[الحان الورد]

**



بسم الله الرحمن الرحيم
,,

الحلقة الأولى من الموسم الثآني
ومعانا ضيف مميز
إدآري خدوم ومتعاون وليه شخصيته المميزة
معآنا ومعآكم

Silver Spectra

أهلاً بيك يا طارق معانا
ونبدأ على طول بقى
,,













الفقرة الأولى
,,

اسمك الحقيقي
طارق محمد عباس
وسبب إختيـآرك لـ اسمك المستعار
الفيزياء الضوئية أول ما دخلت الكلية الاسم سبيكترا علق معايا و كنت بسجل و لسه قارئ الكلمة , و من ساعتها و كل منتدى اسجل باسم سبيكترا , أما سيلفر فاسم عاجبني مع لونه

عمرك
داخل على 24 أهو كمان شهر
عجزت :biggrin:

تنتقد في نفسك
خلقي ضيق
جربت أوسع الأستك وكرهت لسعت الأستك وخفت أن يتقطع
في طفولتك أحببت أن تكون
سواق شاحنات أو باصات او طيار
وعندما كبرت وجدت أن
العملية مملة باستثناء الطيار عشان بيتظبط
لا تحب أن يرآك الآخرون وأنت ضرسي وارم ونقطة ضعفك طيبتي
رؤيتك للحيآة انها لا تستحق التعاسة وأصعب مافيها لقمة عيشها
ماضيك سكر و حاضرك عادي ومستقبلك أملك
واجمل مرحلة في حياتك هي طفولتي أكيد
لا تغلق أبداً نافذة الـتسامح في حياتك ، لأنك قد تحتاج إليها















الفقرة الثانية
,,


أسئلة عامة

- " الحياة مليئة بالمحن والابتلآءات ، بتتفآوت درجة المحن زي مابتتفاوت ردة فعلنا وصبرنا ع المحن دي "
انت بتواجه إزاي المحن دي .. وبتحب تعتمد على نفسك ولا ممكن تعتمد على حد قريب منك ؟

نادر لما بعتمد على غيري
مابحبش اطلب من حد حاجه حتى لو كانت بسيطة عشان مش ابقى تقيل على حد
أي مشكلة تقدر تواجها بنفسك و تقدر تدور على حلولها بنفسك من غير ما تستشير حد , لكن احيانا مش بيكون عندك خبرة كافية في امر معين فيه اشكال فبتلجأ للإستشارة


_ - دآيماً بنتكلم عن الايجابية وازاي نكون مؤثرين وفعالين في المجتمع اللي عآيشين فيه ،، أيه هو تعريف الايجابية من وجهة نظرك ؟ وتفكيرك -غالباً- بيبقى مهتم بالايجابيات ولا السلبيات ..؟؟

الإيجابية هو انك تدي للمجتمع حتى لو بمقابل المهم ان يكون ليك اثر فيه
و مش بس كدا , الايجابية كمان هو فن التعامل مع الغير
يعني لو اي شخص بقى سلبي هيشكك في كل الي حواليه و مش هيلتمس العذر و لا هيحط احتمالات لغيره و بالتالي هيبقى سلبي و هيخلي الي حواليه سلبيين


_ إيه هو دافعك في الحياة .. يعني الشيء اللي بيخليك تعمل وتذاكر وتجتهد ..
وإمتى بتحس انك محبط ؟

انك عايز تعتمد على نفسك بشكل مستقل
و ماحدش يصرف عليك مليم
الرزق دايما هو اصعب شيء في الحياة , لو قدرت توفره بشكل كويس هتكون الحياة بدرجة كبيرة مستقرة


_ أبرز عيوب شخصيتك ؟
وبتحاول تعالجها ولا مؤمن ان كل شخصية ليها عيوب ؟

طبعا كل شخصية فيها عيوب
تقدري تقولي الاجتماعية و الجو الاسري و الحاجات دي ماليش فيها
ممكن عشان خلقي ضيق :biggrin:


