[jasmean]

ازيكم ياعرايس

محتاره .... حيرانه

مش عارفه هتجيبي ايه فالجهاز

او جبتي بس مش عارفه ناقصك حاجه او لا ؟

تعالي معايا وشوفي

.

.

.

.

.

.

انا فكرت و قررت اساعد العرايس الحلوين

واقولكم كل حاجه بتتجاب فالجهاز بتاع العروسه

يعني كام طقم كذا و كام طقم كذا وهكذا

وهبدا بالمفروشات وملابس العروسه

ولو شجعتوني هكملكم ان شاء الله

بس دعواتكم بقى

وطبعا كل واحده حسب ميزانيتها وحسب سلو بلدهم ايه

بالنسبه للاعداد فانا كاتبه تقريبا المتوسط

يلا نقول بسم الله

اولا المفروشات و الفوط :

6-10 طقم ملايه كبيره
4-6 طقم ملايه صغيره لو عندك غرفة نوم اطفال
2 كوفرته كبيره
1طقم كوفرته صغيره
1-2 بطانيه ماتجبيش دابل عشان بتبقى تقيله جدا وبتكبس على النفس
2-3 بطانيه خفيفه اللي شبه الملايه دي عشان تفرشيها على السرير فالشتا بتدفي جدا
1-2 لحاف فيبر كبير
1 طقم لحاف فيبر
2-3 مفرش سرير كبير
1طقم مفرش سرير صغير
24 فوطه
2 بشكير
2 برنس حمام
مفارش للدولاب
مفرش لطربيزة المطبخ لوعندك
طقم مفارش 5قطع لغرفة النوم
مفارش للنيش
2مفرش سفره
مفرش للصالون
وممكن تحتاجي مفارش تانيه حسب العفش عندك


ثانيا الملابس :

تنويع الالوان و الخامات و الموديلات حاجه مهمه جدا جدا

الصيفي:

هقولك الانواع وانت شوفي العدد اللي انت عايزاه
جيبه قصيره
هوت شورت
بديهات
بنطلون استرتش
بنطلون جينز اسكني
3-5 قمصان قطن قصيره اللي هى زي الجلاليب بس بتبقى قصيره وحملات كده عشان وانت بتنضفي مثلا
2-4 بيجامات عاديه قطن او ساتان عشان تستري نفسك اما يكون عند ال*** بدل ما الراجل يتعب نفسيا
1-2 روب ساتان بكم عشان لو حد طب عليكم وانت لابسه حاجه عوريااانه تلحقي تستري نفسك هههههههههه

الشتوي:

2-4 بيجاما وبلاش تجيبي جلاليب عشان ماتبقيش شبه ام ستوته هههههه
1-2 روب شتوي
بديهات شتوي
2-3 كولون تلبسيه تحت الهوت شورت او الجيبه القصيره بيبقى تحفه بجد وبيدفي
2-4 شراب صوف او بوكليت
2 لكلوك شتوي هاتي حاجه شكلها لذيذ قطه مثلا دبدوب كده بلاش العادي من باب الدلع يعني J

لانجري و داخلي:

6 طقم داخلي اندروير و والبرا دول دلع كده فاليت مش بتوع الخروج
6-12 اندر وير عادي قطن او دانتيل اللي بيريحك
4-6 برا قطن او دانتيل او ساتان زي ماتحبي بس حاجه ماسكه نفسها كده عشان يكون شكلك حلو وانت خارجه
4 قميص نوم طويل
4-6 بيبي دول
4-6 قميص نوم قصير

الخروج:

هاتي طبعا كذا طقم بس ديما اختاري الحاجه الشيك وتبقى الوان متناسقه و هاتي موديلات مختلفه
وتجيبي كذا لون وطبعا الطقم يتجاب كااااااااااااااااامل عشان ماتحتاسيش اما تيجي تلبسي وتلاقي حاجه ناقصه
يعني الطقم يبقى البلوزه بالبنطلون او الجيبه والطرحه ولو محتاج بدي والشوز والشنطه
عشان تبقي شيك كده وجوزك يفرح بيكي
ولو متجوزه فالشتا هاتي شتوي بس ولو فالصيف هاتي صيفي بس
لانك ماتعرفيش ممكن جسمك يتغير ممكن ربنا يرزقك بحمل فيبقى جبتي الحاجه واتركنت وخلاص
فانت اتفقي مع مامتك انكم تجيبو لبس الفصل اللي انت فيه واما يجي الشتا او الصيف تنزل تجيبلك باقي اللبس بتاعك

يتبع

يتبع