جو جميل جدا يشجع اى حد يسجل اي اللي شدك لتسجيل اسم المنتدى شدنى فى البداية انتي كنتي مسجله بورده خجوله ليه غيرتي اسمك جدتى الله يرحمها كانت بتنادينى ب آية حكاية ف حبيت الاسم وغيرته لقيتي ترحيب لما سجلتي ولا مفيش حد رحب بيكي نزلت موضوع بعنوان هترحبو بيا ولا الم هدومى وامشى 😂 والحمد لله لقيت ترحيب كتير♥️ انتي من اقدم الاعضاء هنا اتعلمتي اي من المنتدي كان ايجابي ولا سلبي في حياتك النت عالم افتراضي و مش صح ان حياتنا تتاثر بيه لكن اول تسجيلى كنت صغيرة فى السن و ماليش أصحاب كتير و انطوائيه إلى حد ما المنتدى اثر فيا بشكل كبير جدا قدرت اكون صداقات و عرفت ناس بعتز بصداقتهم كسبت ثقه فى النفس ف مرحلة معينه اقدر اقول اتعلمت حاجات كتير حلوة أثرت ف شخصيتى ايه كانت نشيطه زمان اي اللي اتغير دلوقتي مبقاش عندى طاقه غير لتواجد بسيط يكفينى احلي فتره كانت ليكي في المنتدي كانت امته فترة المراقبه كانت فترة جميلة وهادية وكلها حماس اية اتغيرت لما مسكت الاداره ولا كان التعامل واحد كان التعامل واحد يعتبر اسلوب مااتغيرش مين من الاعضاء اللي كنتي بتخافي تتكلمي معاه وانتي اداره هخاف ليه هههههههه اكيد مفيش كل الناس هنا محترمه لو قولتلك ارجعي الاداره تاني هتقولي اي الإدارة كانت مرحلة سعدت فيها بانضمامى لطاقم إدارة بنات مصر لكن حاليا فى اعضاء احق بالإدارة منى من حقهم ياخدوا فرصة هل كان فيه تفاهم بين الطقم الاداري ولا كان في خلاف كان فى تفاهم الحمد لله اي المشكله اللي وجهتك ومكنتيش عارفه تحليها هنا فى اعضاء كانو ببتعرفو على بعض ف المنتدى و يقرروا يتكلمون على اى وسيلة تواصل اجتماعى خارج المنتدى يحصل بينهم مشكله هناك يجو يشتكو ف المنتدى و مفروض احنا نتصرف ! ندمتي قبل كده انك سجلتي في المنتدي لا ماندمتش الحمد لله اي الفرق بين المنتدي هنا واي منتدي تاني الاعضاء و الرابط بينهم و الجو الجميل لما بنتجمع ايه شاعره متميزه ليه بطلتي تكتبي انا مش شاعرة و لا درست شعر كنت بكتب وقت ما احس انى محتاجه اكتب ف الموضوع مرتبط برغبتى ف الكتابة أو انى مشغولة ولا بالى رايق وعندى استعداد اكتب مين من الاعضاء اللي بيشجعوكي دايما هنا دمعة حائرة منين اقرب الاعضاء لقلبك كتير بحب كل البنات هنا ♥️ ارجع وحشتني تقوليها لمين راقية بأخلاقي ستوب انا التوب مين من الاعضاء اللي تقولي عليه شاعر بجد فى ناس كتير ماشاء الله دمعة حائرة و فصيح و د عبدالله مش عايزة انسى حد شايفه في مجاملات في بعض الاقسام ولا لا فى مجاملات طبعا هههههه اي القرار اللي اخديه هنا وندمتي عليه غالبا مش بحب اندم على حاجه حصلت لانها خلاص حصلت ^^ شايفه المنتدي ممكن يرجع زي زمان ولا لا بصراحه صعب لكن نقدر نقول الحال احسن بردو قولي اقتراح ممكن نعملو لتنشيط المنتدي المنتدى محتاج خطة مش اقتراح خطة متابعه من اول الإدارة لكل المراقبين و المشرفين كلمه شكرك انت سبب ابداعي هنا تقوليها لمين لنفسى هههههه🤭 اختاري عضو واحد تقولي له انت ملك المنتدي صعب عضو واحد بصراحه فى ناس عاملة شغل جامد اولهم انت ( واد حبيب ) و بيج بوص عضوه واحده تقولي ليها نفسي اشوفك دمعة حائرة علشان من احب الناس لقلبى عضو تقولي له ارجع نشيط زي زمان انا بردو ههههه عضوه تقولي لها انتي اختي اللي بجد كل البنوتات اللى هنا اخواتى لو قولتلك امسكي اشراف القسم الادبي تقولي اي هقولك انت قايم بالواجب وزيادة موضوع عجبك وكان بيعبر عن حياتك كان انتي اللي كتباه ها قد عدت ..وتبدلت كلماتي ..~` كده خلصني من المنتدي عوزين نتعرف عن اية في بعض السطور اسمك وسنك وتعليمك اسمى آية عادل تميت ٢٥ سنة امبارح خريجة فنون جامعة الإسكندرية دخلتي الكليه اللي كان نفسك فيها اه الحمد لله ♥️ احلي لينا اول يوم في الكليه حصل اي كنت شبه العبيطه مش فاهمه حاجه 😂😂 متحمسه و خايفه و فرحانه اول سيكشن حضرته كان نحت.و الدكتور طلب مننا كل واحد ينحت و ش اللى قدامة طبعا مفيش داعى اكمل ايه حصل 😂😂😂 اي اللي نفسك تعمليه في حياتك نفسى اكون أقرب لربنا و بيتى يكون بيت يرضيه انتي شخصيه طموحه ولا فاقده الامل طموحه الحمد لله هل فكرتي تشتغلي ولا قاعده البيت احلي اشتغلت و جربت كذا حاجه كلهم ف مجالى و ف الآخر قعدت ف البيت 😂 كنت زمان سامع انك عوزه تقدمي برامج هل ده حلم ولا عادي برنامج ايه ؟😁 مش فاكرة الموضوع ده 😅 اي الحلم اللي بتحلمي بيه ونفسك يتحقق اسافر ♥️ اي الحلم اللي حلمتي بيه واتحقق الحمدلله حلمت بحاجات كتير و أحيانا كانت بتتحقق ف نفس اللحظة ودى من الحاجات اللى بتحسسنى أن ربنا كان كريم معايا لأقصى حد ♥️ ليكي في المطبخ ولا بتعرفي تكلي بس عيب تسال السؤال ده اكيد بعرف اكل بس طبعا 😂😂 لا انا بداياتى ف المطبخ مش بقالها كتير بصراحه بس الحمد لله اكتشفت أن فى. امل منى 😅 اي اكتر اكله بتحبيها وبتعمليها دايما بيتزااا ♥️ ماذا تفتقدين فى حياتك الطمأنينة ما هى الصفه التى لا تستطيعى تغيرها فى نفسك الحساسية الزيادة والتسرع - ما هى اكبر اخطائك انى وثقت فى ناس و تعاملت معاهم بثقه و طلعو مايستحقوش ثقتى ! و هل تغتفر فى حق الغير غالبا اه الا لو كان وقع عليا ظلم شديد اي الميزه اللي فيكي مش عند باقي الناس مش هشكر ف نفسى اكيد قول انت 😂😅 انتي شخصيه رومانسيه ولا اجتماعيه هم الاتنين مش عكس بعض رومانسيه و لا عقلانية اجتماعيه و لا انطوائية بس تقدر تقول أن انا الاربعه مع بعض كوكتيل كده 😁 اي العيب اللي فيكي ونفسك تغيريه انى متسرعه تفضلي الجواز عن حب ولا تقليدي الجواز عن تفاهم و توافق و ثقه قولينا اي موصفات شريك حياتك كنت ممكن اجاوبك على السؤال ده قبل كده لكن حاليا اقتنعت أن مكنش ينفع احط مواصفات معينه لان ممكن تكون المواصفات دى مش مناسبة ليا وانا معرفش و أن المواصفات الظاهرية مش مقياس لكن ربنا اعلم بالخير لينا ف بيقدرلنا ناس تشبهنا و بس ♥️ اي السبب اللي ممكن ترفضي اي عريس بسببها يكون مش بيصلى و بيدخن بخيل مهمل ف نفسه وطبعا راحتى