_ بتهتم بـ علم النفس وتطوير الذات ؟
ليـه ؟
نوعا ما
لأن الإنسان حياته عبارة عن مجموعة من السلوكيات
تنظيمها بيولد ايجابيات في المجتمع بدرجة معينة


_ " الإنسان عدو مايجهل " ,, إيه رأيك في المقولة دي ؟
وليه غالبية الناس بتبقى ضد التغيير ؟
وانت شخصياً موقفك ايه منه .. بتحب تغير ولا بتفضل الروتين ؟

بحب التغيير
الإنسان عدو ما يجهل , سلوك غريزي الهدف منه هو انه يحافظ على مكتسباته الحالية
لو على سبيل المثال شوفنا الحيوانات هنلاقي كل سلوكياتها روتينية و ما بتحبش تعمل اي شيء مختلف و هو كنوع من الحرص الي ممكن يحفظها من الخطر و الانقراض
نفس الغريزة دي عند الإنسان


_ بتبص غالباً لـ نص الكوباية الفاضي ولا المليان ؟
وبتعتبر نفسك متفائل قد ايه ؟

أي انسان طبيعي بيبص عالفاضي و يندم و يقول يااه لو كانت مليانه كمان شوية
بس عامة أنا مش بحب الولولة
و بالتالي فأعتقد اني متفاؤل بدرجة كويسة


_ بتفضل تكون خيالي وطموح ولا بتفضل الواقعية ؟
وليه أحياناً الواقعية بتبقى ضد الطموح ؟

عشان الخيال مالوش حدود
أنا ممكن أتخيل اني بجناحات و بطير , ممكن اتخيل أي حاجه

شخصيا خيالي واسع بس بحب الواقعية بالذات في السياسة و السلوكيات الاجتماعية و غيره
يعني بحب الخيال الواقعي ( بالف بيه القصص )


_ اول انطباع بيتآخد عن شخصيتك ايه ؟
وغالبا بيبقى صحيح ولا لأ ؟

دا يرجع للناس بس اعتقد في بياخد انطباع غلط كتير
حتى بعد ما تندمج معاه يقولك يا راجل ما انت طلعت كويس اهو او كنت مفكرك كذا


_ هل اختلف انطباع الناس عنك في النت عن أرض الواقع ؟
وايه السبب ؟

أكيد طبعا يختلف
الواقع صوت و صورة , النت كتابة بس
أنا ممكن اكلم واحد كتابة و انا عادي و يفهم اني معصب عليه و بكسر الكيبورد على دماغه ,,في حين لو كلمته صوت بتلاقي الوضع عادي و بيتقبل كلامك , فما بالك كمان لو بصورة


_ بتعبر ازاي عن
فرحك ..
غضبك ..
ممكن مش بيبان بيبقى جوايا
لكن بحس اني سعيد من جوا و بتبقى جوايا طاقة كبيرة اني اعمل حاجات كتير في اليوم دا
دا طبعا في الفرح
الغضب ممكن يبان من النرفزه


_ ايه المواقف اللي ممكن تخليك تلجـأ للسكوت ؟
هتجادل واحد عالفاضي و هو مش بيحاول يفكر في اي كلام بتقوله
بسكت و بطنش , ممكن اقول كلمه او جمله لكن بنفضله

_

- مجتمعنا دآيماً او غالباً بيميل للمجآملات ، وقليل اللي بيتقبل الرأي الآخر والنقد بدون حسآسية ، انت شايف امتى هنقدر نآخد النقد والصرآحة ببسآطة ؟ وانت نفسك بتميل للمجاملات أحياناً ولا بتقول رأيك ومابيهمكش ؟

انتي عارفه ان المجاملات دي عامله مرض عكسي !
يعني في واحد عشان يثبت انه مش بيجامل , بيدخل شمال في كل الخلق
و لما تقوله ما ينفعش كدا يقولك هو انت عايزني اجامل!
هو انت يا تجامل يا تدي الناس على نفوخهم!

