اسف علي الازعاج
اسف علي الدوشه
اسف عشان محتاج
ليكو ف وقت شده
اسف لذله لساني
وقولي اني مجروح
وللدنيا اللي دبحاني
اسف للحظه بوح
واسف علشان نسيت
وبينتلكوا تكشيرتي
واسف لو كنت جيت
عليكوا بــ مشكلتي
معلش انا اصلي كئيب
وبحب اعيش فـ الدور
واعمل دور الحبيب
وقال ايه عامل مكسور
بس الجراح مش عيب
وانا جرحي ده مش زور
والحزن برضو نصيب
ومستني وواقف فـ الدور
ما هو انتي برضو السبب
انتي اللي بتعاندي
ومورياني العجب
في كل حاجه عندي
من يوم ما قلبي اتولد
وانا الحزن هنا جمبي
لا راضي يوم يبتعد
ولا عايز يحايدني
وبعدين ما انا ليا حبيب
سابلي المكان مهجور
وسابني للتعذيب
يحكيني بين السطور
فمعلش ع الفضفضه
شيلتكوا همي
بس الدمعه قريبه
ونزلت غصب عني
وبين ده وده
قلبي مهاودني
وبيقوللي مستحملك
يمكن تفرحني
مع اني نفسي اقتلك
علشان تريحني
معلش يا قلبي
لكن ده مش تمثيل
وانت اللي حاسس بي
وعارف ان الجرح تقيل
وفـ اخر المطاف
هيقولوا بطل كدب
وكل اللي شاف
هيستستهل الصعب
ويقولوا يا هياص
ما كفايه بطل ندب
وهقتنع وخلاص
وهعترف بالذنب
وهقول ده كانوا بيتين
شعوري بريئ منهم
اسف علي التلحين
معنتش هكتبهم
فــ اسف انا مرتاح
انا بس بستعبط
ولا فيا اي جراح
ومن الفرحه بتنطط