اول حلقه من ذكريات تحت الاضواء
ومعانا العضوه صاحبت الراى العاقل والفكر الفلكى
نقول لها كل سنه وهى طيبه ونبدا معاها بنت العبد عضو مشارك 
ميرسي نوررر لاستضافتك لى فبرنامجك الطريف ....اهلا باسئلتك ....واليك زكرياتى تحت الاضواء ..
1-ايه اكتر موقف احراج عيشتيه ؟
الحمد لله المواقف المحرجه مش كتير لكن هو ااخر موقف محرج كان امبارح وانا بشترى
ملابس ...المهم انا دخلت البوتيك واخترت اللبس وقسته وكان مرسوم عليا ..كان عجبنى اوى
..وجيت احاسب لقيت البدله ب400 جينيه وانا الحقيقه كان معايا 340 جنيه بس ....طبعا
شكلى كان بايخ ومحرج جدااااا بس الحمد لله الراجل صاحب البوتيك كان جنتل وعارف انى زبونته
من زمان واقسم انى لازم استلم اللبس وبعدين ابقى اجيب الباقى فوقت تانى ....
2- احكنا موقف كنتى فيه غيلسه ؟
غيلسه؟ هههههههه اعتقد لما بروح للدكتور بتاعى فالمكتب علشان اعرف درجاتى
فالامتحانات الجزئيه قبل زمايلى كلهم ...وكمان لما بيقولى على درجتى لااااااااااااازم
اسئل الدكتور (طب فيه حد جاب اعلى منى ؟؟) الدكتور بيقولى انتى طالبه لمضه
3- احكنا موقف اتعلمتى منه كتير ؟
الدنيا اكبر مدرسه الانسان بينتمى ليها انا تقريبا بتعلم من المواقف ليل نهار
الانسان لازم يستفاد من كل المواقف اللى بتقابله ومش بس مواقفه الشخصيه
لاااااا ومواقف الاخرين اللى بتحصل قدامه علشان منقعش فنفس الاخطاء....
اعتقد انى استفدت كتييييييير مالموقف الاتى ....
كنت فالكليه والدكتور طلب منى بحث اعمله باسم المجموعه بتاعتى فالعملى البحث ده
كان مهم جداااااا... انا سمعت الامر مالدكتور بفعلا بدات اعمله تعبت وسهرت وعملت
فيه شغل جامد ودورت فالمكتبات بره وجوه الكليه حتى والله انا فاكره انى اشتغلت فيه
5 ايام وكان 80 صفحه كتبتها ....وجيت بعد ما انهيته علشان اعرضه عالدكتور قبل
المناقشه علشان انا كنت مكلفه انى هعمله وهناقشه امام المدرج والدكتور فيه حاجه
عطلتنى فالمكتبه واضطريت اعطى البحث لزميله تانيه هى اللى تعرضه عالدكتور المهم ..
هى اخذت البحث وراحت للدكتور وللاسف نسبت البحث لنفسها لمجرد انها معايا فنفس
المجموعه ....وجات محاضرة مناقشة البحث وا نا محضره البحث ومذكراه كويس ومنظماه
فدماغى علشان اناقش من غير مبص فالورق نهائيا و منتظره الدكتور ينادى عليا علشان
اطلع اناقش البحث ولقيت الدكتور نده على الزميله دى علشان هى اللى تناقشه انا سكت
وقلت اكيد الدكتور له هدف انها هى اللى تناقش ...المهم بدات تناقش وانا كنت واثقه ان
ربنا مبيضيعش تعب حد ..وانه اكيد هيظهر الحق ... المهم..واثناء مناقشتها الدكتور
استوقفها فمعلومه معينه لكن هى معرفتش ترد لانها مجرد بتقرا مالورق اللى انا تعبانه فيه
ومجمعاه بنفسي ....انا وقفت وطلبت مالدكتور انى اجاوب سؤاله لانى كنت محضره نفسي
انى اغطى كل الثغرات فالبحث واكون قد المناقشه وبالفعل سمحلى واستكملت انا مناقشه
البحث والحمد لله....انا موجهتش للبنت دى اى عتاب او اى شئ لان يكفيها الموقف السخيف
اللى حطت نفسها فيه لكن اتعلمت انى مثقش فاى حد بسهوله وانى متساهلش فاى امر يمس
دراستى ومستقبلى ابداااا....
4- احكنا موقف احرجتى فيه اوى ؟
الموقف داحصلى وانا عندى تدريب وسكاشن فالمستشفى .....المهم انا وصلت فيوم
المستشفى ودخات غرفة تغيير الملابس علشان اغير الجاكيت بتاعى والبس البالطو
....فغيرت وخرجت وبدات اشتغل وفنهاية اليوم رحت علشان اغير تانى والبس الجاكيت
واروح فللاسف لقيت حد سرق الجاكيت او اتبدل بالخطا الله اعلم ....واضطريت انى
اروح باليونى فورم الابيض ومشيت بيه فالشارع شكلى كان غبى اوى وبااااااااايخ
واخدت يومها تعليقات سخيفه فالشارع ....
5- احكنا عن ذكره جميله فى حياتك ؟
والله عندى زكريات حلوه كتيييييير ومعظمها فالطفوله وانا اصغر من كدا شويه ....
