ازيكوا ياحلوين
عاملين إيه
واخباراتكم
واخبار الجماعه ايه
طبعا هتقولوا ايه البت الرغايه دي
ماتتدخلي في الموضوع علي طول
إستنوا عليا بس هقول اهو
بس اصل عندي امتحانات والحاله صعبه علي الاخر
وعاوزه أعيط همتحن منهج سنتين علي بعض ياناس
بس حتي الدموع مش راضيه تنزل
قلت بلا وجع قلب اجي أدردش معاكوا شويه
من كام يوم كده يجي أيام5باين
كان عندي إمتحان عملي
والحمد لله عدي علي خير بعد يوم من العناء
قلت لأصحابي ماتيجوا يابنات نأكل اي حاجه في اي مطعم
احنا واقفين علي رجلينا من الصبح
المهم بعد عناء معاهم وافقوا
ورحنا مطعم قريب من الكليه
المهم دخلنا قعدنا علي ترابيزه في جنب لوحدنا كده فاضي مكنش فيه حد
علشان نعرف ناخد حريتنا
بعد شويه صغيرين لقينا راجل يعني حوالي 50 سنه جه قعد
علي الترابيزه الي قدامنا
عادي يعني ده راجل قد أبونا
بعدين قاعدين عادي مستنين الأكل لاقيت الراجل ده
ماسك موبايل وعمال بيصور المطعم وهو اصلا قاعد مدينا ظهره
بعدين فجأه في الخباثه كده لاقيته عامل الموبايل ناحيتنا وبيصورنا
قال يعني احنا مش واخدين بالنا
قمت انا قلت لامنيه لأصحابي عيال الراجل ده بيصورنا
قامت امنيه صحبتي قالتي ايه ؟ بيصورنا
شوفتيه يامروه متاكده قلتلها ايوه
قامت صاحبتنا التانيه بتبص لاقيته بيمسح صورنا من الموبايل
وبعدين قعدنا لاقيناه بيصور تاني
يادي المصيبه ايه ده
البنت امنيه دي جدعه بصراحه بميه راجل
قامت قامت وراحتله وقالتله انت بتعمل ايه
هات الموبايل الي في ايدك ده
قامت واحده تانيه من أصحابنا قالت ماتعمليش مشاكل ياامنيه
خلينا نروح ترابيزه تانيه بعيد عنه وخلاص
قامت امنيه ماسكتتش قالت ازاي
مش لما نشوف صور ايه الراجل ده
هات الموبايل ياما والله هتصل بالشرطه تيجي شوف تصرف معاك
والراجل اتلغبط وكانت حالته حاله
والناس الي في المحل اتلموا والرجاله كلهم مسكوه روقوه
واخدوا منه الموبايل ومسحوا الصور والفيديوهات الي صورها
واحنا رحنا بعيد عنه وانتهي الموضوع
لاقينا راجل كبير كده جاي يقول لامنيه انا بحيكي علي شجاعتك
انتي بنت جدعه وتعرفي تتصرفي بجد
وقام مسك فاطمه وانتي سلبيه ماينفعش انك تسكتي عن حقك
وتهربي من الموقف وتمشي
انتي مش عارفه هو كان ناوي يعمل ايه بالصور دي
انتوا بقي تتخيلوا راجل زي ده وكبير في السن كده
كان ممكن يعمل ايه بالصور دي
مافيش ضمير خالص مش دول بنات زي بناته
يعني كما تيدن تدان
وبعدين انتي لو في الموقف ده كنتي هتتصرفي ازاي
هتقفي وتاخدي حقك
ولاهتاخفي وتهربي