[الحان الورد]

السلآم عليكم ورحمة الله وبركاته
..






يسعد صبآحكم ، مسآءكم جميعاً
أخبآركم ، يارب الكل يكون بخير


موعدنا النهـآردة مع الحلقـة 6 من برنامج
" رحلة تعمق في شخصيات الأعضاء "


النهـآردة معانا مشرف ، مميز ، وهـآدي
معانا مشرف القسم الاسلامي


Iѕlαм Ч 3αlαм

..

أهلاً بيك يا محمد معانا ..
ونبدأ الحلقة ،

**


الفقرة الأولى : الفراغات ..


إسمي محمد ، عمري ـــــ
لآ أحب أن يرآني الآخرين وأنا مهزوم
جربت طعم الحياة ، وكرهت مافيها إلا طاعة الله ، وخفت أن أموت وأنا غير مستعد للقاء الله
أصعب مآفي الحيآة أن يكون الله خالقك ورازقك ومدبرك ويتذكرك بنعمه ثم تنساه وتعصيه
حياتي ليست كما أريد
وماضيي في آلام وآمال
ومستقبلي أتمناه كما أريد

في وحدتي أعيش غريبا
في طفولتي أحببت ان أحقق احلامى ، وعندمآ كبرت وجدت أن الحياة كلها لا تُنال بسهولة
عالمي الصغير هو نفسى , والكون بالنسبة لي كغابة ، والآخرين في عمري ليسوا الا كألوان الطعام
لاتنظر الى زلاتى ، ولاتجبرني ان أفعل ما أريد ، ولاتطلب مني ان أفعل ما لا أطيق
انتقد نفسي في تنازلها عن بعض الأشياء
وأفتح نافذة الصبر
ولاأطوي صفحة التوكل على الله
لأني أريد أن أشعر براحة البال
الحيآة عندي كاسمها

**


الفقرة الثانية : الاسئلة ..

- " الحياة مليئة بالمحن والابتلآءات ، بتتفآوت درجة المحن زي مابتتفاوت ردة فعلنا وصبرنا ع المحن دي "
انت بتوآجه إزاي اي مشكلة في حياتك ، وبتحب تعتمد على نفسك ولا ممكن تعتمد على حد غيرك ..؟؟


بواجهها بالصبر وبحاول على قدر الإمكان إنى أوصل أحلها بهدوء
بحب اعتمد على نفسى ومش باحب أطلب المساعدة من حد
لكن أحيانا باضطر إنى اطلبها

_أيه هي نقطة ضعفك ..؟؟
كل إنسان ليه نقطة ضعف
بس تصدقى لغاية دلوقتى ماكتشفتش نقطة ضعفى
أو تقدرى تقولى مش حاسس بيها

- دآيماً بنتكلم عن الايجابية وازاي نكون مؤثرين وفعالين في المجتمع اللي عآيشين فيه ،، أيه هو تعريف الايجابية من وجهة نظرك ؟ وتفكيرك -غالباً- بيبقى مهتم بالايجابيات ولا السلبيات ..؟؟
الإيجابية عندى بالخصها فى كلمة وتعتبر أقصى درجات الإيجابية: مواجهة الغزال للأسد فى عرينه
ممكن تكون الكلمة غريبة وممكن يستغباها البعض
وفى ناس ممكن تقول صعب
لكن الإنسان الإيجابى مابيكونش إيجابى بالكلام والآراء فقط
لكن بيكون إيجابى بأفعاله
زى مابيقولوا يقدر يقف فى وش المدفع ومابيخافش
يغيرشئ فاسد , يحارب من أجل حقوقه , يناضل ومايخافش إلا من ربه فقط
لكن واحد يبقى أبسط حقوق ليه ويتخلى عنه يبقى فى سلبية أكتر من كده!!!


