عرض مشاركة واحدة
قديم منذ /08-12-2012, 09:32 PM   #1

morshooo

 

 رقم العضوية : 13962
 تاريخ التسجيل : Feb 2009
 الجنس : ~ ولد
 المكان : مصر
 المشاركات : 18,586
 الحكمة المفضلة : سأل الممكن المستحيل : أين تقيم ؟ فأجابه في أحلام العاجز
 النقاط : morshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond reputemorshooo has a reputation beyond repute
 درجة التقييم : 2965845
 قوة التقييم : 1483

morshooo غير متواجد حالياً

 

 

 

أوسمة العضو

مسابقه الخزعبلات 153 التميز الاشرافى وسام التحكيم فىForumsGotTalent وسام المشرف المميز تكريم أدارى تكريم فى قسم النقاش وسام المشرف المميز صقر الاستبيان (المشرف) اكثر المشرفين ابداعا 

افتراضي الحلقة الاولى من ( رمضان يجمعنا 2 ) معانا ( SiLver Spectra )

بسم الله الرحمن الرحيم

اهلا ومرحبا بكم

والحلقة الاولى

من

( رمضان يجمعنا )


البرنامج كان من رمضان الــ فات

ونزل منة كام حلقة فى بداية رمضان 2011

والحمد لله كان عاجب الاعضاء والسنادى هنزل منة 3 حلقات فقط

الــ حابب يشوف حلقات رمضان 2011 يدخل


البرنامج باختصار هيكون استضافه خفيفة عبارة عن كام سؤال صغيرين


وفى اخر البرنامج هنشوف ضيفنا هيقدملنا اية

ممكن يقدم .

( قصيدة - صورة - اعتزار - رساله - دعاء .... الخ )

المهم اننا ان شاء الله هنكون ضيوف خفاف عليكم انا وضيوفى .

ودلوقتى تعالو نشوف ضيفنا الغالى

SiLver Spectra
المدير العام




س / فى البداية كل سنة وانتا طيب ورمضان كريم ؟

و انت طيب


س / اخبار الصيام اية معاك فى الجو الجامد دا :biggrin: ؟

رمضان بيتي , طول النهار مش بخرج برا البيت غير لمشاوير صغيره
و مافيش غير 8 ساعات الفطار الي بتاكل و يتريح فيهم و بتصلي فيهم و بتعمل فيهم كل حاجه

س / تقريبا كدا رمضان دى تقريبا تانى مرة يجى فى الصيف ؟ اية اخبار رمضان معاك فى الصيف وفعلا السنادى الصيام صعب جدا ؟

دي مش تاني سنة و لا حاجه
على فكرة رمضان الي كان بيجي في اول الدراسة كان اصعب ,
انا اصعب رمضان عدا عليه هو بتاع سنة 2006 و 2007
كان كلو في بداية الدراسة و الواحد كان بيمشي في عز الحر من الصبح للظهر و يرجع كل يوم ميت من العطش
و دا ماكنتش بحسه قبل ما اجي مصر بالرغم من ان في ****************** الدنيا أحر , بس كان الفصل مكيف و الباص مكيف مافيش غير الطابور ربع ساعة بتقفهم في الشمس تدفى

عشان رمضان يعدي من الحر فيها 8 سنين ادام عشان يجي كلو في شهر خمسه و هيعتبر جو كويس بس مش اوي برضو
بعد 9 سنين هيجي في اربعه هيبقى فله

س / عايزين نعرف طارق استقبل رمضان 2012 ازاى ؟

و لا حاجه , زي كل سنة
جبت فانوس و قاعدت الف بيه في الشارع و اقول : حالو يا حالو كل سنة و انتم طيبين مااااء :762:

س / اية الاختلاف الــ حصل لطارق من وهو طفل لحد دلوقتى فى استقبالك لشهر رمضان ؟

انا اول رمضان اصومه و اوعى عليه كويس اوي كان رمضان جه في اجازة نص السنة كلها
و كانوا ادونا شهر رمضان كلو اجازه لحاد العيد , افتكر قبل كدا كان بيجي في الترم التاني بس كنت صغير , تانيه ابتدائي باين

بعد كدا بقى بيجي نصه في امتحانات الترم الاول , و كان رخم كدا ترجع من الامتحان تنام و تصحى عالفطار ميت و مكتئب جدا مطلوب منك تذاكر عشان امتحان بكرا ,

و طبعا كان بيجي كلو في الشتا
فكان راسخ في ذهني فكرة ان رمضان يجي في عز البرد , و كان الواحد لما يروح المسجد بيلاقي الصحرا كلها بيحرات مايه من المطر و كنا بننزل نعوم فيها و نروح البيت ناكل علقه هههههههه