النفسية تجاهه ايه حبت قبل كده لا لا أية حبت الحمد لله ♥️♥️♥️ شايفه مصر ازاي في الوقت الحالي دخلين علي ايام سوده ولا دخلنا خلاص امتنع عن الرد لاستشعارى الحرج 😂😂😂🤭 احنا دخلنا ودخلنا ودخلنا و داس علينا القطر كمان لو اختاروكي انك تحكمي مصر لمده يوم ايه القرارات اللي تخديها الاجابه صعبه جدا بس ف البداية هحاول اوقف الفساد والسرقه اللى من فوق لحد مااقدر أقضى عليها خالص تطوير التعليم لانه التعليم بيصنع وعى الشعب هشجع الصناعه ف بلدنا بدل ما بنستورد كل حاجه من برا ههتم بالصحه خصوصا للمواطن البسيط والله أنفع يالا انتخبونى 😌 😂😂 كلمه لاعضاء المنتدي يارب ديما متجمعين فى بنات مصر ♥️ كلمه لواد حييب مقدم البرنامج شكرا ي محمد ع الاستضافة الجميلة دى فعلا سعدت بوجودى و الاسئله جميلة و البرنامج قوى ومميز ^^ |
حلقة جميل مع شخصية اجمل وحوار راقي وممتع مع اية حكاية انزلى الانتخابات وهنشجعك هههههه تسلم اخى محمد |
استضافه رائعه ... لشخصيه راقيه خلوقه طيبه... وتحمل كل معاني الرقي والاخلاق.. اجابات راقيه ... واسلوب حوار جميل ... ولا شك كانت امسيه ممتعه... ربنا يسعدك يا ايه ويحققلك امنياتك... اسئله وادارة حوار رائعه ابو اياد ومجهود عالي كعادتك دمتم بكل خير |
حبيبتي ياايوش وانا بحبك ونفسي اشوفك والله من اقرب الناس لقلبي وشخصيتي ومتربيه هنا في المنتدي اعرفها من اول ماسجلنا هنا وتابعتها وبقينا صحاب إجابات جميله وانسانه أجمل ربنا يوفقك ويسعدك يارب تسلم يامحمد |
منوره الاستضافه آيه اجاباتك تلقائيه وعقلانيه تسلم محمد ع اختيارك الراقى ومجهودك القيم |
جميله الحلقة بوجود ايه اجابات عقلانيه انزلي الانتخابات واحنا وراكي هههههه نورتي البرنامج مشكور محمد على الحلقه الراقيه |
آيوش منورة منورة خمسة منورة بتحبي البيتزا كمان ياعين ياعين ^-^ استضافة ولا اروووع عرفت تختار ياصديقي محمد أيوش من المؤثرين بالمنتدى بوجودها وعطاءها وأسلوبها الهادي الي خلت الكل يحترمها ويقدرها اتمنى ليك ياصديقتي دوام الصحة والعافية نفتخر بوجود شخصيات متلك معنا أمتعتونا يا آصدقاء ودي |
ما شاء الله استضافه جميله تعلمنا منها اشياء كثيره.... إجابات راقيه وفيها فن ونحت هههههه وكلام جميل من عقليه راقيه والجميع في المنتدي يشعر بطيبه قلبها وحبها لربها ولا نزكيها على الله...... وانا اول من ينتخبك بس عاوزك تحطيني وزير صحه.... ههههه نورتي وانرتي الاستضافه الجميله من الشخصيه الراقيه المبدع الراقي الأخ محمد...... لكم مني أجمل تحيه واسأل الله ان يسعدكم ويحقق لكم كل الأماني |
أهلا آيه منوره كالعادة ردود مميزة كل سنة وأنتي طيب ويا رب عمر سعيد كله طاعة لله عز وجل تحققي كل ما تتمنيه، أنتي شخصية محترمة ونعتز بيكي وأنا بقدرك آيه خالص تحياتي ، تسلم محمد |
نسعد بحسن اللقاء وجمال الحوار دائما لنا شوق معكم توفيق من الله |
| الساعة الآن 08:25 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب