|
قصة قصيرة بائسة رقم 2 النهاردة خلصت شغل ورجعت البيت عادي لاقيت الجماعة عندنا مشغلين التليفزيون علي احتفال بتاع مومياوات وكدا وحوار مش فاهمه والفنانة العالمية يسرا بتحكي عن الحوار وبتاع في حضور الريس وقادة البلد وكدا الصراحة بكل عدم اهتمام سيبت التليفزيون وروحت اوضتي وقلت اتغدي احسن ... بلا ملل اتغديت ودخلت علي الفيس بوك لاقيت بقا مهرسة صور وناس كتيرة بتحكي عن الابهار وازاي الحفل رهيب وبتاع .. وفخرنا >> وازاي ان احنا ابهرنا العالم وكدا .. وعلي الجانب الاخر من الفيس بوك وبما اني بتابع عامة اي حد بيكتب وليه رأي .. عامة انا بتابع بصمت غالبا وبكون مجرد عابر سبيل وجدت في العالم الموازي للمعارضين او المظلومين او المسجونين السياسيين والحقوقيين اراء اخري .. البعض سمي اللي بيحصل اورجازم وطني .. وماحدش يسألني معناه اي المصطلح ده الله يباركلكم ... المهم البعض الاخر شايف ان كل ده بينسب للقيادة السياسية وبيحط في شوال الانجازات اعلاميا وبعد كدا لما حد ييجي منهم يكلم عن المظلومين في السجون وغيره بيلاقوا الناس تقول ليهم انتوا مش شايفين الانجازات وبتاع وبالتالي بيضعف موقفهم في التحدث عن حقوق فئة هما شايفينها بقت مستضعفة في البلد .. وناس كتير حقوقها ضاعت في فترة البلد كانت في حالة تخبط ودخل الحابل في النابل زي ما بيتقال فهما شايفين ان حق اللي ينبسط ينبسط .. بس ده ما يمنعش انهم مستائين .. يعني مش هيفرحوا بالعافية في ظل سجن ناس عارفين ومتأكدين انهم مظلومين في ظل من يحكم .. وفي ظل موقفهم اللي بيضعف يوم عن التاني انا غالبا بجمع الاراء كلها في دماغي ... وبعملها مسرحية هزلية كدا .. علي رأي الشاعر محمود درويش لا شئ يعجبني .. المهم قعدت اخد وادي مع نفسي حسيت ان فعليا كل شئ هيحصل في البلد دي هيكون ليه جانب سوداوي وجانب مفرح في ظل الجانب اللي بتنتمي ليه في المعادلة بس الصراحة انا مش منتمي لاي جانب لا عارف انا زعلان ولا فرحان فخور ولا مبجور ... فهيم ولا مفهوم وبدون اي مقدمات كدا في دماغي وفي موقف عبثي افتكرت داخلة اول حلقة لمسلسل كان لعادل امام مش فاكر اسمة هو تقريبا كان نصاب فيه .. وكان في رمضان من كام سنة كان مشهد مزدوج لحالتين في حفلة كان فيها كل رجال الاعمال في البلد بيكلموا عن المليارات وفي موسيقي فاخرة ونبيذ فاخر واكل كان شكله مستورد من فرنسا وكدا .. المهم يعني ثراء فاشخ وبتاع وفي الجانب الاخر بقا واحد في منطقة عشوائية مهددة بانها تقع وبيجيب ساندوتشات كفتة لعياله ام 4 جنيه دي وهو مروح اخر الليل عشان يسعدهم ويتغدوا وفجأة زلزال يحصل والشقق تقع والعيال والولية يموتو والرجل يقع علي الارض ويعيط وبتاع واكيد المشهد اتعمل ليه ستوب والمخرج سقف والناس عيطت وبتاع .. هيييه دنيا ... والله ما انا فاهم انا افتكرت المشهد ده ليه بس قلت اذكره علي اساس ان المفروض دي قصة بائسة فلازم المصداقية في الاحداث .. المهم وعلي غير العادة وبدون اي مقدمات واذ فجأة قمت دخلت رديت كجزء من الحبكة الدرامية للقصة البائسة دي علي واحد من البوستات اللي هي من النوعية دي بتاع الحقوقيين والمسجونين السياسيين وكان الرد كالتالي.. غياب العدل عن البعض بيخلي الاحساس بالانجاز مفقود وده طبيعي.. انما الاصعب بالنسبة ليا هيظل هو تعريف الناس لمفهوم الانجاز اساسا؟ طول الوقت ومن قرون عاوزين نوجه رسائل للعالم إن إحنا ام الدنيا وبتختلف الأزمنة وبتختلف الطرق في إظهار ده بس المنهج واحد أن إحنا عاوزين نثبت حاجة فعليا إحنا مش عاوزين نعترف أنها مابقتش موجودة علي الارض الواقع.. وبقينا عايشين في. Seeker attention zone عشان كدا انجازنا في الحياة كلام يرفعنا أو ينزلنا وده دائما اللي بيخلي الأجيال بتتراكم و بتختلف والاختلاف في حياتهم بيكون في مباني وحجر فرز تاني والعقول بتبقي فرز تالت بفلسفة كئيبة عن نظرتهم لوضعهم وازاي وصلوا ليه وازاي المفروض يطلعوا منه ومش بيطلعوا لأن عقليتهم بقت فرز رابع طبعا انا كتبت البوقين دول وطلعت بقا من الفيس .. وبدون اي مقدمات .. قلت انا ممكن اكتب موضوع ممل عن الحوار ده عشان ماحدش يقراه غيري وبتاع ... وكدا كدا النهاردة نقل المومياوات وعلي ما مشرف القسم يدخل يكون عدي يومين علي ما ينزل الموضوع وبتاع ... فتكون الناس نسيت بقا وكدا وهذا ان دل علي شئ فأنه يدل انني اصبحت حقا لا اهتم لشئ يعني حتي تلك اللحظة وعليا النعمة ما اعرف ايه حوار نقل المومياوات ده وهل الموضوع ده مهم للدرجة دي ولا ايه ان البلد كلها تقومله علي رجل كدا ولا ايه لأنه فعلا علي رأي الكابتن باسم مرسي ... انا فعلا مش متابع والله بس انا قلت احط التاتش بتاعي .. وهذا ان دل علي شئ اخر فأنه يدل انني برضه اصبحت لا اهتم للمرة التانية لاي شئ نريده اظهاره للعالم فقط لنثبت اننا مازنجر في نفسنا وكدا علي نفس وتيرة ام الدنيا من قديم الازل .. نفسي مرة نغير من الانتاج المصري السينمائي للاحداث انتاج سخي وعبيط في نفس الوقت .. شحات وبيستعرض .. بص اقولك كفاية كدا علي القصة البائسة دي اصل اكتر من كدا هقعد اتفلسف بزيادة علي الحال والحالة وهي مش ناقصة بيض اساسا عشان حد يدخل يقولي افرح للبلد ولا التاني يقول مافيش فايدة .. في الحالتين i dont care |
ايه دا كله. انا قريته وزي الفل بس مافهمتش حاجه هات الخلاصه |
على فكرة المسلسل اسمه العراف 😂 ثانيا l don't care نفس الاحساس والله اخي مش عارفة ده كله كان ليه كل شوية نتباهى بتاريخنا زي ما قلت شحات وبيتمنظر ولا واللقطة بتاع صاحبنا وهو ماشي وحسسنا انه انجز حاجة مهمة وهو بينقل شوية اموات 😏 |
تصدق بالله أنا لغاية دلوقت معرفش المومياوات دي رايحةمنين لفين ولا اهتميت اسأل او أبص غير بس لقيت بالصدفة ع الفيس فيديو وهما عاملين عرض وكده وقفت دقيقتين وقلبت. انا برضو زيك كده مبقتش اهتم بأي بتنجان واياكش تقوم حرب عالمية ولا يهمني. أسد كده في نفسي بس السؤال المهم هل اللي حصل ده فعلا يعتبر انجاز نفخر بيه واشوف ناس صحابي عاملين بوستات فخرية كده تحس انه خلاص مشوفش وش حد في ام الكوكب ده غير المصريين. طب اومال لو كنا احنا الجيل الحالي اللي عملنا التماثيل دي كنا عملنا ايه في الكوكب. والاقي برضو شوية بوستات انبهار ببنتين كانو بيطبلو وانهم طبلو حلو وكده. بس انا برضو مبقتش استغرب من اي بتنجان في ظل البطيخ اللي بقينا فيه |
اقتباس:
الخلاصة ان احنا عالم فقر بعيد عنك ربنا يهدينا |
اقتباس:
والله ان الواحد يوصل لاحساس اللامبالاة ده فده معناه خلاص انه عدينا مرحلة الوحش احنا في الدينجر زون وفاضل عالاكتئاب تكة ههه اقولك حاجة سيبك من الاستعراض وان احنا شحاتين وبنتمنظر ممكن لو انا دخلت في حوار مع طرف مناصر للموضوع ده وهيكلمني تسويقيا والمنافع اللي من الموضوع ممكن يقنعني عالرغم من حاجات كتيرة ممكن تتقال عن التوقيت او فكرة ان احنا ماعندناش ثقافة ان احنا نعمل دراسة جدوي لحاجة عشان نشوف يا هل هنقدر نشوف محصلة محترمة للفيلم ده ولا لاء وكمان سيبك من التطبيل اللي عمال علي بطال .. يمكن فعليا لو الاعلام في بلدنا متزن ومش بيطبل طول الوقت وكان لكل شئ ميزان واضح .. كنت ممكن تلاقيني بطبل انا معاهم وافرح وكدا عادي ... لو كان الموقف منفصل عن الواقع اللي عايشينه يعني لو شفناه في بلد زي دبي. .. كنا هنحس بابهار عادي .. المشكلة ان احنا مش دبي ... تقريبا العين اللي حاسة بالواقع صعب تشوف اولويات غير واقعها يتغير الاول او مايكونش ليه الاولوية .. وكمان سيبك من الظلم اللي فئة معينة من الناس حاسة بيهم وبتقتل جواهم اي احساس بالانجاز او الفرح لبلدهم لأي شئ عادي في بلاد كتير كدا .. بامانة انا عارف ان فيه حاجة مزهقاني في الموضوع ده بس عالرغم من الهري اللي انا قلته ده كله انا مش عارف احدد هي ايه .. |
اقتباس:
عاش يا دوك .. اسد مافيش كلام والله هو في الظروف الطبيعية لبلاد تانية اولويات الصرف عندها المواطن ممكن المسمي بتاعه هو انجاز وشئ نحتفل بيه اما في ظروفنا احنا فهتلاقي دايما جدل عشان الانجاز ده لا يعبر عن اي واقع احنا عايشينه ... حاجة زي دي المفروض تكون زي الكريمة كدا تتحط علي التورتة انما اصلا لما ما يكونش في تورته ايه فايدة الكريمة ... لو فيه اساسات واضحة او تراكمات ثقة كان كتير من الامور سهلة وكتير من الامور اللي بنشوفها حوالينا بمسمي انجاز ماتكونش محل جدل انما لما يكون الارث بتاعك هو شكوك .. فطبيعي يكون صوت الحاضر بتاعك شوكة في خاصرة كل انجاز .. |
الفكرة انه بيبني سمعة او زي ما بيسموها علاقات عامة و هنا انت بتتكلم عن عامة الناس في العالم و دول بيشملهم رجال الاعمال و غيرهم انت قاعدت سنين مثلا كانت السمعة عن مصر هي الفوضى و عدم الاستقرار حاليا هتلاقي السمعة دي اتغيرت نوعا ما سواء محليا او دوليا . و في الغالب السمعة بيكون مبالغ فيها عند الناس سواء في السيء او في الجيد الصورة العامة للعامة غالبا بتكون بسيطه . لو سالت اي حد عن الصورة العامة لدبي هتلاقي في ذهنه على طول ابراج و مولات . على الرغم من ان فيها فقر و طبقات عماله معدمه بس هي البلد استثمرت بقوة في السمعة و دا انعكس عليها بالايجاب نفس الفكرة في بلد زي السعودية عشان يعمل سمعة و يبين الحقبة الجديدة في انفتاحه محتاج حاجه اقوى من مجرد خبر فهنا بيلجأ للمهرجانات و الترفيه دي بتكون اقوى رسالة لانها بتكون عملية من خلالها بيقدر يكسب ثقة مستثمرين مثلا و بالتالي تنفيذ طموحه . الرد دا مش غرضه الدفاع و لا تبرير عشان ماحدش يقول كان ممكن يعمل و بدل دا يسوي دا الفكرة انك بتحاول تفهم دوافع الطرف الاخر بصرف النظر ان كان عاجبك او لا |
انا مع اني لا انتمي لأي جانب سياسي كنت و مازلت من الناس ال متعصبه من الموكب دة حرفيا انا اصلا مهتمتش وكنت ف جامعتي لقيت كله بيتكلم قولت اتفرج و ياريتني م اتفرجت ع كمية الصرف والحاجات ال مالهاش لازمه عشان نبين للعالم قد اي حضارتنا ال كل شويه بنتفشخر بيها واحنا اصلا محيلتناش غيرها احنا عريانين من غير التماثيل والميمياوات دول عايزين نبين للعالم ان احنا اووه واو دولة جامده زوحليقه و متحضرين بقي وعندنا فلوس عشان نطلع عرض زي دا والحقيقه انه من برا هالله هالله و من جوا يعلم الله دا مكنش عدى يومين على حوادث مأساوية تحزن كمية تناقض و قرف و حزن دي عالم تلاقيها عايشه لوحدها كدا انت مش فاهم سياستهم اي بس مجبر تهاها وكدا معاهم |
كان موكب عظيم .. بس يارب يكون بفايدة |
| الساعة الآن 09:06 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب