كلنا مصريين ليه بقينا كده ناسين
ليه نغمه الفرقا سادت بينا وبقينا نسئل انت مين ولا انت مين
ميسحين و مسلمين مع بعض متربين
كل الفرق بينا انا بصلى فين وانت فين
وفى الاخر الاتنين بيوت ربنا متسمين
كنا زمان فى الحروب دم المسيحى والمسلم على الارض مع بعض بيدوب
دلوقتى بقينا نسئل نقول كل سنه وانتو طيبين لبعض ولا كفايه السلام يدوب
معانى جميله تاهت وسط التعصب والبغضه ماتت
ياريت نقدر نرجع روح المحبه اللى فى السنين اللى فاتت
منساش ابدا طنط سميه وهى فى عيدنا نازله تعيد عليا
ولا فى عيد القيامه لما عم الحج سيد يستنى يوم الجمعه العظيمه شوربه الفول النابت وطبق الطعميه
ولا هنسى ابدا رمضان وانوارو ورحو الجميله ديه
وانا قاعده مستنيه المدفع يضرب وصحبتى بعد مانفطر ترن عليا
اكلتى خلاص يالى مكنتيش اصلا صايمه ونضحك عليها وعليا
ولا جارتنا اسماء كانت فى سنى لما كنا نقعد سوا نذاكر ومامتها تاخد بالها منها ومنى
ايام كانت جميله لما بتفكرها دلوقتى دموع عيونى تنزل غصب عنى
مصر مش هتكون ابدا زى السودان وكل فئه فينا تعيش فى مكان
ولا هنكون تانى عراق مسحينها سبوها وقبلو بالغربه والطغيان
مصر كانت وهتكون بلد الامن والامان للغنى وللغلبان
للمسلم وللمسيحى كمان علشان مذكوره فى الانجيل ومذكوره فى والقرآن
كلمه اخيره هقولها لو فضلنا كده بعض مش طايقين مصر هتضيع منناا ونبقى كلنا خسرانين .
يمكن الخاطره مش مترتبه بس مهمه جدا عندى علشان
فيها ذكريات مش هنكر انى نسيتها احيانا بس بعد الاحداث اللى مرينا بيها
افتكرتها وحسيت حقيقى انى مفقتده مصر اللى كبرت فيها
اللى المحبه كانت لغه ناسها
ربنا يحافظ على بلدنا
ربنا يحافظ على مصرنا