[Mind language]

السلام عليكم ورحمة الله وبركاته اولا صلوا بينا كدا على اللى هيشفع فينا وفيكم يوم القيامه باذن الله دا لو كان لينا نصيب بأذن الله يكون لينا قولوا انتوا بس يارب . ثانيا الموضوع باين من عنوانه كل ماعليكم فعله هو سرد يوم العيد يبدأ أزاى من اول ساعه فيك لحد اخر ساعه فيه تمام معايا انتم مركزين . ثالثا هبدأ أنا احكيلكم يومى بيبدأ أزاى اولا فى ليلة اليوم دا مبيكونش اساسا فيه نوم يعنى بيكون ساعه او اتنين قبل الفجر بعد كدا اول ما الفجر بيأذن وتبدأ التكبيرات تملا المساجد بقوم اقول كل سنه وانتوا طيبين لكل اللى فى البيت اول ما يصحوا دا اذا كانوا ناموا اصلا من صوتى ودوشتى اللى طول الليل بعملها تمام بعد كدا فية فى البلد ساحه كبيره طول السنه عباره عن ملعب واول ما بيقرب العيد طبعا معروف فى اى مكان ان كل بلد عباره عن عائلات وكل عائله فى الصعيد ليها جامع ودوار خاص بيها تمام كله بيسيب مساجده وبيتجمع للصلاه فى الساحه دى الساحه طبعا فى الشارع يعنى لو انا فى البلكونه ببص هشوفهم هما كلهم وهما بيصلوا بيبقى منظر الله اكبر عليه بقف اتفرج شويه وبعد كدا بدخل اصلى بعد ما اصلى اروح انام نصف ساعه ساعه على ما والدى واخواتى يرجعوا من الصلاه بعد ما بيرجعوا من الصلاه عيد لحمه طبعا بنفطر كلنا مع بعض فته وكفته ولحمه وحاجه كدا زى الفطير بنعملها بيتاكل بيها كل الحاجات دى دا غير الخضار اللى بيكون مطبوخ معاهم المهم بعد كدا بنقعد نستنى الضيوف اللى هتيجى تعيد علينا زى خاللى ومراته وبناته اللى هما اصغر عنى ومتربيه معاهم بنقعد انا وهما نشترى حاجات ونكولها نهزر ونضحك لحد الليل نتريق بصراحه الواحد بيلاقى نفسه مع البنتين دول اصلى بعيد عنكم انا اللى مربيهاهم على ايدى وزى ابن خالتى بيجى يعيد على والدتى زى شباب العيله بيلفوا على كل بيت يقعدوا فيه شويه اخويا بيكون معاهم فى اخر اليوم بيجبهم معاه يعيدوا على والدتى وبيتم تقديم شاى وشيكولاته وفول سودانى اكأنهم قرود هههههههه وترمس ويعقدوا بقى ياكلوا ياكلوا لحد ما يشبعوا بعد كدا يشربوا عصير ممكن او ساعات انا بستسهل وبديهم ميه هههههه بعد كدا بنتجمع تانى على الغداء كلنا تقريبا نفس الفطار مش بيزيد عليه غير انى ممكن يكون فيه نوعين من اللحمه بالليل بقى يدخل علينا خاللى التانى بس هو لوحده ويقعد نفس قعدت الشباب ويمشى بس مفيش فول علشان محدش يفهمنى غلط بعد كدا بتدخل اختى واولادها على وعمر وجوزها بعديهم بيدخل السنه دى بقى زاد ضيف جديد وهو جوز اختى التانيه هو كمان هيشرفنا بالليل بنقعد نضحك ونحكى وكل اتنين يمسكوا ودان بعض وهاتك يارغى لحد ما كله يمشى بنرجع نتجمع تانى على العشاء كلنا المره دى ممكن نعشى العريس الجديد واختى علشان عرسان جداد وكدا يعنى المهم بعد كدا كله بيمشى ماعدا اخويا هو ومراته وابنه اياد بيفضوا بايتين معانا لليوم التانى باخد انا اياد والعب معاه لحد ما ينام ولو انه يجى العيد وبينام ويصحى بدرى عيند بقى اما لو يوم عادى بيفضل سهران ل2و3 بالليل على ما ينام اطفال ايه دى ياربى بعد كدا بعد ما بلعب مع اياد بتفرج معاهم على التلفزيون يمكن حاجه تعجبنى زى مثلا مسرحية العيال كبرت الواد سيد الشغال مرسى عايز كرسى وهكذا بعد اليوم الطويل دا كله بكون فصلت شحن وبطاريه وكل حاجه بدخل انام واصحى تانى يوم خلص العيد بقى ارجع اذاكر من تانى وارجع لليوم العادى بتاع الدراسه لانى بعد الاجازة باسبوع ولا اتنين فيه امتحانات بتكون علشان اعمال السنه على كل مادة وكدا ساعتها بقى بيكون كل الضيوف مشيوا ورجع البيت للهدوء والسكينه اللى كان عليه من الاول وبس دا كان يومى يومك انتوا بقى عامل ازاى مطلوب من كل واحد يدخل يحكى عن يوم العيد بتاعه تمام ياجدعان يللا كل سنه وانتم طيبين وبصحه وسلام جميعا ويارب عيد سعيد على كل الامة الاسلامية فى كل مكان فى العالم .