المشكلة دي لها علاقة بالثقافة عندنا
و عامة في اي مجتمع بتلاقي مجاملات بس احنا طبعا لا نقارن باي مجتمعات اخرى لاسباب لها علاقة بان احنا بنتكلم كتير اوي


_ الخجل والحياء سمات فطرية في البنت .. إمتى الخجل دا بيتحول لـ خجل اجتماعي مذموم ؟

ساعات البنت بتافور موضوع الخجل دا
و بياثر على شخصيتها
الخجل المفروض مش معناه ان البنت تسيب حقها او تتنازل عنه

وبالنسبـة لـ خجل الشباب .. أيه موقفك منه ؟
ممكن تعتبره نقص في شخصية الرجل ؟

الخجل حلو على فكرة
الرسول كان عنده نوع من الخجل
اصل عكس الخجل هو انك تبقى بجح
و تلاقي الواد مصدق نفسه أوي ,,معرفش ان كان دا بيعجب بعض البنات بس شخصيا مش بحب الشخص الي ماعندوش خجل نهائي , لان الخجل بيوزن الجرأة شوية


_
- معروف ان الطفل وهو صغير الام والاب هم اللي بيتحكموا في تكوين شخصيته بشكل كبير ، انت شايف ان التربية بتأثر قد ايه في شخصية الانسان ؟ وهل كل وآحد مهما كبر بتفضل جوآه جزء من طفولته ..؟؟

آه بتفضل جواه في تصرفات هو ممكن مش بياخد باله منها
ممكن بعضها بيتغير مع الوقت لكن استحاله كل مكتسباته تروح
عارفه انتي لو رميتي طفل مولود في العشوائيات هنا و حطيتيه في اليابان اول ما يتولد
مش بعيد يكبر و تلاقيه شغال في شركة سوني


_ ,,


- التربية (الام والاب) ، المدرسة ، الاصدقاء ، الاعلام ..
رتبهم من حيث تأثيرهم على شخصية الانسآن ..
الام و الاب - الاصدقاء - المدرسة - الاعلام

_
- مين قدوتك في الحيآة أو ملهمك والشخص اللي بتتمنى تكون شبهه ؟ وليه الشخص دآ بالذآت ..؟؟

اي انسان راضي بحياته و مش بيعمل مشاكل
الشخص دا بيعيش مرتاح البال


_
- اكتر موقف مر في حياتك وأثر في شخصيتك ؟ واثر فيها ازاي ..؟
مش مستحضرني موقف معين


_
- " اهتماماتنا بتعبر بشكل ما عن افكارنا وشخصياتنا " ، ايه رايك في الجملة دي ؟
وكلمنا شوية عن اهتماماتك وهواياتك ..؟؟

سليمه ميه في الميه
شخصيا بحب الفلك و تاريخ الحروب و المشاريع الهندسية
و الهواية هي صيد الأفاعي :biggrin:



- ايه هو تعريف الثقة بالنفس بالنسبآلك ؟ وياترى ايه هو الخط الرُفيع اللي بيفصل عن الثقة والغرور ..؟؟

الغرور بيبان
في ناس بتخلط بين الاتنين ,,الغرور يعني واحد بيتمرد على غيره برايه او موقفه
اما الثقة في النفس مش بتخليك تتعنتظ و تتريق على غيرك
مجرد انك متمسك و مقتنع برايك مش اكتر



_ إيه هي الأسباب اللي ممكن تقلل من ثقة الانسان بنفسه ؟
وانت واثق من نفسك بنسبة قد ايه ؟

عوامل اجتماعية
يعني الاهل بيقارنوا بينه و بين غيره كتير و كل حاجه يقولوله شوف فلان عمل و انت ما عملتش شوف علان سوا و انت مش سويت
دا بدرجة ما بياثر في نفسه بالسلب سواء بشكل مباشر او غير مباشر


