حوار حلو يا سامي مع شخص محترم
مش هزيد على كلام حنون ,,بس الي عايزك تفهمه يا استاذ خالد ان الامور بيحصلها تطورات في الخاص
زي الخزرجي ,,دا كان كاتب كلام في توقيعه بيقول فيه (نحن تجار دين) و طلبت منه يشيل حاجه زي كدا لاني شايف فيها نوع من ازدراء الاديان و الاساء للجماعة و قبلها للدين
في فرق لما تتكلم عن موضوع و تذم فيه الزنى و بين انك تكتب و تقول : زاني و افتخر
تقدر تسيب الذم في الصفة المذمومة لكن ماتقدرش تسيب المدح في صفة مذمومة
و لو تلاحظ هتلاقيني عمري ما تعرضت لتوقيع بسبب انه بيهاجم شخصية سياسية , و لكن انها توصل لمرحلة نحن تجار دين و بيقولها بفخر زي ما في بعض الشيوخ وصلوا لمرحلة انه عادي يستخدم المسجد للدعايا السياسية لصالح فصيل و عادي نشتم ماهو الرسول كان بيشتم !
دا انا بسميه التطور الطبيعي للانفلات التعصبي
المهم اني راسلته يحذفها و شرحتله يعني ايه تجار دين لدرجة اني هزرت معاه و قولتله خد راي خالد و بضحك ,,الا ان جوابه كان : لو خالد قالي شيلها هشيلها لو قالي مش اشيلها هسيبها
فرديت عليه بكل صراحة و قولتله: صدق الي قال عليكم خرفان ههههههه , رد عليه و قالي انت الي خروف
لحاد دلوقتي مافيش مشاكل , قولتله الفرق بين الخروف و بين الانسان الي ربنا كرمه بالعقل , مش سمع و لا انصت ,,في النهاية قولتله كدا هتخليني اطبق عليك حد ازدراء الاديان
عاند برضو و دا خلاني اضطر اديله حظر
و دا كل الموقف بدون نقص او زيادة و تقدر تسأله
بالنسبة لبودي , فانا بعد ما حذفت الموضوع الي شوفته بوجهة نظري لا يجوز القياس على السب و القذف لشرف و عرض باي خلاف سياسي اخر
يعني انا لما اقول رئيس فاشل او رئيس مش ذكي , هنا المقصد في سياسته للامور لكن مافيش فيها اهانة لشرفه و عرضه ,, و اديك شايف الازمه الاقتصادية الي وصلنالها ,,السياحة شبه منهاره بعد ان كانت تعافت بشكل كويس ,,غير انقسام المجتمع و القضاء و وصلنا لمرحلة عدم احترام احكام القضاء و حشد الانصار و دا واضح انه هيستمر مستقبلا ضد اي حد عليه حكم او القضاء بينظر في امر خلاف ارتكبه,,و دي مصيبه كبيره ما اقدرش اغفلها و ما اقدرش اعديها للرئيس لانه الي بدأ حاجه زي كدا
دا كلو نتيجة القرارات الغير مدروسة ,,و الله اعلم احنا رايحين على فين لان واضح ان الامور مش صفت لسه و هيكون في تخبط خاصة مع قرب ذكرى الثورة
لو تلاحظ كلامي عن الرئيس في اي استضافة قبل الاحداث سواء انا او قلم بلا حبر الي كتب موضوع بعنوان (فوقوا) و كان بيلوم فيه الطرفين بل انه شد مع ضياء على الفيس بسبب هجومه بدون مبرر على مرسي , و انا كنت دايما بقول الحمل تقيل و البلد ادارتها صعبة و كل دا انا مقدره تماما و كنت ضد محاسبته بعد 100 يوم
لكن الاجراء الي تم كسر هشاشة العلاقة الي كانت بتجمع مرسي مع كافة اطياف الشعب للاسف بطريقة انا وصفتها بالغبية , كموقف سياسي مش كشخص
العجلة تدور يا خالد بالتوافق مش بالدستور ,,الدستور و الحبر الي عالورق دا عمره ما يعمل حاجه
لكن التوافق و احترام مؤسسات الدولة هو الي يدور العجله
لو قاعدت بدون دستور لسنة ادام مش هيحصل حاجه طالما في توافق وطني و حالة من الرضا مقبولة , و دا كان ملموس قبل الاعلان الدستوري
اما الي انا شايفه دلوقتي فهو ان ابسط حاجه تحصل بتلاقي شباب نازلين بعبارة : يسقط حكم المرشد
زي ا كان بيحصل ايام العسكر ,,بس الفارق ان العسكر كنا عارفين انهم بيحكموا كام شهر و ماشيين لكن الرئيس قاعد ل4 سنين ,,يعني لو استمر الوضع كدا هتبقى كارثه
و دا كلو بيوضح ان العلاقة الهشة الي كانت بتربطهم بالرئيس انهارت , و دا انعكس بالسلب على الدولة ككل و اوصلتنا للمرحلة الي احنا فيها دلوقتي
الي احنا فيه دلوقتي عمرنا ما هنقدر نسميه استقرار ,,دا انهيار اقتصادي
مين المسؤول عنه ؟ الرئيس الي المفروض يدرس ابعاد خطواته كويس قبل اي اجراء
و بالمناسبة و استكمالا لموضوع بودي ,, بودي انا كلمته تليفون امبارح تقريبا ساعتين , انا عملت المبادرة لنزع فتيل الازمة الي حصلت , برغم اني مش مجبر اعمل كدا و ممكن كنت اكمل عادي لكن ضميري مش هيريحني ,,لأننا كلنا وصلنا لمرحلة من التعصب مش طبيعية و انا اولكم
و كان كل طلبي في الموضوع بتاع المبادرة ان اي حد حصل فيه اجراء يبعتلي على الخاص عشان اقدر اتراسل معاه و اصاحبه و نصفي كل الي بينا بشكل حقيقي ,,و دا الي حصل مع بودي امبارح
و عموما بعتذرلك على ردي الي حصل في الشكوى الي كنت ارسلتها و قولتلك فيها ان مرسي لو استمر في اعلانه الدستوري فدا خطر عليكم و اظن اني حذفت ردي دا و بعتلك بعدها مش تزعل و كدا
و عامة أنا مهما اتكلمت فمش هاجي جنب اخلاقك حاجه
الي ممكن تاخده مني هو الفكر و الجوهر مش اكتر
لو هعتبر اني اب اسرة (كتعبير مجازي) فمافيش اب مش بيجي عليه فترة و بيعصب على ابناءه و ممكن يتهور في عقابهم , المهم بعدها هو ان الاب مش كان بيعاقب عشان يعاقب بقدر ماهو كان عنده فكره و جوهر و تقويم اخلاقي و فلت منه التعبير شوية في العصبية و ردة الفعل
نورت يا خالد
و ربنا يصلح الاحوال