بسم الله الرحمن الرحيم 
اهلا ومرحبا بكم
فى البداية التوبيك دا مش معمول عشان نتسلى بالعكس الموضوع معمول عشان نستفيد منة
وان شاء الله هنستفيد والى حابب يقول حاجا هيدخل يقولها وينصح بيها باقى الاعضاء
المهم البنت بطلة القصة لسة مخلصة ثانوية عامية قصدى عامة من صغرها وهى بتحلم بدخول الجامعه
مش فارق معاها كتير ياترى هتدخل جامعه اية المهم انها تدخل حاجا اسمها ( جامعه ) وفعلا ربنا كرمها
وجالها كمان التنسيق وفعلا هتدخل الجامعه بس تعالو بسرعه كدا نشوف اول لما مسكت جواب التنسيق
عملت اااااااااااااااااااااية وتعالو نشوف كدا الحوار الى دار بينها وبين نفسهااااااااا
الطالبة الجامعية : يااااااااااة اخيرا هدخل الجامعه انا مش مصدقة
نفسها : ايوة خلاص والجواب فى ايدك اخيرا حلمنا اتحقق
ياترى الجامعه دى شكلها اية
اكيد هتبقى اكبر من المدرسة الى كنا فيها دى كانت صغيرة اوى
هههههههههه مدرسة اية بس دى كفاية اسمها جاااااااامعاااااااة
بالظبط يبقى اكيد حاجا كبيرة جدا واكيد الحوش بتاعها كبيررررر
يييييييييييي حوش اية بس انتى عايزة تلغبطينى لية سبيى اتخيل شكلها
دا كان اول حوار يحصل وكان حوار زى ما شوفنا كدا مالوش ملامح ^_^
بس بطلتنا تفكيرها غريب جدا وانا عارفها مش هتبطل رغى مع الناس الا لما
تعرف النظام اية فى الجامعه اة صحيح تعالو معايا كدا
اصل انا شايف بطلتنا واقفة مع مامتها هناك اهى واكيد اكيد بيكلمو برضو
عن الجماعه تعالو نسمع كدا بيقولو اية
الطالبة الجامعية : اة يا ماما خلاص كدا الحمد لله هدخل الجامعه
والدتها : مبروك يا حبيبتى والله كبرتى اهو ودخلتى الجامعه
انا كبيرة من زمان يا ماما وانتى كنتى شايفانى صغيرة يعنى
طول عمرك كبيرة يا حبيبتى المهم عايزاكى فى موضوع
خير يا ماما موضوع اية
بصى يا حبيبتى الجامعة دى الى اعرفة ان فيها ولاد وبنات كتير جدا
اة اكيد يا ماما
بصى بقى انا عايزاكى مالكيش دعوة بحد يعنى تروحى تحضرى الحصة وترجعى
حصة اية يا ماما اسمها محاضرة وبعدين ما تقلقيش اكيد هعمل كدا
طيب يبقى هتروحى تحضرى وترجعى على طول ومالكيش دعوة بحد
دا كان حوار مهم لبطلتنا عشان كان اول حوار جاد يحصل بينها وبين حد وكان اهميتة
فى نصيحة مامتها ليها وخاليكو فاكرين مامتها قالت اية تروحى تحضرى الحصة قصدى
المحاضرة وترجعى استنو كدا تعالو تعالو نشوف البطلة بتكلم مين فى الفون
انا عارف البطلة بقولكم هدوخنا معاها النهاردة تعالو اسمعو معايا كدا
الطالبة الجامعية : ايوة يا بنتى بقولك ماما بتقولى تروحى تحضرى الحصة وترجعى ههههههههه
صاحبة البطلة : هى طنط لسة مش مقتنعا اننا دخلنا الجماعه
ياااااااااااة اخيرا هندخل الجامعه بقى ونشوف ناس ومفيش طابور وقرف
اة خلاص بقى ننسى الكلام دا بس قوليلى تفتكرى الجامعه هتبقى الحياة فيها ازاى
اعتقد ان هيبقى فى تحرر لينا يعنى مفيس طابور والا حصص والا مدرسين
وكمان الى اعرفة فى الجماعه الدكاترة مش بيضربو ومفيش شتايم والا حاجا
يابنتى انا ليا قريبتى بتقولى ان اجمل ايام هتكون بتاعت الجامعه خروجات وفسح
بالظبط انا اختى كمان قالتلى الكلام دا يلة بكرة نروح ونشوف بس عايزين بقى يبقو 4 سنين جامدين
دا كان برضو حوار مهم بين البطلة وزميلتها الى هتبقى معاها فى نفس الجامعه
ودا كان حوار بيعرفكم قد اية هما كانو بيحبو المدرسة والمدرسين والطابور
بصراحة حاجا حلوة جدا :vb30: ههههههههههههه عندهم حق بصراحة
مين فينا كان بيحب المدرسة والطوابير والمدرسين الرخمين والدروس الخصوصية
يا على رخامة الايام دى حاجا كدا تقررررررررررررف استنو استنو
تعالو البطلة دخلت دلوقتى على النت وفتحت الميل وكمان بنكلم حد
مش قولتلكم دى مش هتسكت تعالو نشوف بترغى مع مين وفــ اية
اكيد عارفين يعنى مش محتاجا
الطالبة الجامعية : اهلا ازيك عامل اية مش انا خلاص
زميل البطلة من النت : الف مبروك ياستى
الله يبارك فيك قولى بقى بما انك فى جامعه اية النظام هناك
اوعى وشك هتهيصى خروجات وفسح وقضيها وعيشى حياتك
خروجات اية ياعم انا مش بتاعت الكلام دا
اها انتى من بتوع الى يروحو زى العساكر يحضرو ويمشو
( طبعا افتكرت كلام مامتها :juvefan2: ) عساكر اية
احنا بنقول عليهم كدا تلاقيهم لا بيتعرفو على حد والا بيعملو حاجا بيروحو يحضرو ويمشو
طيب واية يعنى هو لازم اكلم الناس كلها عشان مابقاش عسكرى
ياستى براحتك بكرة تروحى وتشوفى يا عسكرى أمن مركزى ^_^
احم احم البطلة طلعت عسكرى المهم بطلتنا مش هتبطل تتخيل شكل الجامعه
الا لما تنزل وتروح وتشوف بنفسها وبطلتنا لو فضلنا وراها مش هنخلص من رغيها
انا عارفها والله وانتو كمان هتعرفوها فى الحلقات الجاية بس قبل ما اقولكم سلام
حابب اقولكم حاجا بسيطة .
نصيحة : اتمنى من كل ولد او بنت يتخيل زى ماهو عايز حياة الجامعه المهم لما تروحو الجامعه
تعيشو حياتكم على طبيعتكم وميبقاش فى تمادى فى التصرفات لان هناك هتقابلو ناس كتير واشكال
كتير جدا فيها المحترم وفيها الـــ والا بلاش المهم حاولو تبقو على طبيعتكو عشان هتقابلو مستويات
كتيرة هتلاقو الغنى والفقير المحترم والكداب و الحكاية مش حكاية تحضرى وتمشى
قدام انتى عارفا حدودك مع الغير اية هى و
سلام
استنونى بقى الحلقة الجاية
ومع السلام عليكو
morshooo