_
- كل ان كل انسان جوآه طاقة كبيرة محتاجة يوجهها في الاتجآه الصح ويستفيد منها وكل انسان ربنا ميزه عن غيره بشيء خآص بيه ،، انت عارف كل موآهبك وقدرآتك وبتقدر تستفيد منها ولا حاسس انك لسه ممكن تكتشف نفسك أكتر ؟

حاسس ان ممكن اكتشف اكتر
لو عرفت كل امكانياتي هيجيلي اكتئاب و هحس اني خلصت لعبة الحياة بس مش بتاعت رزان


_ بتحب تكون صداقة مع شخصيات قريبة من شخصيتك ؟
ولا شايف دا شيء مش مؤثر في الصداقة ؟

ايوه طبعا ,الشخص الي قريب من فكرك لما بتيجي تكلمه في امور سياسية مثلا بتحس انه بيطلع اراء من تحت تراب دماغك


_ ماضيك .. بيمثل ليك ايه في حاضرك ومستقبلك ؟
خبرتي في الحياة


_ بتعتبر نفسك قيادي وبتتحمل المسؤولية ؟

دا الي بتمناه ان شاء الله
عشان اعرف افتح بيت :biggrin:
و عامة انا متعود اعتمد على نفسي في اغلب الامور باستثناء الفلوس و الطبخ الي هما اهم حاجه اصلا:762:
لكن مثلا دخلك خفاش البيت بتتصرف او دخلك صرصار )


_ هل فشلت في تحقيق حلم مهم في حياتك قبل كدا ؟
والفشل دا أحبطك ولا استمريت في المحاولة ؟

اعتقد الكلام دلوقتي هيكون سابق لأوانه في سني دلوقتي
ممكن مثلا كنت عايز اتعلم ثري دي من 5 سنين و فشلت عشان جهازي كانت امكانياته تعبانه :762:


_ كليتك , داخلها عن اقتناع ؟
ولو لأ .. ايه اللي خلاك تدخل حاجة انت مش حاببها ؟
وكنت حابب ايه ؟

بصي عشان اقول انا بحب ايه لازم اجرب كل كليه و دي استحالة تحصل
زي انك تاخد من كل صنف حته
لكن مش منطقي تحكم على الاصناف من غير ما تدوق اصناف كتير

اعتقد ان ميولي عشان سياسية شوية فتمشي مع الحقوق و السياسة و الاقتصاد
لكن العملية اعتقد مش فارقه كتير
لان مثلا في اسنان في مواد بتبقى حاببها و في مواد بتكون كارها و دا موجود في كل الكليات


_ بنسمع حكم وامثال كتير .. بس في حاجات معينة بتثبت معانا ..
اما لانها لمست حاجة جوانا .. او اننا اقتعنا بيها جداً ..
إيه هي أهم المقولات أثرت فيك ؟

ان اكرمت الكريم ملكته , و ان اكرمت اللئيم تمردا
دي بنطبق على المنتدى بنسبة 100% بحكم خبرتي :biggrin:


_ هتتصرف ازاي :

اتظلمت من حد معين .. هتتصرف ازاي مع الظلم دا ؟

هحاول أوصل للطرف الي ظلمني انه ظالم حتى لو بين ادامي انه صح
المهم اني اقدر اهز ضميره عشان يضايقه في المنام :biggrin:
و على فكرة العملية دي نفعت كتير معايا ايام المدرسه
مره مع مدرس دين و التانيه مع مدرس كيميا
و كنت بكلمه و كدا و يعاند و يقولي هي كدا
بس تاني يوم بلاقيه جاي يقولي هعدلهالك , بعرف اني هزيت ضميره و هو نايم )
بتاع الدين كان منقصني درجتين عشان و انا بكتب النقطة كتبت جملة و في اخرها الله و رسوله , ال ايه عايزني اقوله محمد صلى الله عليه و سلم
و نقصني عليها درجتين من عشره
لما هزيت ضميره صححهالي تاني يوم, يوم الشهادة لاقيته منقصهوملي في الشفوي هههههههه