- أيه هو دآفعك في الحيآة اللي بيخليك تُنجز ، وامتى بتحس انك محبط..؟؟
التقدم وإنى أبقى أفضل من غيرى دائماً
باحس بالاحباط لما أفشل
بس الحمد لله أنا عنيد وبافضل ورا الحاجة لغاية اما اعملها
حتى لو فضلت وقت طويل
بس احيانا فى حاجات ليها وقت معين للانجاز ساعتها لما بتضيع عليا من غير انجاز أشعر بالاحباط الشديد

- ابرز عيوب شخصيتك ايه ؟ وبتحاول تعالجها ولا مؤمن ان كل شخص لازم تكون ليه عيوب ومفيش حد كآمل ..؟؟
حاليا
عدم المبالاة بما حولى
بحاول اعالجها بس المشكلة ان سببها موجود وبيقاومنى فانا وهو فى صراع
طبعا مافيش إنسان كامل
والكمال لله وحده
بس العيوب درجات بتتفاوت من شخص لشخص
فى ناس مليانة عيوب وفى ناس وسط وفى ناس عيوبها تكاد تكون منعدمة

- بتهتم بـ علم النفس وتطوير الذآت ؟ وليــه ؟؟
اللى مايهتمش بيهم خصوصا تطوير الذات يبقى انسان حابب يعيش على وتيرة واحدة
ومش حابب يكون صراعه للافضل
ليه؟ لإن الانسان عامل زى الصلصال إما تطوير للأفضل أو للاسوء
وأكيد معظم الناس وغالبيتهم يميلوا للتطوير للأفضل

- " الانسان عدو مايجهل " ، ايه رأيك بالمقولة دي ، وليه غالبية النآس بتبقى ضد التغيير ؟
و موقفك ايه منه ..؟؟
عدو ما يجهل وبيعاديه
الإنسان بطبيعته لو عاش على نظام معين بيتعود عليه
لكن منهم اللى يحب يغير من شئ للأفضلية
لكن الناس تقولك البلد دى احسن من غيرها
وهما مايعرفوش غيرها
ماهو غيرها ممكن يكون احسن فنفضل عليه لغاية اما نشوف الاحسن منه
اما لو طلع مش احسن نبعد عنه

- بصرآحة ، بتبص غالباً لنص الكوباية الفآضي ولا المليان ؟
وبتعتبر نفسك .. متفآئل ، بنسبة قد ايه ..؟؟
المليان طبعا
الحمد لله متفائل وبحب الامل والصبر
نسبة التفائل عندى ( ومن يتوكل على الله فهو حسبه )


- بتفضل تكون خيالي وطموح ولا واقعي ، وليه احيانا الطموح بيبقى ضد الواقعية ، يعني ياكون واقعي او اكون طموح ..؟؟
الإنسان مفروض عليه يعيش فى الواقع
بس الطموح ممكن يتحول لواقع
واحيانا الطموح بيكون ضد الواقعية لان الطموح فى عالم خيالى غير مقيد لا بقوانين ولا بسجون
لكن لما مثلا تيجى تنفذيه على الواقع تلاقى التقيد والقوانين والسجون فتحسى ان فى تضارب

- أول انطبآع بيتآخد عن شخصيتك ايه ؟ وهل بيبقى صحيح ولا لأ ..؟؟
الطيبة والبراءة
اه صحيح إن شاء الله

- بتعبر ازاي عن ..
فرحك ،
الدهشة مع الابتسامة
غضبك ،
مابكلمش حد ولو كلمته بيبقى بأسلوب اللى مش طايق حد
وتعبيرات الوش بقى بتبقى باينة عندى

بتلجَأ للسكوت ولا بيكون ليك موقف ..؟؟
على حسب الموقف والمشكلة
فى مواقف بتضطرنى انى اسكت
وفى بيخلينى آخد موقف

- مجتمعنا دآيماً او غالباً بيميل للمجآملات ، وقليل اللي بيتقبل الرأي الآخر والنقد بدون حسآسية ، انت شايف امتى هنقدر نآخد النقد والصرآحة ببسآطة ؟ وانت بتميل للمجاملات ولا بتقول رأيك ومابيهمكش ..؟؟
لما نرجع لمبادئ الدين
لانه مافيهوش مجاملات
باكره المجاملات أوى
وبقول رأيى بصراحة