كانت معظمها فالمصيف وخصوصا مع اولاد عماتى كتييييير كنا بنلعب عالبحر وبنتفسح
ونهزر ونسهر بره ....لكن دلوقت الحاجات دى قلت خااااالص يعنى الواحد لما بيكبر بتذداد
مسؤلياته وبيفكر طول الوقت فمستقبله وازاى يثبت نفسه وينجح فبالتالى بتكون الحياه
جافه اكتر من الاول ...التزامات كتير والواحد بيكون مسؤل عن كل تصرفاته وتفكيره
لمجرد انه كبر شويه ...يعنى مثلا اسرتى كانت مستعده اننا نروح المصيف السنادى
بس كنت انا السبب اننا مرحناش لان كان عندى تدريب وسكاشن فالصيف وكمان مجموعة
ابحاث مطلوبه منى انى ادخل بيها العام الدراسي القادم دا غير قرصات لازم احضرها ....معلش جبتلكم اكتئاب مش زكريات
حلوه هههههههههههه ليت الطفوله تعود يوما ...
6- احكنا عن موقف طريف حصلك ؟
الموقف دا حصلى السنه اللى فاتت وكنا فالشتا ....كانت ليله شتويه جامده كناحوالى
الساعه 3 بالليل والجو كان بيمطر بشكل مش عادى تقريبا كانت سيول ورعد وبرق
وحاجه صعبه وانا ساكنه فبلد صغيره والكهرباء كانت قاطعه والبلد كانت ضلمه خالص
المهم ...البيت كان كله نايم حتى بابا كان جاى مالسفر وهيبات معانا الليله دى بس و
هيسافر تانى يوم على طول ...بس انا كنت عالسرير بس صاحيه ..كنت انا الوحيده
اللى صاحيه فالبيت ...المهم سمعت صوت بره فالشارع زى انين او صوت بيبكى
وبيصرخ بس ضعيف ومريض ...حاولت اكدب نفسي ...يعنى مين المجنون اللى
فالشارع فالضلمه والسيول والوقت المتاخر ده ....المهم اتاكدت من الصوت فعلا
وقمت وفتحت شباك غرفتى فتحه صغيره علشان اشوف ايه اللى بيحصل بره ...
حتى الهوا كان جامد اوى لدرجة انه فتح الشباك عالاخر غصب عنى والمطر دخل
وغرقلى السرير ....وبصيت مالشباك ولقيت ست عجوزه واقفه فالطين والمطر
نازل عليها وبترتعش وبتنازع ...الست دى جارتنا وهى كبيره فالسن جداااااااااا
وفقدت عقلها وزاكرتها ومبتعرفش حد ولا حتى اولادها ...وهى ساكن معاها
حفيد لها بس تقريبا كان نايم ومسمعهاش وهى خارجه ...المهم ضميرى بدايشتغل
والست دى هتموت لو فضلت بالشكل ده ...وضميري هيفضل يعذبنى العمر كله ..
طب اعمل ايه ؟؟المهم ان الشجاعه خدتنى والضمير اشتغل واخدت كشاف ومشيت
على اطراف صوابعى وخرجت فالشارع والخدت الست ومشيت معاها لحد بيتهم
ولقيت بابهم مفتوح فدخلتها ندهت على حفيدها ياخدها ومشيت علشان ارجع
البيت تانى ...ولسؤ الحظ الا قى الهوا قفل عليا الباب وانا بره ...طب اعمل ايه ؟؟
مينفعش اخبط على اهلى يفتحولى فالوقت ده هزعجهم وهتبقى مشكله علشان خرجت ...
المهم انا قررت انى افضل طووول الليل فالجنينه بتاعت البيت لحااااااد النهار ميطلع
وحد يفتح الباب وادخل من غير محد يشوفنى....وفضلت فالجنينه برتعش ومراقبه
الباب لحاااااد الصبح جدتى صحيت وفتحت الباب ومشيت ...فانا جريت دخلت بسرعه
البيت ودخلت غرفتى ونمت على سريري كانى بايته عليه من امبارح عادى....
والحمد لله جالى برد ونزله شعبيه وكنت بمووووت ههههههههه هو دا جزائى
وعلى فكره محدش يعرف حاجه عن الموضوع ده لحد دلوقت غيركم فالبرنامج ..
7-ما رايك فى الحب ؟
الحب .....الكل بيتكلم عن الحب ...اى ولد يعرف اى بنت نقول حب...اى حد يقول كلام حلو
لاى حد نقول حب ....اى حد يجيب دباديب وورد احمر لاى حد نقول حب !!!!(عجبى)
المهم ....بص يانوررر انا يمكن مكونش عشت قصه علشان احكيلكم من خلالها ايه
هو الحب ؟؟....لكن رغم انى معشتش قصه الا انى عرفه الحب ده يبقى ازاى ...عارفه
هو عباره عن ايه ؟؟؟
لما بشوف اللى بين بابا وماما ....عرفت انه عشره وموده واحترام .
لما بشوف اللوحات اللى بابا بيرسمها ....عرفت انه تعبير واحساس.
لما بسمع صوت جدتى الدافى وهى بتحكيلى عن قصة الحب الجميله
اللى كانت بينها وبين جدى الله يرحمه وقد ايه هو اتمسك بيها رغم انه
كان ابن اكابر ومن عيله وهى كانت بنت ناس غلابه ...عرفت انه تضحيه واخلاص.
لما كنت بسمع بابا بيشغل شعر نزار قباتى بكلماته الساحره وانا صغيره...
عرفت انه رومانسيه وجنون ..
يعنى انا كونت معنى الحب من الحاجات دى كلها ....
وماذا تعلمتى من حياتك وتجاربك ؟
تعلمت كل شئ ...كل شئ يا نوررر ومش من حياتى انا بس لا من مواقف وحياة الاخرين
ايضا ورغم كل ده حاسه انى لسه متعلمتش حاااااااجه خاااااالص لانى سنى لسه صغير
واكيد الحياه لسه فيها الكثير والكثير ....
............................
اتمنى لو كنت ضيفه خفيفه...نوررر استمتعت كتير باسئلتك الجميله....دمتم انجح الناس
....