انت وزميلك عندكو فكرة معينة حابين تشرحوها للناس .. مين غالباً اللي هيقوم بشرحها .. انت ولاهو ؟

انا غير بارع في الشرح
اعتقد هرمي عليه و هتابع معاه


_ علاقتك بـ الناس .. ايه اهم قواعدها .. وعندك خطوط حمراء في التعامل ولا
منفتح من الجميع ؟

الاحترام , اعتقد اني منفتح بدرجة ما لكن اكيد في خطوط حمراء تهمني بما اننا مجتمع شرقي فمهما كانت افكاري فلازم بتتاثر بالمجتمع



_ رؤيتك لـ الصداقة .. وحياتك بيوجد فيها شخص تقدر تقول عليه انه صديق فعلاً ؟

اه في
الشخص الي تلاقيه جنبك في كل احوالك دا بيكون صديق حقيقي















الفقرة الثالثة
,,



أسئلة ليها علاقة بـ المنتدى

السبب اللي خلاك تسجل في المنتدى ؟
كان بالحظ بسبب ان منتدى كنت عليه و قفل و حتى قبل ما يقفل كان ممل و مافيش فيه ناس
لانه كان بتاع واحد صاحبي
خلاني ادور كتير عالنت على منتديات كويسه
فصادفني المنتدى دا و ماكنتش اعرف اني هكمل فيه 4 سنين

وندمت في يوم انك سجلت .. او فكرت تمشي ؟
عمري ما هندم
فكرت فعلا اني امشي بعد ما سجلت بشهر
بس رسالة التعيين الاشرافي غيرت فكري و دخلتني في عالم تاني


بتؤمن بالصداقة النتية ؟
ومين أقرب حد ليك هنا ؟
يعني مش بتبقى صداقة قوية زي الواقع
بس اهي شغاله , انا مش لازم الي يصاحبني يعد جنبي و احكيله مشاكلي و هو يحكيلي و كدا
المهم الاحترام ,

هتصدقي لو قوتلك حاليا مافيش حد قريب مني :biggrin:
بالرغم ان في ناس كتير بحب اتكلم معاها بس اقرب اقرب ما اقدرش اقول فلان
هو كان في حد بس راح لحاله بقى

استفدت ايه من المنتدى ؟
ومن الناس اللي فيه .. مين أبرز الشخصيات اللي استفدت منها ( قديماً وحديثاً ) ؟
واستفدت ايه ؟
انك تكتب و تعبر عن نفسك
كان طول عمري بتفرج كدا و بقول ايه الناس الجامده دي , بتكتب بقى و بتاع
و كمان طلعت مواهب ليه زي المسابقات و كدا


عيوب المنتدى ايه ؟
وشايفـه اتغير عن زمـان ؟
عيوب تفاعلية و دا لاسباب عدة اهمها انتشار الفيس بوك
زمان معدل التسجيل كان اعلى
لكن الحمد لله في اعضاء كتير برضو مميزين هنا


هل اتهمك حد قبل كدا في المنتدى بشيء ضايقك ؟
أو حسيت انك مفهوم غلط ؟
كتييييييير
اللون الاحمر دا بلاء بعيد عنك :biggrin:
العين بتبقى عليك و كل واحد بينجم بمزاجه
و ممكن اقل حاجه حد غيرك يفهمها بشكل مختلف و يالف عليها افلام هندية


كلمـة أخير توجههـا لـ كل الأعضـاء ؟
أتمنالهم التوفيق دائما في حياتهم
و اتمنى ان المنتدى مايبقاش سبب نكد حد , لكن يبقى شيء لترويح النفس و التسلية و تبادل الافكار

وبس كدآ ,
إن شآء الله تكون الحلقة عجبتكم
قولوا رأيكم بقى ولو حد عايز يقول تحليله لـ شخصية طارق يتفضل
في انتظآركم ,,
بالسلآمة
^_^