- الخجل والحيآء سمات اساسية للبنت ، امتى الخجل دآ بيتحول لخجل اجتمآعي مذموم ؟ وهل بتفضل البنت الجريئة أم الخجولة ...؟؟
كل حاجة بتزيد عن ضوابطها بتبقى مذمومة
بس بصراحة ماشفتش مواقف لبنت تكون خجلها مذموم إلا بقى لو قاعدة وسط قرايبها ومابتتكلمش من كثرة الكسوف
كل واحدة ليها عيب
البنت الجريئة أفضلها فى حالة إنها عايشة فى غابة وتقدر تاخد حقها من الذئاب
لكن لا أفضلها إنها تبقى جريئة مع الاولاد أو جريئة فى أسلوب التعامل
عكسها البنت الخجولة اللى ماتقدر تاخد حقها من شدة خجلها وده بيعرضها لمشاكل لكن حريصة فى التعامل
لكن طبعا لو الاتنين متساويين فى موضوع انهم يقدروا ياخدوا حقهم فطبعا أفضل الخجولة بس بضوابط

وبالنسبة للشباب ، لو قابلت وآحد ولاحظت انه خجول نوعاً ما
هتعتبر دي حآجة بتنقص من شخصيته وان الرآجل لازم يبقى جريء تماماً ومايهموش حآجة ..؟؟
فى صفات بيشترك فيها الرجل والمرأة
والخجل صفة مشتركة فطبعا ده مش عيب
بس معروف ان الرجل بيبقى أقل من المرأة نوعا ما
لكن عادى لا يأثر ولا شئ بس مش يوصل لدرجة البنات

- معروف ان الطفل وهو صغير الام والاب هم اللي بيتحكموا في تكوين شخصيته بشكل كبير ، انت شايف ان التربية بتأثر قد ايه في شخصية الانسان ؟ وهل كل وآحد مهما كبر بتفضل جوآه جزء من طفولته ولا الوضع بيتغير ..؟؟
الطفل عامل زى الصلصال لغاية وقت معين
فطبعا بيبقى ليهم تأثير كبير عليه
ده حتى بتوصل لدرجة إن فى ناس الأب والام يفضلوا يأثروا فيه لغاية بعد الجواز كمان وده بيعتبر إنسان ضعيف
لا بيبقى فيه جزء من الطفولة بس هو اكيد بيغير حاجات من نفسه
لان الإنسان طبيعته متمردة

ا
- التربية (الام والاب) ، المدرسة ، الاصدقاء ، الاعلام ..
رتبهم من حيث تأثيرهم على شخصية الانسآن ..

بصى هو التربية ( الأب والأم ) ده عامل أساسى وبداية التأثير
لكن الباقى بيتغير على حسب البيئة لان فى ناس مابتتعلمش فبيبقى عامل المدرسة ضايع
وفى ناس بتحب الانطواء وبترفض الصداقات فبيبقى عامل الصداقة ضايع
أما لو عايزانى أرتب فهاعملك ترتيب تخمينى

التربية (الام و الاب) - الاصدقاء - المدرسة - الإعلام


- مين قدوتك في الحيآة أو ملهمك والشخص اللي بتتمنى تكون زيه ؟ وليه الشخص دآ بالذآت ..؟؟

فى شخصيات كتير
صعب التحديد

- اكتر موقف مر في حياتك وأثر في شخصيتك ؟ واثر فيها ازاي ..؟

فى مواقف كتيرة بتأثر بأى تأثير الحزن والفرح والغضب وغيرها

- " اهتماماتنا بتعبر بشكل ما عن افكارنا وشخصياتنا " ، ايه رايك في الجملة دي ؟
وكلمنا شوية عن اهتماماتك وهواياتك ..؟؟

