بسم الله الرحمن الرحيم
كل عام وانتم بخير
و
رمضان كريم
النهاردة اول يوم رمضان وكان لازم نقدم حاجا جديدة لاعضاء المنتدى الغالى
البرنامج باختصار هيكون استضافه خفيفة عبارة عن كام سؤال صغيرين
وفى اخر البرنامج هنشوف ضيفنا هيقدملنا اية
ممكن يقدم .
( قصيدة - صورة - اعتزار - رساله - دعاء .... الخ )
المهم اننا ان شاء الله هنكون ضيوف خفاف عليكم انا وضيوفى .
ودلوقتى تعالو نشوف ضيفنا الغالى
عاشق ولهان
لما سئلتة عن الى بيعملة فى رمضان قال اية
س / فى البداية كل سنة وانتا طيب ؟
وأنت بألف خير وهنا وسعاده
س / فاكر ايام الطفولة اكيد فى رمضان احكلنا عنها ؟
اكيد طبعا ً فاكر كنا قبل رمضان بأيام نتجمع أولاد وبنات الجيران
ونشترك كلنا ونشتري الزينه ونزين الشوارع
والبيوت ولو شوفنا حد عمل زينه حلوه في الشارع اللي بعدنا كويسه
نعمل زينه اجمل منها واللعب والشقاوه
اللي مش بتنتهي الا وقت النوم
س / عاشق ولهان فاكر اول سنة صومت فيها والا لا؟ كنت كام سنة ؟
افتكر كان عمري 8 سنين
س / كل واحد بيبقى لية زكريات مع شهر رمضان اية زكرياتك ؟
والله هو اجمل شئ بفتكره دايما ً الود الجميل اللي بيجمع الناس
في شهر رمضان وبيخليهم أسره واحده
يعني كنت تشوف جيرانك دايماً تبادل زيارات وولائم جماعيه بين
الجيران والعائلات وكمان كان فيه
شئ جميل أوي بنفتقده دلوقت روح التسامح كنت تلاقي الناس
بتتصافي وتتصالح وتنسي
كل المشاكل وتتصافي النفوس وتفتكر بس فرحة شهر رمضان
س / اية نظامك فى الصيام بتتعب والا الصيام بالنسبالك حاجا عادية احكلنا ؟
أبدا ًمش بحس بتعب في الصيام أنا بطبعي أكلي قليل فكده كده مش
بحس بجوع أو عطش
س / اكيد كل ما بنكبر بنحس برمضان مختلف اية احساسك دلوقتى واية الاختلاف الى حصل معاك ؟
أكيد رمضان زمان كان أجمل وكنا بنحس بفرحته وود الأهل والأصحاب
والأجواء الرمضانيه الجميله
أما دلوقت إختلف الحال غربه من مسؤليه ومفيش أوقات فراغ زي زمان
س / شهر رمضان يمكن لية روحانيات خاصه ( صيام - صلاة - التقرب من الله - المودة - الرحمة ) قولنا بتعمل اية خلال الشهر ؟
الحمد لله أنا مواظب علي الصلاه دايما ً لكن في رمضان لازم أقرأ جزء
يوميا ً علي الأقل يعني ممكن أختم القرآن
مرتين في الشهر أما الموده والرحمه لظروف الغربه بتكون عن طريق
الإتصال ده بالنسبه للأهل في مصر
أما هنا بنود أصحابنا دايما ً مش في رمضان بس
س / يومك ازاى فى شهر رمضان ؟
طبعا ً بين العمل والصلاه ومتابعة المنتدي
س / بتابع المسلسلات والبرامج اكيد تفتكر اية السنادى هيكون مميز ؟
بصراحه في رمضان اللي فات كنت بتابع مسلسل شيخ العرب همام
وأعتقد مسلسل محمد علي هيكون الأفضل السنادي
س / عايزك تقول كلمة للاعضاء بمناسبة الشهر الكريم ؟
كل سنه وأنتم طيبين ويكون شهر رمضان شهر الخير علي الجميع
س / اية رائيك فى التوبيك ؟
طبعا ً مورشو متميز في أي شئ يقدمه وده مش جديد عليك يا أحمد
س / اخيرا حابب تقدم اية للاعضاء بمناسبة الشهر الكريم ؟
هكتب كلمتين مختصرين عن شهر رمضان يا رب تعجبكم
وهل الهلال
وصلينا القيام
يا فرحة قلوبنا
بشهر الصيام
وهلة علينا
نسايم الغفران
يالا معايا قولو
أهلا ً يا رمضان
وبكدا تنتهى حلقتنا النهاردة
اتمنى ان اتنال اعجابكم
انتظرونى وحلقة جديدة من
رمضان يجمعنا