[نجم وزهره ومسافات فراق]

وصلنا لحال الغرابه ياهوه
وعقلي هيهرب تعالوا الحقوه
بلادنا الجميله كده كل ليله
خيالها بيمشي امتى تجيبوه


بلادي الحزينه الشريده كتير
يا احوالها شعارها الم ليه مرير
هنكسر لقله ونكسر لزير
وعدل وعداله خلاص ودعوه


بلادي بتبكي على حال هزيل
تنوح تلوح صباح ويا ليل
وحلم الحيارى كده بات هزيل
بتوع الجماعه ياعيني خدوه

بتوع الجماعه خدوا الحلم منا
باعونا رمونا ياعيني ياحالنا
باعوا محمد وبطرس وميرنا
باعوا الشعار اللي ياما قالوه

بتوع الجماعه خدونا بسرعه
ياعيني عليهم كفاءه واوعى
دي نهضتهم مباركه وباتعه
وليهم سر خصوصي لقوه

بتوع الجماعه اللي كانت خطر
خلاص النهارده رفعوا الحظر
مصيرنا همومنا جراحنا وقهر
وتوهه وحيره ومكر التقوه

بتوع الجماعه وحطه يابطه
تلاقي المصالح نايمه في الف شنطه
تروح للرصيف تلاقي المحطه
اونطه وورطه وشر ابدعوه

بتوع الجماعه يا عالم عقده
سرقوا بلادنا واحده وواحده
قوموا سلموا لي عليها النهضه
شعار ابن هرمه وهم فكروه

بتوع الجماعه ياعيني مشايخ
وانا وحدي ضايع وانا بجد دايخ
بتضرب ف نار تفرقع شمارخ
وحالي اللي بايخ ولا بيرحموه

بتوع الجماعه بكل الحداقه
وكل البراعه وكل الرواقه
خلاص قرروها
خلاص حددوها
وبكره تلاقوها
مبارك .. براءه