ظلموك يامبارك ولا زوجتك ظلمت
وقيامة الدنيا قامت والثوره جت واتعملت
شعب الفراعنه للاسف متغير
وكل يوم بحال يا احوال كده اتغشت
ظلموك وبضحك انا من سوء حياتنا اكيد
قبل كده هنوك والكل كان بيزيد
وياما كرمومك والكل راضي سعيد
دلوقتي حكموا عليك والمحكمه اهي تمت
ياشعب مصر لله بقولها فين بئا المبدء
مره تحب وتكره وترجع تعود تعشق
ياشعبنا الغلبان مع هموموا
حياتنا بالشكل دا والله اهه تعبت
عايزين يعيدوا العسكر يحكمنا من تاني
الله عليك ياشعب مبدع صحيح جاني
فنان في كل البدع ياشعب ياتايه
والله حالتي معاك والله اتخنقت
ياشعبنا المسكين في تفكيروا
تمشوا على السكاكين كده تسيروا
مره تظاهر واعتصام شغال
والحفله منصوبه وجماعه اهه حكمت
معنى كلامي مش عطف على المخلوع
او بطلب العفو منوا او يكون له رجوع
انا بس ببكي على حالنا واحوالنا
بقت الحياه مضحكه مبكيه وملت
جات الجماعه تقول : نحكم بشرع الله
جات الجماعه تقول : الحق راح نلقاه
جات الجماعه تقول : مرسي لوجه الله
والجيش مع الاخوان والصفقه اهه ( تمت )
ياشعبنا الموجوع في توهانوا
مش لاقي غير الجوع وغليانوا
هانت علينا الحياه الحق تاه منا
بقت الامور مضحكه جدا واهي ختمت
شهداء ورا شهداء طرف تالت
احوال ومتلخبطه وامور اهه عادت
الشر لاح بالجراح على شعبنا المسكين
عصبة فساد الشر متجمعه انتشرت
طنطاوي باع البلد علشان ما يتحاكم
نصبوا محاكم هزيله وعليله يا محاكم
بقى شعبنا في الالم ضايع كده وهايم
بقى شعبنا وكلنا في التوهه اهه غمرت
ياشعب مش عارف مصير وقرار
الكل بقوا في الكفاح والكل بقوا ثوار
الكل متفلسفين في سياسه مغلوطه
وكلمة الحق ماتت مننا وهربت
ياشعب عايز ايه ما تتكلم
ياشعب صوتك فين / متلجم
ياشعب عاش مخدوع ومتندم
حرام عليكم مصر مننا تعبت
اكتب وكتاباتي بوجع الهموم صرخات
وحزينه يا كلمة الحق ضايعه مع الاموات
وحزينه يا ثوره راحت لهفوها الملاعين
تورته ومتقسمه لجماعه اتفقت
بكتب ويمكن ف يوم حد يسمعني
حال البلاد اتكسر والحزن يوجعني
دي مصر ما تستحق الاسى منا
دي مصر متكرمه ومن ربنا اتحفظت
يوميات مواطن قرفان