[شقاوة احاسيس]

نص حــــالة

بحس دايماً ان كل اللي حواليا عايشين نص حالة

نص فرحة , نص ضحكة , نص إبتسامة


في عنيهم نظرة عدم رضا بس ماعرفش عدم رضا عن مين

نفسهم
ولا اللي حواليهم
ولا افعالهم اللي بيسموها الظروف


نص الحالة دا دايماً مع الحاجات الحلوة
انما الحاجات اللي بتزعل بتاخد حقها اوووي معانا


على طول زعلان اووووي
و مكتئب اووووي
و زهقاان اووي


انما الفرحة بنقسمها
زي ما نكون مش ضامنين تيجي تاني
فـ بنخبي نصها لوقت تاني

مش بندي لنفسنا فرصة نفرّح قلبنا للآخر


لو حاجة ضحكتنا من قلبنا نخاف و نقول خير اللهم اجعله خير


ولو الضخكة غلبتنا و أخدت حقها مننا لازم نختمها بدمعة
و نقول دمعت من كتر الضحك


..





عندي اقتناع تام
اننا عايشين نص عيشة

و دا عشان فعلاً مش بنعمل اللي المفروض يتعمل

ماهو ربنا خلق كل واحد فينا عشان هدف يحققه طول حياته
و حاجة يوصلها و يفيد بها نفسه والناس

و بما اننا عايشين اليوم بيومه و مش بنحدد هدفنا صح
ولا في دماغنا حاجة نوصلها
فـ عشان كدا عايشين و مش راضيين

هاتحس بالرضا عن نفسك
لما ترجع شريط يومك و تفتكر اللي عملته
وتلاقيك حققت جزء من حاجة المفروض ان ربنا خلقك أصلا عشان تنفذها كاملة
!!

و طبيعي هاتصحى تاني يوم تكمل باقي هدفك
بنفس راضية
نفس عايزة تعيش عيشة كاملة
و ماترضاش بنص عيشة
..

ماتسيبش قلبكـ يرضى ويتعوّد على نص حالة