الجملة حلوة
لان الانسان بيهتم بافكاره وشخصيته
من هواياتى من الطفولة كانت الرسم بس الموهبة اتدفنت وبحاول ارجعها تانى ان شاء الله
وكانت العاب الكمبيوتر وكده وبرده اهتمامى بيها قل جدا
بعدها ابتديت بقراءة القصص والروايات من رومانسى لغاية رعب داخل فيها بوليسى والغاز وخيار علمى وفكاهى وكده
بس تقريبا بطلت
حاليا اهتمامى بالعلم الشرعى والتعلم عبر النت

- ايه هو تعريف الثقة بالنفس بالنسبآلك ؟ وياترى ايه هو الخط الرُفيع اللي بيفصل عن الثقة والغرور ..؟؟

بصى انا مابعرش اعرف بصراحة
بس حاولى تفهمى تعريفى من كلامى العام
الثقة بالنفس هى إن الإنسان يعمل شئ ويكون واثق انه هايتعمل صح بإذن الله من غير خوف ولا قلق
ونسبة الفشل عنده تكاد تكون معدومة
الخط الرفيع هو عدم التكلم والمباهاة والنظر للآخرين بعجزهم وعدم وصولهم لنفس الدرجة


- إيه هي الأسباب اللي ممكن تقلل من ثقة الشخص في نفسه ؟
وانت ثقتك بنفسها قد ايه ..؟؟
الناس اللى فى حياة الشخص
الشعور بالفشل
شعور الانسان نفسه بعدم ثقته فى ىنفسه
من فترة ماكنتش باثق فى نفسى
لكن مع الوقت الحمد لله بقيت اثبت لنفسى انى لازم اكون واثق فى نفسى

- كل انسان جوآه طاقة كبيرة محتاجة يوجهها في الاتجآه الصح ويستفيد منها وان كل انسان ربنا ميزه عن غيره بشيء خآص بيه ،، انت عارف كل موآهبك وقدرآتك وبتقدر تستفيد منها ولا مازالت في حاجات مجهولة بالنسبآلك ..؟؟
فى قدرات باستغلها الحمد لله وباستفيد منها
فى قدرات اكتشفتها محتاج وقت لتنفيذها
ومستنى تيسير ربنا
لكن بقى مش عارف لسه هاكتشف تانى ولالا

- بتحب تكون صدآقات مع الشخصيات القريبة من شخصيتك ؟
ولا شآيف ان دآ شيء مش مؤثر في الصدآقة ..؟؟
هو كل ما الانسان يكون قريب من شخصية صديقه بتبقى أفضل
بس مافيش انسان بيبقى مشابه لانسان بالتمام
والا اعتقد هايبقى فى خلل
فاعتقد ان ده مش مهم أوى


- المآضي ب ذكرياته وتجآربه ، بيمثل ليك ايه في حيآتك ومستقبلك ..؟؟

صفحات ملونة بالوان الحياة


- بتعتبر نفسك قيآدي وبتتحمل المسؤوليه ولا لأ ..؟؟

اه باقدر اتحمل المسئولية والحمد لله

- هل فشلت في تحقيق حلم مهم في حيآتك قبل كدآ ، وكانت ايه الاسباب ، ولو حصل استمريت في المحآولة انك تحققه ولا لأ ..؟؟

كان ليا احلام نفسى تتحقق بس ماحصلش نصيب الحمد لله
ومر عليها وقت انى احققها
وفى احلام عاجز حاليا انى احققها بس ان شاء الله انا وراها


- ايه هي العبآرة اللي بتاخدها شعار ليك في حياتك ..؟؟

إلا كرامتى


,,

هتتصرف ازاي في الموآقف دي ..
اتظلمت من حد وانت عارف انك مش هتقدر تعمل حاجة او تغير الظلم دآ ، هل هتحآول بردو تتكلم وتاخد حقك ولا هترضى بالامر الوآقع ..؟؟
هاتكلم لغاية اما احس انه خلاص مافيش فايدة
وبعدها بقى
ماعرفش هاعمل ايه
ماعتقدش انى هارضى بالامر الواقع