س / اية الحاجا الــ بتحرص عليها دائما فى رمضان ؟

الخشاف :biggrin:
و اهم حاجه يكون فيه البلح و الموز و التفاح

س / عايزينك بقى تحكيلنا عن طفولتك فى رمضان ؟ واية المواقف الــ حصلتلك فى رمضان وانتا طفل ؟

بص يا سيدي , رمضان كان بيجي ايام الدراسه في الترم الاول في اخره أو نصه
كنت بستغل رمضان دا اني انزل مع صحابي بحجة اني رايح اصلي , لانهم بعيد عنك كانوا بيحرموني من النزول للشارع طول الاسبوع باستثناء الاربع و الخميس عشان الاجازة بس
بيجي رمضان و بتبقى كل يوم تشوف صحابك و ال يعني بقى رايحين نصلي
كنا بنروح نصلي و كل حاجه بس بندلع
نعد نتكلم في المسجد و حد يزعقلنا , و ساعات كنا نستهبل و نضرب رجول بعض في الصلى , و ساعات كنا نطرد من المسجد :biggrin:
و ساعات نهرب بقى من اخر كام ركعة عشان نلحق نلعب شوية , بس كان بيبقى في خوف و تربص حد يشوفنا , مع اني مش عارف كان ايه الاجبار في انك لازم تصلي التراويح كلها
و نروح نلعب ساعتين و أرجع البيت الاقي اخويا يقولي انت لسه جاي دلوقتي !
اقوله ياعم كنا بنصلي ,,يقولي الصلى خلصت من ساعتين , مش عارف اخويا كان عامل فيها مراتي باين هههههههه


س / بداية صيام طارق فى شهر رمضان كان وانتا كام سنة ؟

8 و فاكر كنت صمت نصه كدا
و 9 صمته كله لأول مره
و لو كان بيجي في الصيف و انا صغير اعتقد ماكنتش هصومه كلو غير على 12 سنة :biggrin:

س / اخبار فانوس رمضان اية معاك ؟

عمري ما جبته , اعمل بيه ايه ياعم
انا و انا صغير كنت بحب اجيب عساكر و لا عربيات العب بيهم , الفانوس اعمل بيه ايه ! كان بالنسبالي حاجه عبيطه :biggrin:

س / المسحراتى طبعا دا من رموز الشهر الكريم اية حكاية المسحراتى مع طارق ؟ وكان بيقول اسمك والا لا :biggrin: ؟

مافيش مسحراتية في ******************
و هنا في مصر انا ساكن في حته نائية شوية فمش بيعدي علينا مسحراتية
و بعدين التلفزيون صوته اد كدا طول اليوم و اعلان 12 قرش وقع على سمير , مسحراتي مين بقى :762:

س / كل سنة بنلاقى افراد الاسرة شايلين هم سلع رمضان بسبب الغلاء ؟ حسيت بتغير السنادى فى حكاية غلاء الاسعار والا كالعادة ؟

مش فارقه لاني مش غاوي ياميش رمضان , قمر الدين حتى بحب اكله حاف لكن العصير بتاعه تقيل و بيجزع

س / طبعا شهر رمضان بيبقى فية عزومات كتير سواء فى البيت عندكم او خارج البيت ؟ اية اخبار العزومات السنادى معاك ؟

و الله من ساعت ما جوز عمتي و عمي اتوفوا و بنات في العيلة اتجوزوا و سافروا واللمات الكبيره دي قلت مش زي زمان
و بعيد عنك عيلتي صغيره اصلا
عمتين و عم و تلت خالات بس
منهم تلاته مش مخلفين و العم متوفي

س / بتنام بعد الفطار على طول :762: من كتر الاكل والا مش بتنام ؟

اليومين الي فاتوا نمت و يومي اتقلب
بس عدلته بسرعة ,,لاقيتني طول ما انا صاحي صايم

س / بتقضى يومك ازاى فى رمضان ؟

طول النهار في البيت , و يوم ما بعمل مشوار زي اول امبارح كدا و رحت المنصورة و كنت شايل هم المشوار
و عارف اني هموت من العطش , و حظي كمان الطريق اتقفل نص ساعة عشان بيكسروا في الشارع و الشمس ضاربه فيك و مافيش نسمة هوا حاجه فل

قبل الادان ممكن تقرا شوية
تفطر و ممكن تصلي بعدها القيام
و شوية و تلاقي معاد السحور جه
بس ياسيدي
ساعات بخرج بعد الفجر ساعتين كدا و ارجع على خمسه سته الصبح

