معلش ياختى يامصريه اختى يا مصريه يا ام الاراده القويه
انتى مش غبيه بس برده هي هي
لا عدل ولا حريه ولا كرامه انسانيه
ولا ثورة فيها كرامه ولا عداله اجتماعيه
وان موتي فيها موتــي مانتى مالكيش ديــه !
وطيرى يا حمامه طيرى دانتى مالكيش غــيه
طالبتى بلقمه عيش موتي من جوعك
وموتي فيها موت فا رضيوا بخضوعك
ومهما تصرخى فيها صوتك ماهوش مسموع
تموتى وايه يعنى ماهو موتك بقى مشروع
وان عيشتى برده عادى عيشى بقلب موجوع
صوتك بقى عوره وحسك بقى ممنوع
ولما حسيتي بتغيير عن زمن مخلوع
جابوا اللى يمرمطوكى واجرهم مدفوع
بس انتى اللى يوم اختارتى والحجه شرعيه
والموت فيكي بقى عادى ومالوش ديه
دا معنى جديد للحريه ودا الطريق للديمقراطيه !
ناديتي بكرامتك ما صابك الا السحل
وطالبتى بعداله ما لقيتي فيها عدل
وطالبتى بحقوقك قابلوكى بكل جهل
وقولتى ديمقراطيه طلعلك قانون بالعزل
وانهارده بيسحلوكى .. وبيهددوكى وح يدبحوكى
وان طالوا فى يوم يسموكى .. ح يسموكى معلش ياختى يا مصريه ..
اصل احنا مش رجــاله
وبقينا فى حاله غير الحاله
واتبدلت عزتنا لخسـه ونداله
وبقت نخوتنا خيبه وسـاله
وادى اخرتنا فقر وجهاله
وبلد لا فيها قضاء ولا عداله وان كان فيها حريه .. حريه بس مياله !
|