[ARAGON]

وفي يوم الاحد اللى هو النهاردة يعنى
ركب مشجع زملكاوي الميكروباص واثناء جلوس المشجع الزملكاوي داخل الميكروباص وجد بجواره مشجعًا أهلاويًا يحمل علم النادي الأهلي فأصبح علم زمالك بجوار علم أهلي وبعد سلامات بين المشجعين سأل الزملكاوي الأهلاوي سوالآ مباشراً أنت رايح الاستاد عشان تشوف الماتش.




الأهلاوي: آه طبعاً أمال شايل العلم عشان أقف بيه في شارع جامعة الدول بعد ما نكسب الزمالك.

الزملكاوي: ياعم بالراحة هو انتو خلاص ضامنين المكسب قوي.. دي الكوره مالهاش كبير علي فكرة أنا برضه رايح الاستاد أيه رأيك نروح الاستاد مع بعض.

الأهلاوي: قاله الله هو انت!!!!!!!!!!!!!!!! انت مش فاكرني ولا ايه.

الزملكاوي: بصراحة لا مش واخد بالى!!!!! اصل الهزايم اللى احنا شوفناها المرة الاخيرة خلت الواحد مش شايف حتى قدام رجله.

الأهلاوي: انا اللى كنت مقابلك المرة اللى فاتت قبل مايأجلوا الماتش.

الزملكاوي: اه هو انت تصدق انك كنت على بالى.

الأهلاوي: خير ان شاء الله.

الزملكاوي:خير انا كنت عايز اعزيك على كاس العالم انتم شربتوه.

الأهلاوي: اه يأخى شوفت اللى حصل بس هانعمل ايه دا نصيبنا بس انتم شربتو من كاس صغير اللى هو كاس مصر انا عارف ان طعمه كان حلو هههههههه.

الزملكاوي:احنا مش عارفين الناس اللى ماسكين النادي هايعملوا في الجماهير ايه تانى ولا اللاعيبة ولا ايه ولا ايه.

الأهلاوي: بس انت ايه رأيك في اللى حصل في ماتش الاسماعيلى الاخير.

الزملكاوي:طبعا دا مش كلام اللى حصل ده.


الأهلاوي: اه طبعا بس ربنا يسترها النهاردة وماحدش يحدف طوبة ولا ازازة ولاكرسي بصراحة لو الكراسي بتاع استاد القاهرة اتشالت النهاردة هاسبقى كويس عشان الناس اللى تدخل ماتلاقيش كرسي نظيف تقعد عليه.

الزملكاوي: عندك حق هو كده كده الواحد بيبقى واقف على اعصابه .طول الماتش مالهاش لازمة الكراسي.

الأهلاوي: وأحسن برده عشان مافيش كراسي تتكسر.

الزملكاوي:هههههههههههههههههههه.

الأهلاوي: بس ان شاء الله ربنا يعدي الامور على خير.

الزملكاوي: ان شاء الله تعدي على خير.

الأهلاوي: بس انت تتوقع مين اللى يكسب النهاردة.

الزملكاوي: ان شاء الله اللي يلعب احسن هو اللى يفوز.

الأهلاوي: ان شاء الله.

الزملكاوي:بس ياريت مايكونش في تعصب في الماتش.


الأهلاوي: ان شاء الله واللى يكسب يكسب هي الحكاية كلها 3 نقط

الزملكاوي: عندك حق بس ياريت كل الناس تفهم كده .

الأهلاوي: ربنا يسترها النهاردة وان شاء الله نتقابل بعد الماتش لو ربنا سهل أو كان مكتوب لينا اننا نتقابل تاني

الزملكاوي: ان شاء الله .

الأهلاوي: سلام عليكم .

الزملكاوي: وعليكم السلام ورحمة الله وبركاته.

يتبع