س / اخبار المسلسلات اية معاك السنادى رغم وجود يجى 14587 مسلسل:biggrin: ؟

السنادي المسلسلات كتيره بشكل غير مسبوق
لان كل بتوع السينما قلبوا على الدراما الي مكسبها مضمون
بص , انا في اول كام يوم حاولت اتابع شوية عشان اخد فكرة عامة
ناجي عطا الله , مسلسل ممل بغباء ,, المفروض انه مكتوب على انه فيلم اصلا بس هما راحوا مطينه و مخليينه تلتين حلقة
ام الملل, خسارة فيه ال70 مليون الي عادل امام لواحده واخد 30 مليون فيه
غير ان قصته سازجه و بحس اني طفل عندي 7 سنين و كل شوية يقولك ادينا الاسرائيليين على افاهم :biggrin:

خطوط حمراء بتاع السقا , مع ان فكرته تقليدية شوية و تلائيك بتتوقع الي بيحصل بس اهو ماشي حاله و بقالي كام حلقة مش بتابع من ساعت ما البت مراته قتلوها :762:

الهروب بتاع كريم عبد العزيز شوفت منه حلقتين
و بس يا سيدي
ممكن نجبلك الست الحاجه تحكيلك المسلسلات كلها :biggrin:

اه و بعيش جو المراهقة شوية مع رامز ثعلب الصحراء


س / انتا مع كثرة المسلسلات والاعمال الدرامية فى رمضان ؟

دا سوق , عرض و طلب
فترة رمضان الناس بتعد في بيتها هروبا من الحر بصفة عامة و من تعب الصيام و بعد الفطار الأكل بيتقلهم و بيعدوا برضو
المحطات بتستغل دا و بقى معروف ان دا الموسم التلفزيوني , فبتنتج المسلسلات و بتعرضها و بتحقق ارباح من كثرة الاعلانات لان الشركات كمان بتعتبره الموسم الدعائي المفضل
فلما يقولك ان المسلسلات مكلفه مليار و ميه وخمسين مليون جنيه فدي فلوس بتدفعها الشركات المعلنة و بتدفع زيادة عنها كمان باضعاف و بتحقق ارباح من المستلهكين

س / اية رئيك فى برامج المقالب السنادى شايف انها طبيعية والا الموضوع مختلف السنادى ؟

الحكم بعد المزاولة و في رامز دول الي بشوفهم الباقي فكسان
بتاع رامز واقعي و يتصدق , بس هزار تقيل بصراحة , و بعدين رامز طول ماهو بيتكلم بيضحك فبحس انه مراهق اوي مع ان سنه 39 سنه و داخل على اربعين و دماغه تحسها تجيب 15 سنة :biggrin:

التاني بتاع اسرائيل دا , عاجبني الواد ابو نضارة الصارم الي عامل انه اسرائيلي : انت مش هتخرج من هنا و لازم تكمل الحلقة :762:

س / قبل ما انهى الحلقة تحب تقول اية لاعضاء بنات مصر ؟

نقولهم كل سنة و انتم طيبين و رمضان كريم عليكم
و هتسمعوا كل سنة و انتم طيبين دي من هنا لغاية العيد الكبير
كل سنة و انت طيب يا باشا و تطلع الي في جيبك نص جنيه , جنيه ,,

س / اية رئيك فى التوبيك وقدرت تقول او تفتكر حاجا مكنتش فى بالك وافتكرتها ؟

ايوه انت اسلوبك بيخلي الواحد ينسى نفسه

س / اخيرا مطلوب منك تقدم حاجا لاعضاء المنتدى ؟ ياترى هتقدم اية ؟

بلح الشام
مش في دماغي حاجه و الله
بس الي نفسي اقوله هو ان سامي يرجع تاني لانه زعل مننا جامد بسبب كلمات البعض قالها بدون دراية و ادراك و مسؤولية في موضوع (قلم بلا حبر)
اذا كنا بنقول اخوة و وطن واحد فالي قاله البعض في الموضوع بيوضح اد ايه احنا شعب بيشتغل نفسه و بياع كلام
انت لا لصالح دينك و لا لصالح وطنك انك تقولكلام تنفر بيه غيرك و خاصة لما يبقى غيرك دا شريكك في الوطن
بس دا الي اقدر اقوله . و اتمنى يكون في وقفة قوية من الاعضاء لصالحه , الراجل دا مش شوفنا منه غير كل خير


وبكدا بتنتهى حلقتنا النهاردة

انتظرونى وحلقة جديدة

وضيف جديد

تحياتى