_انت وزميلك مثلاً عندكو فكرة معينة حابين تشرحوها لمجموعة من النآس ، غالباً مين اللي هيتكلم ويشرح ,, انت ولا هو ..؟؟


لا انا باحب اكون الاخير فى كلامى

- تعبت في تحضير بحث أيام المدرسة او الكلية ولما سلمته جآلك الرد بانه "مش كآمل ولازم تعيده " ..؟؟
الحمد لله شخصيتى صبورة
وده بيساعدنى فى اشياء كتير
فهاعمل الاعادة


_ايه هو برجك وايه هو لونك المفضل ..؟؟

مابقتنعش بالابراج

الأسود والأصفر
بس الاسود عندى اكتر


**


الفقرة الثالثة : عن المنتدى ..


ايه اللي شدك في المنتدى وخلاك تسجل فيه ؟

مافيش حاجة شدتنى ليه
وكان غرضى فى التسجيل كان غرض محدد وهو اللى خلانى أسجل فيه


ليه اخترت القسم الاسلامي بالذآت ؟ وايه سبب اختيارك لـ اسمك .؟

لانى باحب القسم ده جدا ويعتبر اهم قسم فى المنتدى
وده طبعا مايمنعش حبى لأقسام تانية

سبب اختيارى لاسمى ليه علاقة بالشات بتاع الموقع كان شعار حاطه فى اسمى ف الشات
كان الشعار ( الإسلام دين العالم ) فطبعا لو ترجمته للإنجليزية هايبقى اسم طويل فحولته لاسم مختصر إسلام فور عالم


بتؤمن بالصدآقة عبر النت ؟
يعني ممكن يكون ليك صديق ( نتي ) أقرب ليك من صديق الواقع ؟
ولا في حاجز ما بيمنع الموضوع دا ؟
صداقات النت موجودة وطبعا باقتنع بيها
وعلى فكرة فى صداقات من النت قابلتها فى الواقع والعلاقة كويسة والحمد لله
بس لو صديق ماقابلتوش طبعا بتبقى العلاقة مهزوزة شوية

مين أقرب الناس ليك هنا ؟
أحمد ماتريكس كان أقرب واحد ليا
بس فجأة رجعت تانى للصفر يمكن عشان ظروفه وربنا يعينه
بس مافيش حد تانى بعديه


أشخاص في المنتدى اتعلمت منهم ,, واتعلمت ايه ؟

مافييش



أشخـآص بيجذبوك وحابب تتعرف عليهم أكتر ؟
و ايه سبب الانجذآب ؟

بصراحة تعاملى قليل
وماتوسعتش فى المنتدى وماشفتش اشخاص كتير
حتى فى أشخاص ساعات لما يردوا على مواضيعى أفكترهم كانوا غايبين عن المنتدى بقالهم فترة طويلة
بس ان شاء الله ناوى فى مرحلة معينة أتعرف أكتر


المنتدى بيفتقد ايه ؟

إرضاء الآخرين مع المقدرة
وده فى المعظم مش الكل لان فى ناس كويسة
وأحيانا عدم الاهتمام
فى حاجات تانية
بس بقيت ماهتمش بيها



ممكن في يوم تفكر تغادر المنتدى بلا عودة ؟
انا فكرت وكنت خلاص هاعملها
بس رجعت تانى
بس ممكن تحصل الله أعلم


**

و أخيراً ، بشكرك جداً على وجودك معانا
أتمنى تكون استمتعت ..

انا اللى باشكرك على الاستضافة
وإن شاء الله أكون ضيف خفيف
بالتوفيق


**

ب كدا تكون خلصت حلقتنا الأسبوع دا
اتمنى تكون نالت على إعجابكم
..،
في انتظار ردودكم وارآءكم
بالتوفيـق ..